بنات العيلة 8😍
الكاتبة Amina Mano أمينة العكر
في اول يوم شهر رمضان كانت فرح وصاحباتها ابرار وساجدة في الامتحانات وهما كيف طالعات من القاعة ،فرح ساكتة وخلاص ،وابرار وساجدة يتكلمو على الامتحان
ابرار:الله الأسئلة جت ساهلة الحمدلله
ساجدة:إن شاء الله نصفوها ونفتكو
ابرار: يااااارب ،فرح خيرك ساكتة
فرح:لا والله مافي شي غير تعبانة ونبي نروح
ابرار:جاوبتي في الامتحان والا لا
فرح:نص نص إن شاء الله خير
ساجدة:باذن الله ناجحين معاش تفكرو فيها
وشوية وهيثم جاهم ،قعد يشوف لي ابرار بنظرات ماطمنش وكأنه يهدد فيها يحسابها بتقول لفرح
هيثم:فرح تعالي نبيك
فرح استأذنت من البنات ومشت لهيثم،وساجدة وابرار ماعدلوش عليهم ومشو روحو مع بعض
هيثم:انت خيرك ديما لاصقة فيهم البنات هذوم
فرح:صاحباتي من الإبتدائي
هيثم:لكن اني مش مرتاحلهم من شبحاتهم لينا باين عليهم حسودات
فرح قعدت تفكر:وكيف عرفت انت أنهم حسودات بالعكس كويسات معاي صحبتنا مش اليوم والا أمس
هيثم تعفلق:انت بيش تفهمي ،استغفر الله ،المهم توا تشوفي بروحك يطلعو لفعات من تحت لتحت
فرح:مستحيل اصلا
هيثم شبحلها ع الجنب :توا انشوفو...
***في حوش الحاج محمد كيف نايض من النوم
زهرة :صحة النوم شن الرقاد هذا كله حتى الظهر قريب يدن والا على منو عابي بيش يجيبلي خضرة
الحاج محمد:وعلاش اتعبي في روحك من توا مازال الوقت
زهرة :لا حوستي نبي نكملها بكري بكري
وفجأة الحوش يطقطق ،ولما الحاج محمد فتح الباب لاقاه ولده المعتصم وكانت احلى مفجأة ،طول قعد يحضن فيه ويسلم عليه ويبوس على رأسه ،وخش لي أمه يحضن فيها ويبوس فيها،
زهرة تبكي: الحمدلله على سلامتك يا وليدي ،
المعتصم:الله ايسلمك يام
زهرة:شنو خلاص روحت بتستقر هنايا معاش بتولي
المعتصم:لا والله واخد إجازة نبي نرمضن معاكم بعد العيد ان شاء الله بنولي
زهرة:تولي عينك اقعد هني ،سادك منها الغربة توا معقولة ماتستاحش فينا
الحاج محمد:خلي الولد ياسبحان الله كيف واصل وتنكدي عليه
زهرة:توا اني طلعت منكدية صحة ليك
المعتصم يضحك عليها:لالا احلى زهورة مش منكدية
الحاج محمد:ايه واضح هلبا
زهرة:فكك منه بوك هذا ديما مش عاجبه شي
وشوية وشهد وصلت كانت في الإمتحانات اول ماخشت طول مشت تجري المعتصم وتسلم عليه
المعتصم:ماشاء الله شهد الدبة ضاعفة هلبا
شهد :,دبة عينك ،من يومي رشيقة
المعتصم:الآنسة رشيقة واثقة من نفسها ،والصور آمالا كيف تباني فيهم دبة والا نافخينك
شهد تضحك:مرات ،بعدين قولي شن جبتلي من هدايا هيا وريلي ويلي قلتلك عليه جبتهولي والا لا
المعتصم :ياودي جبتهم كل شي تبيه جبته
زهرة :تي نوضي خلي خوك يرتاح وانت عششتي فوق رأسه نوضي بدلي حوايجك بيش تساعديني تحركي فيسع
شهد:باهي يام خلي نرتاح شوية الطريق طويلة ونو وصيام
زهرة :واهو تدوي وتلبلبي مافيك شي نوضي تحركي
المعتصم يضحك عليها:نوضي مابين ارتحت بعدين نعطيك حاجاتك مش هارب قاعد راهو
شهد ناضت:تمام احلى عصومي والله
زهرة:مفلحها فيه التفتفيت هذا
المعتصم يضحك عليها:عادي خليها براحتها يام قاعدة صغيرة
زهرة:يلي اندادها بصغارهم
المعتصم:لا والله قاعدة صغيرة ،
الحاج محمد خش للدار:هيا طالع اني قولي شن تبي انجيبلك يا ام طلبات انت
زهرة بدت تسميله في الحاجات يلي تبيهم..
