TASTY

• إشارات •

طلقات الميكة و حطات يديها بجوج على فمها حابسة الغوتة فحلقها ماتخرجش .. تراجعات بالزربة اللور و عينيها واسعين كتنهج .. رجليها فشلو و قلبها كتحس بيه كيضرب بقوتو كلللها و كيضرها فصدرها .. عقلها لثواني ولا بحال شي صفحة بيضاء تماما و خاوية .. بحالا ضربها الضو و حسات بالصعقة ديالو و جسمها رعش بالجهد .. جسمها تشوك و حتى شعرها فراسها وقف ..

راكيل: ل..ا .. لا .. ( كتحرك راسها بلا ) لا ..

ماقدراتش تتيق .. و مابغاتش تتيق .. رجعات بشوية للفريكو كتسمع دقات قلبها فودنيها مجهدين .. وقفات حداه كتطل عليه من لفوق و أنفاسها كيتجهدو حتى هوما تدريجيا .. مدات يدها لي كترعش و هزات ميكة أخرى .. و شهقات ملي كتبان ليها يد !! عضات شفتها التحتانية و لاحتها .. بقات كتحقق كيبانو ليها أعضاء آخرين .. ميكات كيبانو عاديين و آخرين كيبان منهم بلي أعضاء بشرية !

العرق برد على جسمها و بدات كترعش .. شدات على راسها كتضور فبلاصتها .. الأفكار تزاحمو فراسها و حتى الاحتمالات .. كتحس بركابيها فااشلين بزز باش هازينها و حلقها نشف .. و توسعو عينيها بالجهد ملي تفكرات العشا .. اللحم الغريب لي كلات !!! فكرة مرعبة مروووعة عصفات برااسها .. و طاحت على ركابيها قدام لاشاس كتتقيا ..

كتفكر بلي كلات لحم البشر ! بلي هادشي علاش كان ماشي طبيعي و حسات بيه جديد عليها .. هي هاد الوقت كلو كانت مع كانـ. يبال ڨتال ! فدارو ! هضرات معاه جلسات معاه نعسات معاه و كلات معاه !! نفس اللحم لي فالفريكو !!

تقيات داكشي لي فجوفها كاااامل حتى مابقاتش قادرة و سخفات .. هزات راسها كتحركو بلا .. وجهها صفار .. يديها كيترعدو و عينيها كيرعشو .. كتنطق بصوت هامس و خايف و مصدوم ..

راكيل: لا .. مايمكنش .. أنا كنحلم .. كنتوهم ..

صرفقات راسها بالجهد حتى دمعو عينيها بالحريق باش توعا .. تفكرات ملي قال ليها ( غاناكلك ) و بدات كتكحب بالجهد .. كتنهج .. كتزييد ترعش .. بزز باش وقفات .. حلات الما فلاڤابو كتغسل وجهها بالجهد .. كتفكر بلي خاصها تتجاوز الصدمة باش تعرف تفكر .. و ملي هزات راسها حبسات الغسيل .. عينيها جاو على الريدو لي وراها .. بيض و ضاير بشي حاجة توقعات أنها البانيو .. المثير للانتباه و لي خلاها تحبس هو قطرات حمرين صغار فالجنب ديالو !

ضارت كلها تقابلات معاه .. بلعات ريقها بصعوبة كبييرة .. عارفة بلي ماخاصهاش تقرب .. عارفة بلي يمكن إيلا حيدات الريدو غاتشوف شي حاجة ماباغاش تشوفها و ماغاديش تقدر عليها .. و لكن هي مشات ليه و شداتو و بالزربة دوزاتو للجنب .. و كان قلبها غايحبس من المنظر !

كان عامر .. ماء أحمر غاااامق .. ريحتو بحال ريحة الصدأ خلاتها تخسر ملامحها .. أي واحد فبلاصتها كان إما غايطيح فاقد الوعي ولا يهرب يبعد من داكشي .. و لكن هي .. واخا ميـ. ـتة بالخوف .. واخا باغية تهرب .. لقات راسها كتجلس حداه على ركابيها .. مدات يدها بشوية باش تخشيها فيه .. و لكن ترددات .. مرة و جوج و ثلاثة ...