_ شلونكم؟ اني ترفة عبدالله المرهون
طولي 168 ووزني 65 بيضه وشعري فاحم بي كسرة، كثيفه الحواجب وشفاهي ممتلئة وعندي نمش خفيف على وجهي
جان الي يميزني دائماً اتلثم من حرارة الشمس خاصه بوكت الرعي بالحلال والحصاد ووكت اذري الحنطه
جنت امتلك مواصفات جمال تميزني على باقي بنات القرية بس ما جنت اشوف هالشي، جنت اكره نفسي كوني انثى، جنت اكره كوني مستضعفه وجنت أحاول اخذ مكانت اخوتي حتى ما احس بالضعف البداخلي، جنت اشوف الفرحه بعين ابويه من اكعد بمكان، من احجي مثل الزلم على عكس امي،
جان يستشيرني اكثر مما يستشير اخوتي مهدي وجاسم (وسالم وفريد وكامل) هذولا اخوتي الي اجو بعدي... وفريده وسعاد خواتي الي جانن على عكسي
هاي شخصيتي خلت عائلتي تصير احزاب، امي صار عدها حزب وجنت منبوذة يمها لان بنظرها اني مسترجله مو البنت الي ببالها، الي لازم احضرلي جنطه وابدي انتظر عريس الغفله حتى اصير بنت مثالية بنظرها!
برغم بذاك الوكت البنت تنطي بس ابويه جان معتمد عليا بالفلاحه والشغل
_ جا اليوم الي فريده صار عمرها 15 سنه وخلصتني من ملحة امي واملها يصير عدها نسيب وتكعد بنص النسوان اسمه خلف، من صار عمري 16 سنه (لان امي كل سنه تجيب النا اخ اواخت) صارت حرب التسعين وبدأت الناس تنازح من المدن على القرى اجوي كرايبنا، جان عمي جمعه الي يصير ابن خال ابوي عائلته مثقفه ناس خريجين
( خاله صبريه زوجه عمو جمعه اثنينهم موظفين، جان عدهم اهم شي العلم والمستقبل)
بقوا يمنا شهر جانت ايام رغم الحرب بس حلوه، جنا نكعد اني وخاله صبريه نتعلل تعاليل الشته مع استكان جاي الحار تحجيلي هواي عن حياتهم وتنصحني يمها، جنت احس اني مرة من اشوف ايديها الناعمه ولبسها الحلو، ونعومه بشرة وجها واظافرها المبرده وعنايتها ببشرتها كبل ماتنام علبه النيفيا لان تنهار من تكعد الصبح وعلى گولتنا (تتأكسد بشرتها او تمشگ) جانت كيوت بمنتهى الانوثه، وهم بنتها دعاء تشبها وكيوت مثلها،
جنت اتمنى اصير مثلها جان ابنها الجبير اسمه فاهم، ما التقيت بيه هواي بس جانت نظراته غريبه كلش كون اني ماهتم للاشياء الانثويه، ماجنت افتهم نظرات الاعجاب، راحت أيام وجتني ايام والحصار بدا يخنگ العراق، بدت الحكومه تشتري الحنطه من الفلحان وانتعش المنتوج الوطني، بدت أمورنا بعدين تتغير وحالنا بدا يتحسن وهمين زوجنا اخوي مهدي واخوي سالم تزوج لدعاء، وبقيت اني اني
_ بيوم اجتنا دعوه من عمو جمعه وخاله صبريه علمود زواج فاهم صعدنا بالبكم اخذنا ويانه طلي وجيس حنطه، جنا فرحانين كلش والاعراس بذيج الفتره كلها بالبيوت وجانت مختلطه، بس من وصلنا للعرس بين ما جنا كاعدين لاحظت اكو مرية تباوعلي هواي وبصراحه شكلها ما ارتاحيتله
وكل ذيج الفتره امي بدت ترجع للاسطوانه القديمه لان خالتي ام ادريس رايدتني لأبنها ادريس واني ماحبه، شخصيه ماعنده وسوالفه مكسرة ونوب عمري 23 فأمي لازم تجاهد وتحاول بشتى الطرق تزوجني وما لگت غير ادريس يرضى بوحدة عانس عمرها 23 سنه
:: راح ازوجج هو غصب عنج مو بكيفج، شعندج كاعده وماتقبلين تتزوجين عمرج 23 شكول للناس
ترفة: يمه معليج بيه عوفيني بحالي والله ما اتزوجه عوفيني بس كافي موتيني بهالسوالف (جانت تحجي بقهر)
:: تتزوجين حالج من حال خواتج ونشوف الايام بينا.
ــــــــــــــــــــــــــــــــــــــــــــــــــــ
شنو رأيكم بالبارت الاول؟
اتمنى الدعم منكم ✪
