ترفة: يمه معليج بيه عوفيني بحالي والله ما اتزوجه عوفيني بس كافي موتيني بهالسوالف (جانت تحجي بقهر)
:: تتزوجين حالج من حال خواتج ونشوف الايام بينا.
--------------------------------------------------------
ترفة: يمه عوفيني أبوس ايدج عوفيني بحالي
:: تاخذينه يعني تاخذينه واني انطيت كلمه الخالتج كلمتي ماتصير اثنين
ترفه : ما اخذه يعني ماخذه أبقى خدامه لأخوتي وابويا ولا اخدم هيج واحد مخربط سوالفه مكسرة
ثارت الام وحجت بكل غضب وعيونها يقدحن شر
:: شوفي ترفه والله العظيم اذا ماخذتيه وماقبلتي لأكول الابوج واخوتج ترفه عدها واحد عاشگه وكبستها وياه بين الزرع
ترفه وعيونها مغورگه وشفايفها بدات ترجف وبصوت مخذول حجت : انتي شدتحجين؟ تعرفين انتي شجاي تحجين هسه!؟؟
يادوب كالت هالكلمات وسكتت بسبب الغصه الي تشكلت عدها
:: اي اعرف شدا احجي مو انتي التعلميني احجي، وكلمتي ماتصير اثنين.. سمعتي لو لا!
حجت هالكلام الي هدني وطلعت من المطبخ عايفتني بوسط خيبتي
مسكني البجي وكمت ارجف ومحتارة شكول لان اذا حجيت الابوي واخوتي امي راح تجذبني وتحجي عليا وطبعاً راح يصدكوها ويجذبوني... مجبورة اوافق حسبي الله ونعم الوكيل خطايا برگبة امي
اووف ماكدر اوكف تفكير بهذا الموضوع! شلون راح ادبرها وشلون حعيش ويه هالمخربط!
دزت امي طارش لخالتي هلاله ام ادريس لان امي كملتها للطبخه اجت امي لابوي، اني جنت اباوع عليهم من طاگه الغرفه (الشباك) تحاجيه
چان ابوي يعلى صوته وصرخ عليها وضربها، وهي تصارخ وتكله الا تاخذه لا احرك روحي
إجوي اخوتي يتراكضون من سمعوا صراخهم ووجهم مصفر بس اني خفت اطلع، خفت منها شي بداخلي يكلي لج طلعي افضحيها كدامهم بس خفت لاتدير السالفه عليا وابوي يذبحني او اخوتي وعادي اموت ولا اخذه لأدريس بس اخاف على سمعة ابوي واخوتي اروحلهم فدوة ولا أأذيهم،
ابوي بدا صوته يعلى وشفت وجهه بدا يحمر ويختنك وهي تزيد عليه بالكلام طلع يركض للغرفه مالته واني اراقبه، عرفت باللحظه الي فتح باب الكنتور السلاح سحب المسدس، اي توقعته يريد يرمي ويكتلها ويخلص منها
لازم اتدخل اي اي!!
بديت اركض عليه واصرخ: لا يابه لاا
هو هنا ندار على صوتي حضنته وكملت: فدوة يابه عوفها اني موافقه اريده لأدريس
هنا ابوي بدا يتغير حسيته يريد يرميني بالمسدس بدل امي!
::- ولج شجاي تسولفين انتي! ولج شبيج تخبلتي انتي لو شنوو! انتي اجاج ذاكر ابن محمد السليمان شيخ ابن شيخ وماردتيه نوب تقبلين بأدريس!؟ تردين تخبليني انتي.؟
ترفه: اي يابه اقبل بيه ذاكر قبل 3 سنين اجاني هسه اني عانس وهو ابن خالتي قابل احسن من الغريب
احجي ودموعي مطر، هو ابوي عرف اني ماريده
بس كسرت گلبه كلمتي، صرت بصف امي.. كعد ونهد حيله ع الجربايه وعيونه مغوركه
گلي:: اطلعي من الغرفه
طردني لان عرفني اجذب
- مجبورة اسوي هالشي والله ماريده بس مجبوورة هالقرار الاحسن بهالوضع... اضحي احسن مايكتلها لأمي
_ وحرت مابين ألِم روحي، وألَم روحي 𖠴
شنو رأيكم بالبارت؟ وشنو تتوقعون يصير؟+لاتنسوا تدعموني اذا عجبتكم الروايه 🌸
