بنات العيلة الحلقة 19😍
الكاتبة Amina Mano
****
في الليل في حوش صالح،كلهم يجهزو ويرتبو في حاجات القفة والنجمة ،والخيمة غيرولها الديكور جيهة الزمزامات وجيهة الصدارات،وفي الحوش يلي تصدر ويلي تمكيج ويلي تجيد في شعرها.......
فتحية : ياسامية تعالي
سامية :نعم ماما
فتحية :مرت خوك وين ،مش معقولة هكي الناس يسألو عليها حسيتهم مركزين
سامية:بالله عليك معاش ادوري حد ،فرح قالتلي امها مشت المزين بتصدر
فتحية :المغرب قريب يدن ماروحتش
سامية :توا تجي ،ماعاش ادوريها خليها براحتها،السفرجيات وصلو لازم انوريهم أماكن الحاجات
فتحية:إن شاء الله ،وحتى انت بدلي والبسي مش تقعدي في قفطان الحوش
سامية:حاضر ياماما من عيوني
فتحية:سلم هالعوينات يارب......
****
في حوش الحاج محمد
شهد :شن حتى اليوم مش ماشيين ،اهو ماجانا حد
زهرة:جي حد والا ماجاش مافيش مشي
شهد:علاش يام والله خاطري فيه هلبا
سناء:يام اهو اني نمشي معاها شوية ونروحو
زهرة :وحتى انت شكلك خاطرك فيه
ورن تليفونها وكان فارس متصل بسناء
فارس:سناء نوضي من بحدا امي نبيك ضروري
سناء : باهي باهي
زهرة :منو يلي متصل
سناء:بنت معاي في العمل،شوية بس توا انجي
سناء:ايوة فارس شن فيه ان شاء الله خير
فارس:خير خير ،بتمشو للعرس والا
سناء:مااعتقدش لان امي مسكرة رأسها قالت مافيش مشي
فارس:امي خليها عليا،المهم انت وشهد حتمشو للعرس باذن الله ،بس نبي منكم طلب ،قولي لزهور تفك الحظر وتكلمني
سناء:باهي ياامتع الخطط،صار تبي مصلحتك
فارس:لالا عيب عليك بعدين حتى شهد اكيدة شايشة تبي تمشي حشيشتها الأعراس
سناء تضحك:والله باين عليك حاس بيها،لين قريب تبكي تبي تمشي للعرس
فارس عارفها ختشة: خلاص امالا اني توا انكلم بوي توا يخشلكم ويكلم امي ،اعتبري المشكلة انحلت
سناء:اكيدة بتنحل،مدامه فارس خاش فيها على مصلحته
فارس يضحك خيرلك راهو ،خلاص سكري ايمن جي سلام....
شوية وخش عليهم الحاج محمد بيوتي روحه لصلاة المغرب في الجامع
الحاج محمد: السلام عليكم ورحمة الله
ردو عليه السلام
الحاج محمد:خيركم ماممشيتوش للعرس
زهرة: ماعندنا علاش ماشيين الناس خاشة طالعة علينا
الحاج محمد:مافيش حد بيجي كلهم لاهيين في العرس،سناء نوضي انت وشهد وتو رواحكم وامشو للعرس
زهرة:انت شن قاعد تقول ياحاج
الحاج محمد:بالله اسكتي والهي في روحك
شهد من الفرحة قريب طارت،مشت تجري لبوها حضناته وباساته على رأسه:ربي مايحرمني منك يابابا
الحاج محمد:امين يارب العالمين ولا يحرمني منكم
سناء:ربي يطول عمرك بابا
الحاج محمد:يارب
وزهرة ترحي وتسحن
****
عند خديجة
الليلة حفلة تخرج منال في الحوش ،وعازمة شوية من صاحباتها ،وحوش عمها و خوالها،وشوية جيران،مزينة صالة الحوش ودايرة فيها كراسي وطاولات وجايبة منشطة والجو والع مش عادي ،وهذا كله خديجة في حوشها صغارها بس لوطا،ماتبيس تنزل ع خاطر مرت فتحي اتلمح وادير في الجو،استغربت فيها غالية ..
