Mak ti tak chuan a khhum hma ah tak chuan ka ding ngawi ta reng a, amah chu a nui, a hlim bik nachhan erawh ka hrelo, kei erawh mittui tla lo tur in ka in dang thei tawk tawk. A hmel mawi tak leh êng tak hmuh hreawm ka vawi khat tih na a ni awm e.
"Hi, i dam maw?" rawn tiin, midang chu nise ka chhang let ve ngei ang, ani erawh chuan ka lungphhu a ti rang sawt, a ring lutuk chu in bendaih ka tum nasa hle, ka thhinlung chhuak mai dawn a ka hriat avang chuan a bo leh nerve vel ka check ta vat a, ka zawh veleh chuan ward dangah chuan ka lut zui ta nghal bawk, kalo ngai ve ngang ani mah na.
A nupui chuan tunge ka nih tih a zawt ngei ang, engtin nge Zomuana chuan a hrilh ang le, ka rilru chu zep lo chuan ala ti buai reng thei anihhi.
Nileng chuan ka awm anuam thei lo a, mahsela hun kal tawh chu hun kal tawh, ka colleague nurse te nen chuan fiamthhu chu kan thhawh ho leh a. Rilru ah erawh chuan Zomuana leh a nupui awm dun thla chu a lang zeuh zeuh. Thla 3 dawn an la awm chhunzawm dawn si a, ka huphurh ngei mai, ka ward check na tur ber ah an rawn la in seng lut leh nghal. Engpawh chu nise hlim takin dawnsawn kan tum mahna.
Eng mumal ngaihtuah loh chuan ka phone ka khawih neuh neuh a, ni sa bawk nen chuan hah chu hahthlak ve deuh hlek ani e, A.C. in on chuan min ti hahdam sawng sawng thei hial in ka hria.
"Bawiha vawiin chu heart surgery kan nei dawn a, ilo en ve dawn em?" Dr. Robert ah chuan chhuk melh chuan min melh reng chung chuan tiin, ani hi staff zinga upa ber niin kum 43 ani tawh ani, upa ber nih chang anih avang chuan kan en sang em em a, ani pawh in ai naupang zah der a thiam em em bawk a, buaina ching fel tu ani deuh ber mai anih chu.
"Aw" tiin ka chhang ve maia, insawm ta chu kan aw ve mai loh chuan tiin ka fiam zui bawrh bawrh a, nui ngai vak lo tih takah a nui lem lo, a chhuak ta daih a, keipawh chu dar 12 a rik tawh avang chuan ka ward enkawl ward no. 3 ah check tur chuan ka kal leh ta a.
"Chaw in ei khham hlawm tawh em?" tiin nui sâr pah chuan ka zawt ta hlawm a, mifel thlan chhuah awm khawm ang mai chuan nui chunga min han chhang ho te chuan ka thhinlung chungril chu a hlim ve vawng vawng a, thhawk leh khata tih dam vek mai hi ka nap thin. Mahsela chu erawh Pathian ina a rem tih dan dan ani tawh si a.
Zomuana mutna chu a kil tawp anih avang chuan hmanhmawh lo tak chuan a khum bula chair ah chuan ka thu a, annu erawh a awm lo, ka tihtur chu ti mawlh mawlh in, min be buai reng a kei pawh chuan chhang ve zel in, ka ti zo chu ka ban ah chuan min rawn vuan thut a ka phhu chiang ngang mai, ka au thleh lo chauh ani.
"I aa mi, miin min hmu ang." tiin min vawn na chu ka hmer sak a.
"Ana, miin min hmu se, in ngaizawng kan ni tawh chuang hleinem." tiin min thlah ta a.
Ka in ngaihtuah chu, ni tak e, enge ka thuhruk tum vak, tiin ka nui lui titih.
"Enge ni?" tiin ding reng chung chuan ka zawt a, ka kut chu pe tura min tih chuan ka pe a, ka kut chu vuan in kan nih tirh lai a min vawn dan a, a han vawn meuh chuan ka hun kal tawh ka ngai tih ka in hre chhuak mawlh mawlh hle.
In ngaihtuah harh thutin, ka thlah ta nghal a, a nupui pawh chu eitur neuh neuh keng chung chuan kan awm na lam chu rawn pan in, energy drink chu pek min tum chuan a ban chu a rawn khai cho a, keipawh chu lawm takin a kut ami energy drink chu ka laksak a, lawmthhu sawi mawlh mawlh in ward chu ka chhuah san ta a. Zomuana nupui chu a fel in a hleitling bawkah chhungkaw fel taka rawn chawr chhuak tih chu a hmel ah pawh chuan alang reng.
O.R. ah chuan ka lut a, nurse then khat chuan ka kawr leh ka glove tur te chu min hak tirin min bun tir bawka, Dr. Robert a dinna hmazawn ah chuan dingin, patient awm chu zei tur chuan kan tan ta a, a thhin awm na lai chu thleng in a thisen chu suction machine chuan nurse pakhat chuan lo hip zung zung bawk.
Dr. Robert a chuan pulmonary veins chat chu a hmu a, hemostat hmang chuan a thui ta a, kut a thui anih avang chuan hun chu a duh rei ngang ngang hle, a zawh chuan ligating chu ka chhunsawm a, a thuina chat mai mai tawh lo tura ti nghet tu ani.
Tha tak chuan kan patient awm chu kan thui leh ta a, a BP te chu normal vek in, a lungphhu leh a thin thhawh dan te pawh a pangai leh vek a, kan hlim tlang hle, chanchin lawmawm sawi tur chuan Dr. Robert a chuan min tir a, keipawh chu phha em em lo chuan a damlo chhungte hnenah chuan thhu lawmawm chu kava hrilh ve ta a. An tap hlawm lo chauh ani.
