بنات العيلة الحلقة 11😍
الكاتبة Amina Mano أمينة العكر
فرح وهي في السيارة مش عارفة شنو ادير من الخوف ولمنو تمشي،فقررت انها تمشي لصاحبتها ساجدة ، درست قدام حوش ساجدة،واتصلت بيها وهي تبكي وطلبت منها اطلعلها عباية ، ،وساجدة طلعت من الحوش وطلعت معاها عباية لبستها ودخلتها للحوش،وخششتها لدراها ،فرح تبكي وخلاص ومش قادرة حتى تتكلم.
ساجدة:خيرك فرح ،وين كنتي منو يلي دار فيك هكي
فرح تبكي بالعبرة: سامحيني ياساجدة ماسمعتش كلامكم انت وابرار،اني قريب مشيت فيها لولا لطف الله بيا
ساجدة:اكيدة الكلب هذا يلي اسمه هيثم ،قولي شن دارلك
فرح تبكي وخلاص ،ساجدة اضبطتها وقعدت تسكت فيها ، وكان في ع الطاولة ماء شربتها منها ،وقعدت تبكي لين هدت
فرح بتنهبدة قهر:والله ماكنت نحسابه هكي ايصير فيا ،كان يزلبح فيا بالكلام المعسول والهداية ،حسبي الله ونعم الوكيل فيه.
ساجدة:إن شاء الله مايربح هالحقير ،قصدك انت مشيتي بروحك للعيد ميلاد
فرح هزت راسها بمعنى ايه مشيت
ساجدة:ربي يهديك حتى انت راسك كاسح،احكيلي شن صار بالضبط
وبدت فرح تحكي لساجدة في كل شي صار وقعدت تبكي
ساجدة بعصبية:حسبي الله ونعم الوكيل فيه حقير وكلب ،ان شاء الله ماينوض خليه الكلب ،وانت احسن مادرتي دافعتي على شرفك
فرح:هو صح دافعت ع روحي لكن خايفة لأنه هددني بي اماليا وعنده صوري ومش عارفة حتى كيف صورني
ساجدة: لأنه حقير ،ونيته مش صافية ماتخافيش صدقيني مش رح يقدر ايدير شي ربي في الوجود
فرح: امي تتصل بيا شن بنقوللها
ساجدة :قوليلها عجلة سيارتك انفشت ،وروحتي معاي للحوش ع الأقل تطمن ،قوليلها توا انروحو بيك
وفرح كلمت امها ،وقالتلها زي ماقلتلها ساجدة ،واطمنت شوية
فرح:امك وين حي علياواني من امبكري دايرة دوشة بعياطي
ساجدة:لالا امي وبوي مهناش ،في العزي في منطقة ثانية،بيروحو متأخر شوية
فرح:وانت كيف تقعدي بروحك وماتخافيش
ساجدة: ربي معاي ومتعودة ،راني بنت بمية راجل عندي حتى سلاح
فرح:ساجدة طلعتي خطيرة
ساجدة:نعجبك يانصي
قعدو يضحكو ،وبعدين ولت تبكي مرة ثانية ،
فرح:ياحليلي شن بندير ،خايفة يجوني للحوش
ساجدة:انت مش مرة قلتي عندك خالك كان في السلاطة امتع البلاد هذه
فرح قامت رأسها:ايه والله فكرتيني ،تصدقي نسيته بكل من الرعشة،خالي عبدو يخدم في مكان .....
ساجدة: خلاص اتصلي بيه توا واحكيله يلي صار لك كله
فرح :ايه لكن خايفة منه عصبي هلبا ،خايفة يشهدر بيا ويضربني
ساجدة :لالا مستحيلة ايديرها جربي اتصلي بيه قوليله يجيك لحوشنا
فرح اتصلت بيه وقالتله لازم يجي لحوش صاحبتها ساجدة ،وقالتله ع مكان الحوش ،وسكرت منه طول
فرح :قلتله سيارتي وقفت بيا قدام حوش صاحبتي ،خلي يجي ونفهموه خشي معاي بالله عليك
ساجدة :إن شاء الله ع خير
وشوية وامها وبوها وصلو للحوش ،طلعتلهم وقالتلهم أنه صاحبتها عندها وبيجيها خالها،طبعا ساجدة بوها عسكري قديم ومتقاعد ،احكتله القصة كلها ،وقاللها إن شاء الله خير لما يوصل خالها انكلمه ...
