خفايا محن

جبروت

ام محمد الجبوريه
البارت الاول

جبروت

تكول صاحبه القصه
علاقتي باهل زوجي كلش حلوه
احبهم واحترمهم وهمه نفس الشي
يمكن لان اني اول جنه وهمه ماجان عدهم بنات بس اربع ولد
بعد سنتين من زواجي  واحد من حمويني الي هو اكبر من زوجي ومامزوج لان جان مسجون
بسبب حادث سياره واهل الميت ماتنازلو انحكم 3سنوات
جان يعاملني بطريقه تختلف عن اخوانه
ودوم يتعارك وياي لان اني متعوده مالبس حجاب كدام حمويني اكثر خلافنه ع الحجاب
اخر شي عمي كال الزوجي كمل الطابق الثاني وافصله خلي بت العالم ترتاح انسكمت بسبب اخوك المعقد جايب عقد السجن كلها علينه
صدك كملنا الطابق واني هم ساعدته بعت من ذهبي
والباقي اخذ بيهم سياره يشتغل بيها
لان صرنا عازلين لازم ارتب حياتنا صح
جنت دوم انزل العمتي انظف وغسل ملابس الولد
خطيه هيه تطبخ
لو تلزم ابني واني اشتغل
نبقه نسولف الحد الظهر اصعد الشقتي لان حماي يرجع ب12ومااحب اتواجه ويا
بهذي الفتره صرت دائما احلم حماي يتعارك وياي ويبسق بوجهي
اكعد كلش ضايجه عبالك بالحقيقه باسق بوجهي كلش كرهته فوك ماجنت كارهته
فد يوم كتبت حلمي باحد الكروبات
واجتني التفسيرات عجيبه غريبه
بس اكثر تفسير خوفني وغير حياتي جان من حجيه كاتبتلي بنيتي اخذي حذرج تفسير حلمج

حماج بيوم من الايام راح يعتدي عليج وينتهك شرفج بالغصب مااعرف ليش
اجاهلت كل التعليقات بس هذا التعليق رجف كلبي منه من يومها
صرت ملتزمه كدامه بالححاب وعمري ماتعدا كلامي ويا اكثر من السلام وعليكم السلام واذا اكو طلعه المكان هو بيها اعتذر بحجه اني مالي خلك لو ابني مريض

بس جنت اشوفه دائما ينظر الي بحقد من تجي عيني عليه صدفه

جنت اخاف احجي الاحد لا صير مشكله
والي اكدلي هو حاقد عليه وكارهني شخصيا لمن ازوج حماي الثاني
عادي جان يتعامل وياها باحترام
ولا يدخل بالبسها ولا طلعتها
مرت الايام عادي واني اتحاشا
فد يوم طك كلبي منه ومن تدخله بيه لان جان عيد وجنت هستوني حامل هو ماشايفني بوكتها صار اكثر من شهرين
نزلت سلمت عليهم
وزوجه حماي من ظمن السلام مالت العيد كالتلي ان شاءلله  تكومين بالسلامه ونفرح بيج وبالبيبي

رغم زوجة حماي هم حامل
بس هو انتفض من مكانه وصاح شبيج يوميه حامل ابنج بعده زغير
ودار عله زوجي وبقه يرزل بي
وزوجي فحطان ضحك عباله عود خايف عليه او شي
بس بيومها شفت نظره بعينه عمري ماانساها
مثل الي يكلي حسابج ثكل وياي

صارت عندي ابنيه تخبل  وجنت يم اهلي جايبه لان عمليه
وعمتي ماتكدر ادارين خطيه هيه مرة جبيره
وزوجة حماي هم بثامن هم صعب عليها تصعد وتنزل
فرحت يم اهلي زوجي جان طلع كروه الغير محافظه خطيه يتعب علمودنا
حتى مالحك يجي وياي للعمليه
ثاني يوم رجعت البيت اهلي
واجانا خبر زوجي مسوي حادث
برجعه

