بنات العيلة الحلقة 20😍
الكاتبة Amina Mano
ثاني يوم الصبح فارس نايض من الفجر مارقدش،وهو يراجي في زهور تفك الحظر ،كل شوية يشوف في تليفونه وأيمن راقد مايندري ع الدنيا شن فيها ....
***
في حوش صالح مع الساعة 10كلهم نايضين،ويفطروا ،والعروسة تجهز في شناطيها بيش تمشي المزين ،طبعا بيمشو معاها بنات خوها فرح وغيداء ورافعين معاهم تسنيم واختها سامية فقط ،بعد لحظات جي الوقت يلي بتمشي فيه للمزين،قعدت تبكي وتشهق ،لين كلهم قعدو يبكو معاها (واعرة طلعة البنت من الحوش الحق🥺)...
كاملة :استهدي بالله يابنتي سادك منه البكي تقول رافعينك بيذبحوك،جيبولها ماء مرقي خلي تشرب منه
فتحية سكتت: خلاص سادك من البكي ،سيورك بتجينا
حنان تبكي وتشهق:واعرة يام والله واعرة
كاملة: علاش متزوجة ،ياسر منه الدلع،سامية تعالي كبترفعي اختك المزين
سامية:اشربي الماء المرقي،سادك ادعي لربي يكملك على خير،اقري قرأن في سرك استغفري وحوقلي
حنان شربت الماء ومسحت دموعها وطلعت معاهم،طبعا عبد الرحمن هو يلي رافعهم....
****
عند سعاد ام احلام،فطرت لوطا وركبت لبنتها فوق،لقتها تجهز في شنطة فيها قفطان وكندرة وتاكم ومسلتزماتها،بيش تمشي المزين ،والشعر يلي قاصاته كاريه تقول اصغر من بناتها
سعاد: وين ماشية بقشيشك
احلام:وين بنمشي المزين طبعا
سعاد:تحسابي روحك صغيرة على الجو يلي اديري فيه
احلام:وخيرني شن درت يام
سعاد:انت غبية والا شنو ،عرس حماتك وماشية جاية زي الضيفة ،بدل ماتعولي معاهم وتوقفي معاهم والله ماتتحشمي ،هكي ربيتك اني تكلمي هكي ربيتك
احلام:يام هما مايبونيش وماينادوش عليا شن تبيني نخش بروحي
سعاد:خشي بروحك والا من غير روح ، التسهويك الزايد يلي اديري فيه هذا معاش نبيه فاهمة والا لا،وغير نروح والله لما نقول لبوك وخوتك تحشمي فينا مع الناس
احلام:يام استهدي بالله وفكينا عاد،مادرتلهم شي خلاص خلاص مليت اني
سعاد:اني يلي عندي وقلته ،وانت ورأيك
وطلعت وخلتها اتفتفت بروحها....
***
عبدو طالع هو وعماد جاهم اتصال مهم من المقر ومشو طول للمقر وقالوللهم إنهم شبه عرفوا مكان هيثم وناوي يهرب بإسم مزور وأوراق مزورة، بس مرات يكون حتى متنكر فلازم يشدو الحدود،لأن يلي فاللهم عليه شخص يعرفه كويس وهو يلي يتواصل معاه....
عبدو :خلاص ياعماد من توا بنشدو دوريات وبوابات على الحدود
عماد :خلاص امالا،مدامه هكي اني نقعد في بوابة راس جدير،لإن صاحبي علي يخدم غادي وحيساعدني هلبا
عبدو:تمام ،خلي نتصل بولد خوي بيش يرفع معاهم امي للعرس،لإنها عندها عرس واني مانبيش نقوللها شي ،توا تعلق عليا وترعش
عماد:احسن حل
واتصل عبدو بمحمد ولد خوه،وقاله لما ترفع امك للصالة اخطم على حناك ارفعها معاكم ،واني مسافر تونس وماتقولش لحد ....
****
عند خديجة ،مافي شي جديد هي وصغارها ،وغالية وبناتها،لكن غالية قاعدة شاكة ان خديجة مابتش تنزل للحفلة ع خاطر مرت فتحي ،واختها قالتلها سمعت مرت فتحي تدوي علي خديجة،وتشبحلها في شبحات زي السم.
