فصل خفيف بمناسبة العيد كل عام و أنتم بخير❤️
ياريت تعملوا ڤوت قبل القراءة..
و لا تنسوا الصلاة على النبيّ.
_____________________________
_ العيد فرحة......
=هي ..هي.. هي...
_ و أجمل فرحة.....
= هي.. هي.. هي....
_ يجمع شمل قريب و بعيييد... سعدنا بيها...
= هي..هي..هاااي....
_بيخليها ...
=يا سلاام....
_ ذكرى جميلة لبعد العيييد... غنّوا معانا غنّوا...
=غنّواااا...
_ قولوا ورايا قولوا....
= قولوااا...
_ كتّر يا ربّ فى أعيادنا وو.... ايه اللى بعديها انا نسيت؟!
=و لا انا فاكرة..
=تعالوا نغنّيها من الأول و احنا نفتكر....
= يلاااا
"العيد فرحة......"
_ "و قعدنا نغنى كده طول الليل و سهرنا و لعبنا و طبعًا احنا متعودين انا و اختي و ولاد اعمامى بنسهر لحد الفجر نغنّى و نلعب، و قعدنا على حالنا ده لحد الفجر.. كانت فرحة غير طبيعية.. فرحة لا توصف.. كنّا كلنا فرحانين و متجمعين ..أحلى حاجة هيّ لمّة العيلة.. عشان كده بحبّ العيد..."
« الله أكبر... الله أكبر »
"أول ما سمعنا آذان الفجر كله جرى ع الصلاة و صلينا جماعة فى البيت و طبعا شباب العيلة راحوا و صلوا فى المسجد.... اما انا و البنات اول ما خلصنا صلاة كل واحدة جريت ع الدولاب و لبست الإدناء بتاعها و الخمار و استعدّينا لصلاة العيد.... و نزلنا علشان نسلّم على جدى و جدتى و باقى افراد العيلة و نعايدهم.. قصدى همّا اللى يعيّدوا علينا😂
خرجت لقيت حازم ابن عمّى نازل على السلّم لان شقّتهم فوق شقّتنا و كان لابس جلبيّة فلّاحى بصيتله بإستغراب انه ليه مش لابس لبس العيد او جلابية بيضة زى باقى الشباب؟؟
_ ملبستش ليه يا عم؟
لقيته بص لنفسه بإستغراب و رفع حاجبه و هو بيتكلم: ده على اساس إنّى خارج بقميص النّوم؟!
_ عيب كده ابوك يسمعك.. الناس هيفهموك غلط يبنى..
هز راسه بمعنى انه خلاص يأس منّى طبعًا لإنى مش بسيبه فى حاله و بحب اضايقه طول الوقت و طبعا عارفة انه مش بيهتم بالمظاهر فخرج بجلابية فلاحى و مش فارق معاه و اهو احسن عشان يسلم من معاكسة البنات فى الرايحة و الجاية..جاتهم القرف مش عارفة بيعاكسوه على ايه؟؟
حازم نزل و سابنى بكلّم نفسى كالعادة و كنت لسّة هنزل انا كمان بس لقيت باب شقّة عمّى محمد اتفتح و خرج منّه كائن عجيب كل ما بشوفه بقول:" سبحان الخالق!" ..و الكائن ده سيّداتى سادتى هو كائن رخوى بيقعد يتشقلب طول الوقت هتحتار فيه اذا كان قرد و لا كنغرو! .. كائن حيّر العلماء بجد و....
_ يا رب السنة الجاية تتجوزى بقى عشان آخد العديّة بتاعتك.
طبعًا زى ما قولتلكم انه كائن رخم و لا بيطيقنى و لا انا كمان بطيقه أقدّم لكم إيهاب صاحب العشر سنوات ابن عمّى محمد... انا مسكته من ياقة قميصه و بهدّده: تاخد عدّية مين يالا؟؟ ده على جثّتى يحصل.. ده انا مش هتجوّز مخصوص عشان أغيظك يا ابن المتضايقة..
أنت تقرأ
اسكريبتات عائلة الحاج سعيد
Humorعائلة الحاج سعيد.. هي ليست ككل العائلات! إنها عائلة مميزة و مايُميّزها هو جنونها المُطلق.. جنون! فرد! اثنان!! بل عائلة بأكملها. تعالوا معنا نتعرف على هذه العائلة عن قرب و نخض معها مغامراتٍ يكسوها الجنون. و تذكروا الضحك للجميع.. تابعوني..
