بنات العيلة الحلقة 4😍
الكاتبة Amina Mano امينة العكر 😍
في حوش عيلة الحاج محمد وقت العشية كانت زهرة امكعمزة هي وبناويتها سناء وشهد يتفرجو على مسلسل وكان في رأسها موال وحاطة قصة زواج ولدها فارس في راسها وشوية واتصل بيها ولدها المعتصم بهاتف سناء اتصال بالكاميرا ع الماسنجر وسناء فتحت الكاميرا وشهد نقزت تجري بتشوفه وتأشرله بيدها وزهرة فاقت من سرحانها
المعتصم :السلام عليكم كيف حالك سنو كيف حال امي وبوي وفارس وشهد
سناء : الحمدلله كويسين انت كيف حالك طمنا عليك وينك عاش من شافك
المعتصم:والله مشغول قراية وخدمة مافيش فضوة
زهرة :بصوت عالي ايه مافيش فضوة لي اماليك والا كان معاش تتصل خير
المعتصم سمعها يضحك عليها:خيرها ست الحبايب باين عليها راقيلها
سناء تضحك هي وشهد:ايه راقيلها ماهو عارف انت
شهد:روحلها بعروسة أجنبية بالك ترضى عليك
زهرة:طيح سعدك هذا كلام تقوليه هذا ماناقص غير كنة أجنبية
وكلهم يضحكو عليها
المعتصم :بالله هاتيهالي خلي نشوفها انهدرز عليها
ومدت سناء الهاتف لي امها وعمتكم زهرة لاوية شواريها
المعتصم :كيف حالك يام والله مستاحشك هلبا هلبات
زهرة :حالي الحمدلله وحتى اني استاحشتك ياوليدي وانت شن حالك تاكل كويس وترقد متهني راهو رايح ضاعف خيره وجهك هكي رايح
وكلهم يضحكو عليها خاصة شهد وسناء
المعتصم :من القراية والخدمة والله من الصبح واني برا الحوش لين يجي الليل بيش نرتاح
زهرة:ماهو كان تروح لبلادك خيرلك من هالتعب والشقا وتتزوج وادير حوش
المعتصم:وين يام البلاد بالله شن هو يلي فيها لاخدمة و لا معاش هو حتى الضي بالهون وكيف بنتزوج لا حوش لاخدمة لاسيارة
لالا خليني هنا متريح اهو عندك فارس زوجيه
زهرة :عليك مكلوب انكلم فيه توا وضع البلاد عندك فيه الحق لكن شن دخلك في فارس توا ندوي في موضوعك انت والا
المعتصم:اني مازال يام مانبيش نتزوج سامحيني لين انكمل قرايتي ونضمن مستقبلي واندير حوش بعرق جبيني
زهرة:اهو كمل هنايا واخدم اي حاجة
المعتصم:لالا مستحيل يام سامحيني فيها حق وين بوي نبي نشوفه
زهرة :زيد تهرب زيد سيورك تحصل بوك في الدكان ماهو عارفه ديما مغطس رأسه في الدكان
المعتصم يضحك:ايه عنده الحق خليه يخدم يضمن مستقبله بيش يتزوج الثانية
زهرة:شنو الكلام هذا طيح سعدك مش عارفة لمنو طالع الولد هذا توا بعد هالعمر هذا كله ياخد عليا خزي عليك الحق فيا اني
المعتصم:هدي اعصابك غير مش هكي بوي قاعد شباب
زهرة:بالله برا والله رقيتهالي وحرقتلي دمي تي والله كان ايديرها نذبحه هو وياها ومعاش يخشلي حوش
المعتصم ميت بالضحك:اقوى عليهم زهورة
زهرة:قال زهروة قال يحسابني انديدته امشي برا امشي هذا ماناقص
وكلهم يضحكو عليها وهي متعفلقة وشهد خدت من أمها الهاتف
شهد:اسمع عصومي المرة هذه جيبلي قفاطين اعراس وحفلات والله ماخصني فيك
المعتصم:عرس منو أن شاء الله
شهد:عرسك انت وفارس
المعتصم:لا اني لا فارس بس ويضحك باهي هيا بسرعة بنسكر شن تبو ثاني
سناء:روائح وشاربات زي يلي مرة جبتهولي
شهد:نبي شنطة جديدة
المعتصم:حاضر من عيوني هي عندي خدمة باي توا
سناء:في امان الله ربي معاك
شهد:بااااي
وسكر الخط وقعدو يضحكو وخالتكم زهرة لاوية وجهها بعدين قالت ياسناء تعرفي شبه لاقيت عروسة تمشي مع فارس
سناء:من هي وبعدين كان يبي بنية ثانية شاوريه قبل
زهرة:حتى لو شاورته مش رح ناخدله برانية
سناء استاكت وشبحت لشهد لأنهم عارفين فارس يبي زهور ويحبها..
