عسكري على البال(ليبية_منقولة)

الحلقة 7/6

#عسكري_على_البال "حُماتي"
الحلقه :السادسه&السابعه
بقلم :فاطمه سالم الورفلي
..........
طلعت بثينه بدون ما ترد  وشبحولي تهاني وكنز وقعدن يخزرطن فيا....

كنز :شن تحسابي روحك؟.... انتي ره تحت رجلينا... ولي تكلمي فيه بيضحك عليك ومش ح نسمحولك تشوهي سمعتنا عقاب الوقت..

تهاني تلاطع بيديها:راك اصغر منا يا عاار.. تعرفي كان نلقى بثينه ليها ايد في الموضوع نقتلك قتل سامعه ولا!

اني لملمت رجليا بيديا وقعدت نبكي... مش من حقاره كلامهن!... لا من كلامهن خايفه يكون حق.. خايفه ميلاد يضحك عليا... لاني وقتها مش عارفه شن ح ندير في روحي!...وقعـدن مستمرات في تخزريط... تفصل هدي ولي تعقبه تكمله الاخرى... لييين تعبت من الـدموع وهن ما تعبنش!... وبعدين طلعن وسيبني في دوامه مع نفسي... اتكيت على الارض وقعدت نفكر ونستنى في يوم غدوا...لعند اذن الفجر ... نضت توضيت وصليت... وقعدت ندعي ونبكي... مش عارفه كيف نحكي حتى! ... قعدت نقول يارب انت تعلم بي لي فيا يارب... وفاتت ساعه وساعتين وتلاته واكتر... ونعسني النوم... ما نندريش على شي لين نوضتني كنز...

كنز تهز فيا :نوضي تي نوضي في ناس يبوك

اني فتحت عيوني :هااا شن في خيرك؟..

كنز :امي قالت نوضي اسراء في ناس يبو يشوفوك

اني :يشوفوني؟

كنز كشخت :تيي اييي نوضييي فيسع

اني هنا تفكرت ميلاد...نضت طول خشيت الحمام "حشاكم" وغسلت اطرافي و وجهي... وخشيت لدار مكيجت مكياج بسيط...ولبست بلوزه وسروال... ودرت شعري كوده وطلعت.. ومع كل خطوه ابتسامتي تزيد وتزيد وفرحتي مش سايعتني... جت قدامي تهاني قلت في خاطري اهو جي بيخطبني.. اهو حبني وما كدبش عليا ...واقعدو بقهرتكن... ومع كل خطوه تزيد ثقـتي وفرحتي وابتسامتي... ما حسيتش بروحي الا اني في وسط الصاله واستاقضت بروحي على صوت مراه...

مراه :ماشاء الله تبارك الرحمان على كنتي قل هو الله احد يا ماشاء الله يا زين خيرته ميلود

امي :سلمك وينجيك وخيتي

"مش قادره نوصف فرحتي بجد ❤بس لحظه لحظه قالت ميلود؟... بس هو اسمه ميلاد!!!.... كيف هك؟... غريب!...اممم يمكن يقولوله ميلود ههه شعبنا اعوج معلش  .. قعمزت وحتى من عيوني يضحكو ... وشوي نادا عليا بابا ومشيتله بدون ما نحس على خطواتي حتى... من فرحتي مش حاسه بي ولا شي... "

اني:نعم بابا؟

بابا :خشي البسي وشاحك وتعالي للمربوعه

اني تحشمت:حاضر

....
خشيت فتحت القجر واخترت احلى وشاح فيك يا قجري😄... ولفيته عليا بي كل حب وكل ذره فرحه فيا... ومشيت جيهة المربوعه وجيت قدام الباب بزبط ورفعت ايدي بنطقطق خلاص... قاطعني صوت تهاني...