في وحده من مؤسسات بوظبي عند البرنت واقفه ليلى تطبع اوراق للمدير ..وكل شوي توايج ربيعتها حصه تشوفها خلصت ولا لاء...ويوم ملت من زود ما تتريا سارت لها بنفسها...
حصه : عنبو شو تسوين هالكثر مب اوراق هاللي بتوصلينهن اللي يشوف تطبعين بطايق عرس.
ليلى وهي مبتسمه: وانتي شعليج ممكن افهم.؟
حصه: مليت وانا يالسه لروحي تعالي المكتب..
ليلى: بسج عاد عن الدلع بسير اوصلهن لنصوور وبرد..
حصه وهي مبتسمه: عشتوا..نصور بعد والله اللي يسمعج يقول اصغر عيال فريجكم..
ليلى: كيفي ادلعه انتي ليش محتره..
حصه: لا محتره ولا هم يحزنون بس تغمضيني لانج مقصه..
ليلى وتغير شكلها: ما قلنا بس من هالسالفه انا مب ياهل ولا تمين تسوين لي فيها الطيبه النصوح شوفي عمرج اول..
حصه مستغربه: ليلووه شو بلاج ..ليش انجلب حسج جي..ما قلت شي انا ارمس عن اللي الكل يشوفه..
ليلى وهي ترتب الاوراق وتدبسهن وشكلها معصبه على الاخر: خلاص فسري اللي تبينه على راحتج انا سايره يوم بخلص بييج..
وسارت ليلى عن حصه وطلعت فوق مكتب المدير الاول للقسم الاستاذ ناصر ..ودقت الباب ودخلت...
ليلى: السلام عليك استاذ.
ناصر رفع راسه مبتسم: هلا وغلا وعليكم السلام ويا هالاستاذ اللي قلنا نبطلها من زمان..
ليلى مبتسمه: وني مسويتنلك سالفه...
ناصر: مب مبين والله..
تضحك ليلى ويبتسم ناصر وتحط له الاوراق...
ليلى: لا تنزل تحت ولا شي انا خلصت كل الاوراق وباقي بس انك توقع وتسير البنك وتختمهن..
ناصر: الله يعطيج العافيه يا اخت ليلى..
ليلى: اسمع هذا شو يقول من متى انا اختك يالاخ...
ناصر:اقول سيري مكتبج بعدين يقولون المدير مسوي حق ليلى سالفه عشانها من اهلهم..
ليلى: يا حظي من درا فيك انت ولا درى اني من اهلك..
ناصر: جنه مب عايبنج..؟؟
ليلى وهي مبتسمه: هذا موضوع انتهينا منه ...الكبار حكموا علينا ما نكون من اسره وحده انت ليش مزعل عمرك...
ناصر ونش من مكانه: والله ما يخصني فيهم..انا عمري 29 اظن اقدر افكر واتخذ قراراتي بنفسي..
ليلى: احلى هناك يا بو قرارات انت...
ناصر:زين ممكن تشرفين وتطلعين..
ليلى: يعني طرده..؟؟
ناصر مبتسم: الله يهديج محد يروم يطرد روحه...جانج سمعتي حد يطرد روحه انا بطردج..
توردت خدود ليلى من المستحى وظهرت على طول...ويلس ناصر في مكتبه..يكلم نفسه..
" لو عطيتها كلمتين حلوات من اول جان ظهرت من وقت ..بدل الصدعه وويع الراس"..
سارت ليلى مكتبها وهي متخدره من كلمتين سمعتهن..وبغت تطير...ليلى من ايام دراستها بالجامعه وهي مولعه بناصر..اللي يكون ولد عمتها وناصر بعد يموت فيها ولو انه شوي غلس ودمه ثجيل بس يتم يحبها..ورغم محاولاته الفاشله انه يفهمها ان اللي بينهم حب مستحيل بس مب راضيه تقتنع وعنيده لابعد الحدود...
