TASTY

التسعود ديال الليل .. كيبان الحال مظلم برا من الشراجم لي مسدودين .. الثرية و أضواء الدار كلهم شاعلين .. صوت أغنية إيطالية هادئة و قديمة جاي من التورن ديسك .. و صوت أزيز اللحم لي محطوط على المقلة .. ريحتو عاطية فالجو كتخلي الريق يسيل .. واقف عليه كاسيو فالكوزينة بسروال رياضي كحل و مالابس والو لفوق .. صدرو الأسمر الصلب كان معـ..ري و عضلاتو مستفين .. و فاصمة مغطية جهة الطعـ.نة لي دارت ليه راكيل .. و شعرو مخربق هابط على جبهتو بدا كينشف من الدوش ..

قدامو على الفورنو جوج مقلات كل وحدة فيها ستيك كيطيب مع الزبدة و الثومة و اليازير .. كيتحرك تماك بهدوء و كالم .. مسيطر على الوضع كيف العادة و مسترخي ..

جبد جوج طباسل بيضين حطهم على الكونطوار .. طفا الفورنو على المقالي .. طفا الفران و جبد طاوة فيها الخضرة متبلة كانت كتطيب فيه .. حط كلشي قدامو و بدا كيحول للطباسل .. كل ستيك فطبسيل و معاها الخضرة المحمرة و فوقهم لاصوص .. هز منديل بيض كيمسح أطراف الطباسل بكل اهتمام بحال شي شيف مهووس .. من بعد هزهم و مشا بيهم لجهة الطابلة ..

تماك كانت كتتسناه قرعة نبيذ إيطالي فاخر من النوع لي كيعجبو و جوج كيسان دالكريستال كيلمعو مع الضو .. حط طبسيل قدامو و طبسيل قدامها هي ..

راكيل ..
جالسة على الكرسي لي مقابل معاه .. شعرها الكحل مطلوق و فازگ .. لابسة غير تيشورت ديالو هو بيض .. كتشوف قدامها مباشرة .. وحدة من يديها كانت ملوية بالفاصمة حتى للمرفق ولابسة عليها بانضة .. الكدمات و الجروح فسيقانها و وجهها مزال مابراوش و كيبانو .. كتبان ساهية .. ثقيلة .. دايخة .. كترمش ببطئ شدييييد ..

جلس فبلاصتو مقابل معاها .. هز القرعة حلها و كب كاس حطو حداه .. من بعد كب الثاني و حطو حداها هي .. هز كاسو شرب منو .. هز الموس و الفورشيط و بدا كياكل ..

هدوء كبير كيڨتل .. برود .. و السكات .. كيتسمع غير صوت الموس و الفورشيط ملي كيقيسو الطبسيل ديالو و الموسيقى الهادئة و المنخفضة .. بينما هي مزال جامدة ماتحركاتش .. كيتحرك غير صدرها بشووووية ملي كتتنفس و عينيها ملي كترمش ..

كاسيو: ( نطق بشوية و هو كيشوف فالستيك لي قدامو و كيقطع منها ) البوليس جاو لبارح كيقلبو عليك نتي و صاحبتك ..

راكيل مادارت حتى ردة فعل غير كتشوف فيه ..

كاسيو: لقاوها هي .. فبلاصة بعييدة على هنا ..

دار قطعة اللحم ففمو من بعد رجع اللور حتى تلاقا ظهرو بالكرسي .. كيشوف فيها و كيمضغ .. عينيه فعينيها حتى بلع ..

كاسيو: بنادم .. يقدر يدير أي حاجة إيلا عطيتيه بزاف ديال الفلوس .. يقدر يڨتل معاك و على قبلك .. و يعاونك تخبي الجريمة و تفلت منها .. ( هز كاس النبيذ دارو ففمو يشرب منو ) كان خاصك تشوفي دانييل و هو كيهضر مع المحقق و كيقول ليه ما شفتهمش .. ( ابتسم بالجنب ) بحالا ماشي هو لي دفع صاحبتك من فوق هاداك الجرف و ڨتلها ..