I.C.U ah chuan damlo chu kan dah ta a, a chhung te pawh chuan an awm pui renga, a dam reng pawh chu Dr. Robert a nen chuan kan beisei pui hle.
Zan chu lo her in, thli hît vawt tak chu thhaw ve tawh in, anuam ve reng, coffe dawm chung chuan thla eng mawi tak leh chhumin a han hel lai vel chu ka thlir ta reng a. Zomuana a nen a hmangaih thhu kan in fah lai te chu langin siar te pawh chuan min la hriatpui ngei ka ring.
Thla hnih dawn an awm tawh bawka, keipawh chuan ngaiah ka nei ve tawh."Ngatinge nangmah in i awm?" ka hnung lam atang rawn ti tu chu en tumin ka hawi let vat a, Zomuana lo niin, ka nui suih. Ani pawh chu min nuih ve suk a, a biangsum lawmawm deuh chu ala pu reng.
Coffee chu a rawn keng ve in, kan in cheers a, thla chu kan en dun ta reng a.
"Bawiha..kei mihring fapa ve mai hi kalo mawl mang khawp mai, rilru fim leh Pathian thuawih ni ila chuan, ka tina lo mai tur che nia, tiraw?" a sawi laia a thhutak zia chu a mit atang chuan hmuh theih hial ani.
Chawngmawii leh Hrangchhuana siar leng mawi din te chu thlir vauh vauh in,"Ni e, keipawh lo be lo tawp tur che hi ka nia." fiam thhu titih chuan ka nui lui suk a, mahsela ka rilru ah erawh kan in tawng kha ka hlimpui ber si a. Theihnghilh chu tum ve eng ang sek mah ila, hmangaih na thhinlung chu nawhreh a har ve ngang mai.
Theih chang se, nang tawg lovin ka hun tha te hlim takin ka hmang mai tur, mahse ka dem bik lova che.
A phone chu rawn phawrh chhuak in,"I no." ati a, ka hamhaih hman tep, a phone chu la in ka no. chu ka type ta a, ~Bawiha🦋~ ti chuan alo la in save reng.
Ni e ka duh dan taka keima save ngei kha ania, tinge ala delete lo le. Engpawh chu nise a theihnghilh anih dawn hi tiin a phone chu ka pe kir ta a.
Ward lam pan chuan a chhuk a kei pawh chu kan room ah chuan ka kir ve ta a.
Dar 12:00 a.m. ka alarm ri chuan min ti harh leh chiang hle, night shift nilo mahse ka ward chu enkawl that ka duh avang in ka ward a patient te chu ka endik leh ta hlawm a. An muttui hlawmin an hahdam tih ka hmuh chuan ka hahdam ve sawng sawng mai.
Zomuana leh a nupui an awm loh avang erawh chuan mak ka ti hle, an zung ani mahna ka tih lai chuan bathroom atang chuan in fawp ri chu ka hria a, annih ngei dawn chu tiin ka mittui a hnam ve sawk, a chhan erawh ka hre hauh lo.
Tawrhchhel ka tum bawka, ka mittui pawh chu a tla lem lo, kan nurse room ah chuan lutin ka mutna turah chuan ka mu ta a, chau bawka ka muhil zui ta nghal.
A tuk zing ah chuan, tuk dang ang bawkin coffee nen ward ah chuan ka lut a, keimah zawk hi damlo awm ang mai tura min han dawnsawn chang te chu ka hlim na ti zual tu mai anni zawk. Zomuana pawh chu fel tak chuan ka check zo a, ka chhuak leh ta nghal a.
Ka off ni anih avang chuan nileng chuan ka office tur room tifai hna thhawk in, keima tawk ah ka hah ve hle, mahse chumi kara hlimna ka neih erawh chuan min ti phhur ngang mai.
Ka office chung chu en kual mawlh mawlh in, ka nu leh pa te chu la dam se min lawm pui bik ngei ang, ka mittui chu luang in, ka ngai vawng vawng hle, hlim taka ka intern zawh kum a min thlah lai te, ka hospital thhawh na tur a min thlah lai te.
Ka biang chu hru in, room chu ka kalh leh ta a, nurse room ah chuan ka awm ta phawt a, ka khum ve ah chuan mu in, kalo muhil daih chu niin.
Nurse Ruat in min rawn kaih thhawh takah chuan ka thho ve thuai a, ward chu ka fang kual a, dar 7:00 p.m. vel anih avang chuan a hun tawh reng reng tiin ka ke chu ka pen hnuk hnuk a.
Zomuana leh a nupui chu an in pack lai ka hmuh chuan ka pan vat ta a. "In chhuak tawh dawn mi?" tiin nui sâr chung chuan ka zawt a, annu chuan,"Umm, anih hi, kan lawm lutuk e." tiin a bag chu ak in pawn lam chu a pan ta a.
Zomuana nen chuan kan in din chilh ta reng a, "Bawiha, awm dun i thla hlel ve lo ami? Zan hun nuam taka kan hman lai te." beisei nei ru tak chuan min en reng a, kei pawh chu hmun dang ka en duh bik lo.
Annu a rawn kir leh vang chuan a bag chu ka ah pui ta a, an thhawmhnaw an in thhiar zawh hnu chuan an motor chuan an in khalh chhuak ta nghal a.
Whatsapp ka han en chu, "Lo in ngaihtuah rawh" tiin Zomuana chuan min lo text chu niin, "Ai" tiin ka chhang hmak, ka chhungril lam erawh mak deuhin a hlim ru hle. Chu erawh tih pun ka duhloh avang chuan, "Mi pa ngatan mah ka tilo, ka hmu zolo pawh nilo" tiin ka in fuih tha sauh sauh.