***
عند فارس قاعد في شقته ويخمم ويفكر في زهور وماباش حتى يتصل بيها ،لان عطاها وعد ،وشوية طق باب الحوش فتحه لاقاه بوه.
الحاج محمد:شن مافيش تفضل والا كيف
فارس:سامحني يابوي ،تفضل خش الحوش حوشك
الحاج محمد:الله يزيد فضلك،افتح الضي خيرك مظلم الحوش
فارس:حاضر ،تفضل كعمز هنايا على الصالون
الحاج محمد كعمز :ايه يافارس شن فكرت بتكمل مع بنت الاستاذ عبد القادر والا كيف
فارس :ايه لازم نكمل معاها مستحيل نرخي بيها عطيتها وعد
الحاج محمد:مافيش الا حل واحد ،نمشي اني وياك لحوشهم ونكلمو بوها، وان شاء الله يوافق
فارس :ياريت والله،لكن امي عارفها مش حتريح روحها لين تعفسلي فيها
الحاج محمد:امك خليها ع جنب توا اني نتفاهم معاها ،انت غير وتيلي روحك بس غدوة بعد العصر باذن الله نمشوله ونخطبوها
فارس حس براحة من كلام بوه:إن شاء الله،حاضر ،ربي يحفظك لينا يابوي ويعطيك الصحة وطول العمر يارب
الحاج محمد طبطب على كتف فارس: إن شاء الله اجمعين ،توا ارقد ارتاح ومايصير الا الخير ،هي تصبح على خير...
فارس :وانت من اهل الخير
وطلع الحاج محمد وروح لحوشه ومايتكلمس مع مرته زهرة نهائيا .......
***خميس يكلم في سمر المصرية ،ويتغوتلها ،تبي الفلوس وتبي ادير العرس هي وياه.
خميس :ياسوسو افهمي عليا قلتلك مرتي الأولى شكت فيا في المحكمة ،تبي الطلاق وتبي حقوقها،اني هكي بنخسر هلبا
سمر:مالياش دعوة خااالص ،انت خاطبني،من سنة و لدلوقتي ،ماعملناش الفرح ،ولا حتى اشتريت اوضة نوم ،والمهر مادفعتش منه ولا مليم
خميس:عندك الحق في هذه ،باهي قوليلي شن اندير ،عندك خطة انتي
سمر:مافيش حل الا وتبيع البيت وتعطيني النص ،والنص الثاني خود منه لنفسك وادي منه لمراتك الأولانية،عندك فرصة يوم واحد وبس،عجبك ماشي ،ماعجبكشي خلاص شوفلك وحدة ثانية غيري
خميس:لالا لا وين بنحصل احلى منك واحسن منك،خلاص انت تؤمري أمر من غدوة نبيع الحوش ونطلقها ،وانديرلك احلى عرس
سمر تضحك في ضحكتها الخبيثة بصوت عالي:ايوة كذا عجبتني أوي ،وخليتني نحبك أكثر واكثر ياخموشتي
خميس دايب معاها:وحتى اني تهبل فيك ياسوسو،ربي مايحرمني منك......
****
عبد الرحمن:خيرها بنتك عطلت لتوا بيش بيروحو بيها،اتصلي بيها قوليلها وين الحوش توا انجيها
احلام:انت خيرك انت تحب تزن ،قلتلك توا تروح خلاص ،اني اعييت نشرحلك ،عندك هاتف والا اتصل بيها بروحك
وناضت وخلاته بروحه ،واتصل بفرح وقالتله اهو يصلحوفي العجلة وخالها بيروح بيها،ارتاح عبد الرحمن شوية ،وحذف الهاتف ع الصالون ...
