ظلت أسماء صامته نحو ربع ساعة كاملة وكذالك الأولاد الذين جلسوا على الاريكة المقابلة لها ينظرون للأرض باحراج شديد...
اسماء: انتوا في سنة كام؟
ريماس : طالعين رابعة ابتدائى...
اسماء: وشاطرين؟
مصطفى : ايوه شاطرين الحمدلله
اسماء: اممممم هو في خضار او حجات في المطبخ؟
نظر الأخوات لبعضهم البعض و قال هاني : مش عارفين!
اسماء: طيب إيه رأيكم نبص على المطبخ ولو لقينا ،نعمل الغداء سوا؟؟
ابتسم الأولاد وقالوا : موافقين.
اسماء : بس نتفق اتفاق، ممنوع نقرب من النار نهائي او البوتجاز او السكاكين او الكهرباء ، هنعمل الحاجات سوا و بس ، اللي هطلبه منكم نعمله.
هاني : تمام يا ابلة...
اسماء : قولولي سوسو احلى بلاش أبله و ميس و الكلام دا.
الاولاد: ماشي يا سوسو..
دخلت أسماء المطبخ مع الأولاد وفتحت الثلاجة فوجدت بها الكثير من الخضروات والفاكهة والجبن و المعلبات و البيض بينما في الفريزر يوجد اللحوم و الدجاج وغيره و المطبخ به الأرز والمكرونه وغيره مما يجب أن يكون في اي مطبخ فقالت مبتسمة
- حلو جدا في كل حاجه ، تحبوا نطبخ ايه؟
ريماس: ممكن فراخ..
مصطفى : بحب المكرونة
هاني : بس انا عايز ارز!
روز : بس أنت وهو احنا هنعمل حواوشي...
وبدأ الاولاد في الشجار .....
أسماء: بس بس بس ، ينفع نهدأ ...
صمت الأولاد ونظروا إليها ، فقالت : أولا نعتذر لبعض عن الأسلوب دا..
نظروا لبعضهم البعض و تبادلوا الاعتذار..
- شاطرين يا حبايبي ، بصوا بقه تعالوا جدا نتفق اتفاق احنا نحدد حالا اربع وجبات متكاملة ونطبخ كل يوم أكله، كدا كلنا نكون مبسوطين، ايه رايكم؟
نظروا لبعضهم ثم قال هاني : طب النهارده هنعمل أكله مين؟
جلست اسماء القرفصاء لتكون في مستوى طولهم و قالت : هتفرق معاك؟ ، يا حبايبي احنا مفروض نتعلم الايثار، عارفين يعني ايه؟
- لا....
- يعني أننا نحب لغيرنا اللي نحبه لنفسنا ، أني افضل سعادة غيري على ساعدتي ، عارفين أن ربنا بيحب الشخص اللي عنده ايثار.
روز: بجد يا سوسو!
اسماء : ايوه طبعا ، ها بقه هنعمل ايه؟؟
مصطفى : أنا عادي ، اللي اخواتي عيزنه أنا هأكله...
ريماس : وانا كمان...
هاني وروز : وأنا كمان..
اسماء : حبايبي الشاطرين، طيب يلا بقى نحدد الأربع وجبات المتكاملة اللي هنعملهم...
ريماس مثلا طلبت فراخ ممكن نعمل مع الفراخ الأرز اللي طلبه هاني ونعمل معاه خضار و بكره نعمل المكرونة والحواوشي زي ما طلبت روز و مصطفى ، ايه رايكم؟؟
قفز الأولاد سعداء وقالوا: يلا بينا...
اسماء وهي تخرج نوع من الخضار من الفريزر : تحبو نأكل تورلي؟
ريماس : ايوه ايوه طعمه حلو!
اسماء : ها والباقي ؟
- موافقين....
وقفت أسماء تحضر الطعام و قد احضر الاولاد كراسيهم الصغيرة وجلسوا لجوارها و هي تطهو الطعام ، وكانت تقطع لهم الفاكهة و تعطيهم العصير اثناء إعدادها الطعام....
روز : انا جعانه اوي و ريحة الأكل حلوة اوي اوي...
اسماء : خلاص هانت كلها ربع ساعة و الأكل يخلص...