حاولت اروح اشوفه بس مااكدر لان اني عمليه بقيت بس ابجي وانوح
الحد اليوم الخامس بست ايد ابوي ياخذني اله
صح اهلي يحاولون يطمنوني بس اني حاسه زوجي حالته صعبه

اخذني ابوي واخوي وامي بعربانه للمستشفى
وصلت شفت زوجي بالانعاش وكله صوندات تخبلت

هو جان فاقد دخلتني الممرضه من عرف الدكتور اني زوجته
حاجيته وطمنته على جهاله
طلعوني للبيت  لان تخربطت كلش 
ب12باليل خابرونه زوجي توفه
تخبلت اني صح زواجي تقليدي بس علاقتنه احترام وموده وتفاهم قبل الحب

اخذوني البيت عيالي كاعده على كرسي ولازمه بطني جهالي بقو يم اهلي
خلصت الفاتحه
ورجعت الاهلي
بس عمتي اجتني كالت يمه تخلصين انفاسج وترجعين البيتج حاولت اقنعها ابقه يم اهلي
كامت تبجي وتكلي اريد اشبع من جهاله اشم ريحته بيهم

صدك كملت 20 يوم ورجعت البيتي مكسوره فاقده مااعرف
من وين ابدي
الحمدلله عندي وظيفه اشيل روحي وجهالي بيها

بقيت بيتي سنتين
حمويني الزغار اثنينهم ازوجو
اجرو بيت قريب علينه وزوج بي اثنينهم

بيوم اجه عباس حماي الحبير
كالهم حصلت بيت جبير مبني كامل وبيه حديقه جبيره
البيت مبني 3طوابق
ليش اخوتي ماجرين
انجر هذا البيت ونكمل عليه وناجر هذاك
اقتنعو الولد بعد ماشافو البيت يخبل

انتقلنا وكلنا مصدكين البيت ايجار

عباس جان هو الي ماجره
جنت افكر منين يجيب هيج فلوس
بحيث اثث الطابق الارضي كله على الطراز الملكي
وشققنا كلمن جاب غراضه
احلى شي بالبيت كل شقه الها درج وحد والها درج يتصل بالبيت هم

جنت اترك الجهال يم عمتي وروح لدوام
لبسي صح بنطرون وبدي بس كله اسود ماالبس الوان من توفه زوجي
والمكياج مامر على بشرتي غير واقي الشمس

فد يوم جنت نازله اترك الجهال يم عمتي وسايق جان واصل
نزلت شايله سدن
وتيم كايدته بيدي
تلكلني بنص الدرج
اخذ سدن مني وكالي اصعدي بدلي هذي التفاهه

باوعت النفسي بنطرون اسود بدي اسود وستره وحجاب
كتله شبي لبسي

نزل درجتين
ورجع التاف كالي بسرعه غيري لبسج
الرجال واكف زحمه

اني نزلت ورا
عاط بيه حتى سدن فزت بحظنه
روحي غيري بسرعه

اني هم مااعرف خفت ماادري شبيه
كش تكول مو بشر الغسل

رجعت لبست تنوره بدل البنطرون وبقيت بالبدي والستره

طلعت كبل لسايق وصلت كوه لحكت ع البصمه

بيومها الدائره مخبوصه صعدت للقسم مالتنا سالت شكو
كالن البنات النزاهه اليوم يمنه

كعدت على ميزي وشغلت الحاسبه
ونظمتها

بيومها عشر مرات دز عليه المدير

اطبعي هاي ورتبي هاي

جان اكو واحد ويه جماعة النزاهه
عيونه ماوكعت مني حتى البنات انتبهو

رجعت للبيت هلكانه

مرو كم يوم وخابرني ابوي
كالي تعالي عندي حجي وياج

من رحت انصدمت كالي اكو ناس جاي خطابه عليج

.
.
.
يتبع