***وصل عبدو خال فرح ،واتصل بيها ،وطلعله بو ساجدة استقبله ودخله المربوعة ،اب ساجدة اسمه العميد سالم.
العميد سالم:كيف حالك وليدي
عبدو:والله الحمدلله وانت
العميد سالم: الحمدلله،اني نبي نقولك كلام ورد بالك تتعصب لين تفهم
عبدو عدل تكعميزته :إن شاءالله خير
العميد سالم قعد يحكي لعبدو في قصة فرح،وعبدو يغلي غلي
عبدو وقف :وينها هي توا وينها،الحق مش فيها في امها يلي ماتعرفش تربي ،
العميد سالم وقف وشد عبدو:غير كعمز وصل ع النبي ،بنت اختك صح غلطت،لكن تعتبر صغيرة تبي حد ينصحها،الوقت هذا معاش فيه امان ،توا حاول تزيد تفهم منها وماتقعدش تخوف فيها وتزيدها على همها هكي تأثر حتى على نفسيتها
عبدو :حاضر إن شاء الله،ناديهالي
وطلع العميد سالم وضبح على ساجدة ،وقاللها خليها تخش لخالها المربوعة
ساجدة :حاضر يابابا ،لكن زعما مايضربهاش
العميد سالم:لالا وصيته عليها مش حيضربها
ساجدة:ربي يحفظك ليا ياأحلى عميد وليك احلى تحية عسكرية
العميد سالم يضحك عليها ومشي
ساجدة :فرح يافروحة اهو خالك جي يبيك في المربوعة ،وماتخافيش مش حيضربك بابا وصاه عليك
فرح:لالا مش خاشتله بروحي خالي ونعرفه ،مايعرفش يتفاهم الا بالضرب
ساجدة:باهي نلبس عبايتي ونمشي معاك غير هيا نوضي
فرح ناضت وليست سورية وسروال من ساجدة ،وساجدة لبست عبايتها وصلتها لباب المربوعة وقالتلها خشي
فرح مكرشة فيها:لا خشي معاي
ساجدة:هذا كله خوف ياجبانة ،ماهو ضاربة واحد بالموس ،وضحكت عليها
فرح:توا بتقعدي لابستيني بيها
وفجأة انفتح باب المربوعة
عبدو:خشي كبتخشي ،واقفة ودايرة روحك خايفة ،كانك خايفة راهو ماديرتيهاش المصيبة هذه لروحك
فرح ساكتة ماتكلمتش وزادت شدت يد ساجدة،وجبدتها معاها للمربوعة،وساجدة تشبح لعبدو ،شخصيته حلوة غير عصبي
عبدو واقف وحاط يديه في الوسط:وانت شنو خاشة معاها،والا كنتي تهيجي معاها،
ساجدة:منو اني
عبدو:لا غولتك
ساجدة شبحتله ع جنب :لا اني صاحبتها وبنت العميد سالم
عبدو:عارف ،اطلعي وخلينا بروحنا
ساجدة:بشرط
عبدو:شنو هو
ساجدة:ماتضربهاش
عبدو: ماشاء الله وزيرة دفاع حاطاتك
ساجدة :ايه صاحبتي ومن حقي نخاف عليها،واهو بنطلع والله تضربها والا حاجة تشوف شي مايعجبك،وطلعت وخلاته يشبحلها ساكت
عبدو :تعالي ايبسي هني ،من وين لاقيته فرخ الحرام يلي قريب قتلتيه.
فرح تبكي :والله نحسابه يحبني حق ،هو كذب عليا
عبدو:وانت غبية والا شنو ،واحد حقير زي هذا يضحك عليك،والله كان مش عيب راهو عفجتك طريحة لين تتربي
شن اسمه الكلب ،وين يسكن والاستراحة وين
فرح عطاته المعلومات كلها وكتبهم في ورقة
عبدو :نوضي تحركي ،كلمي امالي الحوش اليوم باتي في حوشكم وغدوة الصبح نرفعك عندي تقعدي قدام عيوني مراقبة حتى الجامعة تنسيها فاهمة والا ،امك وبوك ماعرفوش يربوك ،نوضي
ناضت فرح تبكي وخشت لساجدة وحكتلها شن قاللها خالها ،وطلع العميد سالم لعبدو وزاد تفاهم معاه،وروحت
****زهور طول الليل وهي تبكي وخلاص،ونفس الوقت ماتبيش امها وبوها يعرفو أنها تبكي ،وتكلم في سامية وتهدي فيها ....
***وخديجة اول مرة ترقد مرتاحة هي وصغارها ،وعندها امل كبير إن ربي حيخلصها من خميس اليابس.....
ثاني يوم الصبح ،فارس ماممشاش للعمل ،وزهور مابتش تمشي واتصلت بسامية وقالتها إنها تعبانة شوية ،وسامية وصلها بوها للمدرسة،ومع الساعة10عبدو جي لحوش أخته ،ورفع فرح لحوشهم،واحلام مهناش في العمل اتصل بيها خوها عبدو وقاللها أنه بيرفع فرح تقعد مع جداها تبيها تعاونها..