غالية :منال تعالي نبيك
منال :نعم يام
غالية:خيرها خديجة مانزلتش قاعدة فوق،اتصلي بيها تنزل توا
منال :حاضر هي
منال اتصلت بخديجة ،وردت عليها:وينك خديج عطلتي علاش مانزلتيش لتوا
خديجة:والله ماخاطريش يامنولة ،مش نازلة اهوصغاري معاكم ساد
منال :خيرك مريضة والا حاجة
غالية :هاتي جاي التليفون هاتي:ايوة خديجة توا تنزلي اهو نراجي فيك ،لاتقولي مريضة لاسو مافيك شي إنزلي غيري جوك ،خليك قوية ماتعدليش ع حد
خديجة عيونها دمعوا:حاضر غاليتي،شوية وننزل
غالية :هي سقدي روحك اهو نراجو فيك ......
وسكرت الخط خديجة قعدت تبكي،غالية مستغربة وحايرة فيها ..
****
في حوش صالح
الناس بدو يجو والزمزامات قعمزو في مكانهم ،وشبه الخيمة تعبت ...
فتحية لابسة تركيبة ردي وقمجة ،ومتكمة روحها،وتستقبل في الناس والعروسة حنان امكعمزة في الخيمة بحدا الصدارات وتهدرز ،وزهور وامها امكعمزات في الخيمة حتى هما زهور لابسة قفطان تركوازي كم حاير وفاتحة شعرها ومكياج خفيف وامها لابسة تركيبة ردي وتسنيم وغيداء المرة هذه مصدرات لابسات الجلوة اجرتهولهم سامية ومكعمزات مع الصدارات بحدا حنان، وسعاد قاعدة في حوش بنتها تبدل هي وفرح،فرح لابسة الفجرة (لبسة أهل البادية أو مايسمى العبروق) خاطرها فيها جتها مرا لابستها وروحت وسعاد لابسة تركيبة حتى هي..
سعاد:امك هذه مش عارفة خيرها هبلت ،معقولة لتوا ماروحتش والله لما انوريها حشمتني
فرح:ياحنينة والله ماعارفة خيرها متغيرة هلبا الأيام هذه خاصة،مش طايقة حتى واحد فينا
سعاد:خلي يتم العرس على خير بعدين ساهل
فرح :إن شاء الله...
في الدار كانت مرت عمهم كاملة تبدل وبنتها تساويلها في رداها وهي شادة مروحة السعف وتمروح،وسامية لابسة قفطان مغربي زي لون عيونها وظافرة شعرها قرن طويل وتلف فيه بيش تلبس الوشاح
بنت عمها:الله يبارك على شعرك سومة خليه من غير وشاح
سامية :لالا والله ماخاطريش اليوم الحق،غدوة نمشي المزين تتصرفلي فيه أن شاء الله
كاملة:ماتعدليش عليهم البسي وشاحك راهم يضربوك بعين عارفاتهم مصديات كلهم ومحسدية
كلهم يضحكو عليها،قالوللها حرام عليك عمتي كاملة ليه عليك
كاملة:مانعرفكمش ماهو ،هيا سقدو رواحكم اطلعوا الزمزامات قريب يبدو....
وكلهم طلعو برا الخيمة والزمزامات بدو يغنو،والجو نشط ،وعمتكم كاملة كل شوية تنوض ترقص رقص العزايز وتنوض معاها في فتحية وحنان،وشوية خشت عليهم احلام لابسة بدلة كبيرة ومكياج وصبغة شعر جديدة دايرتها رصاصيةتقول عليها عروسة جديدة،وحولت الكاب وكعمزت جنب مرت خوها امال يلي كانت لابسة بدلة صغيرة ،وكلهم يشبحولها....
*****
عند خديجة نزلت لابسة بدلة قونة ودجاكة ولابسة وشاح،البدلة كانت هدية من سالمة ومنال،اول ماخشت ومرت فتحي تفنص فيها،لين كعمزت في الطاولة مع غالية وخوات غالية ،وبدي الجو ينشط،وغالية مرة مرة تنوض مع بناتها ترقص معاهم،وخوات غالية عارفين قصة خديجة .