كانت علاقة ناصر في ليلى قمة في البساطه يعاملها مثل اخته بس بنفس الوقت ما يقدر يخفي شعوره الغريب في حبها..مع انه نفسه تمنعه مرات بحكم الظروف اللي مرت ولا زالت تمر بها العايلتين..من ايام الزيارات والعزبه وسوالف اليهال وهي صغيره لين ما كبروا ودخلت الاعداديه ومنعها راشد انها تظهر عليه بليا حجاب..وعقب من يوم دشت ثالث اعدادي وتوفى ابوها انقطعت علاقة العايلتين في بعض وما قامت تشوفه ابداً..رغم ان اللي في قلبها من الصغر ما كان حب بس من كبرت تولعت به وحبته اكثر من يوم غاب عن عيونها..وزاد هالشي في فترة دراستها بالجامعه..وعقب تخرجها ما اشتغلت الا في شركة مشترك ميراثها بينهم وبين بيت بو ناصر..والمشاكل بين العايلتين..هي سوالف الميراث بين ابو ليلى الله يرحمه واخته ام ناصر..ومشاكل لا اول لها ولا تالي فرقت بين البيتين وقامت ام ناصر ما تسير بيت اخوها من عقب ما توفى لا هي ولا عيالها...
ناصر بتفكير انسان عاقل يشوف ان ليلى بالنسبه له شي مستحيل خصوصا انه ابوه ما يطيق بيتهم خير شر...فكان تفكيره اكبر من مجرد الحب..ومرات يلعب الشيطان براسه وما يشوف في ليلى اكثر من تسليه وحب عابر يرطب فيه حرارة الاجواء مع انها بنت خاله...
...................
ردت ليلى المكتب ونست انها زعلانه من حصه...ويلست وياها...وهي غارقة في بحر الحب والهيام..
ليلى وهي متسنده على الكرسي ومغمضه عيونها: اااه يا حصه والله اني ميته ميته ميته...
حصه وهي حايسه حلجها ومبتسمه شوي: هاه شو صار ويا قيس بن الملوح..؟؟
ليلى: وييه فديت ابويه الله يرحمه يوم سماني ليلى ما درى ان قيس بيطلع لي في أي لحظه...فديتك يا قيسي..
حصه تضحك: شو قيسي هذي بعد..اسميها اللغه ما بيشوهها الا انتي واشباه قيسووه مالج هذا..
ليلى: ويا ويهج يالغياره..ودج تلاقين نص نصوري..علني افداه..وتفدينه انتي وكل ربعج..
حصه: فداج ابليس انتي وهو يا مسودة الويه..انا امايه بعدها تباني ..جانج بايعه العمر تفدي نصوورج هذا...
ويقطع سوالفهن صوت دق على الباب...وعدلن شيلهن وتحجبن...
ليلى: تفضل..
حمد: السلام عليكم
ليلى وحصه: يا هلا ومرحبا وعليك السلام...
حمد: اشحالكن اليوم...؟؟
ليلى وحصه: الحمد لله..
حصه: شحالك حمد وشحال الوالده..؟؟
حمد وهو يطالعها بنص عين: الحمدلله..
ويحط اوراق على مكتب ليلى ...وهو ساير صوب الباب وقف..
حمد: ليلى قولي للمدير يوقعهن اليوم ضروري لاني هب مدوام باجر..وما بداوم الا يوم السبت..
ليلى وهي تفتح الاوراق: ان شاء الله...
وطلع حمد..وطالعت ليلى حصه وضحكت..
ليلى: هاه اخت حصه وين وصلتي في بحر الخريط..اووه اقصد في بحر الحب..
حصه وهي تسوي عمرها عاديه: ليلى خل عنج الخبال اكبري شوي...
ليلى: كبرت من زمان ما اترياج يا عبله..وعنتر اللي مب داري وين دارج...
حصه: زين شلج انتي ليش متغصصه مني..
ليلى: برايج بس حبيت اذكرج برمستج عني قبل شوي...
حصه: زين زين..
ليلى: يالله بنرد البيت بسرعه الدوام بيخلص ونحن نسولف..بسرعه ابى الحق على شواخي اكيد تترياني..
حصه: فديت روحها يا ربي...
ودقت حصه لدريولها وظهرت وياها ليلى اللي خلاص من يوم توظفت وهن يردن مع بعض... ليلى وحصه من عايله وحده بس من بعيد شوي يعني ام حصه تستوي بنت عم ابو ليلى الله يرحمه... اعمارهن نفس الشي 26 سنه ..متعلقات ببعض..وكل وحده تشوف في الثانيه الاخت اللي ما تستغني عنها..خصوصا ان ليلى اخر العنقود في البيت..واصغر اخوانها..وما عندها خوات في عمرها او قراب منها..وكلهن معرسات وبعاد عنها في دبي..
