_ بنص أهـلي ومدمعات
وآمنيتي يعمَن.
خاف ابچي ويكولون هذا البچي المن؟
--------------------------------------------------
تذكير:
- مجبورة اسوي هالشي والله ماريده بس مجبوورة هالقرار الاحسن بهالوضع... اضحي احسن مايكتلها لأمي
ـــــــــــــــــــــــــــــــــــــــــــــــــــــــــــ
_ طبعاً امي ما بيتت الموضوع من فرحتها ودزت طارش على خالتي.. جان يوم أحد كل هذا صار واني ساكته مابيدي شي
بعد مرور 5 ايام إجوي خالتي وابنها ادريس اول ماطبو للحوش باوعتله من الطاگه، كشت نفسي ولعبت روحي تمنيت لو اموت هاللحظه، ماجنت اتصور راح تجيني لحظات اتمنى بيها الموت اكثر من هاللحظه والمستقبل الي ينتظرني!
جانت امي من فرحتها بجيت اختها وابنها الشلح جبيرة.. وچنها تخطب لأبنها، لو عليا احطلهم سم بالجاي
كعدوا شويه يحجون ويه امي واني بقيت واكفه بالمطبخ وماريد اشوفهم ولا متقبله اني نخطبت!
تمت الخطبه وابوي جان مقهور وبقى زعلان مني
بعدين كطعوا المهر وتم كلشي.
جانن صديقاتي يجن يباركلي ويتعللن عندي فجنت امثل اني فرحانه بس من اشوف حمديه صديقتي المقربه جنت اظل يمها وافضفضلها وعيط الا ان تورم عيوني هي كاتمه اسراري.
ترفة: وج شكريه وج راح اموت اريد احرگ روحي واحرگ امي وياي... الله ياخذني.. الله يكتلني.. والله ياخذ ادريس.. لو خليت ابويه يرمي امي ولا هالقهر الي كاعده اعيشه
حمديه وهي تشد حضنها عليا: لج كافي راح تموتين راح تعمى عيونج شعلتي گلبي شبيدي عليج يايمه.. اصبري ليما الله يفرجها
مضت الايام وخلص الشهر وجهزتني امي وخالتي الشفيه واقترب الموعد المشؤوم وهمين حددوا موعد العرس
ما احجيلكم شصار بيه بذيج الفتره جنت ماكدر اباوع للاكل ولا اكدر اكل واخوتي كلهم يباوعولي هما ونسوانهم مقهورين عليا لان يعرفوني مارايده هالشي
ـــــــــــــــــــــــــــــــــــــــــــــــــ
يوم الثلاثاء مشينا لبيت عمو جمعه.. لازم ياخذوني من هناك لان هما بالمدينه اقربلهم مو مثل بالقريه
من جنت اباوع لبيت عمو جمعه لثقافتهم ونظافتهم وترتيبهم اتمنى أصير چنتهم او بنتهم ومن اتذكر بقالي يومين وأصير بحضن ادريس يجيني إحساس التقيئ...
جانت خالتي صبريه تباوعلي بس ماتكدر تحجي بسبب امي
فمرة استغلت الفرصه وصيحتني لان امي جانت نايمه
صبرية: شبيج يمه ليش احسج ما مرتاحه؟ مو مثل باقي البنات الي على وشك الزواج.. احجيلي بنيتي؟
طبعاً اني جنت اتمنى تسألني هالسؤال لان طكت روحي ما كادرة اتحمل اكثر فگبل فضفضتلها وكعدت تبجي عليا وعلى حظي فمن سكتت نصحتني
صبريه: ترفه شوفي بنتي الحياه معركه.. الحياه مو سهلة راح تصيرين ام العائله لازم تكونين قويه، لازم تغيرين حياتهم كلها للأفضل، اصنعي حياتج بأيدج لتكولين ماكدر كلشي تكدرين تسوين لازم يكون عندج طموح حتى تواجهين هالشي "
اول من كملت بقيت اباوعلها ساكته وافكر
ركزت على جملتها من كالت "اصنعي حياتج بأيدج"
ابتسمت بوجها واحس شويه ارتاحيت من فضفضت واحسني اكدر اواجه اي شي من بعد كلامها هذا
ترفه: شكرا الج خاله
ابتسمت صبريه بوجهي وحجت: انتي حالج من حال دعاء وسعاد اعتبرج مثل بنتي فواجبي انصحج واوجهج
مضى اليوم بسرعه ومابقى غير يوم واحد يفصلني عن بدايه جحيمي.. لازم اكون مستعده لهالشي ونشوف منو حيغير منو!
يتبع.... 𖠴