اخت غالية :ربي يحفظك ياخديجة ماشاء الله عليك قاعدة صغيرة ،ربي يعوضك خير ،اهم شي صحيحتك يابنتي
خديجة :امين يارب اجمعين،وايه والله اهم حاجة الصحة والباقي طز
اخت غالية:ايوة هكي نبيك قوية ياغزالة
ونسجمت خديجة مع هدرزة خوات غالية ،جوهم محلاه والتكعميزة معاهم تنسي الهموم،لكن لتوا قاعدة ماعرفتش مرت فتحي علاش متغيرة هلبا عليها،واديرلها في الشبحات المستفزة....
****
في حوش الحاج محمد
زهرة قعدت بروحها وطيبت العشي ،واتصلت بالحاج محمد بيش يروح يتعشى ويرفع العشي لفارس وأيمن،لكن الحاج محمد عنده جارهم يهدرز عليه في المحل بيعطل شوية،وقررت أنها هي ترفع العشي لحوش ولدها ،وركبت واول ماوصلت فتحلها ايمن الباب
ايمن:اهلين عمتي زهرة يعطيك الصحة علاش متعبة روحك
زهرة:لا تعب لاشي وليدي ،شد الصونية،خلي نخش لفارس ،حق شن حال امك والا قاعدة في مصر
ايمن : الحمدلله كويسة،الاسبوع الجاي تروح أن شاء الله وبتجيك
زهرة فرحت : إن شاء الله تروح بألف سلامة،سلملي عليها هلبا
ايمن :إن شاء الله
ومشت خشت لفارس لاقاته مكعمز في سريره،وكان لاهي في الهاتف ،اول ماخشت
زهرة: السلام عليكم،فارس وليدي شن حالك اليوم
فارس:وعليكم السلام ورحمة الله،الحمد لله اليوم احسن
زهرة:شن مازال مش متحرك
فارس: إن شاء الله ع خير،كل شي بيد ربي،الاسبوع الجاي مراجعة أن شاء الله،بعدها بندير علاج طبيعي
زهرة:وقداش يقعد العلاج الطبيعي بيش تمشي
فارس تعصب وعرفها بتبدأ في جوها:يام معليشي انزلي ارتاحي ،نبي نتعشى ونرقد راسي يوجع فيا
زهرة شبحتله ع الجنب وقفت وطلعت:ارقد تو ينفعك الرقاد ،كان تمسع في كلامي راهو مش هذا حالك
فارس :لاحول ولاقوة إلا بالله العلي العظيم
ايمن لما زهرة طلعت هو خش للدار ،بيش يتعشى هو وفارس
خيرك يا راجل شن فيه
فارس:امي هذه والله بتهبلني
ايمن:ربي يهديها خالتي زهرة واعرة
فارس:كول كول حسني جعان،ماكلة ونوم
ايمن يضحك عليه.....
****
في عرس حوش صالح ،الدنيا تهيج وتشطح مع الزمزامات،سناء تبي تكلم زهور لكن ماعرفتش كيف،فلما شافتهم ينوضو في زهور بيش ترقص ،جتها فكرة ناضت حتى هي بترقص،وشهد حتى هي ناضت مع سناء ،مشو دارو روحهم يرقصو،ولما زهور جت بتمعمز ،سناء جنها تجري ،والدكتورة مريم لما شافتها تعصبت
سناء:زهور معليشي شوية بس
زهور تلفتت :نعم
سناء مدت يدها:كيف حالك زهور ،سامحيني لكن نبيك في موضوع
زهور: الحمدلله حالي باهي ،كان ع فارس الحمدلله على سلامته ،وكل شي بينا انتهى
سناء:لا ماتتسرعيش هو موصيني يبيك تفكي الحظر وتكلميه،بالله عليك عطيه فرصة المرة هذه بس
زهور ساكتة وخلاص،بعدين تكلمت: ايصير خير ان شاء الله
سناء:إن شاء الله
ومشت كل وحدة كعمزت في مكانها
الدكتورة مريم: خيرها سناء شن تبي منك
زهور:ماتبي شي غير تنشد عليا وتأسفتلي
الدكتورة مريم:متأكدة
زهور:بالله عليك يام خلي جوي رايق والله ماخاطريش فيه النكد...