زهرة:خلي يروح على خير بعدين نتفاهمو وانتم مادخلكم في شي
سناء:باهي من هي العروس يام خاطري نعرفها
زهرة: نرجس بنت خالك سالم الله يرحمه بنية وحيدة يتيمة قاعدة مع جدتها ام أمها بنية الله واحد عليها زين وفلاحة علاش نخلي فيها للبرانية
سناء:نرجس قاعدة صغيرة يام حرام نظلموها بعدين فارس اكيدة عنده بنت يبيها
زهرة:ومن قال عنده وبعدين وكان صغيرة يامامنهم تزوجو صغيرات تو يربيها على يديه وعلاش خيرنا يمشي لغيرنا
سناء يام افهمي هذا زواج مش لعب نرجس ماتمشيش مع فارس الوقت هذا مش زي وقت زمان
زهرة:والنبي اسكتي نوضي من قدام وجهي انت وياها توا تعرفو خير مني
ناضت زهور وشهد وهما ساكتات ومتعفلقات على امهم .....
في حوش عيلة صالح بعدما فتحية اقنعاته بشياط الريق بيش يرفع البنات للسوق وطبعا كانت فرحة كبيرة بالنسبة لسامية يلي بوها وخوها حابسينها في الحوش هكي وخلاص...
وطبعا وصلو للسوق البنات وأمهم وكانو فرحانات ويشرو ويختارو على اماعين على قضية أو سبيزة ونفس الوقت زهور وامها كانو في نفس السوق وفجأة سامية شافت زهور قعدت واقفة تشبحهلها صديقة عمرها يلي انحرمت من التواصل معاها سيبت يلي في يدها ومشتلها طول تجري
فتحية:سامية وين ماشية
حنان :خيرها هذه تجري وماتسمعش فيك حي يام شوفي زهور
سامية وصلت في زهور وتبكي :زهور ياغاليتي ياوخيتي ياصاحبتي
زهورتلفتت وراها وزي يلي عرفت الصوت قعدت واقفة متجمدة في مكانها وساكتة موقف صعب وسامية ورت وجهها لزوهور لان سامية تلبس في خمار
سامية :زهور عرفتيني
زهور طول اضبطتها وبدو يبكو وأمهاتهم يبكو معاهم والناس يلي يخطم يتفرج ومش فاهمين شي ،بكت سامية لين طاب خاطرها
سامية :وينك زهور لاعاد دورتيني والاحتى نشدتي عليا ولاعاد تجيني للحوش
زهور :والله اخر مرة جيتك فيها لاقيت خوك ومرته قدام الباب قالولي سامية معاش تبي حد يجيها وروحت وزعلت منك وبكيت
سامية:الله لا يربحهم هالكذابين حسبي الله ونعم الوكيل فيهم
زهور:قصدك معناها كذبو عليا
سامية :اكيدة كذبو عليك تصدقي خوي وبوي من اول ماروحو بيا خدو تليفوني وخلوني لاطلعة لاخشة قريب هبلوني
زهور:حسبي الله ونعم الوكيل والله ماكنت نحسابه هذا كله صاير معاك ياوخيتي وحضنتها وقعدو يبكو ثاني
وام زهور وأم سامية وحنان وقفو في جيهة بروحهم ويهدرزو ودموعهم ينزلو على حال سامية وخدو ارقام بعض
زهور :خودي رقمي خزنيه وكلميني عليه خلي نهدرزو
سامية:منعوه عليا الهاتف خودي رقم حنان
زهور:تمام وان شاء الله رح نكلم بابا ايديرلك حل معاهم هذا الوضع ماينسكتش عليه
حنان:والله ياريت الأستاذ عبد القادر شخصيته قوية اكيدة يقنعهم اني وأمي والله تعبنا جرتهم
ام زهور:لاحول ولا قوة الا بالله العلي العظيم ربي يفرجها عليك يابنتي
سامية: امين يارب العالمين
وسلمو على بعضهم بالاحضان وروحو......