**
فاطمة اخت زهور لما سافرت خلت سيارتها لزهور وبدت تستعمل فيها وتمشي وتجي بيها للمدرسة وتوصل معاها في سامية ،المرة هذه كملو امتحانات وروحو مع بعض
زهور:تفطرو مع بعض انتم مرت خوك والا كل واحد بروحه
سامية:لا والله كل واحد بروحه
زهور: وعلاش هذا كله محلاها اللمة
سامية:الله غالب احلام ماتبيش تنزل لكن الصغار أكثر حاجة غيداء تنزل ومرات تهرب هروب
زهور:محلاها غيداء حسيتها مش زي اختها الكبيرة
سامية:ايه هديكا طالعة لي امها ،غيداء من صغرها تحب تجينا ومرات امها تضرب فيها ،لكن توا كبرت ماشاء الله عليها
زهور:ربي يحفظها
سامية :امين يارب،ايه قولي شن صار فيك انت وفارس
زهور والله شن بنقولك توا لين يروح بعد العيد قال بيخطب وبيدير العرس على طول
سامية : ماشاء الله تبارك الله،الف مبروك ربي يكمل عليكم بالخير يارب
زهور تنهدت:امين يارب العالمين........
**في حوش خديجة
غالية راكبة عند خديجة وتكلم فيها تبيها تنزل لوطا كل يوم يفطرو مع بعض
خديجة:والله مانقدر خايفة الصغار يضايقوكم والا حاجة
غالية:عيب عليك يابنتي ،صغارك كل يوم عندي وعاقلين ربي يبارك ،
خديجة استسلمت : إن شاء حاضر من اليوم نفطرو مع بعض لكن بشرط انطيب في الحوش وننزلكم
غالية :يلي يريحك اهم شي ماتحرموناش من لمتكم
خديجة :ربي يحفظكم ومايحرمني منكم نحمد في ربي كل يوم لأنه عوضني بعيلة ثانية
غالية: الحمدلله يابنتي الحمدلله
***فرح روحت خشت لدارها طول حتى امها ماكلمتهاش
احلام طبعا واخدة إجازة في شهر رمضان هذا ،اول ماشافت بنتها مشتلها في دارها
احلام :خيرك خاشة طول تجري شن فيه ان شاء الله خير
فرح:مافي شي يام غير تعبانة ونبي ونرقد
احلام لوت وجهها:ارقدي ارقدي ،اصلا الأيام هذه كلكم مش على بعضكم تقول ساحرينكم.
فرح:ماما بالله عليك خليني نرتاح ياسبحان الله
احلام طلعت متعفلقة وخلتها
غيداء وخوها وسام اول ماروحو خشو لحوش جدهم طول غيداء متعودة تجيهم أما وسام هارب من أمه مايبيهاش تبعته للمحلات
غيداء حاطة يديها في وسطها:انت من امتى تجي معاي لحنينة ترا
وسام يتكلم بدلع:انجي امتى مانبي مزاجي هكي باهي
غيداء:لا مش باهي ولما نقول لحنينة تلزك
سامية خشت عليهم :خيركم شن فيه
وسام بدلع:تعرفي ياعميمة سومة هذه غيداء هذه بشحمها ولحمها ماتبينيش نجي هنايا وتلز فيا
سامية:حق الكلام هذا ياغيداء،عيب هذا خوك وحوش جدك انت وياه تعالو امتى ماتبو
وسام يسحنلها في يديه وايديرلها في حركات:سمعتي والا ،عليلها صوتك عميمة
غيداء متعفلقة:اصلا هو هارب من ماما بيش ماتبعتاش ،قول لا توا
وسام :لا ابدا اني جاي نبي نرقد ونتريح
سامية:باهي مدامك جيت تعالى نبعتك للمحل بيش تجيبلي حاجات نبيهم
وسام:اهاااا لا اني بنمشي فوق ،راسي دايخ والله دايخ ،وجسمي فاشل ،معقولة تبعتيني في عز القوايل لا والله ماصارت لالا
سامية وغيداء يضحكو عليه عارفينه مكار وبخيل مايحبش الحركة .......
