- لعبتهم قديمه شذا يبا ماتحمس
تحلطمت سديم وهي تشوف الفريق الي قدامها يلعبون لعبة الهمس واحد يلبس سماعات والثاني يقول له كلمات وهو يحاول يخمنها ولهم وقت محدد
واكثر فريق يخمن الكلمات صح يفوز ، لعبه متعارفه والاغلب يلعبها بالتجمعات وبكل مكان
- والله اذا ماتبين تلعبين عبود موجود يلعب بدالك
رد عليها علي وهو يتكتف وعينه على الفريق الي وقته بيخلص وماخمن الا 7 كلمات من اصل 10
لفت عليه سديم وعقدت حواجبها باعتراض
- تبي الفكه يعني؟ عناد والله العب !
تنهد علي وهمس وهو ينزل راسه
- انا ليش تكلمت لو ساد حلقي ابرك
ناداهم المنظم عشان دورهم جا ، وطلعت القرعه على علي وهو الي راح يلبس السماعات وسديم تقول له الكلمات ويخمن وش هم
- والله ماظنتي بنفوز لو انتي الي بتقولين الكلمات
نطق علي وهو يلبس السماعات ويعدلهم عشان مايتحركون
اشرت سديم بيدها وهي تهمس
- العبره فالخواتيم اصبر بس
بدا المؤقت يشتغل وكان مدته 10 دقايق كل كلمه لها دقيقه وحده عشان تخليها يخمنها ، سحبت سديم من الاوراق وطلعت لها اول كلمه
" كبك "
رفعت راسها لعلي الي يطالع شفايفها بتركيز ينتظرها تنطق الكلمه وذا الشي الي خلاها تتوتر لكنها حاولت تتجاهل التوتر وبدت تنطق له الكلمه ببطئ
- كبك
- انحرق؟
تنهدت سديم من علي الي واضح بيجيب العيد من البدايه ورجعت تعيد الكلمه
- ك ب ك كبك !
نطقتها بسهوله بينما علي مفهي يطالع فيها ومو عارف وشو الكلمه
اشرت له بيدينها على عيونه تبيه يركز ويشوفها وهي تنطق الكلمه بهدوء
كررتها فوق الخمس مرات وكان باقي نص دقيقه ويخلص وقت اول كلمه لازم يخمنها
- اف منك يا علي مو عارفه تنطقها!
اشر علي بيده لها عشان توقف تقول الكلمه وقال التخمين الي محد توقعه
- احبك؟
قلب وجه سديم احمر وبدوا الموجودين يضحكون والي يصفر والي يصفق يفكرونه يعترف لها
شالت سديم السماعات من عند اذانه وقالت بسرعه
- قصدك ان ذي الكلمه الي اقولها؟
هز علي راسه بموافقه وقالت له ان تخمينه خطأ ورجعت له السماعات وهي تتجاهل دقات قلبها السريعه الي ماعرفت وش تفسيرها ، ورجعت تكرر له الكلمه لين ابتسم اول ماستوعب
- اهااااا قصدك كبك!
