_ عايزين نصيف يا جدو.
= يا جدو عايزين نصيف.
_ عايزين نروح البحر يا جدو.
= يا جدو عايزين نروح البحر.
_ عايزين نشوف المايه ي جدو.
= يا جدو عايزين نشـ....
_ ما خلاص يا تسنيم جدو عرف اننا معفنين و عمرنا ما شوفنا مايه ف حياتنا مش لازم تأكدي كل جملة أقولها!
قعدنا ساعة انا و تسنيم نحاول نقنع جدي سعيد اننا نروح نصيف او نروح ناكل درة مشوية ع البحر او حتي نحط صوابع رجلينا فى المايه لمدة خمس دقايق و نطلعها تاني، و جدي طلع ده كله مش سامعنا و حاطط الهاند فري ف ودانه و بيسمع اغنية لحمزة نمرة!!!
شال الهاند فري من ودانه و هو بيقولنا: بتقولوا حاجة؟! اصلى سامع زن كده جنب الاغنية تقريبًا حد صباعه اتقطع او اتحول لدرة مشوية!
انا و تسنيم بصينا لبعض و اترمينا ع الكنبة بيأس و جدي رجع الهاند فري لودنه تاني و هو مندمج اووى مع الاغنية، و قاسم و عامر الاتنين بيضحكوا علينا..
مفيش خمس ثوانى لقينا اسراء اخت تسنيم بنت عمي دخلت علينا بابتسامة و هي ماسكة حتة جاتوه و راحت ناحية جدي و حطيتها قدامه، قام شال الهاند فري و هو بيبص لحتة الجاتوه بتعجب: نوع السم اللي استخدمتيه ايه؟!
اسراء بصيتله باستغراب و احنا ضحكنا عليها، و جدي كمل: عايزة تموتيني يا بت عشان تورثيني؟ و كمان هتموتيني بحتة جاتوه من أم ستة جنيه؟! ما تبطلوا استرخاص بقى!
_ اورثك ايه يا جدو هو انت حيلتك حاجة؟! انا لو هعوز اورث حد بجد هبقى عايزة أورث جدتي زينب فى الغوايش بتاعتها اللى من عصر الملك فاروق دى هتجيب فلوس كتير دي بقت آثار.
_ عاوزة تورثيني بالحياة يا معفنة؟!
قالتها الجدة زينب و اتبعت كلامها بالشبشب بتاعها اللى لبس فى وش اسراء و وقعها فى الارض..
_آااااه يا ضهراااااي.. آاااه يا وشّي يا صغير على عمليات التجميل ااه... هو انتي حاطة حديد فى الشبشب بتاعك؟ ده انا حاسة ان مناخيري اتعوجت!
جدتي فرحت اووي و لبست شبشبها بانتصار و سعادة كبيرة، و مفيش خمس ثواني و لقينا إيهاب دخل علينا و معاه موبايل تسنيم و حطه قدام جدي و هو بيقول بسعادة: شوف يا جدو نزلتلك لعبة الطيور الغاضبة على تليفون تسنيم عشان تسلّي وقتك فى الطريق و احنا رايحين نصيف.
تسنيم بصت فى جيوبها و بعدها بصيتله بصدمة: انت جيبته منين يا زفت انت و الله ما هسكـ....
زقيتها بإيدي قعدتها ع الكنبة تاني و انا بكلمها بكل هدوء و عقلانية من غير ما ازعق خالص خالص: سيبيله الزفت يا تسنيم طالما ده هيخلي جدي يودينا النيلة!
_ قصدك النيل؟!
حازم اخويا قالهالي بتصحيح بس انا أصريت على رأيي: لا قصدي النيلة عشان هو هيبقى يوم زفت على دماغنا و جميل بس يا رب جدي يوافق.
بصينا كلنا بعدها لجدي سعيد لقيناه لسه حاطط الهاند فري ف ودنه!! ده احنا الجيل البايظ الصايع اللى ضاربها طناش مبنعملش اللى جدو بيعمله ده!
فى حد يسيب احفاده بيكلموه و يقعد يسمع اغاني؟!
المهم اننا الحمد لله قدرنا نقنعه يودينا البحر بعد ما اضطر يشيل الهاند فري آسفًا لما الموبايل فصل شحن، و طبعًا اخد موبايل تسنيم و قعد يقتل فى الطيور الغاضبة طول الطريق و جدتي متضايقة و تقوله فين الرفق بالحيوان اللي الرسول أمرنا بيه يا سعيد؟!
و طبعًا جدي مش مركز معاها و مركز مع الطائر الأصفر اللي هو مش بيطيقه خالص ده و عمال يحردف عليه طوب طول اللعبة و الطوب مش بييجي فيه و عصبه! المهم انه بعد ما الموبايل فصل شحن جدي زهق و قرر اننا لازم نرجع البيت عشان هو عايز ينام!!! و احنا ده كله لسه فى الطريق و موصلناش البحر!!
طبعًا كلنا اعترضنا و اعتراض من هنا على اعتراض من هنا قام جدي قافلها ف وشنا و .._ايه القافية الجامدة دي؟!😂_ المهم انه أصر اننا نرجع البيت لإنه نسي يلبس شراب و خايف يجيله برد و احنا اصلا فى الصيف!!!
و طبعا رجعنا البيت من غير ما نشم نسيم البحر حتى و قضينا اليوم فى الجنينة نرش مايه على بعض بالخرطوم _بنصبّر نفسنا و اهو اي مايه و خلاص!_ ..
_______________________
اسكريبت قصير خفيف اتمنى يعجبكم و تدوسوا ع النجمة اللى تحت دى مش عشانى و الله ده تعاطفًا مع العائلة المسكينة اللى جدهم الشرير مرضيش يخليهم يروحوا يصيفوا
و قولولي حابين مين اللى يحكي الحلقة الجاية من العيلة؟! و خمنوا مين اللى حكى حلقة النهاردة ؟
يلا دمتم سالمين بقى😂❤️
و قبل ما انسى..
جمعة مباركة و متنسوش تقرأوا سورة الكهف.. و الصلاة على النبي❤️
وسام أحمد رجب.
أنت تقرأ
اسكريبتات عائلة الحاج سعيد
Humorعائلة الحاج سعيد.. هي ليست ككل العائلات! إنها عائلة مميزة و مايُميّزها هو جنونها المُطلق.. جنون! فرد! اثنان!! بل عائلة بأكملها. تعالوا معنا نتعرف على هذه العائلة عن قرب و نخض معها مغامراتٍ يكسوها الجنون. و تذكروا الضحك للجميع.. تابعوني..