غالية:سالمة ياسالمة
سالمة:نعم يام شن فيه
غالية:تعالي كعمزي بنقولك على نعيمة مرت فتحي
سالمة :خيرها شن فيه
غالية :أمس خالتك ناجية قالت سمعتها تدوي على خديجة وتشبحلها،واني خديجة شكيت فيها لما تجي نعيمة ماتنزلش
سالمة:نعيمة ربي يهديها ماهو كانت كويسة ومسخفتها خديجة،علاش توا انقلبت عليها
غالية:اكيدة سامعة كلام حد،والا خايفة من فتحي ياخد خديجة،
سالمة تضحك:والله ياريت نعرفوها من قبل مايتزوج فتحي كان هذا راهو خديناهوله
غالية:خديجة اكبر من فتحي بهلبا،لكن نعيمة دماغها مسوس اي حاجة تصدقها
سالمة:ربي يهديها،توا تعرف قيمة نفسها
غالية:ربي يهدي من خلق....
***
في المزين عند حنان ،المزينة اديرلها في تسريحة شعرها ،وحنان سارحة في عالم ثاني
المزينة :ها ياعروسة ،شوفي التسريحة شن رأيك فيها
حنان : ماشاء الله سلم ايدياتك حبيتها هلبا
المزينة:تسلميلي طالعة ماشاء الله عليك زي القمر،المكياج والتسريحة ،طالعات عليك ربي يبارك،ارقي روحك قبل ما تخشي للصالة،وفي الصالة كل شوية اقري المعوذتين والإخلاص،راهو العين حق
حنان:إن شاء الله حاضر،صحيتي بارك الله فيك
المزينة:سلمك حبيبتي ولا يهمك،توا شوية يجو البنات بيش يساعدوك في لبس الفيلو
حنان:إن شاء الله باهي
وقعدت تشوف في روحها ع المراية وهي فرحانة،وخشت عليها سامية وفرح وغيداء وتسنيم، مبدلات ومتكمات شعرهم ،سامية لابسة قفطان لونه زي عيونها سماوي،وفاتحة شعرها مدايراته فلو ،شعرها طويل قريب يوصل لركابها ،غيداء مسميتها رابونزل ،ومكياج خفيف
سامية: ماشاء الله تبارك الله،اللهم صل على محمد،وخيتي حنونة احلى عروسة اليوم
فرح: ماشاء الله حنو ربي يحفظك من كل عين حاسدة
غيداء :اعميمة طالعة حلوة متغيرة،وحتى سومتي رابونزل شوفوها ،مع القفطان ولت فروزن،
تسنيم:ماعرفتكش لما خشينا
حنان تضحك عليهم وعيونها مدمعات شادتهم بالسيف.
سامية تضحك :كل مرة تقولي حاجة ...
***
في حوش صالح قبل المغرب بشوية،مشو للصالة كلهم ،ماعادا احلام طبعا في المزين،وسعاد ،خطم عليها محمد ولد ولدها،ورفعها ، وطبعا قاللها عبدو وصاه عليها...
في الصالة طبعا فاضية فيها أهل العروسة فقط،وفيه منهم ماجوش يلي في المزين ويلي في حياشهم،يجهزو في ارواحهم،وفتحية تلود على العاملات ،وتشوف في التجهيزات ناقصة والا لا،والمشرفات مسؤولات على كل شيء في الصالة حتى العشي ،وبعد المغرب بدت الصالة تتعبى،والمعازيم بدو يجو،مع الساعة 8الصالة كلها معبية،والمنظومة تخبط
شوية وجت العروسة ودخلوها ترتاح في حجرة العرائس ،وخشتلها امها وسعاد وكاملة ،و خالتها وعماتها،وشوية وطلعوها بزفة اسماء الله الحسنى،كانت ماشاء الله عليها،يلي في الصالة كلهم يتفرجو عليها وهي خاشة دخلها وسام ولد خوها لابس بدلة ومتكم روحه،ومشت بالشوية لين وصلت مكانها ،والمصورة تصور فيها،وطلع وسام تلاقى مع أمه في الباب ماعرفهاش ،لين هي كلماته وقف مكانه
وسام:كيف عرفتي اسمي وسام
احلام:تضحك اني امك يابارد ،وحولت الخمار من على وجهها
وسام:الله انت ماما متغيرة هلبا امولية ملكة ،خشي خشي راهو العروسة وصلت ودخلتها،اقري ع روحك ياخدوك بالعين
احلام :تضحك وعاجبها الجو ،وخشت ،للصالة الناس تتفرج عليها لابسة قفطان فضي طويل معدس فيه فتحة ومن فوق سير ،وشعرها كاريه وصبغة رصاصية،والناس في يلي معجب وفيه يلي يعجب،خشت ماعرفتش وين تكعمز،لقت طاولة فيها كاملة وكنتها وبنتها،كعمزت معاهم
احلام:مساء الفل شن جوكم،الصالة معبية ماعرفتش وين انكعمز
كاملة:اهو كعمزي هنايا الكرسي فاضي
احلام كعمزت ،وكاملة شادة روحها بالسيف....