وفي الموتر..
حصه: ليلى ..
ليلى وهي طفرانه: هاه ..
حصه: متى ناخذ اجازه بصراحه مليت...ابى ارتاح شوي..
ليلى: قولي لي متى تقررين وخليها علي انا بطلع لي ولج اجازه لو من عيون المدير بطلعها..
حصه مبتسمه: اكيد شعليج غناة القلب...
ليلى تبتسم وهي شوي مستحيه: بس عاد والله استحي..
حصه وهي تتمصخر: وايد..
ليلى: شو قصدج يعني فاصخه الحيا...؟؟
حصه وهي تضحك: اقول يالله انزلي وصلنا بيتكم...
ليلى: احمدي ربج الله انقذج في اللحظات الاخيره...
حصه: سلمي على خالتي ام راشد وبوسي لي شواخي..
ليلى: ان شاء الله غناتي..بينا تلفون عقب...
حصه: ان شاء الله...
دخلت ليلى البيت كالعاده الكل توهم واصلين من دواماتهم...سارت وسلمت على امها وشافتهم يحطون الغدا..
ام راشد: يالله غناتي سيري بدلي ثيابج وتعالي تغدي ويانا..
ليلى: لا امايه فديتج ..انا بتريا حمداني وسلامه...
ام راشد: بيتأخرون لين اربع شتبين بهم..بيتغدون لرواحهم..
ليلى: حرام امايه بترياهم وحليلهم محد مسوي لهم سالفه كله لروحهم..ترا مب زين هذيل مراهقين وينخاف عليهم..بعدين يتعقدون ولايس..
وينقطع كلام ليلى فجأة عقب ما تشوف اخوها راشد يدخل الصاله...
راشد مبطل عيونه: خيبه خيبه..كل هذا بيستوي فيهم عسب يتغدون لرواحهم...
يوم سمعت ليلى صوت راشد استحت شوي..وتغير شكلها...هذا اخوها الكبير عمره 45 سنه وابو سلامه وحمدان...وعلى الرغم من ربشة ليلى وسوالفها ..بس من يي اخوها راشد تصخ ولا ينسمع حسها تكون خجوله وساكته وتستحي منه ...لانها مب متعوده تيلس وياه وايد شرات باقي اخوانها...
ليلى مبتسمه: امايه انا بسير فوق وبتريا سلامي وحمداني...
راشد: لا تسوين لهم سالفه زياده على اللزوم بيكبر راسهم عقب..
ام راشد بحنيه: زين انت اقرب الحين اخافك الا ما بتتغدا انت الثاني...؟؟
راشد: لا امايه انا ما تهمني هالخرابيط تغدوا ما تغدوا برايهم...
مشت ليلى وهي سايره فوق تشوف البشكاره ماسكه ايد شواخي وتمشيها ..واول ما شافت شيخه ليلى مشت بسرعه وجنها بتتعثر في خطواتها من السرعه واول ما قربت من ليلى عقت عمرها عليها ولوت على ريولها ..وشلتها ليلى وتمت تحضنها وتبوسها...وهي لاويه عليها وشلتها وطلعت فوق..
شيخه بنت سيف اخو ليلى عمرها سنتين وثلاثة اشهر..توفت امها وابوها في حادث وهم رادين من العين يعزون واحد من ربع سيف..وكان عمرها ثمان شهور وربتها ليلى واهتمت بها طول هالفتره..ولين الحين ما تطيع تسير ولا تيي الا عندها ومرات تتقبل يدتها ام راشد..
ليلى تشوف فيها براءة اخوها سيف الله يرحمه ..ومن نظرة عيونها تحس انها ملكة الكون كله..عاهدت نفسها تفرغ العمر كلها لها ولا تتنازل عنها لو شو ما صار..رغم ان اهل حرمة سيف جلبوا الدنيا مشاكل يبون يربون بنت بنتهم بس ما رضت مع انها صغيره بس اهتمت بها ووعدت نفسها ما تتخلى عنها..