وقت المغرب كل عيلة مكعمزة على سفرة فطورهم ،ويلي ملتمين وفرحانين وخاصة خديجة وصغارها فرحانين هلبا لأن حسو وكأنهم عند جدودهم ،ونفس الوقت ارتاحوا وحبو عيلة المشرف فتحي ،وماشاء الله غالية تشكر في تطييب خديجة هلبا.
وعيلة الحاج محمد فرحانين بروجوع ولدهم المعتصم ،ولكن قلب زهرة مش مريحها لين تكمل موضوع فارس .
وعيلة عبد القادر زهور تفكيرها كله عند فارس ،وامها وبوها يفكرو في بنتهم وصغارها.
وعيلة عبد الرحمن فاطر هو وأحلام وفرح ،اما وسام وغيداء عند عماتهم وأحلام مش عاجبها الجو غير تحشمت من شيبانيها كان هذا روحت بيهم.
***وعند فارس وأيمن
ايمن :شن الاكلات الغريبة هذه والله استاحشت ماكلة حوشنا خاصة من ايدين امي
فارس:ايه والله في هذه عندك الحق،الصبر وخلاص ايام وتفوت
ايمن :حق فكرتني قالي الكابتن عبد الله بنروحو قبل اسبوع العيد ان شاء الله
فارس حط الكاشيك وفرحان:الله امتى قالهالك
ايمن :من امبكري ،غير هذا وين تفكرت كنت دايخ من الصيام
فارس ضحك عليه :باهي باهي يادايخ
**بعدما كملو العشاء وروحو من صلاة التراويح في حوش عيلة المشرف فتحي ،جاهم هو ومرته وصغاره ، وكعمز مع مصطفى بيش يحلو المشكلة مع خميس
فتحي : قولي يامصطفى ماعندكمش اعمام وخوال والا حد
مصطفى:هو عندي مش ماعنديش لكن الله غالب مانعرفش وينهم ومانعرفش حتى شكلهم يعني مقاطعينا من زمان
فتحي:لا حول ولا قوة الا بالله،باهي امك اكيدة تعرفهم ،ع الأقل نشوفو واحد منهم بالك يقنعوه وايديرو حل
مصطفى:والله ماني عارف الحق
فتحي :امشي أسأل امك عليهم بالك عندها معلومات والا حاجة
مصطفى مشي لي أمه وسألها على أعمامه وخواله
خديجة :خوالك من لما تزوجت معاش دوروني ولاجوني حتى نتصل بيهم مايردوش والسبب بوك متسلف منهم مبلغ كبير ومارداش تعاركو معاه واني روحت معاه وياريت ماروحت معاه ،اما اعمامك مقاطعينه ع خاطر الورث تعاركو مع بعض وعطوه حصته وخدي بيه الحوش ،وبوه تبرأ منه وتوا مانعرفش وينهم نسيت حتى شكلهم .