عند مصطفى ولد خميس يخدم في فندق ويبات فيه الصبح يقرا واول ما يروح يخش يخدم فكر أنه لازم يمشي لي أمه وبوه مش موجود في الحوش فقرر أنه ياخد إذن من المدرسة ويجي يشوف أمه وخوته واول ماخبط على الباب كان خايف من بوه لكن خوه الصغير هو يلي فتحله الباب وقعد يضبح بصوت عالي ماما مصطفى جي ياماما
خديجة قعدت تبكي وجت تجري تحضن في ولدها :غير علاش يامصطفى مشيت وخليتنا بس علاش والله طلعتك من الحوش مش حلوة بكل مخلي مكانك فراااااغ
مصطفى باس راس امه:سامحيني يام بس هذا يلي لازم ايصيرتعبت من المشاكل لازم نركز في قرايتي مش تبيني انولي دكتور ياماما وتفرحي بيا
خديجة مسحت دموعها:ياربي يوفقك واينجحك ونشوفك احلى دكتور قد الدنيا وترفعلي راسي
مصطفى:امين يارب العالمين ياماما اني جاي نشوفك انت وخوتي وجبتلك فلوس وهاتف صح هو بيلة لكن واصليني بيه مش تخلي بوي يشوفه ويبعيه زي هاتفك الأول ديما خليه صامت ودسيه في مكان بوي مايعرفاش
خديجة تضبط في ولدها:يارب نحمدك ونشكر ك على احلى هدية وهي وليدي مطصفى يارب يحفظك ليا وين ماكنت تعرف خوتك كل يوم يسألو فيا عليك
مصطفى:امين يارب العالمين حتى اني والله مستاحشهم كل يوم نفكر فيهم وباذن الله كل مانفضى نزورهم في المدرسة والانجيكم هنايا
خديجة:ربي ما يحرمنا منك
مصطفى:ولايحرمنا منك ياغاليتي هي توا لازم نولي للفندق باذن الله نزوك ثاني يام
خديجة:رد بالك على روحك ربي يبعد عليك بنات وأولاد الحرام يارب العالمين
مصطفى باس راس امه :يارب العالمين....
في الجامعة كانت فرح بنت عبد الرحمن امكعمزة في الجامعة هي وصاحباتها ساجدة وابرار يهدرزو وفجأة خطم من قدامهم شاب وشاف لفرح وقعد ينادي عليها......أمينة العكر
الكاتبة Amina mano
في الجامعة كانت فرح بنت عبد الرحمن امكعمزة في الجامعة هي وصاحباتها ساجدة وابرار يهدرزو وفجأة خطم من قدامهم شاب وشاف لفرح وقعد ينادي عليها ويأشرلها بيده معنى تعالي نبيك شوية بس
ابرار :خيره هذا ينادي عليك تعرفيه
فرح شبحتله:لالا مانعرفاش اول مرة نشوفه
ساجدة:ماتمشيلاش فوتيه واضح عليه من شكله واحد فاضي
فرح شبحت لساجدة ع الجنب:علاش فاضي شوفي لبسته تهبل حسني بنمشيله
ابرار تضحك:بري ياحنة بري بالك تشد معاك ونحصلو عرس
فرح تضحك:زعما
ساجدة:من رأيي فوتيه خير واريحلك الوقت هذا مافيش امان
فرح:بالله اسكتي ياساجدة وانت ديما مسكرتيها خلينا نحبو الناس كلها تحب
ساجدة :خلاص اهو سكتت امشيله اهو قدامك وحبي زي ماتبي على قولتك
فرح رفعت حاجبها وشبحت لساجدة شبحة زي السم طبعا طالعة لي امها احلام ومشت للشاب...
فرح بحشم متصنع :السلام عليكم خيرك تنادي عليا أن شاء الله خير
الشاب:وعليكم السلام اني هيثم نقرأ لغات كل مانفوت من هنا نشبح فيك والله عاجبتيني يابنت الناس م الأخير
فرح من داخلها قريب اطير من الفرح :تسلم هذا من ذوقك تشرفت بيك والله
هيثم :الشرف ليك ياحلوة خودي رقمي خلينا نتواصلو معاك ونزيدو نتعرفو على بعض اذا مافيش ازعاج
فرح :لالا عادي وعلاش ازعاج خود حتى اسم ايميلي الفيس كلمني عليه
هيثم:تمام ياحلوة اعطيني اسم ايميلك ...
وخدو ارقام بعض وايميلات بعض ..
هيثم: توا بنمشي في الليل نتصل بيك ان شاء الله والانبعتلك رسالة على الماسنجر تمام
فرح :تمام
هيثم: باي ياحلوة
ومشي هيثم وفرح قريب تهبل من الفرحة ومشت تجري لصاحبتها
فرح: اووووووه عليا يابنات شدوني قلبي قريب طاح
البنات يضحكو عليها
ساجدة :قلبك من يومه طايح انت
ابرار:عريسك جاك فرحتي وين عريسك جاك
ومشي جوهم كله هدرزة وضحك ...