***هيثم قاعد في المستشفى راقد في العناية الضربة جاته قوية ،واصحابه المليشيات يراجو فيه يصحى ،بيش يديروله حل يا أما يقتلوها فرح والا يحبسوها عندهم ،
***
وعبدو كلم جماعته وصاحبه عماد بيش ايديرو خطة باهية مافيهاش اضرار لفرح ...
***في العشية بعد العصر الحاج محمد وفارس مشو لحوش الأستاذ عبد القادر،طبعا الوقت هذا موجود في الحوش،واستقلبهم وخشو ،وجابلهم ضيافة قهوة وحلويات من يدين زهور،وزهور فرحانة قريب اطير عاد ليه هلبا ماكلمهاش
الحاج محمد: احني يا استاذ عبد القادر ،جايين نبو نخطبو زهور لفارس
الأستاذ عبد القادر بي ابتسامة:مرحبتين بيكم ،اني موافق لكن لين نسألها هي وناخد رأيها
فارس:لا هي اكيدة موافقة
الحاج محمد تحشم من جرئة فارس :باهي شوفها ورد علينا ،اهو خود رقمي
الاستاذ عبد القادر: إن شاء الله،لكن وين الوالدة ،خليها تجي تشوف زهور وامها .
فارس جي بيتكلم بوه سكته
الحاج محمد:خلاص بعد يومين ايجوكم البنات وأمهم ،ويشوفو العروس ،وعطوهم رد ،وان شاء الله خير
هي توا نستأذن ،عطلت على المحل والمعتصم ماينعباش عليه
عبد القادر:ربي يعاونك وتفضلو اي وقت
واستأذنو وطلعو وفي الطريق فارس قال لبوه امي مش حتمشي عارفها
الحاج محمد:والله هذه الأصول الام تمشي تشوف العروسة،وامك خليها عليا توا تمشي بالسيف عليها...
***عند خديجة استلمت البضاعة امتع حلويات صاحبة حنان وبدت فيهم في حوشها وبناتها الزوز الكبار يعاونو فيها مريم تقرا ثاني ثانوي وسعاد 3اعدادي ،ومصطفى مستمر في العمل والقراية
***عيلة صالح يجهزو لفضانية حنان ،تسييق وغسل بساطات وفراشات وبعض الحلويات داروهم في الحوش وكنتهم احلام حالفة ماهي نازلتلهم ولا معاونتهم في حاجة فالحة غير تقصقص في غيداء .........
الكاتبة Amina Mano أمينة العكر
اليوم الجمعة وكان اجمل يوم بالنسبة لعيلة صالح ،لانهم دايرين فضانية حنان ،والمرة هذه عازمين احلام،وماشاءالله من الصبح يوتو ويجهزو ،بيش كل شي يلقوه واتي في الليل.
سامية :يام احلام شكلها ماتبيش تجي من أمس مكلمتها قالت توا انجي،وحتى غيداء عطلت غريبة
فتحية:والله على راحتها تبي تجي تتفضل ماتبيش تشد حوشها وتكعمز
سامية:ايه والله عندك الحق
فتحية :بري شوفي حنان ،كملت تفريش المربوعة والا لا
صالح:هاشنو يافتحية بالك ناقصتكم حاجة والا حاجة
فتحية :لا والله كل شي موجود الحمدلله،شوية بتجي اختي آمنة بطيب معاي العشي ،وهي ماشاء الله نفسها قنين في المسقي ،والعصبان
صالح: ماشاء الله ماشاء الله،هي توا بنمشي للجامع
فتحية:برا مربوحة ربي معاك
وشوية بدو يوصلو أقاربهم يلي عازمينهم ع الفضانية منهم خوات صالح وصغارهم وخوته،واخت فتحية وخوتها بصغارهم،ماشاء الله الحوش تعبى ،وبدو كلهم يساعدو فيهم في العصيان والكسكسي،والحاجات الثانية ،والبنات يعبو في الحلويات في الباكوات ،ويجهزو في الروزاطة والعبمبر وكل شي خاص ليوم الفاتحة ،ونزلت غيداء شكلها باكية شافتها سامية ضبحت عليها دخلتها للدار
سامية :خيرك ياغيداء باين عليك كنتي تبكي
غيداء:ايه امي ضربتني ماتبينيش ننزل لحوشكم
سامية: وعلاش
غيداء تبي تمشي لحوش حنينة
سامية:وفرح وخوك وسام وين
غيداء :فرح ليها يومين عند حنينة أما وسام قاعد وديما يطلع
سامية استغربت: باهي انتي توا معاش تبكي ،اهو اطلعي مع البنات وغيري جوك ......