مصطفى لا حول ولا قوة إلا بالله ،ربي يسامحه بوي وخلاص خلانا مقطوعين من كل مكان
خديجة دموعها نزلو :الله غالب الحمدلله على كل حال ربي يفرجها
مصطفى تنهد :امين يارب العالمين
ومشي ولى لفتحي في المربوعة وقاله نفس كلام أمه
فتحي :معناها مافيش حل الا سالمة
مصطفى :احسن حل والله تعبت من المشاكل
فتحي:وحد الله وقوي عزمك راك راجل انت ،وامك وخوتك انت سندهم بعد الله توا
مصطفى:لا اله الا الله محمد رسول الله يارب فرجها
فتحي:باذن الله تنفرج ،خلي نشوف سالمة
واتصل بيها قاللها تعالي في المربوعة ،وجتهم
سالمة : السلام عليكم
فتحي ومصطفى : السلام عليكم ورحمة الله
فتحي:سالمة اسمعيني كويس انت لازم تساعديهم ،افتحي محضر في المحكمة قضية طلاق وتاخد حقوقها ويرتاحو
سالمة:والله هي قالتلي تبي هكي ،ان شاء الله بعد شهر رمضان كل شي يتم على خير مش رح نسيبكم يامصطفى ،لكن لازم ادور جدك واعمامك ضروري
مصطفى :والله خايف نمشي يردوني وامي ماتبيني نمشيلهم
سالمة :امك خليها عليا اني وان شاء الله خير
مصطفى :إن شاء الله بارك الله فيك
فتحي :هي سالمة ناديلي العويلة بنروح وقت عليا الطريق طويلة
سالمة :حاضر باهي............
الكاتبة Amina Mano أمينة العكر
مرت الايام وانتهت الامتحانات وجت العطلة وكانت 15يوم رمضان ،يلي يشري في دبش العيد ويلي يجهز في حلويات العيد ،وطول الأيام هذه هيثم معاش كلم فرح اختفى فجأة وهي مهمومة وتفكر ،لعب في رأسها وخلاها تحبه وماتفكر في شي غيره .
احلام تنوض في فرح:فرح يافرح نوضي تحركي معاي حتى شوية وانت نهار وليل راقدة وخامدة في هالدار
فرح:والله ياماما تعبانة ماخاطريش في حتى حاجة خليني في حالي ياسبحان الله
احلام:خيرك شن فيه تحسي في روحك مريضة والا حاجة
فرح:مانحس في شي غير كان تخلوني بس
احلام بصوت عالي:مش بجوك هو نوضي تحركي بيش بنمشو لحوش جدك
والوقت هذا خش عليهم عبد الرحمن جايب بضاعة ،سمع صوت احلام تكشخ وخش عليهم
عبد الرحمن:خيرك تلعلعي صوتك طالع لي اخر الشارع
احلام:بنتك هذه يلي ماعاش فاهمتها كيف شادتها ع النوم وخلاص ،وغيداء يلي معاش تقعد في الحوش كل يوم مع عماتها،لايعاونو لا شي ،
عبدالرحمن:وخلي يرتاحو وين المشكلة كيف كملو امتحاناتهم وضغوطات القراية
احلام تشقلب في عيونها:ترا فكني منه الدلع الزايد
عبدالرحمن:المهم اليوم بننزلو بنفطرو عند امي عازمتنا
احلام حطت يديها في خصرها:والله ،لالا سامحني فيها ،اليوم ماشية لحوش بوي عازميني وبنمشي
عبدالرحمن: واني قلت لا ،واهو جبتلك بضاعة بيش اطيبي حاجة تنزليها
احلام :والله ماني امطيبة حاجة ولا نازلة ،بنمشي يعني بنمشي خير ما والله نتصل بخوتي يجوني ،انت من يومك مقيدني انت وعيلتك ومش مخلييني في حالي
عبدالرحمن:ترا قولي شنو هو يلي داروهولك امي وخواتي ترا فهميني
احلام: يلي داروه داروه غير التلقيح امتعهم ساد
عبدالرحمن:عيب عليك يا بنت الناس امي وخواتي يبونا انت يلي ماتبيهمش
احلام :ماشاء الله من امتى أدافع عليهم والا معبينلك راسك عليا
عبدالرحمن:بالله اسكتي وسكري فمك واحترمي نفسك ماعمرهم تكلمولي عليك ولا جابو سيرتك
احلام:مش ساكتة والله ماني ساكتة ،كل شي واضح توا،اني خلاص مليت وفديت ،بنمشي نقعد عند اماليا يومين خود راحتك معاهم .