***تعالو نعرفكم على الشخصيات الجديدة صاحبات فرح ابرار بنت طيبة وجوها مليح ديماتضحك وعلى نياتها عندها خوت وخوات، وساجدة بنت شخصيتها قوية ونفس الوقت محبوبة هلبا عند الجميع وتحب تساعد الناس وحتى هي جوها حلو وراس بنت ماعنداش لاخوت ولاخوات عايشة مع بوها وامها، هيثم شخص مغرور واناني يحب البنات بمعنى صايع ويحب يلبس ويتأنق وعائلته من الناس يلي حالتهم ولت فوق الريح بعد 2011 ....
**في حوش الأستاذ عبد القادر كانت زهور امكعمزة في دارها وتصلح في كراسات الطلابة وتراجي في رسالة من فارس يلي ليه يومين واصل لجنوب أفريقيا وماكلمهاش وفجأة جاها مسج على الماسنجر فرحت وفتحت الرسالة..
فارس: ﻻ ﺃﺳﺘﻄﻴﻊ ﺍﻟﺘﻮﻗﻒ ﻋﻦ ﺍﻟﺘﻔﻜﻴﺮ ﻓﻴﻚ . ﻓﻲ ﻛﻞ ﻣﺮﺓ ﺃﻓﻜﺮ ﻓﻴﻚ ،ﻳﺒﻜﻲ ﻗﻠﺒﻲ ﻣﻦ ﺃﺟﻠﻚ . ﺃﻓﺘﻘﺪﻙ ﻛﺜﻴﺮًﺍ
زهور:ﻟﻴﺲ ﻫﻨﺎﻙ ﻣﺎ ﻫﻮ ﺃﻛﺜﺮ ﺃﻟﻤًﺎ ﻣﻦ ﻋﺪﻡ ﻭﺟﻮﺩﻙ ﺑﺠﺎﻧﺒﻲ . ﺗﻌﺎﻝ ﻗﺮﻳﺒًﺎ.ﺍﺷﺘﻘﺖ ﻟﻚ ﻛﺜﻴﺮًﺍ، ﺣﺒﻴﺒﻲ
فارس :محلاها منك ربي ما يحرمني منك كيف حالك طمنيني عليك
زهور: الحمدلله وانت والله استاحشتك وكل ساعة ودقيقة نفكر فيك انشغلت عليك هلبا
فارس:وانت ماغبتيش من بالي ولاثانية احكيلي شن جوك وشن درتي في غيابي عارفك عاقلة لكن احكيلي
زهور تضحك عليه:حالي الحمد لله ونفس الوقت فرحانة هلبا أمس لاقيت صديقة عمري صدفة في السوق واليوم رسالتك انت زادت كملت فرحتي
فارس:الله الله أن شاء الله دوم فرحانة وطالعة تدهوري صار
زهور:وحتى انت يارب ايه وبعدين امتى بتروح
فارس :مازال والله بعد شهر رمضان ان شاء الله
زهور:بتصيم غادي ياخسارة الصيام مع العائلة احلى
فارس هو احلى لكن الظروف تحكم ماهو كان متزوجين راهو ماسافرتش بكل
زهور: زعما والا غير كلام
فارس كلام عينك يامهبولة...
وقعدو يهدرزو ويضحكو قريب ساعة أو اكثر ......