** في حوش عيلة الحاج محمد، بعد مافطرو ،وجهز روحه لصلاة الجمعة
الحاج محمد:اسمعي يا زهرة اليوم العشية وتي روحك انت والبنات بيش تمشو لحوش الأستاذ عبد القادر
زهرة:وشن المناسبة أن شاء الله
الحاج محمد:المناسبة واضحة وتعرفيها ،بتخطبيها لولدك فارس
زهرة بعصبية:لا والله هذا ماناقص ،غير نمشيلهم ،اني من مكاني مش متحركة
الحاج محمد:لا بتمشي وبالسيف عليك ،والله والله لو ماممشيتيش ماعاد تقعديلي في الحوش
زهرة بتعجب:بعد هالعمر هذا كله جاي تقولي الكلام هذا
الحاج محمد:زي ماانت تسكري في راسك،هما كلمتين ياتمشي تخطبي لولدك والا دوري وين تقعدي
وطلع وخلاها قريب تهبل
شهد : يام شنو فيه خيره بوي يكشخ
زهرة متعفلقة:هذا كله ع خاطرها شيطانة الرجيم يلي يقولولها زهور
شهد :ياماما زهور كويسة وطيوبة
زهرة:نوضي من قدام وجهي ،انتلفي تلفة،توا طلعت اني يلي مش كويسة يلي ماتتحشمي ....
"***عند خديجة ماشاء الله كملت طلبية الحلويات ،وسالمة رفعتهم وجابتلها حقها،واهل العرس يشكرو فيها ويشكرو في حلوياتها ،واليوم جمعة خديجة وصغارها متغدين عند غالية ،ويوم الجمعة لازم يتغدو مع بعض.
سالمة:تعرفي يام ،يلي يذوق الحلويات يقول ماشاء الله ربي يبارك،كلهم قريب هبلو عليهم
غالية:ربي يبارك فيها وايسلم ايديها حتى حلوات العيد ماشاء الله بنة وصنة
خديجة :ربي يحفظكم وايسلمكم
سالمة:شن رأيك تفتحي مشروع حلويات وتخدمي للمحلات أو طلبيات اعراس
خديجة:ايه والله عادي
سالمة:افتحي صفحة ع الفيس ونزلي فيها تحصلي هلبا زبائن
خديجة :والله مانفهم فيه الفيس وتليفوني بيلا مش زي التليفونات المطورات
سالمة :عادي وتعلمي مافيش باس
خشت عليهم منال غير وسعو بالكم شوية شنو تقولو فيس مافيس
قعدو يضحكو عليها
سالمة:نبي خديجة تفتح الفيس وتتعلم وتفتح صفحة تنزل فيها حلوياتها يلي تشتغل فيهم
منال :اهاااا كان على هذه ساهلة ،اني تليفوني الاول قاعد ومانستخدمش فيه ،توا نعطيهولك خديج واني نعلمك كل شي ومرات حتى نخدم معاك لأن عطلة والسيم الجاي نتخرج ان شاء الله شن رأيك
خديجة: ربي يفرحك منولة واينجحك والله ياريت حتى من توا عادي
منال: خلاص امالا متفاهمين من توا ،خلي نمشي نجيب الهاتف
غالية:غير راك تجي مكدسة وانتي تجري جري....
****
احلام في حوش اماليها تبكي وتتغوت لي امها واللوم كله تحط فيه على شيابينها،وطبعا ام احلام كويسة وطيبة ،وحتى تعرف قصة فرح وعبدو حكالها كل شي ،ودايرة روحها ماتعرف شي ،لانها مرا حكيمة وفهيمة..
