عسكري على البال(ليبية_منقولة)

الحلقة 12

#عسكري_على_البال "حُماتي"
الحلقه :اثنى عشر
بقلم :فاطمه سالم الورفلي
..............
.....
اني نشرب في العصير :زي ما قتلك يا خويره الحق اني بنطلق وبنقول له راجلي ان العيل مات...لان لو كان تعرفي راجلي لواه لواه وخلاص نار تلهلب وما عنده الريح وين ادور... واني خايفه ياخده عيلي ويحرمني منه... والحق مالقيتش كان هالدباره نبي نخليه عندك لعند نطلق وبعدين نقوللهم تبنيته من دار الرعايه ولا شي.... ها شن قولك يا خويره تساعديني؟...

خيريه :والله شن بنقولك يا سريوه... مش عارفه الحق ما نقدرش نوعدك الامور هدي مسؤوليه وصعبه الحق... اني يا وخيتي كان تبي الشيره والدباره... ما تخربيش حويشك وحتى لو كان راجلك نار ودخان زي ما قلتي لكن هدا كوم وانك تحرميه من ضناه وتطلقي منه كوم تاني.... ره هو انسان والكبد واعره وصدقيني اول ما بتجيبي ويشده عيله في غمره ح يلين والله ره لان دار منك صغار... والصغيويره هي مفتاح الجنه فما بالك القلوب؟... اني نقولك من قصيرها ما تقزينيش عيلك واصبري وتحملي مهما كان يكون حتى في سبيل عيلك ... وره كان جيتي للحق ولا ما نقدرش نطاوعك في شي زي هدا حتى بيني وبين ربي لا الشي هدا فيه خراب بيوت وتقزين عويله واني حاجة بيت الله وبعد ريت وشبحت وكبرت ندير كاوصه زي هدي!..... لالا اسمحيلي سلم وخيتي لا الحق ما نقدرش نحط ايدي في شي زي هدا ومن ساكت على الحق شيطان اخرس... وهدا لي عندي وهدا الحق وكلام الحق ينقال ايواه... وانتي زي وخيتي واعز ما نريدلكش الشينه يا سريوه وره هدا لي تخممي فيه ما ننصحكش اديريه حتى مع غيري ره ما ينفعكش والله ما ينفع ولا يثمر ولا حتى حاجه...وسلم وخيتي زي ما قتلك ارزني واثبتي واستهدي بالله والمراه ماليها كان حوش راجلها والمشاكل ديما تصير ايواه... زمان اني وعامر الله يرحمه توصل بينا لي شيطان الرجيم اعود بالله منه ونتحارفو ونتصارفو لكن بعدين ادور شي ما تلقى شي... ره المشاكل ديما تصير وديما هكي في الحياش وللحياش اسرار وحكايات ولو كان هلحيط يتكلم ره قال مواويل من لي يصير بين هلسيسان

اني كلام خيريه لين قلبي شوي وهديت وطبست راسي وتحشمت.. :والله شن بنقولك يا خويره ... الحق كلامك كلام عقال واني ما جيتك الا باش تردي عليا الشيره والدباره..

خيريه ابتسمت وحطت ايدها على ايدي وشدتها بقوه وتنهدت :اسمعيني شوفيني اني هاني بلا صغار لكن ما قدرتش نسيب حوش راجلي... ماقدرتش لان فيه ريحته وريحته سادتني وجيراني وناسي محاوطيني ومونسيني... لكن عليم الله يا سريوه لما نجي نحط راسي على المخده تخنقني العبره ونتمنى غير كان ربي رزقني وعقبت عويل من المرحوم عامر من ريحته وحنيته والله يا سريوه الاهل والجيره كوم والصغيويره كوم تاني ... كدب عليك لي يقولك الصغار شقا... صح الصغار يشقو ولكن بعدين يشقو بينا💙...."تنهدت وخنقتها العبره وطبست راسها وسكتت شوي وزمطت ريقها وشبحتلي وضغطت على ايدي"... المهم يا سريوه سلم وخيتي ابعدي شيطانك وما تخربيش حويشك وان شاء الله بالعمار الدار