عبدالرحمن:مافيش مشي قلت اني يعني مافيش مشي
احلام:لا بنمشي مش انت يلي تمنعني من اماليا حول من قدامي
فرح نوضي تحركي نادي ع اختك الغبية ونوضي خوك كان بتمشو معاي تحركي.
طبعا عبد الرحمن مايقدرش يمنعها تعرفو علاش لأن اماليها عاطينه فلوس بيش خدي قطعة أرض ويبني فيها وشبه قريب يكملها وبي اسمها هي ...
فرح ناضت وتت دبشها هي وخوها أما غيداء سكرت رأسها مابتش تمشي معاهم تبي عمتها سامية وتعلم فيها في القران ودايرة ختمة هي وياها ....
**عند خديجة نايضة من الصبح ادير في حلويات فالحة فيهم وعندها خبرة وكانت تخدم في حوشها الأول طلبيات ،وقت الظهر نزلت لغالية وجابتلها معاها حلويات .
غالية: ماشاء الله ربي يبارك،امتى درتيهم الحلوات
خديجة:والله من الصبح بكري بادية فيهم
غالية :الله يعطيك الصحة،شن بيصبرني للمغرب بيش انذوقهم ،راهو حشيشتي الغريبة والمقروض
خديجة:الغريبة اهي درتهالك لكن المقروض ماحصلتش سميد الحق
غالية:غير كان قلتي يامنجوهة راني بعتلك،حتى اني بندير مقريضات للعيد كان هذا انديروه اني وياك
خديجة:والله تاخدي عويناتي
غالية:سلم هالعوينات لكن قوليلي خيرك مااديريش طلبيات
خديجة:والله كنت نخدم فيهم في حوشي قبل لكن توا مافيش حتى إمكانية
غالية:لا يابنتي فيه إمكانية آمالا احني شن انديرو ،اني حنساعدك اديري مشروع صغير للحلويات ،ع الأقل تلقي مصروف صغويرتك
خديجة:ربي مايحرمني منك
غالية ،:امين يارب العالمين ،اليوم امدايرة عصيبينات من الصبح مطلعة المصارين من الفريز ،هي صلي الظهر وخلي نبدو فيه مابين روحو البنات.
خديجة:ماشاء الله تبارك عليك ......
**في حوش الحاج محمد زهرة تنوض في المعتصم تبيه يجبلها حاجات
زهرة:تي نوض ياولد دهشتني حتى الظهر إذن من امبكري
المعتصم يتكسل:باهي يام خليني نرقد قولي لبوي يجيبلك شن تبي
زهرة:بوك قداش منه مسكين نوض تحرك
المعتصم:باهي باهي ،ماصدق روحت حصلتي عليا
زهرة: طيح سعدك تتهربو وتسافرو انت وهذاكا المنجوه مابعدهم نساوينكم
المعتصم كعمز ويتكسل:توا من جاب سيرة النساوين والا لازم منها النغمة هذه
زهرة:نوض يلي ماتتحشم نوض قاعد حتى تقطف في الدوة
المعتصم :ربي يسامحك يام اهو نايض ،حق نسيت أمس كلمني فارس يسلم عليكم بيروح الاسبوع الجاي
زهرة:عليك وعليه السلام ،الحمد لله خلي يروح ساده
المعتصم :ايه بيش يندم ع مرواحته
زهرة: ربي يهديك ،وانت ماعندك كان التفتفيت الزايد نوض خش الحمام صلي الظهر وتعالى للصالة بيش تاخد الفلوس
ومشت وخلاته يتمتم
المعتصم :,عليك عيشة سودة ،حتى اني غبي ياريتني ماروحت ......