احلام:والله لا ايدورو فيا ولا يعبرو فيا ،عزموني اخر وحدة في الناس
سعاد :يابنتي تعودي من الشيطان ،انت تعتبري من العيلة مفروض تنزلي بروحك ومن غير عزومة
أحلام: يام افهميني هما مايبونيش كيف تبيني نمشيلهم من غير عزومة
سعاد:وكيف عرفتي مايبوكش
احلام:واضحة اصلا من تصرفاتهم
سعاد قعدت ساكتة وتهز في رأسها وتشبح لبنتها ع الجنب....
وفرح تغيرت هلبا بدت غير تصلي وتدعي وتقرا في القرأن وتتواصل مع صاحباتها ع الهاتف فقط،لان خالها عبدو وقفلها قيدها ،بيش ماايصيرلهاش مشكلة من هيثم وجماعته ،يلي قاعد راقد في المستشفى ...
**وجت العشية وزهرة وبناتها وتو وأرواحهم ورفعهم فارس لحوش الأستاذ عبد القادر،من اول ماخشت وهي مش عاجبها شي ،بينما ام زهور الدكتورة مريم استقبلتهم احلى استقبال،ورحبت بيهم ..
الدكتورة مريم:انستونا والله نورتو
زهرة تلوي في شواربها وماتبيش ترد دارت روحها ماسمعتهاش ردت عليها سناء
سناء :الله يأنسك وينور عليك دكتورة مريم
دكتورة مريم شبحت لزهرة استغربت فيها ومابتش تكلمها : تسلمي سناء ربي يحفظك
زهرة:آمالا وينها بنتك زهور
الدكتورة مريم:باهي توا انضبحلك عليها شوية بس
وناضت خشت على زهور في دارها
الدكتورة مريم: ماشاء الله على بنتي ربي يحفظك من كل شر،نوضي جيبي الضيافة وخشي للدار ام فارس تبي تشوفك
زهور :باهي ،تعرفي ياماما توا كلمت فاطمة قلتلها اليوم خطوبتي قالت ياخسارة ياريتني معاكم
الدكتورة مريم؛الله غالب معليشي ان شاء الله تحضر العرس ،هيا سلم بنتي عطلنا على الضيوف
زهور :حاضر ومشت للكوجينة
وفي الدار عمتكم زهرة تسحن وتعجب في الدكتورة مريم وادير في حركات وبناتها متحشمات منها ،وخشت الدكتورة مريم وكعمزت ،اهي شوية وتجي زهور
زهرة تلوي في رأسها بطريقة مستفزة،وخشت عليهم زهور
زهور: السلام عليكم ورحمة الله
ردو عليها السلام وجت بتعطي لزهرة العصير والشكلاطة
زهور:تفضلي عمتي
زهرة بشبحاتها يلي زي السم:الله يزيد فضلك صحيتي مانشربش فيه العصير والشكلاطة ماناكلش فيها
زهور خافت منها وحستها اشبح كيف ،وكملت توزيع العصير والشكلاطة وسلمت على سناء وشهد وزهرة ماتبيش تسلم عليها جاية بشرها وكعمزت جنب امها
زهرة :مادامك جيتي اسمعيني وماتفهمنيش غلط،اني راهو جاية بالسيف الحق مش موافقة عليك لفارس ،نبيه ياخد بنت خوي الله يرحمه
سناء وشهد سخنو من الحشمة يلي دارتها امهم ،وحاولو يسكتوها بالتلميح ،وشي ولاقالت تسكت،وزهور وامها في حالة صدمة يشبحولها وبس
زهرة:اني ولدي دار العار على خاطرك طلع من الحوش ومعاش روحلي قريب اسبوع هذا كله منك ومن جرايرك ،واليوم جايبني بالسيف نخطبك اني مش راضية عليك سلم بنتي ،تقدري تقولي مش موافقة لان حتى لوخداك مش حتخشولي حوش لا انت ولا هو
