TASTY

• مغامرة. •

• بــعــد خـمــسـة أيـام •

الحداش ديال الصباح و الشميسة فالسما وسط غيوم بيضين مفرقين .. فالموتيل .. ورا الكونطوار ديال الاستقبال كانت جالسة جيسيكا .. تيشورت واسع فالأزرق و سروال بيض قصير و عريض .. حداها على الكونطوار كانت فرفارة بيضا محطوطة خدامة و كتدور و الجو سخون .. حالا البيسي قدامها على واحد السيت ديال المجوهرات .. كتطلع فالباج و تشوف فيهم باهتمام ..
سمعات صوت شي طوموبيل بلاصات و هي تهز راسها كتشوف جهة الباب لي محلول .. هزات حاجبها و بدات كتتقاد فالجلسة ..

كانت الطوموبيل ديال الـ sheriff ديال أقرب ڤيلاج ليهم .. بيضاء و فيها الأسود و نجمة ذهبية كبيرة فالجناب .. بقات كتشوف حتى هبط الشريف من لقدام و هبطو معاه جوج رجال .. هو كان راجل خمسيني التجاعيد معمرين جبهتو .. بيض و وجهو حمر بالصهد .. باللبسة الرسمية القهوية و الشارة على صدرو .. و لاخرين كانو رجال ثلاثينيين بحوايج كاجوال .. واحد بجينز زرق و شوميز بيضاء و الثاني بسروال جينز و تيشورت رمادي لابس كاسكيط على راسو .. جا داخل و لكن لاخرين بقاو كيشوفو حولهم .. كانو النظرات ديالهم مركزين و حادين ..

جيسيكا: ( وقفات بابتسامة ) مستر جون صباح الخير !

جون: ( كان وصل عندها و ابتسم ليها ) صباح الخير جيسيكا .. اش خبارك ؟

جيسيكا: بحال ديما .. لاباس .. ( شيرات ليهم براسها ) شكون هاد الرجال لي جاو معاك ؟

جون: ( ضار شاف فيهم كانو داخلين ) البوليس ..

عاود جيسيكا هزات حاجبها و هوما وصلو عندهم .. مول الكاسكيط مد ليها يدو ..

- المحقق جورج كلارك .. ( جبد الشارة ديالو وراها ليها و أشار للراجل لي حداه ) و هادا المساعد ديالي برونو ..

جيسيكا: ( سلمات عليه حتى هو ) متشرفين .. فاش نقدر نعاونكم ؟

جورج: جينا كنقلبو على جوج بنات .. ( دار يدو فجيبو اللوراني دالسروال يجبد شي حاجة ) وحدة فيهم كانت مسافرة فهاد الطريق و يمكن تكون باتت هنا ..

جيسيكا حركات راسها بالإيجاب و هو حط قدامها تصاور لبنات لي جبد من جيبو .. راكيل و ليسا .. هزاتهم كتشوف فيهم و المحقق أشار لصورة راكيل فيدها ..

جورج: هادي هي لي كانت مسافرة فهاد الطريق ..

جيسيكا: إيمتا هادشي ؟

جورج: الخميس لي فات ..

جيسيكا: همم .. ( حطات التصاور و دفعاتهم لجهتو ) لا .. ماشفتهاش ..