عسكري على البال(ليبية_منقولة)

الحلقة 15والاخيرة ¹

قبل ما تبدو قراءه لازم تركزو كويس لان في حلقه هدي ح ينقلب كل شي رأسا على عقب...قراءه ممتعـه🌸🍃
#عسكري_على_البال "حُماتي "
الحلقه :الخامس عشر جزء الاول والاخيره
بقلم :فاطمه سالم الورفلي
......................
.........
"اسراء بحداي!!!.... منو لي يتصل بيها وهي خايفه نسمعها! وشوي وقالت "

تهاني :تي باهي تو ندير لي قتلي عليه

اني استغربت!!!.... شن قصدها!!!.... غمضت عيوني وهي صكرت الخط وقعدت تبرم في الدار!.. ومعاش سمعت شي ورقدت....فات شهر ونص ومزال اسبوعين ويطلع ولدي امبارك من العياده❤... قعدت كل يوم نطلع للمحلات وايي شي يعجبني نشريه... ونمشي للمستشفى نقعد ساعتين نتأمل فيه...لعند فاتو الاسبوعين هادو.... وجي يوم المنتظر..... بتاريخ 6/6/2020....نضت الصبح مشيت للمحل خديت ورود ومبايل وتورته واتصلت بي بنات خالاتي ومشيت لي خويره ولي امي كلمتها... وكلمت شركه الفاطميون للتنسيق... وعطيتهم عنوان حوشي... وروحت استنيت ربع ساعه وجت مجموعه من الشركه وقعدنا نسقو ونزينو في الحوش... درت مبايل حتى على سريره وستيكرات بيبي ومكتوب عليه "على جده سميناه واجعل له بالمراجل يشبه سماه امبارك "..... هو مش على اسم جده جده بس يلا معلش 😅 وكملنا تزيين....ومشيت لي داري فتحت الدولاب كان فيه مبلغ فلوس ديما ميلود يحطلي فيه...خديت منه 150 وطلعت عطيته للمشرفه على المجموعه

اني:صحيتو وان شاء الله مش اخر تعامل❤

المشرفه :ان شاء الله حبيبتي ولينا الشرف..وان شاء الله يتربى في عزك

اني ابتسمت :سلمك حبيبتي ❤مع سلامه

المشرفه :في امان الله

....خدو عدتهم وادواتهم وطلعو وطلعت في جرتهم وصكرت باب الحوش بلمفتاح....ومشيت لي العياده الامل...على رجليا بحكم انها قريبه....وخشيت لقيت ميلود قدامي على الريسبشن وعاطيني بظهر...وموقع على اوراق قدامه وواخد ملف امبارك في ايده ويخلص في مبلغ لي طالبينه العياده...قدمت خطوتين وقلت...

اني مبتسمه:صباح الخير

ميلود التفتلي واول ما شافني ارتبك :ااا اهلين

اني استغربت رده فعله بس تجاهلت وقلتله:ليش ما قلتلي على اقل مشيت معاك!

ميلود مرتبك:ااا ماهو اا كن... كنت... كنتي راقده

اني زدت استغربت وبرفعه حاجب قلت :به و وين المشكله كان نوضتني

" وعلى كلمتي هدي سمعت صوت تهاني قالت "

تهاني :ميلود هيا سلامه يراجي فينا برا

"نصدمت !... لما شفتها... وكأنه هي لي مرته مش اني!!... واول ما التفتتلي ملامح وجهها تغيرت 180درجه !!.... الباين في شي!... وخطييير... طول جي في بالي ولدي ...رعشت شكله ابصر شن دارو

اني :وين ولدي!

تهاني :في الحضانه..

اني :توا وريهولي توااا