عاوزه اتكلم طفا النور وانا شهقت بصوت عالي قلت له انت بتعمل كدا ليه ما فاهماك : المافاهماه شنو يا سمر يعني لمن زوجك يقول لك تعالي عاوزك معناها بقصد شنو
قلبي دا فجاءة بقى يدق بقوه ، وياها حالة اللخبطه البدخل فيها كل م اكون قريبه منو ، ما قادره اطلع كلمتين موزونات .
والضلام ما شايفه كويس ، فجاءة حسيتو بقرب ويحضني ما كان حضن عادي ابدا ، كلو لهفه وشوق واحاسيس امكن نحن الاتنين نسيناها من زمان خاصة هو ، الزول دا من زوجتو اتوفت تاني ما قرب على مرا ولا عاش علاقه قريب الخمسه سنوات ، وفي النهايه انتهى بينا المطاف في السرير .
اول م الاذان اذن انا فتحت عيوني ، انخلعت شديد لمن لقيتني في حضنو ومحتويني بكل معنى الكلمه ، بحيث انو لو اتحركت هو بحس ، وفعلا صحى بي ، انا عشت حالة بتاعة صدمه !! والشي الحصل دا خوفني شديد بقيت افكر في طليقي والكان بحصل بيننا !!! وانا كرهتو قدر شنو اخر فتره لمن انتهينا بالإنفصال .
كان في نفور شديد من قبلي ، واول حاجه عملتا اني قمت . مسك يدي وعاوز يرجعني لحضنو بس قاومتو ، شلت ملابس وطلعت لبست برا ، ما مصدقه الانا عملتو دا!! وكيف ما رفضت ولا حتى طلع لي صوت ، الزول دا قالا لي بالحرف اتزوجتك عشان الاولاد ، وشعورو بالشفقه تجاهي واضح . امكن هو حس بالمسؤوليه لمن شاف القروبات البتابعا واني بتعمد الفت انتباهو!! امكن خاف افكر في الحرام بسبب بعدو عني!!💔 امكن خاف من غضب ربنا واداني حقي الشرعي ك اداء واجب !!!
الشي دا خلاني احس ب احباط شديد واحتقرت نفسي مشيت اول حاجه اطمنت على اولادي في نومتهم بعداك طلعت برا عشان املا الجردل ، هو لحقني وانا ما قادره ارفع راسي اعاين له قال لي : بتعملي في شنو .
قلت له : عاوزه املى الجردل.
: ما كان تستحمي في حمامنا هناك ، ليه تطلعي برا؟
سكت وما ركزت في كلمة حمامنا دي ، قال لي : وبعدين ليه اتصرفتي معاي كدا لمن صحيتي؟ انا عملت حاجه زعجتك؟؟
سكتت
قرب مني وقال لي : ردي انتي متضايقه مني ع..........
قاطعتو ب : لا ما في شي ، ومشيت املى الجردل ، شالو ملاه لي ودخلو لي الحمام ، تاني ما ضغط علي في الاسئله.
مشيت اتحممت ، كنت حاسه بغرابه كأنو دي م انا ، انا فعلا كنت متزوجه بس في احساس كدا حسيتو مع نزار غريب شديد !! كأنو م انا ، ولا بعرف ليه اتصرفت كدا ، المهم استحميت وغسلت شعري بعداك طلعت ، لقيت ليان قدامي قالت لي صباح الخير .
: صباح النور .
كنت بجفف شعري ، قالت لي : نعيما ، عملتي ماسك ولا شنو؟ عاينت لها ب استغراب ، قالت لي : مغسله شعرك من الصباح!!