***تسريع الأحداث
اهل العريس وصلو ،صوت الكلاكسات في الشارع ،العروسة خشت الداخل،واهل العريس بدو يخشو وجايبين القفة ماشاء الله ,سوابيت مليانة مش ناقصة حتى حاجة،والنوبة تخبط والدنيا تهيج والألعاب النارية قريب قلعو بيها الشارع،وفتحية تستقبل في أهل العريس ،لين خشو وكعمزوا في مكانهم، والزمزامات بدو ينشطو في الجو العين قالت يامرحب بيه اللي جانا وجاب كساويه،والسفرجية بدو يفرقوا في العبمبر والروزاطة ،والحلويات والشاهي،وفرقو حاجات حارة عشي خفيف مع مشروب،وبعدين طلعو العروسة للحنة،غيداء وتسنيم شادين المراية،وفرح شادة صونية الحنة،والعروسة مطلعينها زوز صدارات من أهل العريس،ودارو بيها والزمزامات يغنو في اغنية الحنة وكعمزوها وام العريس تحطلها في الحنة في يديها. و حطتلها الهدية الشنمبير وفلوس.
ﻣﺪِّﻱ ﺇﻳﺪﮒ ﻧﺤﻨﻴﻬﺎ ﻧﻮﺍﺳﻴﻬﺎ ﺻﻐﻴﺮﻩ ﻭ ﺗﻔﺮﺡ ﺑﻴﻬﺎ
ﻣﺪِّﻱ ﺇﻳﺪﮒ ﻧﺤﻨﻴﻬﺎ ﻧﻄﺮﻓﻬﺎ ﺻﻐﻴﺮﻩ ﻭﺑﺎﺵ ﺗﻌﺮﻓﻬﺎ
ﻭ ﻣَﺰﻳﻦْ ﺍﻟﺤﻨﻪ ﺍﻟﺤﻤﺮﺍﺀ ﻓﻲ ﺇﻳﺪﻳﻬﺎ ﻭ ﺍﺟﻌﻞ ﺍﻟﺴﻌﺪ ﻳﻮﺍﺗﻴﻬﺎ
ﻭ ﻣﺰﻳﻦ ﺍﻟﺤﻨﻪ ﺍﻟﺤﻤﺮﺍﺀ ﻓﻲ ﺇﻳﺪﻳﻬﺎ ﻭ ﺍﺟﻌﻞ ﺍﻟﺴﻌﺪ ﺍﻳﺠﻴﻬﺎ
ﻭ ﻣﺰﻳﻦ ﺍﻟﺤﻨﻪ ﺍﻟﺤﻤﺮﺍﺀ ﻓﻲ ﺍﻟْﻴِّﺪﻳﺎ ﻭ ﺍﻟﺨﻮﺍﺗﻢْ ﺫﻫﺒﻴﺔ
