طبعًا كلكم بتسألوا ليه وسام منزلتش حكايات جديدة لينا من فترة طويلة؟؟ طبعًا ده مش تقصير منها و لا حاجة يعني لا سمح الله! الحقيقة احنا طول الفترة دي كنا بنحاول نقنع جدي سعيد إنّه يوافق يخلينا نروح نبص ع البحر بصّة كده من بعيد حتي و اهو نتأكد ان في بحار و محيطات فعلا ف كوكب الأرض و انها لسه مانشفتش و كل اللي بنشوفه ف التليفزيون ده فوتوشوب!
و اخيررراااا جدو وافق اننا نروح البحر لما اتفقنا انا و ولاد عمي نتخانق جنبه عشان نصدعه و استمرّينا على خناقنا ده لمدة تلت اسابيع لحد ما جينا ف يوم من الايام و احنا بنتخانق كالعادة....
_ انتي عبيطة يا اسراء؟! قولتلك ميت مرة متغلطيش فى العم جدو!!
_ بس يالا يا اهبل انت قال العم جدو قال! ده كرتون متخلف! انا عايزة اسمع بتاع سبونج بوب.
_ و انا هسمع العم جدو هاتي الريموت!
_ لا هنسمع سبونج بوب عشان انا بحبه.
_ لا احنا هنسمع ألڤين و السناجب على سبيستون.
قالها إيهاب بحماس ف بصيتله انا و اسراء و اتكلمنا فى وقت واحد_ اخرس يالا!
بصلنا بضيق و انا و اسراء بنت عمي كملنا خناق: هو انت عايز تاخد كل حاجة ليك كده؟! حتى تيشيرتاتك مش بترضى تخليني البسها!!
_ يمكن عشان دي تيشيرتاتي و انا حر فيها مثلًا؟! و بعدين انتي بنت تلبسي لبسي ليه ان شاء الله ؟!
_ عشان عاجبني و خصوصًا التيشيرت الابيض اللي عليه الدببة الثلاثة اللي انت لسه جايبه امبارح.
في اللحظة دي ماما دخلت و هي ماسكة حاجة سودا فى ايديها و بتقولي: معلش يا قاسم يا بني مخدتش بالي و انا بكوي التيشيرت الجديد بتاعك و اتحرق.
بصيت ع التيشيرت اللي فى ايديها و اللي باين عليه انه دخل النار مش اتحرق مجرد حرق مكوى!! و بعدها بصيت على اسراء اللي قعدت تبص حواليها و هي بتصفر ببراءة..
_ عجبك كده؟!
_ اللاه! هو انا عملتلك حاجة؟ امك اللي حرقته مش انا!
_ انا محرقتهوش و الله المكوى اللي حرقته!
_ هو انتو الستات بتحبوا تنكروا اعمالكم الفاسدة ليه؟!
_ الحقي يا مرات عمي سامعة بيقول عليكي اييه؟! ابنك العاق قليل الرباية اللي معندوش اخلاق بيقول عليكي فاسدة!
بصيتلها بشر و بعدين بصيت لماما اللي كانت بتبصلي بصّات غريبة مريبة و حاسس كده و الله أعلم انها عايزة تقتلني قومت اتكلمت بسرعة: انا مش قصدي عليكي ي حبيبتى ده انا قصدي على اسراء العبيطة عشان كان عينها من التيشيرت اكيد هي السبب مش انتي!
قولتها و ضحكت ضحكة متوترة لقيت ملامحها لانت و قالتلي: معاك حق اكيد هي السبب.
سكتت شوية و بعدها ابتسمت: بس المهم ان بقى عندنا قماشة جديدة للمطبخ.
أنت تقرأ
اسكريبتات عائلة الحاج سعيد
Humorعائلة الحاج سعيد.. هي ليست ككل العائلات! إنها عائلة مميزة و مايُميّزها هو جنونها المُطلق.. جنون! فرد! اثنان!! بل عائلة بأكملها. تعالوا معنا نتعرف على هذه العائلة عن قرب و نخض معها مغامراتٍ يكسوها الجنون. و تذكروا الضحك للجميع.. تابعوني..