**وفي حوش عيلة صالح اليوم احلام كنتهم جاية تهدرز عليهم نازلة بالسيف وهما متحملينها بالسيف وتهدرز وتلقح في الدوة..
احلام:تعرفي يامرت عمي ياريت عبد الرحمن كمل بني الحوش قبل رمضان صغاري كبرو وكل واحد يبي دار بروحه
فتحية:إن شاء الله توا يكمله بالشوية بالشوية خلي يتحملو بعض علاش مستعجلين
احلام وهي تتكلم بإستفزاز وتلوي في حناكها وتشقلب في عيونها :بصراحة يامرت عمي حتى اني مستعجلة مش مرتاحة الحق
فتحية:وعلاش يابنتي أن شاء الله خير
وخشت عليهم حنان بسفرة القهوة :والله والله يااحلام عندك الحق لأن حتى احني مش مرتاحين نبو الوسع
احلام رقالها وفهمت التلقيحة: ايه ربي يفرج ،تعرفي مرا تخدم معاي شدو بنتها امدايرة عيد ميلاد في فندق دايرهولها واحد يخدم مليشيات وخش عليها خوها جبدها من شعرها هكي وقعد يضارب هو وياهم خوها ضرب الولد بالموس والبنت خوتها حتى هما مليشيات
فتحية:اللطف يارب شن الناس هذوم يارب سترك
سامية :ربي يهديهم ويهدينا ويسترهم ويسترنا
احلام:امين يارب والله كان بنتي نقتلها قتل ولا نخليها تاخد عسكري بيش يموت وتقعدلي في رقبتي اني
سامية حسيتها في قلبها ودموعها قعدو في عيونها وجعها خاطرها من كلام مرت خوها لأن راجل سامية عسكري ومستشهد في الحرب
فتحية:لا فيه فرق بعدين العسكرية بروحهم والمليشيات بروحهم معاش تخلطي
حنان:يلي يحكي على الناس راهو يجيه يوم وربي يحطه في نفس الموقف
احلام تشقلب في عيونها :إن شاء الله ربي مايحطنا في مواقف زي هذه هي نستأذن بنطيب العشي بندير بيتسا نبعتلكم منها
فتحية:لا ماتعبيش روحك حتى البنات اليوم بيديروها
احلام :باهي صحتين هي سلامات
وطلعت بعدما وجعت خاطر سامية يلي قعدت ساكتة وخلاص وقريب تبكي وحنان قعدت تعلق على حركات احلام
كيف تدوي وتتشقلع لين سامية ضحكت ..
فتحية تضحك :والله كان نعرف من شنو مخلوقة المرا هذه حتى ذرة احترام واخلاق ماعندها
حنان:قولي لولدك يام يلي جايبها مش عارفة شن عجبه فيها بس
سامية :معليشي نصيبات ربي يهدي وخلاص
حنان:شفتي يام ربي يعطيني وسعة البال يلي عند سامية ....
**في حوش خميس خديجة بنتها الصغيرة مريضة عندها حرارة عمرها 3سنوات اصغر وحدة في صغارها وخميس شي ولا قال نرفعها نعاينهاامكعمز يتفرج على فيلم زي وجهه مش محترم حتى مرته وصغاره ويشفط في الرقيلة
خديجة:ياخميس البنية مريضة حرارتها مابتش تنزل نوض خلي نرفعوها نعاينوها
خميس ويسب فيها بأبشع الألفاظ:انت وفروخك لازم تنكدو عليا وتعكرولي يومي مافيش يوم نقعد فيه مرتاح
خديجة:حرام عليك والله حرام عليك هذوم صغارك انت بوهم بنتك يلي مريضة راهو تعالى شوفها مش قادرة حتى تتحرك
خميس:ديرليها كمادات عطيها دواء خافض للحرارة ورقديها وسكري عليا خرارتك معاش نبي نسمع صوتك
خديجة وهي تبكي:ياراجل بيش تفهم البنت من الصبح وهي هكي ماخليت مادرتلها حرارتها قاعدة راقية
خميس:واني مش طالع ومش معاينها وان شاء الله تيبسي انت وياها
خديجة:حسبي الله ونعم الوكيل فيك
خميس هجم عليها ويسب فيها ويضرب فيها:ياحقيرة ياكلية مزال نسمع صوتك والله لمانقتلك ونحذفك لخوتك الكلاب يلي من يوم لوحوك ليا ومعاش دوروك
خديجة تبكي وتتحسب بعدين فكرت مافيش حل الا مصطفى يجيها الصبح وراجلها مهناش وترفع بنتها تعاينها وشن بيصبرها للصبح وخشت للدار هي وصغارها وبعتت رسالة لمصطفى أنه ضروري الصبح يجيها واستمرت بوضع الكمادات لتخفيف الحرارة لبنتها وخميس لاهي في التليفون وفاتح الفيس ويتسهوك مع البنات
شيباني وخايب ...
*عند عيلة الحاج محمد
زهرة وهي تكلم في ولدها فارس متصل بيها:باهي امتى بتروح انت
فارس:بعد رمضان يام ان شاء الله خير
زهرة :إن شاء الله لكن ديرها في بالك بعدما تروح بنخطبلك إن شاء الله
فارس :إن شاء الله ع خير
وكيف خش عليهم الحاج محمد :منو هذا فارس
زهرة حركت رأسها بمعنى ايه فارس
الحاج محمد :هاتي خلي انكلمه
وقعد يهدرز هو وبوه وينشد عليه وتمت المكالمة
زهرة :الولد هذا نبي نخطبله إن شاء الله
الحاج محمد: وامتى بتخطبيلة وعيلة منو
زهرة:بنت خوي الله يرحمه
الحاج محمد وهو مايندريش على شي:اها أن شاء الله خير كل شي بالبركة هي توا بنولي للمحل تبي حاجة
زهرة:لالا سلامتك......يتبع Amina Manoأمينة العكر