**في حوش عيلة الاستاذ عبد القادر كانو يكلمو في فاطمة وصغارها
فاطمة تبكي : والله استاحشتكم واستاحشت اللمة معاكم
الدكتورة مريم:حتى احني استاحشناك هلبااااا ،وان شاء الله ربي مايغيبك حبيبتي
الاستاذ عبد القادر:مغلى عليكم البكي والنكد معليشي يابابا تحملي وقوي روحك ع خاطر صغارك بيش يتعودو ع الغربة ويتأقلمو ،غير ردي بالك تخليهم يخالطو النصارى، اهم شي خليكم متمسكين بدينكم الاسلامي ماتخالطو حد
فاطمة:ايه يابابا حتى احني هكي مدايرين ،والصلاة نصلو في حوشنا ونصيمو والجيهة يلي عايشين فيها نصهم مسلمين وفيه حتى ليبيين
الاستاذ عبد القادر:حتى لو كان المهم اني وصيتكم ،وسلميلي ع هيثم راجلك سلام
سامية :وين الصغار يا فطومة
فاطمة :والله قاعدين في المدرسة مازال مايروحوش ،
الدكتورة مريم :ربي يحفظكم كلكم ردي بالك عليهم
فاطمة:حاضر ياماما من عيوني
الدكتورة مريم :سلم عويناتك،هي سادك دوة وقت ع الفطور
فاطمة تضحك :ماشاء الله تبارك الله عليك يا ماما ربي يعطيك الصحة وطول العمر
الدكتورة مريم:امين يارب العالمين اجمعين،هي توا مع السلامة سلميلي عليهم كلهم
فاطمة : إن شاء الله .....
**احلام اول ماوصلت لحوش اماليها سلمت وخشت طول قرمة في شيابينها
احلام:والله يام درهولي كبدي،معاش نتحمل ننزلهم،واليوم يقولي انزلي افطري لوطا بالسيف
سعاد:يابنتي عيب يلي اديري فيه ،شن فيها كان نزلتي وفطرتي عند شيابينك ، العيلة هذه عاجبيني هلبا ماشاء الله عليهم
احلام:لا يام هذوم من تحت لتحت غير انت ماتعرفيهمش كويس ،اونا حتى غيداء مابتش تجي معاي لاصقة في عمتها سامية وخلاص
سعاد:وخلي تلصق انت مادخلكش في النهاية عمتها اخت بوها،اهو اني امال كل يوم تفطر عندي ماشاء الله،وقايمة الحوش ماعمرها شكت الا انت طول النهار تزني لين تخربي على روحك
احلام:ماهو انت كويسة معاها مش زيني اني مرت عمي مش كويسة معاي
سعاد:والله انت خايبة وبنتي ونعرفك شن تبيهم ايديرولك
احلام:توا يام طلعت اني يلي ماتنفعش والا
سعاد:يابنتي خشي فيهم ديريهم اوخياتك وعزوزتك اعتبرها امك الثانية ،هكي يحطوك ع روسهم
احلام:اني عندي ام وحدة بس غير هكي لا
سعاد:لاحول ولاقوة إلا بالله شيطيلي ريقي في هالصيام .
احلام:اهو سكتت اني معاش بندوي
***في حوش احمد اخ احلام كانت امال توصي في ولدها باش مااديرش مشاكل مع وسام ولد احلام
آمال:اسمع ياناصر عمتك جاية بتقعد في حوش جدك يومين ثلاثة ماتقعدش اديرلي في المشاكل مع ولدها ريحني الله يرضى عليك،والا اقعد في الحوش مع خوك محمد
ناصر:اللهم اني صائم ،والله يام كان هو مستفز شن تبيني اندير ،يحرقلي في اعصابي بدونه وحركاته حتى البنات مايديروش فيهم
آمال: خلاص معناها اقعد هنايا مع محمد
ناصر:ايييييه محمد كساد في كساد شن بندير معاه ،بعدين اني في الليل بنطلع مع اصحابي
آمال:وين بتمشي انت وياهم
ناصر:بنمشو للمدينة
آمال :وقلت لبوك
ناصر:لا ماقلتلاش انت قوليله
آمال:قوله بروحك مادخليش فيك
ناصر يتأسف:باهي حاضر
تسنيم :ماما بتمشي لحوش حنينة اكيدة غيداء وصلت
آمال:باهي بري ،اني بنكمل باقي البيتساونلحق عليك .....يتبع Amina Mano أمينة العكر
