بنات العيلة الحلقة 15😍
الكاتبة Amina Mano
شهد اتصلت ببوها وكلماته ورد عليها وقاللها أنه في المستشفى فارس مريض وسكر ،وشهد قالت لي امها وزهرة بدت تعيط وتخبط وتلعن في زهور وتقول كله منها كلبة الكلبات هذه ،وشهد تبكي وخلاص،واتصلت بسناء قالتها روحي للحوش فارس مريض ..
روحت للحوش في تاكسي ،من اول ماخشت قعدت تبكي مع امها.
زهرة:اهو خوك مرض كلها من تحت جرايرها والا اشبح شن دارتله السحارة
سناء: لاحول ولا قوة الا ياماما حرام عليك سحر شنو،زهور مستحيل ادير حاجة زي هذه
زهرة:والنبي اسكتي ،وانتم كله مستحيل
سناء شافت لشهد:شن قال عنده من شنو مريض
شهد:والله مانعرف ،قالي في المستشفى وخلاص
سناء :توا اني نكلمه
واتصلت ببوها وعرفت منه القصة وحكت لي امها ،لكن زهرة قاعدة مسكرة رأسها .
*****
عبدو وعماد لما وصلو للمقر بيش يشوفو صاحب الرقم يلي هيثم بعت بيه الرسالة ،طبعا اول ماشدوه الجماعة رفعوه للمقر،وخش عبدو يجري ،شده عماد
عماد:,اعرف كيف تتكلم معاه بيش يعطيك معلومات ،مش طول تخش فيه ضرب
عبدو:تم تم
وخش عبدو وقعد يسأل فيه مع المحقق
عبدو :انت منين تعرفه يلي استعمل هاتفك
الراجل:والله لا نعرفه لايعرفني،جاني في المحل قالي نبي هاتف شوية ،بنكلم بوي ،عطيته الهاتف ،اتصل بيه وردهولي
عبدو تعفلق لين خلاص وطلع وخلاه
عماد:شن صار
عبدو:ماصار شي،الكلب هذا طلع مش ساهل،والراجل مايعرفاش
عماد:ورأسك لمانلقوه ماعنده وين يهرب الكلب هذا
*****
في المستشفى فارس فاق ويحس بالتعب والوجع ويتألم،وكان بحداه الدكتور يفهم فيه في حالته ويكلم فيه ،وقاله إن غدوة العملية وفارس يهز في رأسه مش قادر يتكلم من الوجع ،والدكتور طلع وبلغ ايمن والحاج محمد وخشوله
الحاج محمد اول ماشاف ولده بالحالة هذه عيونه دمعو : الحمدلله على سلامتك يا ولدي غير علاش مداير في روحك هذا كله بس الله يهديك
فارس يشبح لبوه ويبكي وحرك يده يلي مش مكسورة شد يد بوه وبأسها:سامحني يابوي سامحني
الحاج محمد:مسامحك ياولدي مسامحك وراضي عليك دنيا وآخرة ،غير انت ربي يهديك ،كان تهتم بصحتك وتلوح عليك النكد
فارس يتكلم بصعوبة:حاضر يابوي ان شاء الله
ايمن:عاد ياسرك منه الدلع الزايد كترته ع اللزوم
فارس يضحك:هو انت شن جابك اصلا
ايمن:ياسلام كان مش مني راهو الحاج مايندري عليك
الحاج محمد:ايه والله الحمدلله لولا الله وأيمن وليدي ماعرفت مكانك ولاعرفت شن صاير فيك،ربي يحفظك ايمن ويرحم والديك ويفتحها عليك
ايمن :بارك الله فيك باحاج مافيشي جميل على عيني وراسي والله
فارس: ايمن خوي ونصب الثاني ديما حاس بيا،غدوة العملية قالو الحوض مكسور ،نحس فيه يوجع فيا لين خلاص
الحاج محمد: معليشي وليدي تحمل وخلاص باذن الله ادير العملية وتطلع من المستشفى وتولي احسن من قبل
فارس:امين يارب العالمين
ايمن :أما اقوى وجع ظهرك والا قلبك
فارس فهم عليه وضحك :بالله عليك اسكت فكني منك
ايمن :شفته باحاج والا شفته شن يقول هذا جزائي
فارس:من لسانك
الحاج محمد يضحك عليهم وخلاص...