وعاد شيخه رغم انها طفله بس ما تقدر تتخيل الدنيا بدون عمتها ليلى..واربع وعشرين ساعه وهي بحضنها ما تنزل ابد..ونص معاش ليلى على اغراض شيخه...اللي ما تطيع تسكت من الصياح اذا ما شافتها...ويابت لها خدامه خاصه تهتم فيها لين ما ترد من الدوام....
..................
في غرفة ليلى يالسه تلاعب شويخ..وتغير ثيابها..وشيخه تلحقها من مكان لمكان مثل العصفوره اللي توها بدت تتعلم تطير...ويلست ليلى على الشبريه وحطت شيخه فوقها...
ليلى وهي تكلمها بدلع: من سوالج غدا اليوم..؟
شيخه: ثرملا..( شرملى خدامتها)..
ليلى وهي تلوي عليها: فديتج انتي وكل طوايفج..اقول شواخي من الحلوه..؟؟
شيخه وهي تسوي عمرها مستحيه وتحط راسها فحضن ليلى: انا..
ليلى تلوي عليها بقو: فديت قلبج يا روحي وعمري كله..
شيخه تطالع ليلى بدلع وهي مبطله عيونها: وين حواوا..؟
ليلى: شتبين بالحلاوى ويا ويهج وانتي الحلاوه بكبرها...فديت قلبج وفديت امج اللي يابتج يعل قبرها وقبر ابوج نور على نور...
شيخه تبتسم ما تدري عمتها شو تقول..وتطلع لها بعض الحلويات اللي يابتهن وتسير تبند الليتات وترقدها حذالها لين ما نامت شيخه ..وليلى حطت راسها شوي لين ما يوون عيال اخوها....
وتفكر في حالهم هالمساكين اللي محد يعبرهم وابوهم وامهم مشغولين عنهم اربع وعشرين ساعه...وهم الاثنين مطيحين ببيت يدتهم ما يسيرون من عندها...مر الوقت وليلى بتموت من اليوع بس تكابر تتريا عيال اخوها يردون من مدرستهم الساعه اربع العصر..لانهم في مدرسة الشويفات الخاصه..غفت شوي لين 3:30 عقب نشت...ويلست تفكر مره ثانيه في عيال اخوها وفي الدوام..وفي شخص ساكن في حناياها...
...ولين ما وصلت ليلى لاخر حدود تفكيرها...قطع عليها حبل افكارها...صوت هبل عند الباب...وشوي الا حد يفتح الباب...
سلامة وهي شاله شنطتها في ايدها ولابسه ثياب المدرسه ووراها حمدان: سلام عليج يا احلى عمه بالدنيا....
حمدان من ورا سلامه: مرحبا عمووتي ....
ليلى وهي تطالعهم مثل اللي يقول يا حظي فيكم: وعليكم السلام ..قصري حسج انتي وياه شواخي راقده..
سلامه: ليش معتفس ويهج عمووه..؟
ليلى: يالله سيروا غيروا بسرعه بنتغدا رباعه انا اترياكم من الصبح مب رايمه ايود عصافير بطني...
سلامه وحمدان: ان شاء الله....
وعقب حطت لهم البشكاره الغدا ...وتغدوا حمدان وسلامه وعمتهم ليلى وكل واحد بعدها سار حجرته يرقد...لين المغرب..
العصر حوالي الساعه 5:00 عقب ما رقدت ليلى ساعه ..نشت ونزلت تحت...
وفي الصاله... يلست مع خلود حرمة راشد...
خلود: اقول ليلوه وين سلامه ما شفتها اليوم...
ليلى بينها وبين نفسها(ومن متى تهتمين انتي ولا تدرين عنها شي):راقده في حجرة ختيه عويش هي وحمدان..
خلود: هيه زين بعد..
ليلى: اقول خلود انتي متابعه دراستهم...؟؟ لانها وايد صعبه وتبى لها متابعه من اهلهم...
خلود وهي ودها تصفع ليلى: ما يحتاي حمدان وسلامي ما ينخاف عليهم طالعين على خوالهم...
ليلى مبتسمه ابتسامه صفرا: هيه والله صدج ..
وبينها وبين نفسها( راحوا عيالك يا خويه دامها شبهتهم في خوالهم)
وعلى الساعه 6:00 ينزل حمدان من فوق وويهه كله رقاد ويسلم على امه وييلس عدال عمته...
حمدان يهمس : عمووه اباج بسالفه عقب...