ﻭ ﻣﺰﻳﻦ ﺍﻟﺤﻨﻪ ﺍﻟﺤﻤﺮﺍﺀ ﻓﻲ ﺍﻟﺼﻮﺍﺑﻊ ﻭ ﺍﻟﺨﻮﺍﺗﻢ ﺑﺎﻟﻄﺎﺑﻊْ
ﻭ ﻣﺰﻳﻦ ﺍﻟﺤﻨﻪ ﺍﻟﺤﻤﺮﺍﺀ ﻗﺒﺎﻟﻪ ﻭ ﺑﻮﮒْ ﻋﺰ ﺍﻟﺮﺟﺎﻟﻪ
ﻭ ﺍﺟﻌﻠﮓ ﻳﺎ ﻋﺮﻭﺳﻪ ﺑﺎﻟْﻘﺪﺍﺭﻱ ﻭ ﺍﻟﺸُّﺒُﻮﺏْ ﺍﻟْﺠﻠﻮﺍﻟﻲ
ﻭ ﺍﺟﻌﻠﮓ ﻳﺎ ﻋﺮﻭﺳﻪ ﻛﻴﻒ ﻧﺒﻴﻚ ﻭ ﺍﻟﻌﺪﻭ ﻣﺎ ﻳﺸﻤﺖْ ﻓﻴﻚ
ﻭ ﺗﻬﻨﻰ ﻳﺎ ﺳﻠﻄﺎﻥ ﺑﺎﻟﻐﺮﻳﺒﻪ ﻭ ﺧﺒﺮﻫﺎ ﺍﻟﻨﺎﺱ ﺗﺠﻴﺒﻪ
ﻭ ﺍﺳﺘﻬﻠﻪ ﻳﺎ ﺳﻠﻄﺎﻥ ﺑﻤﻨﺎﻧﻪ ﻭ ﺍﻟﻠﻲ ﺍﻋﻄﻰ ﺍﻟﻠﻪ ﺳﺒﺤﺎﻧﻪ
ﻭ ﺯﻱ ﻣﺎ ﺍﻋﻄﻲ ﻋﺸﺮﺓ ﻭ ﺯﺍﺩ ﻋﺸﺮﻩ ﻓﻴﮓ ﻳﺎ ﺳﻤﺤﺔ ﺍﻟﺒﺸﺮﻯ
ﻭ ﺯﻱ ﻣﺎ ﺍﻋﻄﻰ ﺑﺎﻟﻤﻴﻪ ﻭ ﺯﺍﺩ ﻣﻴﻪ ﻓﻴﮓ ﻳﺎ ﻛﺤﻞ ﻋﻴﻨﻴﻪ
وروحو أهل العريس ،وبدو يدربكو ويغنولها البنات،حبها ماكذبش عليها حبها جاب كساويها ،،جتهم عمتهم كاملة شن الغني هذا وحولو هكي،تعالي ياسهام ،فتحية زودي تعالي انغنو الغني امتاعنا،البنات يضحكو وخلاص،والزمزامات قعدو يشجعو في كاملة وبدت تغنيلهم ياناري الجريدة يادخانها ياوحش البنية لجيرانها،وحنان تبكي
ﻳﺎ ﻧﺎﺭ ﺍﻟﺠﺮﻳﺪﺓ ﻳﺎ ﺩﺧﺎﻧﻬﺎ .. ﻳﺎ ﻭﺣﺸﺔ ﺍﻟﺒﻨﻴﺔ ﻟﻲ ﺟﻴﺮﺍﻧﻬﺎ
ﻣﺶ ﺍﻧﻲ ﺍﻋﻄﻴﺘﻚ ﺑﻮﻙ ﺍﻟﻠﻲ ﻋﻄﺎﻙ .. ﻫﻮﻧﺎ ﻓﻲ ﺍﻟﺴﻘﻴﻔﺔ ﻳﺴﻤﻊ ﻓﻲ ﺑﻜﺎﻙ
ﻭﺍﻟﻴﻮﻡ ﺍﻳﺤﻨﻮﻫﺎ ﻭﻏﺪﻭﺓ ﻣﺎ ﺗﺒﺎﺕ .. ﻭ ﺍﻧﺘﻲ ﻳﺎ ﻋﺮﻭﺳﺔ ﻳﻌﻄﻴﻚ ﺍﻟﺜﺒﺎﺕ
ﻭ ﺍﻟﻐﺮﻓﺔ ﺟﺪﻳﺪﺓ ﻭ ﺍﻟﺒﻴﺒﺎﻥ ﻟﻮﺡ.. ﻭﺍﻧﺘﻲ ﻳﺎ ﻋﺮﻭﺳﺔ ﻳﻌﻄﻴﻚ ﺍﻟﻔﺮﻭﺡ
ﺣﻨﺔ ﻗﺎﺑﺴﻴﺔ ﺟﺎﺑﻮﻫﺎ ﺍﻟﺘﺠﺎﺭ ﻭ ﺍﻧﺘﻲ ﻳﺎ ﺑﻨﻴﺔ ﻳﻌﻄﻴﻚ ﺍﻟﺜﻤﺎﺭ