فرح شافت صاحباتها ابرار وساجدة وأمهاتهم ،خشو من باب الصالة ناضت تجريلهم فرحت بيهم ،تسلم وتحضن فيهم مستاحشتهم ،ودخلتهم كعمزتهم على طاولة ،ونادت عمتها سامية وعرفتها بيها بيهم ،ونادت جداتها سلموا على امهات صاحبتها ورحبو بيهم اول مرة يشوفوهم ....
وطبعا زهور وامها من الحاضرين ،وكذلك سناء وشهد بنات الحاج محمد،....
****تسريع الأحداث
في نص الحفلة وزعو العشي ،والعروس رقصت وهيجت معاهم،ولما جو أهل العريس بيروحو بيها دارت شوط بكي ثاني،مشت معاها سامية وخالتها وعمتها وكاملة فقط..
والناس كل واحد روح لحوشه ...
****
عند خميس الساعة 2في الليل ،سمر نايضة مدايرة مكالمة دولية ،تكلم في اماليها وهو راقد مايندري عليها من وين زارقة
اتفقت مع خوها ،تجيب يلي في بطنها،وتبيع الحوش وتاخد الفلوس وتهرب ، لكن كيف بيطلقها هذا يلي تخمم فيه
***
ثاني يوم الصبح
فارس ناض على رسالة يقرأ فيها ويعاود مليون مرة ،
ﺇﻧﻨﻲ ﺃﺭﻳﺪﻙ ﻭﺃﺭﻓﻀﻚ ﻓﻲ ﺍﻥ ﻭﺍﺣﺪ ﺃﺗﺠﺎﻫﻠﻚ ﻭﻛﻞ
ﻗﻠﺒﻲ ﻣﻨﺘﺒﻪ ﺇﻟﻴﻚ ﻭﻓﻲ ﻛﻞ ﻣﺮﺓ ﻗﺮﺭﺕ ﺑﻬﺎ ﺃﻥ ﺃﻛﺮﻫﻚ
ﺷﻌﺮﺕ ﺑﺄﻧﻲ ﺃﺣﺒﻚ ﺃﻛﺜﺮ
ايمن ناض شاف فارس مبتسم: صباح الإبتسامة ،ان شاء الله خير
فارس: صباح الورد والفل والياسمين،خير بإذن الله
ايمن: هذا انت فارس والا شخص ثاني
فارس يضحك :لا غولته ، زهور فكت الحظر وفرحاااااان قريب نطير
ايمن:ايوااااااه قول هكي من الأول،المهم ياسي فارس ان شاء الله ع خير
فارس:إن شاء الله
ايمن :خلي انوض نفطر،بيش الحلاق بيجيك للحوش بيحلقلك شفشوفتك،والا تبي تقابل حبيبتك وانت مشفشف
فارس :بالله قوله يجي توا ،وتيلي احلى لبسة ،ومستعد توا نستقبلها كان تجيني
ايمن يضحك:سنفور رومانسي بسلامتك
فارس حذف الوسادة على ايمن:نوض نوض نفاخ
ايمن يضحك عليه وخلاص.......
****
مع العشية
عيلة صالح مشو لحنان ،مدايرلها محضر عائلي، ومشت معاهم زهور بالسيف رفعتها سامية ....
**وفي حوش الحاج محمد
متصل بيهم المعتصم بيروح الاسبوع الجاي،بيش يشوف خوه فارس، الحاج محمد كان في المحل مكعمز يخمم،في ولده فارس،ومرته حشماته مع عيلة الأستاذ عبد القادر،حاير كيف بيدير ،ولده فارس عاطي امل في الله وبوه،بيش الاستاذ عبد القادر ومرته يسامحوهم ،جي بيوقف حس بدوخة،شرب ماء ،وقاعد يحس فيها،روح للحوش طول فتح الباب طاح قدام الباب،سمعو الخبطة ،طلعو البنات وأمهم يجرو ويعيطو......يتبع Amina Mano 😍
امينة العكر