***
في حوش صالح مجتمعين مع عبد الرحمن يكلمو فيه يبوه يروح بي احلام ،وهو مسكر راسه
صالح :اسمع من غير عناد ،تمشي تروح بمرتك وانت ساكت،شن تحساب روحك ،مش صغير انت شغل دماغك
فتحية:الصغار كل يوم ينشدو فيا يبو يمشو لي امهم ويقولو خيرها ماروحتش
عبد الرحمن:اصلا هي مهملة ومنكدية ،كان فالحة راهو قعدت في حوشها،اني معاش نقدر نتحمل أكثر من هكي
صالح :تحمل شن معاش تتحمل علاش متزوج من الأول مادامك مش قد المسؤولية
عبد الرحمن قعد ساكت معاش تكلم
فتحية: خلاص اسمع كلام بوك وبرا روح بيها ارفعلها الصغار توا يقنعوها
عبد الرحمن وقف وقال إن شاء الله ان شاء الله،قولي للبنات يوتولي الصغار توا نرفعهم...
****
عند خديجة حاصلة في حلويات العيد طبعا اخرلها يوم وبتسكر الحجز لبعد العيد ان شاء الله
منال : خدوجة بعد العيد حفلة تخرجي نبي اندير حفلة في الحوش ،ونبي حلويات من تحت يدياتك
مريم بنت خديجة :اكيدة منولة اصلا بنديرولك حلويات هدية صح ماما والا
خديجة تضحك على بنتها:اكيدة هدية واحلى هدية ،وانت من يوم صاحبتي منال لسانك ولا مطلوق
منال:تضحك نجيهم ليا ياربي ولا تحرمني منهم ،عادي خلي تنطلق تولي ناشطة وفالحة في الدوة زيني
خديجة :,ياريت والله تطلع زيك طيوبة وحنينة ودكتورة قد الدنيا
منال :إن شاء الله يارب وتكون احسن مني ،حق بنقولك
خديجة :شن فيه ان شاء الله خير
منال:سالمة اختي في واحد بيخطبها محامي كبير ماشاء الله عليه ،وقاعدة تفكر ع خاطر متزوج عنده 4صغار مرته متوفية ،وامي تبيك تكلميها بالك تسمع منك
خديجة: ماشاء الله تبارك الله،مدامه الراجل كويس علاش قاعدة تتوكل على ربي والصغار اديرهم زي صغارها
منال :اصغر ولد يقرا ثانوي والباقين في الجامعة ،عايشين مع حوش جدهم متعودين عليهم ،وعنده بنته الكبيرة مخطوبة وهو قاعد بروحه
خديجة: خلاص امالا توافق تتوكل ع ربي
منال :مشكلة اختي سالمة كبرت وفي الأربعينات وقاعدة وتتشرط
خديجة:من حقها تتشرط الزواج مش بالعمر ،الزواج اختيار الشخص الصح يلي تعيش معاه مرتاحة
منال:والله عندك الحق خديج ،ربي يحفظك ،المهم انتي كلميها
خديجة :ان شاء الله ويحفظك يارب,والعقبة ليك حتى انتي
منال:امين يارب العالمين،ووووك ظهري تكسر امتى بيتم هذا
خديجة وبناتها يضحكو على منال ،جوها حلو والحركات اضحك فيهم متونسين بيها ....
****
عبد الرحمن رفع الصغار لي حوش انساباته هما خشو لي امهم وهو خش المربوعة ،مع بو احلام
وسعاد اتصلت بي احمد ولدها قالتله اسمع كان قاعد في الحوش تعالى راجل اختك عندنا وجاي بيروح بيها،مانبيش بوك بروحه ،خايفة يقوله لا مانردهاش،لازم تجي
أحمد:خيرها ديما بعمايلها هي ،لحظة توا نجي....
والصغار سلمو على أمهم ،وكانو مستاحشين أختهم فرح أكثر حاجة
غيداء :الله فروحة استاحشتك هلبا هلبا امتى بتروحي عرس أعميمة حنو بعد العيد
فرح : إن شاء الله من اليوم بنروح معاكم ،حنينة سعاد قالتلي روحي مع امك بعد العرس ولي
احلام:ماعندك علاش مولية ،الحوش كله ع راسي ،روحي عاونيني ع الأقل
سعاد :اللطف ياربي اللطف ،امالا لما تتزوج من بيعول عليك ماهو بروحك
احلام:وقتها ساهل اهي غيداء
غيداء:لا اني بنقعد عند حنينة توحة ،واعميمة سومة
احلام:سمعتي يام والا سمعتيها شن قالت هذه ربياتهم اصلا
غيداء:نحبهم هلبا وكل شي يجيبولي فيه
احلام:والنبي نوضي من قدامي ماتقولش عليها بنتي بكل
غيداء عيونها دمعو
سعاد :ياسر من الهبال وخلي البنت ،شن فيها هذوم جداها وعمتهم بالله ياسر منه الجو يلي اديري فيه ،ياريت تنوضي تلمي قشيشك وتروحي مع راجلك
احلام:صار تبي تليزيني يام باهي باهي
سعاد:افهمي كيف ماتفهمي،فرح نوضي ديري قهوة لبوك وجدك....