ﻳﺎ ﻧﺎﺭ ﺍﻟﺠﺮﻳﺪﺓ ﺍﻟﻠﻲ ﺗﺤﺮﻕ ﺣﺮﻳﻖ ..ﻳﺎ ﻭﺣﺸﺔ ﺍﻟﺒﻨﻴﺔ ﻣﻦ ﺧﻮﻫﺎ
ﺍﻟﺸﻘﻴﻖ
ﻭ ﺍﻟﻴﻮﻡ ﻳﺤﻨﻮﻫﺎ ﻭ ﻏﺪﻭﺓ ﻣﺎ ﺗﺒﺎﺕ ﻭ ﺍﺑﻜﻮ ﻳﺎ ﺻﺒﺎﻳﺎ ﻋﻠﻲ ﺯﻳﻨﺔ ﺍﻟﺒﻨﺎﺕ
ﻳﺎ ﻧﺠﻤﺔ ﺗﻼﻟﻲ ﻓﻲ ﻗﻠﺐ ﺍﻟﺴﻤﻲ ﻭ ﺍﻧﺘﻲ ﻳﺎ ﻋﺮﻭﺳﺔ ﻳﻌﻄﻴﻚ ﺍﻟﻬﻨﻲ
ﻳﺎ ﻧﺠﻤﺔ ﺗﻼﻟﻲ ﻓﻲ ﺭﻳﺎﻧﻬﺎ ﻳﺎ ﻭﺣﺶ ﺍﻟﺼﺒﻴﺔ ﻋﻦ ﺟﻴﺮﺍﻧﻬﺎ
ﻳﺎ ﺯﺭﻉ ﺍﻟﺴﻮﺍﻧﻲ ﻭ ﻳﺎ ﺯﺭﻉ ﺍﻟﺴﻬﻮﻝ ﻭ ﺍﻧﺘﻲ ﻳﺎ ﻋﺮﻭﺳﺔ
ﺍﻧﺸﺎﺀ ﺍﻟﻠﻪ ﺑﺎﻟﻘﺒﻮﻝ
ﻭ ﺍﻟﺤﻨﺔ ﻃﺮﺍﺑﻠﺴﻴﺔ ﺟﺎﺑﻮﻫﺎ ﺍﻟﺘﺠﺎﺭ ﻭ ﺍﻧﺘﻲ ﻳﺎ ﻋﺮﻭﺳﺔ ﺍﻧﺸﺎﺀ
ﺍﻟﻠﻪ ﺑﺎﻟﻌﻤﺎر
ﻳﺎ ﻧﺎﺭ ﺍﻟﺠﺮﻳﺪﺓ ﻳﺎ ﺩﺧﺎﺧﻴﻨﻬﺎ ﻳﺎ ﻭﺣﺶ ﺍﻟﺒﻨﻴﺔ ﻋﻠﻲ ﺍﻭﺧﻴﻴﻨﻬﺎ
ﻳﺎ ﻧﺎﺭ ﺍﻟﺠﺮﻳﺪﺓ ﺗﺸﻌﻞ ﻣﻦ ﺑﻌﻴﺪ ﻭ ﻳﺎ ﻭﺣﺶ ﺍﻟﺒﻨﻴﺔ ﻋﻠﻲ ﺧﻮﻫﺎ ﺍﻟﺸﻘﻴﻖ
ﻳﺎ ﻧﺠﻤﺔ ﺗﻼﻟﻲ ﻓﻲ ﻟﻴﻠﺔ ﺍﻻﺣﺪ ﻭ ﺍﻧﺘﻲ ﻳﺎ ﻋﺮﻭﺳﺔ ﻋﻠﻴﻚ ﺍﻟﻠﻪﻭﺍﺣﺪ ....
وكملو ودخلوها و قعدت تبكي الداخل هي وامها وسامية ،وزهور قعدت تبكي معاهم تفرغ يلي في قلبها...
وبعدين طلعو نجمتهم والقنديل ،والناس روحو والباقين يلي بات ويلي رقد ويلي قاعدين يهدرزوا........
***
في حوش الحاج محمد
اول ماروحو سناء وشهد،زهرة مابطلتش تقصقيص،لين هربو منها لدارهم ،ةسناء بعتت رسالة ع الماسنجر لفارس ،بيش تفرحه أنها كلمت زهور وان شاء الله تفك الحظر.....يتبعAmina Mano 😍
امينة العكر
