اسكريبتات عائلة الحاج سعيد

٣ ثانوي

جمعة مباركة أحبّتي❤️
لا تنسوا قراءة سورة الكهف، و الصلاة على النبي، و وردكم اليومي من القرآن..
و لا تنسوا الدعاء لإخوانكم في فلسطين و سوريا نَصَرهم الله..

و ادعولي انا كمان بالمرة😂❤️

صلّوا على نبّي الرحمة..

______________________________

=يا ندى.. بت يا ندى...
_ يا دى النيلة مش عارفة أذاكر و شكلى هسقط السنة دى.... نعممم يا مرراااات عمممى.....
= هبعتلك الواد ايهاب ياخد منك بصلة عشان عايزة اعمل سلطة و البصل اللى عندى خـ.....
_ خلاص يا مرات عمى ابعتيه مش وقت سهارى الله يكرمك..

"دى بقى دعاء مرات عمى محمد.. بحبها اوى بس لولا انها بتختار الوقت المناسب اللى تنادينى فيه.. المشكلة انها بتعشقنى و متقدرش تعيش من غيرى...نفسى أذاكر خمس دقايق على بعض بس طول ما انا موجودة فى البيت ده استحالة ده يحصل... بالمناسبة انا فى ٣ ثانوى يعنى سنة الفيصل... لازم اجتهد علشان اجيب مجموع كويس و أشرف عائلتى.. انا أدبى اه بس ده ميمنعش انى اجتهد عشان اوصل لهدفى...
فجأة سمعت صوت خبط ع الباب و انا بذكائى استنتجت ان اللى بيخبط اكيد ايهاب.. لسة هقوم أفتح الباب لقيت اخويا حازم حبيب قلبى راح يفتح بدالى.. شوفتوا الشهامة؟!..."

حازم: خليكى انتى يا ندى عشان تذاكرى و انا هفتح.

"أول ما حازم فتح الباب لقى كائن صغير جرى على جواا بسرعة و هو بيتنطط فى كل مكان و يقول: الحقوووونى... عايزة تاكلنيييي.
بصّيناله بإستغراب و لسة هتكلم و أسأله عن قصده لقينا فجأة حد هجم علينا و هو بيزعق..."

_ هو فيين؟؟ راح فين القرد ابو شقلباظ؟ فيين؟؟
حازم: اهدى يا تسنيم و قولى عملّك ايه تانى؟

" و دى بقى تسنيم... تسنيم القط و ايهاب الفأر.... دايمًا بيتخانقوا و اشتهروا فى العائلة بل و فى المنطقة و المدرسة بخناقاتهم اللى مش بتخلص.."

تسنيم: قول معملش ايه؟؟ ده كسر الفازة بتاع جدتى و قالها ان انا اللى كسرتها و حرق الاكل و قال لأمى ان انا اللى حرقته و عمل مقلب فى عامر و قاله ان انا اللى وزّيته و جاب إندومى البيت و قال لأمه انه بتاعى انا و مش بس كده! ده كمان راح و أكل الشيكولاتة بتاعتى و شرب القهوة بتاعتى و كسر المجّ و قطعلى الفستان الجديد بعد ما حطّلى عليه كلور... انا هتجنن.... و مش هسيبه ده انا هشرب من دمّه..

" انا كنت واقفة بسمعها بملل لأن ده نفس سيناريو كل يوم... خناق طول الوقت.. بصّيت حواليا ملقتش ايهاب و فهمت انه استخبى فى شقّتنا و انا بصراحة عاوزة أذاكر فقررت إنى أضحى بيه...
_ تسنيم ايهاب دخل اسخبى فى اوضة حازم و اكيد هتلاقيه فى الدولاب زى كل مرة..
حازم: و أكيد كرمشلى الهدوم زي كل مرة... طب و الله لأخليك تكويها يا ايهاب يا ابن ام ايهاب.

" و دخل حازم اوضته بسرعة و وراه تسنيم و انا روحت جيبت البصلة و حطيتها ع الترابيزة و مسكت الكتاب و انا بعدّ لحد تلاتة: واحد....اتنين...تلاتة...
و فجأة لقيت ايهاب خارج و هو بيجرى و تسنيم بتجرى وراه و حازم بيجرى عشان يسلّك بينهم...
ايهاب و هو بيجرى عشان يخرج اخد البصلة فى ايده و هو بيشكرنى: منك لله يا ندى ع اللى بتعمليه فيّا ده... و مدّيانى كمان بصلة صغيرة يا بخيلة!
_ يا حازم الله يكرمك خد الباب فى ايدك.
خرج حازم عشان يلحق تسنيم قبل ما ترتكب جريمة و قفل الباب وراه و انا اتنهدت براحة و بدأت مذاكرة... ثوانى و لقيت الباب بيخبط..."
_ طب و ربنا ما هذاكر..