#السجين_777
#الحلقة_14
نوح من الصبح حايس ...وماصدق امتى عمي يونس فتح المكتبة ...رقى بسرعة ..فتحوا الحرس الباب خش ...قمعز على الطاولة ..واعيونه على الباب 🔥
دارين الحارس فتحلها الباب ..وخشت وعلى طول اعيونها في اعيون نوح ...وهو صبا 🔥❤
***************
رغد نازلة من سيارتها ومتكية عليها ..واتشوف لفونها ...وسيارة نزار قربت منها ...وقف ونزل ..وقرب منها ..وهيا صكرت فونها وابتسمت
نزار مد يده وسلم عليها : خيرات ..شن اخبارك
رغد منحرجة : اهلين ...تمام ..كيف حالك نزار
نزار : تمام ...اول ماقالتلي دارين جيتك طول
رغد : ماعرفتش كيف نوصل فيك
نزار ايشوف لطريق ..وبرم بحت فيها : نمشوا لمكان لتاني ..شن رائك ؟؟
رغد : ايكون افضل ..لان طريق عام والمنظر مش حلو
نزار : اي امعاك حق ...نمشوا لكافي الساحل ؟؟
رغد : تمام ..مافيش مشكلة
نزار : اوكي ...اطلعي قدامي بالسيارة ..وأني وراك طول
رغد شافتله وهيا منحرجة ..اول مرة اتشوفه من قريب وتهدرز امعاه بشكل خاص ..هزت راسها وركبت سيارتها ..ونزار ركب وطلع وراءها
بس في اللحظة هادي ومن بعيد ...كان أوس في سيارته واقف بعيد منهم ويشوف فيهم 🔥 ..أوس دنيته كلها تلخبطت ..ع اساس ايحب دارين ..بس مش قادر يفهم شن الشعور الغريب اللي قاعد ايسيطر عليه من جديد ...فكرة ان رغد اتحب شاب غيره ..مش مستوعبها ومايبيش يفهمها 😡🔥
***************((الكاتبة أم ناصر ))
نوح صبا وضم يده معصب 😤 ..دارين مازلت على حالها من غير حجاب ...وهو تعصب كان مرايف عليها وعنده شعور ان دارين ..تبي تسمع كلامه وتفرح قلبه ...بس لما شافها معاش عرف شن ايدير 🔥
دارين مبتسمة وتمشي شوره ...وهو اعيونه ايخوفوا ..ايفنص فيها ..وانفاسه مرتفعة 😤
وقفت قدامه ..وهوا فنص فيها وبرم وجه لجيهة الثانية
دارين : سلام ..شن اخبارك ☺️
نوح قرب وجه منها : زي الزفت ..ليش دارين ..ليش بس ؟؟😡
دارين : أهدأ وأني انفهمك نوح
نوح بحت في وجهها مش مقتنع : شن بتفهميني ..شنو دارين ..كل شي قاعد واضح ..أنتي ماتبيش تسمعي الكلام ..وأني حلفت دارين ..حلفت معاش بتشوفي وجهي دامك من غير حجاب ..بس مكالمة أمس قلت شكلها البنت فهمت عليا ..والامور بتمشي ..بس اا😤
دارين التفتت على عمي يونس ..بس هوا مشغول ومايشوفش فيهم ..قربت منه ومسكت معصمه : نوح اسمعني قبل ..اسمعني شن بنقول وبعدين قرر شن تبي ادير 🥺
