#السجين_777
#الحلقة_17
ثاني يوم دارين ناضت وفطرت ..كانت عطلتها ..ضمت الشقة ..وقمعزت اتشوف لفونها ..دق باب الشقة ..صبت تفتح وهيا مستغربة من جايهم على وقت الغداء
فتحت الباب لاقاته بوها 😳 : اهلين ..شن اخبارك
نجيب خش وماردتش عليها ..واضح أنه معصب 😡😤
دارين صكرت الباب وخشت ورءاه : غريب شن جابك الوقت هادا ؟؟
نجيب التفت على بنته : تعرفي حد أسمه نوح الحاج 😡
دارين : 😰😰
نجيب : نسألك فيك أنا ..تعرفي حد بالاسم هادا والا لا ؟😡
دارين تعرش : ااءء .ممن قالك ...ككيف اا😰
نجيب قرب منها : دارين جاوبيني بصدق ..تعرفي نوح او لا ؟؟
دارين طبست منحرجة : اا اي نعرفه ..كان سجين ..وأني شفته في عيادة السجن 😣
نجيب تنهد : يعني مايكذبش ؟؟
دارين فونها ايرن لاقاته نوح ..حطت فونها صامت 😣 : أنت من وين عرفت؟ ..من قالك ؟؟
نجيب مشى كم خطوة وقمعز : شن تبي فيه دارين ..أنتي دكتورة وبنت ناس ..وهو كان سجين سابق ووو..
دارين قربت من بوها بسرعة : من قالك ..من وين عرفت نوح ؟
نجيب : هادا كل اللي هامك بس ؟؟ نوح بنفسه كان عندي في المكتب اليوم 😑
دارين فتحت فمها : كان عندك ؟؟ 😲
نجيب صبا : اي كان عندي ..وحكالي كل شي صار امعاه ..أني بس نبي نعرف أنتي موافقة علي أسمه نوح ..موافقة على شخص زيه 😡
دارين : كيف اموافقة ؟؟ على شنو تحكي بوي ؟؟
نجيب : نوح جاني اليوم وطلبك مني ..يعني يبي يتزوجك 😡
دارين انصدمت 😳 وشعورها تلخبط مابين الصدمة والفرح ..بس كانت اتفكر ..ليش نوح تصرف من رأسه وماقاللهاش نبي انكلم بوك ؟؟
دارين سكتت ومعاش عرفت شن اتقول
نجيب : خيرك تبكشتي ...أنتي تعرفي أنه بيجي ايكلمني عليك ؟؟
دارين اتهز في رأسها : لا لا .أني مانعر...
سكتت على طلعت أمها من المطبخ : دارين ...منو اللي جاء يابنتي ؟؟
نجيب التفت على صوت صباح ...وهيا وجهها تغير اول ماشفت نجيب ..قربت وسلمت عليه : اهلين نجيب ..كيف حالك وحال لعويلة ؟؟
نجيب : بخير الحمدالله ..كيف حالك صباح ..وحال صحيحتك ؟؟
صباح : بخير الحمدالله ..شنو اخبار عزيزة والصغار ؟؟
نجيب : كلهم بخير ويسلموا عليكم
صباح اتشوف لدارين : قعمزوا الستر ..خيركم واقفين ؟