سناء :يام خلاص شن هالكلام يلي تقولي فيه عيب حرام عليك
زهرة:سكري فمك ،مادخلكش انت
الدكتورة مريم:وهذا هو كلامك انتي،يعني كملتي كلامك خلاص ماعاش عندك شنو تقولي
زهرة تشبح لزهور ع جنب وزهور عيونها دموع بس مش قادرة تتكلم ولا عارفة شن تقول
الدكتورة مريم:ولدك وبنتي يبو بعض انتي علاش تحرمي فيهم من بعض والله هذا تتحاسبي عليه عند ربي سبحانه
زهرة :وشنو انت توحي وماعنديش علم والا كيف،اني يلي عندي قلته انسحبوا والا مش حتشوفو خير
الدكتورة مريم:مادامك انتي هكي ،حتى اني ماعاش نبي نعطيهالكم بنتي ،لإنكم ماتستاهلوهاش
وزهور صاخت وطاحت عليهم وشهد خافت قعدت تعيط ويلي في المربوعة سمعوهم جو يجرو وسناء والدكتورة مريم ايفيقو فيها،مابتش تفيق
الاستاذ عبد القادر وفارس جو يجرو مخلوعين :شن فيه خيرها زهور
الدكتورة مريم:داخت علينا فجأة مرات هبوط بسرعة ارفعوها للمستشفى جي فارس بيقيمها الدكتورة مريم قالتله لا خلي بوها يقيمها ،وشبحت لزهرة وقاللتها حسبي الله ونعم الوكيل فيك
فارس شبح لي أمه عرف أن أمه اشبح شنو ملبزة
وكلهم طلعو روحو والأستاذ عبد القادر والدكتورة مريم رفعوا زهور للمستشفى ،ولحقهم فارس وسناء..
فارس شد سناء على تركينة :شنو يلي صار احكي ،من لماانت في السيارة ماتبيش تحكي احكي شن فيه تكلمي
سناء بدت تحكي لفارس على الكلام يلي امها قالاته كله
فارس تعصب:لاحول ولاقوة إلا بالله العلي العظيم ماهو كنت عارفها بتفسد عليا غير علاش هذا كله بس علاش
وقعد يخبط ويعيط من القهر والناس كلها تتفرج لين جاه الاستاذ عبد القادر ونوضه وكعمزه على الكرسي،وطبعا الدكتورة مريم مابتش تعاود الدوة للأستاذ عبد القادر لين تشوف حالة بنتها قبل وقعدو في المستشفى إلى الليل.
**وفي حوش الحاج محمد
زهرة شادة شهد وتهزب فيها:تعرفي نسمعك مقايلة حرف لبوك انهارك ادوري فيه ،ولسانك لماانقصه
شهد تبكي :حرام عليك يام والله حرام،ان شاء الله يارب مايعاقبناش من أفعالك ويصيرلنا زي زهور
زهرة بخوف:نوضي خشي لدارك نوضي مصايب اعوذ بالله منكم ....
**في حوش صالح في الليل ،جو عرب العريس للفضانية ،وماشاء الله الفضانية طبعا كلها رجال ،وكان استقبال جميل جدا ،ومنظم ،وتعشوا واتفقوا على كل شي وحددوا حتى موعد العرس وعطوهم هداية وروحو ،والحوش كلهم فرحانين ودارو شوط دربوكة وباركو لحنان ..
العقبة ﻟﻴﻜﻢ ﻳﺎ ﺍﻟﺒﻨﺎﺕ**ﻓﻀﺎﻧﻴﻪ ﻭﺑﻴﺎﻧﺎﺕ
ﺍﻟﺰﻳﻨﻪ ﺍﻟﻠﻴﻠﻪ ﻓﻀﺎﻧﻴﺘﻬﺎ**العقبة ﻟﻲ ﻟﻴﻠﺔ ﺣﻨﺘﻬﺎ
ﺍﻟﻠﻴﻠﻪ ﺍﻟﻐﺎﻟﻲ ﺍﺑﻌﺖ ﺭﺟﺎﻟﻪ**ﻟﻠﺰﻳﻨﻪ ﺍﻟﻲ ﺑﺘﻜﻮﻥ ﺣﻼﻟﻪ
ﻳﺎﺯﻳﻨﻪ ﺍﻟﻐﺎﻟﻲ ﺍﻟﻲ ﻳﺒﻴﻚ**ﺍﺑﻌﺚ ﺭﺟﺎﻟﻪ ﻓﻀﻮ ﻓﻴﻚ........ أمينة العكر Amina Mano 😍
