توأم دياب

الذَئـــب"16"

Writer/Tena
تـــيــنــه 🐺🔥
لاااا تنسون التصوووووويت ، والتعليق بين الفقرات عيوني ♥️.

رَبـنا أتِـنا في الدُنيا حسنه وفي الأخره حسنه وقِنا عذاب النار

كـف چـرحك ياسبع وأنهض وگوم ترى الدنيا نهايتها ماتدوم .

_______________________

گلبي وگف ولطمت على وجهي بكُل قوه من سمعت الرجال گال ...

_ جثتها هناك مشموره بالقطعه مال بيتهم الي احترگ .

حراره اجتاحت راسي وأذنـي صفرت أطرافي رچفت،عيني تتنقل من أُمي الي طاحت بالأرض لـمحمد اخوها الي يصرخ على مصيبته ويلطم مثل النسوان ويدگ على راسه ....كُلشي صار سريع سريع وذاكرتي مـن الصدمه ما تسعفني كأنما حلم وگعدت منه واذكره بس دقايق ونسيته

فزيـت من صفنتي على صوت المـله وهيَ تنعي واصوات نحيب النسوان الي تتعالى . كُل شخص همه شكل وكُل شخص يبچي على مصيبه شكل فعلاً القلوب ابواب وكُل باب داخله غير ...
رجعت ابجي من سمعت الصوت والكلام المُعبر الي يجتاح گلبك بسهوله ويعبر عن مصيبتك ....

::- أنا يُمه النوايب من كل كترها محاوطتني
محاوطتني .. محاوطتني
أنا يُمه الضحكه من زمان متيهتني
متيهتني .. متيهتني
أي يُمه صغيره وما شفت فـرحه بعـدني
أي والله يُمه بعدني
عزيزه أنا ييُمه والموت أخذني ...

روحي طلعت من البچي وأحس الكلام ملح وچاي ينرش على جروحي ، فاجعتنه بيها أليـمه أختي هذي مو بس بنت خالي
شلون أنسى ؟
شلون أنسى كُل كلمه نطقتها ، شلون أنسى برائتها وطفولتها الي انتهكوها حيوانات ما بگلبهم ذكر الله ولا ذرة رحمه !
هضيمه تـروح بـنيه بعمـر الورد ما شافت من الدنيا بس الضيم والقهر  ...

گمت من مكاني على أصوات صريخهم وگلــبي حسيته راح يوگف أبد ما يتحمل هيچ أجواء
راسي ثگيل واحس چاي امشي عليه مو على الأرض ، اتعديت من يم أُمي الي صافنه بعيد وسرحانه ودموعها تمطر چريت حسره بهموم  هذه حالها من أول يوم فاتحه لحد هذه ثالث يوم گلبي ورم واحتار بزمانـي المن اركض لأُمي لمحمد الي حاله يبچي الصخر ...

فتحت باب الغرفه أتطـمن على محمد بس مو چن فتحت باب لا بالله چن فتحت باب المواجع
گـاعد بزاويه الغرفة متكرفص وساند راسه على رجليه وبس أچتافاته تهتز وكُل ما تحچي الملا كلمه يزيد بالبچي احترگت روحي وياه ...