-في المربوعة
سالم :اني والله مافاهم حاجة ولا عندي علم بشي ،نحسابها جاية تهدرز
عبدو :لا ياعمي جاية حرجانة ،ماتبيش نضرب الصغار ولا نكشخ عليهم ولا شي
وخش عليهم احمد: السلام عليكم ورحمة الله كيف حالك عبد الرحمن
عبد الرحمن:عليكم السلام ورحمه الله الحمد لله وانت كيف حالك
احمد :الحمد لله كويس بخير شن حال. بوك وامك والعويلة
عبد الرحمن: الحمدلله بخير
سالم:احمد شوف اختك قال جاية حرجانة واني نحسابها جاية تهدرز خش شوفها كلمها علاش حرجانة
وخش احمد لي أخته ونادى عليها بروحها،وسألها وكلمها ،وقاللها مافيش اي عذر من كلامك وروحي لحوش راجلك،طبعا احلام تخاف من خوتها أكثر من بوها،ورجع احمد المربوعة وقال لعبد الرحمن،خلاص غدوة تروح هي والصغار أن شاء الله......
****
والحاج محمد روح من المستشفى واول ماروح تلاقاته زهرة من الفم
زهرة :وين فارس ولدي وينه علاش ما خليتناش نجوه للزيارة ونشوفوه
الحاج محمد:مش لازم تمشو قسم رجال مافيش داعي تمشوله كلموه حتى من الهاتف ،وبعدين ايمن قاعد معاه
زهرة:باهي قولي شن فيه طمني
الحاج محمد:ع الأساس هامك انتي ،ماهو كله من تحت راسك ومن جرايرك ولدك طاح من الدروج تكسر لولا لطف الله راهو مشي فيها ومن غير حتى واحد ينديري عليه
زهرة:لا عاد ماتحطش اللوم كله فوق راسي ،حتى العقرب يلي يبيها هي يلي خلاته هكي
الحاج محمد: لاحول ولاقوة إلا بالله العلي العظيم والله مافي عقرب الا انتي،حولي بالله خلي نرتاح بنوليله الصبح عمليته أن شاء الله..
سناء مشت لحقت بوها للدار ،وشهد خشت للكوجينة تسخن لبوها في عشي،من الصبح ماروحش للحوش
سناء باست راس بوها:طمني عليك قبل كل شي حالك باهي
الحاج محمد: الحمدلله حالي باهي يابنتي
سناء:دوم يارب ربي يعطيك الصحة وطول العمر يارب
الحاج محمد:امين ويحفظكم ليا ويفرحني بيكم
سناء:يارب العالمين،بابا قولي فارس كيف حاله
الحاج محمد: الحمدلله غدوة عمليته على الحوض ويده ورجله. ممكن بيديروله بلاتين
سناء دمعتها في عينها :إن شاء الله ينوض بألف سلامة يارب العالمين
الحاج محمد:امين يارب....
***
ثاني يوم الحاج محمد ناض بكري وصلى الفجر وقري قرأن رفعه ايمن من الصبح بكري للمستشفى ،خش على فارس قبل ما يدخلوه للعمليات ،وقعد يصبر فيه ويقرا عليه في قران ويدعيله لين دخلوه لغرفة العمليات.....
***
في حوش عائلة احلام
كانو مكعمزين في الجنان يفطرو مع بعضهم ،احلام وصغارها وامها وبوها وعلية خوها وصغار خوها ،طبعا معادا محمد مستحيل يكعمز معاهم ،وتسنيم وغيداء لاصقات في بعضهم ديما مع بعض وعاد غيداء ليها فترة ماجتش لحوش جدها مستاحشات بعض...
