_ويا أنا يا عِيلة الوكيل و الزمن طويل!
-إيه هتوديهم في داهية يعني؟
_أقل حاجة هعملها معاهُم!
-عِيلة الوكيل دا اللي هي عيلتك انتِ!
_دي عيلة نكدية وكارهة لمَن يكون ذاته ف الزمن دا
-يا ماما فوقي بقا إنتِ بتتكلمي على البلوة اللي أنا وانتِ منها
وقفت "وسام" وهي بتبصلُه وبتضيق عينيها اللي كُل واحدة فيهُم ليها لون مُختلف ما بين الأخضر والعَسلي،
وبعدين قالت:
_أهو أنت قولتها بلوة، بقا أنا جِدك يقولي يا غلطة العِيلة؟
طيب مش مكملة تعليم خالص بقا!
-قالك يا غلطة العيلة؟
_إيه هكدب أنا!
-لأ، لكن هو صَدق!
_طب يلا قوم من هنا بقا يلا.
-أستني طيب نعرف قالك كدا ليه!
_عشان أنا الأنثى الوحيدة فيكُم، ومدخلتش شُرطة
زي باقي العيلة اللي مشفُتش في هبلهم دي!
-يا جِدو تعالَ شوف "وسام" مُعترضة على إيه.
_حبيبقلبي يا بوب، ولا في أي إعتراضات!
.........
_ما تتكسر بقى دا أنت برطمان أغبى من عيلة الوكيل!
-ودي حقيقة فعلًا، والدليل عليها أنتِ أهم عُنصر غبي فينا.
_هه، دا أنتوا تحمدوا ربنا على الفنانة رهيفة المشاعر وذات الأصابع السحرية اللي عندكُم في العيلة دي.
-فنانة ورهيفة المشاعر؟
_أوماال
-في جُملة واحدة كدا!
_عندك شَك في كِدا؟
-أبدًا، قولتيلي أنتِ في كُلية إيه؟
_مقولتلكش أنا
-وسام!
_إيه يا ابن عِيلة الوكيل!
-إنتِ ليه محسساني إنهُم واكلين حقك في الميراث!
_لأ يخويا دول كلهم مستوليين على البيت أكمني مفيش أنثى معايا تنصرني.
-ليه وانتِ من أمتى واحنا بنعتبرك أنثى؟
_لأ حقيقي ظريف خالص، تُقل دمك استفزني بجد.
_عِيلة الوكيل كُلها كِدا!
.......
_ونظرًا لأن جِدو كان راجل وسيم
وشوجر دادي في نفسه كدا
إتجوز أربع مرّات، مش بقولكُم شوجر دادي!
مع أنه تاني جوازة كانت مُمرضة وضحكت عليه
وأقلبتُه في مبلغ وقدره، لكن محرمش!
-عندُه أمل في بكرة دايمًا الراجل دا.
_زي حفيده حسونة كِدا
-إيه فنانة، ما تتلمي! حسونة اي دي!
_المُهم، بقى عندُه أربع رجالة أد الدنيا،
أعمامي وبابا يعني.
-عمي، آه كان الله في عونه بجد،
مخلفش غيرك لكن بينا احنا الاتناشر كُلنا
_حبايبي أعمامي
قام كُل واحد فيهم جايب أربع تيران!
ومش صُدفة لأ.
-وأنا طبعًا بيهم كُلهم عند "وِسام"
عدل لياقة القميص الزيتي بتاعُه بغرور.
_لأ طبعًا، أنا فنانة العيلة الميتة دي
-يا فنانة دا انتِ جايبة مُلحق في أول سنة ليكِ ف الكُلية!
_تصدق إنك أكتر واحد غِتت في العيلة دي!
-حاسبي بس عشان أنا اللي بداري على مصايبك.
_أنت بتعايرني؟ ما تقول انك بتوكلني منابك كمان!
-دا على أساس إنك مش بتعمليها!
_تؤ.
-وِسام.. بقولك إيه.
_مش مسترحيالك لأ.
-تعالي ننزل البلد ونقنع جِدك واعمل فيكِ معروف واتجوزك.
_ليه حد قالك انك بتتبرع لجمعية خيرية؟
-ما هو محدش هيستحملك زي حسن حبيبك.
_ومين قالك اني بطيقك أصلًا
-ما علينا دا شعور متبادل كدا كدا.
-أصلًا؟
-أصلًا!
_لأ أنا عُمري ما وافق أتجوز في عِيلة الوكيل أبدًا!
وقومت شوحة بإيدي كدهو!
_يا بابا فهّم ماما معلِش إني عندي تدريب سباحة مش وقت الفَن بتاعها دا خالص!
-معلش يا حبيبي سيبها تعيش الدور
_خليك انت كدا علطول متقدرش الفنانة اللي معاكُم في العيلة دي يا "حسن".
-أنا قولتلك يا أصغر فرد في عيلة الوكيل وأعقلهم سيبها تعيش الدور!
"مَن عاب على شيئٍ ابتلي بِه، وأنا ابتليت بعِيلة الوكيل كُلها."♡
____
#حَواديت_عِيلة_الوَكيل
أنت تقرأ
حواديت عائلة الوكيل
General Fictionالعائلةُ التي تملُك مقاليدَ الحُبِّ، والمحاولات من أجلِ بعضهِم، الإثنا عشر رجلًا، والفتاة التي تُكمل تِلك العائلة، تَجدهُم مليئين بالحماسِ، كُلُّ يومٍ لَهم مُغامرة جديدة، تختلف إختلافًا كُليًا عن باقي الأفرادِ، كُلُّ يومٍ يسعون كي يتركوا في قلوبِ ال...
