ضاعن درابين العمر ماندري نمشي بيا درب
چا ليش من دون الخلگ عشنه أويه اهلينا غرب؟
____________________________
تذكير: مضى اليوم بسرعه ومابقى غير يوم واحد يفصلني عن بدايه جحيمي.. لازم اكون مستعده لهالشي ونشوف منو حيغير منو!
ــــــــــــــــــــــــــــــــــــــــــــــــــــــــــــــــــــــ
كعدت من الصبح وما بقالي غير يوم واحد لموعد زواجي ما جان ليا نفس بأي شي، رحنا للصالون من وكت واخذت معاي فستان العرس.. جنت اتمنى تصير معجزة تخلصني من هالكابوس!
من طبينا للصالون أجتني ام الصالون تباوع عليا وجانت مسيحيه اسمها روزة كلتلي
روزة: اول مره تجيني عروس ماكو على معالمها البهجه، اليوم اول يوم بحياتج الجديده لويش كل هالتوتر والخوف؟
ما جاوبتها وبقيت ساكته ومدنگه راسي فكملت حجيها: هسه اسويج احلى عروس
وبدت ترسم الوان العرس على وجهي الحزين
شكد ما جانت تخلي بالالوان على وجهي جنت اباوع لوجهي بالمرايه اشوفه كله ابيض واسود
جانت امي فرحانه كلش ومرت عمو جمعه تتظاهر بالفرح بس هي جاي تتگطع عليا
بعد 3 ساعات من شغل الصالون رجعنا للبيت وتمنيت بذيج اللحظه حمديه يمي ابجي بحضنها.. حمديه لحگيني...!
صارت الساعه 3 ونص
جت الساعه الحاسمه الي حتنهي حياتي كلها
اجت امي عليا ومبتسمه حسيتها تريد تگولي شي
تقربت مني وخلت ايدها على كتفي وحجت
:- تگيدي على خالتج وهي هسه صارت بمثابتي يعني امج الثانيه وانتبهي همين على زلمتج هذا ابو بيتج واهم شي تصرفي طبيعي..
هي جانت تنصحني وانا اشوفني بوادي وهي بوادي ثاني، اخر همي سعادتهم (خالتها وادريس)
ردت اگللها دمرتيني!
وهي جانت مكمله تحجي وتنصح اني اصلا ممستوعبه الوضع الأني بيه!
شويه وأسمع صوت السيارات والهورنات وبدأت الهلاهل والتصفيگ
دخلوا والبنات شغلن اغاني ويرگصن على جرح گلبي وبذاك الوكت جانت دارجه اغنيه قاسم السلطان ” الماعنده منين يجيب‟ واني شارده بالواقع المرير الي راح اعانيه من اگابل ادريس
جو الزفافه واشتغل الركص والهلاهل... هاي الفرحانه وهاي الي تهمس م عاجبتها الاجواء وهاي الي تتمنى تصير عروس وهاي الي تگول مبين جابريها عليه وجثيير سمعت حجي وبس ردت اطلع اختنگت... اريد تخلص هالمهزله.
جان يدخل ادريس وامه تهلهل وتشومل بيدها طاگه من الفرح.. باوعلي ادريس من راسي لأخمص قدمي بنظرات أعجاب بعدين تقدم عليا وگعد مبتسم بوجهي
:- شلونج ترفاوي.. طالعه تخبلين
حجاها وهو يخلي عينه بعيني يريد ياكلني!
لعبت نفسي بس حاولت ما ابين هالشي
ترفه: تسلم
جاوبته بهدوء حتى يحس ماريد اسمع صوته
هو هم جان يسكت بعدها ويباوع للبنات الي يرگصن وللأجواء الي بالبيت
شويه وامه گالتله
:- ادريس الزم العروس يلا دنروح
حسيت گلبي نبض بقوة متت رعب ماريد اروح!
هز راسه لامه موافق وگام وكف ولزم ايدي بقوة حتى يوگفني وياه وبدا يمشي بيه لبرا واني اباوع بخوف لأمي وخواتي الي اجو وزوجات اخوتي الي يباوعلي بحزن
جان ينتظرنا برا مصور حتى ياخذلنا صور مع اهلي قبل لانطلع لبيته
صورت مع امي وخالتي وخواتي همين وگوة ماسكه دموعي
:- امسكي نفسج ترفاوي لاتبجين وتفضحينا ولج
حجت سعاد بشقة حتى تغيرلي جو شويه فضحكت دعاء على كلامها... ابتسمت بتصنع ماريد اقهرهم اكثر عليا قبل لا اروح
ودعتهم بحرارة وإجوي اخوتي بوستهم وحضنتهم ودموعي نزلت غصب عني خاصه من عرفت بابا ماقبل يجي يودعني.. زعلان مني بعده
:- يلا ماماتي تأخرنا ترى
حجت أم ادريس وهي تباوعلي.. شفت ادريس واكف يم السياره ينتظرني.. هزيت راسي وقبل لا اروح حسيت واحد مسك ايدي من ورا نداريت مستغربه واشوفها خاله صبريه وعيونها مغورگه
صبريه: نفس ما گلتلج بنتي التزمي بنصيحتي وتذكري " كلشي بيدج "
هزيت راسي وحضنتها حضن طويل حرفياا هالانسانه عسل ومواقفها معاي ماتنسي
جان اركب السياره واروح بطريق مجهول.. حياه جديده.. ماعندي ادنى فكره عن الي راح يقابلني
من جنا بالطريق اني وادريس راكبين من ورا فمسك ايدي اني بسرعه سحبت ايدي بخوف ووجهي صفر من الخوف
ادريس: هاي شبيج خايفه قابل شدسويلج هو بس مسكت ايدج
حجه باسلوب كأن ماعجبته حركتي
خليت راسي على جام السياره ممهتمه وبس اريد أخلص
تقريبا ربع ساعه نفتر بالسيارة واشوف وگفت السياره
وصلنا للبيت! وبدأت حياتي الجديده...
يتبع ⊀
ـــــــــــــــــــــــــــــــــــــــــــــــــــ
لاتنسوا تتابعوني حبايب + تصويت 🦋