وسام يشبح لناصر كيف ياكل داير زوز فرادي خبزة ومق كبير عصير
ناصر :يام زيدي فردة ثالثة وربي ماشبعوني حسيتهم صغرو فيها الخبزة
وسام :شن التمساح هذا ماخلا شي
ناصر بعصبية:نعم نعم شنو تقول ماسمعتش عاود شن قلت
سالم :كولو وانتم ساكتين
ناصر:ماسمعتاشي شن قال المسلوع هذا
سالم :عيب انت وياه معاش تتعاركو
ناصر وقف :اني معاش بنتعارك مع حد ولا انزل مستواي للتافهين مع احترامي ليك جدو
وسام :انت تافه يابو كرشة
ناصر:بو كرشة خير من منظرك تقول انثاية
احلام وقفت وجتهم :ناصر احترم نفسك شن هذا من تحساب روحك
امال :عيب ياوليدي اسكت
سعاد :طول النهار وهما يتناقرو ياغيبة عبدو بس
ناصر:محترم وغصبا عليكم ولدك قليل ربابة ،يام يام هاتي شكارة الخبزة بنرفعها كلها اني يلي نايض من الفجر ع خاطر نجيبهالكم سخونة بس خسارة فيكم خونة كلكم
فرح وغيداء وتسنيم بيموتو من الضحك
ناصر مشي جيهة شكارة الخبزة بياخدها جداه شداته :والله ماناك رافعها برا امشي
سالم :عيب ياولد
ناصر:اني ع خاطر كلهم جو ضدي معادا سلومة الغالي ،ياريتني كليت معاه العصيدة وخليتكم بلا خبزة
سعاد:لالا انت احسن واحد كل يوم تجيب فيها سخونة
ناصر:لا توا معاش بنجيبهالكم خلو المستكة ايجيبهالكم
وسام يقلب في عيونه ويعجب فيه
ناصر:ياحربة
احلام تعفلقت وجبدت ولدها وخشت الداخل،اما امال قعدت ساكتة وتحلف في ولدها
سالم : خلاص كعمز وارتاح تشحط في عروقك ع الصبح،ماعندي ليك جهد
قعدو يضحكو عليه وهو كعمز متعفلق ،وقال لي أمه ديريلي زوز نفاص ثانيات جرحولي مشاعري والجرح وصل لي اعماق المعدة
امال :كان كل مجروح زيك معاش تسده كوشة بحالها
قعدو يضحكو عليه ،هو صح ناصر مكتره ومدايرلهم جو لكن ولد احلام مستفز هلبا....
****
وبعد مامرو ساعتين ونص ،طلعو فارس من غرفة العمليات ،لكن مأثر فيه البنج،والدكتور طمن الحاج محمد وأيمن ،العملية نجحت وباذن الله خير،الحاج محمد من الفرحة قعد يبكي ودار سجدة شكر لله ،ودخلو فارس للغرفة ،وكعمز معاه ايمن والحاج محمد ...
****
وقت الظهر كانت سناء طالعة تشري في حاجات بترفعهم لفارس وقت الزيارة في المستشفى ،تلاقت مع زهور صدفة في نفس المحل واول ماشافتها مشتلها
سناء : السلام عليكم زهور كيف حالك
زهور :تلفتت وعليكم السلام ورحمة الله الحمد لله وانت
سناء : الحمدلله بخير ،اني اسفة على يلي دراته امي رانا مش راضين ع يلي داراته
زهور ساكتة وخلاص
سناء :عارفاتك وحاسة وبيك انك مش متقبلة حد منا،لكن فارس طاح من الدروج وتكسر وهو توا في المستشفى ،عارفة انك ماعاش تكلمي فيه ،لكن فارس قاعد يبيك من يوم يلي صار ماروحش للحوش ع خاطرك انت يازهور ،وتوا نستأذن منك
وسناء مشت طلعت من المحل وخلت زهور في صدمة ، زهور اول ما روحت للحوش خشت لدارها تبكي وخلاص. امها وبوها مهناش ...
***
في حوش صالح كيف درست السيارة احلام مروحة هي وصغارها ،غيداء وفرح نزلو من السيارة خشو طول لحوش جدهم واحلام وولدها وسام ركبو دبشهم للحوش فوق
فتحية :فرح بنتي استاحشتك هلبا
فرح :حتى اني والله استاحشتك هلبا حنينة
سامية : ماشاء الله تبارك الله على الزينة لبست شارية وتحجبت
فرح :ايه ياعميمة تغيرت تحجبت ونقرا حتى في الجامع
فتحية :ماشا الله امصلي ع النبي
سامية :بنديرلك حفلة يوم موسم العيد هذه مناسبة تستحق حفلة
فرح تبكي:سبحان الله أعميمة،ماما اول ماشافتني ،كشت في وجهي قالتلي هذا شنو يلي لابستيه هي عباية وشاربة
فتحية:ربي يهديها امك هذه
سامية :معليشي معليشي
غيداء:وين حنو
سامية:حنان تخدم قريب تروح
فرح:والله استاحشتها استاحشتكم كلم وين جدي
فتحية :توا يجي طالع اكيدة يصلي الظهر في الجامع ويروح
وقعدو يهدرزو وماركبوش لي امهم واحلام تسحن في حوشها ....يتبع Amina Mano
أمينة العكر