ليلى: شو..الحين خبرني ما فيني صبر...
حمدان: شو الحين انا ما اريد امايه تسمع..
ليلى: زين يالله نقوم حجرتكم ولا حجرتي...
خلود ما انتبهت لانها ولا تهتم ابدا بالعكس فرحانه ان عيالها متعلقين بعمتهم..ومفتكه من صدعتهم...
وساورا حجرة ليلى....
-----
في بيت مبارك ابو خليفه...كانوا عقب صلاة المغرب يالسين في الخيمه برا في الحوي..يسولفون ويتقهوون خليفه وعبدالله اخوان حصه وبنات خليفه اللي هن عفرا وحمده وام خليفه وابو خليفه...
بو خليفه:بنتي عفرا وين عمتج حصه ما شفتها اليوم...؟
عفرا: في حجرتها مع عمتي سمر..
ام خليفه: حليلها تعبانه من هالشغل...
خليفه: كلنا تعبانين ما شفنا حد ترحم علينا..
عبدالله: البزا كله للبنات شتبى به انت..؟
خليفه: عفرا وحمده يالله كل وحده على حجرتها مب جنه باجر وراكن مدارس..
وقامن بنات خليفه ويلس يسولف ويا اهله واخوه...
وفي حجرة حصه يالسه ويا اختها سمر اللي عمرها 11 سنه...
حصه: ليش تطالعيني جي كم مره قلت لج ان حرف ال H ما تلفضينه بس تكتبينه...
سمر: زين كيف اكتبه ولا انطقه هاي صعبه عاد..انا اشدراني متى الكلمه لازم يكون فيها حرف ال H ولا انطقه..
حصه: يينتيني شو اسوي بج..كل ادوات الاستفهام فيهن هالحرف في البدايه او يكون الحرف الثاني بس بعضهن ترومين تنطقينه شرات who & how وبعضهن شرات why & what ما ترومين تنطقينه هاي قاعده عنبوهن من مدرسات ما يفهمنكن شي...
سمر : زين بقولج نكته...
حصه وهي بتموت من العصبيه: شو من نكته ويا راسج انتي...بتتصفعين والله...
سمر: ارجوج والله العظيم انها خبال بتموتين عليها..
حصه: قولي يالله وفكينا مبتلشه فيج وفي دراستج وفي ثقالة دمج بعد...
سمر بدلع وثقاله: مـــره فــي واحد..
حصه وهي قابضه راسها: والله لو بتقولين روايه جان خلصتيها ..يالله قولي النكته لا اقوم اجلب الحجره على راسج...
سمر: زين شفيج معصبه...سمعي بقولج..مره في واحد نذل يبى يعذب خدامته عطاها فرشة اسنان وقال لها خمي الحوش...
حصه وفقدت اعصابها: اااااااااخ لو الجتل مب حرام جان ارتكبت فيج جريمه نكراء..انتي من وين ييتي وشو هالنكت المغبره اللي تقولينها...
سمر: حرام عليج حصوه ليش جي تقولين عني والله اني مسكينه...
حصه وهي تبطل الباب بتطلع: انا شاللي كالفني ادرس عاهات ما تفهم والله ان ما عندي سالفه لو اني راقده ولا ارمس تلفون ابرك لي..
سمر ماده بوزها اونها زعلت : برايج بدرس لروحي...
طلعت حصه وسارت الصاله تتصل بليلى...وتمت تدق على البيت بس محد يرد..وبندت ودقت على الموبايل بس محد يرد بعد...
صكت السماعه" برايها عقب هي بتسوي...شو هالملل يا ربي وين اسير الحين"
وهي ترمس روحها مرت عفرا بنت اخوها في الصاله..
عفرا: عمتي حصه..
حصه لفت بسرعه: بسم الله منج انتي الثانيه طيحتي قلبي من وين طلعتي مثل ابليس..
عفرا: يدي مبارك يبغيج...
حصه وقامت من مكانها بسرعه: يا ربيييه ابويه فديته ما شفته اليوم مول والله اني نسيته...
عفرا: حد ينسى ابوه..؟
حصه: اقول فارجي لا افج حرة سمر اختي فيج...
عفرا: شفيج بسم الله شابه ضو..
وطلعت حصه وسارت تيلس عند ابوها واخوانها...
