عائلة الجد صالح :
١/ الجد صالح ( ٦٤ ) رَجل عصبي ودمه حار ، هذا بسبب عمله بالقطاع العسكري ( ضابط سابقاً ) عنده اخو واحد (سالم متوفي) وعنده من الابناء [ خالد ، ثنيان ، تهاني ، وجود ] كلهم بنتعرف عليهم .
٢/الجدة منيرة ( ٥٤ ) أمرأة حنونة جداً على عيالها او احفادها ، حبوبة جداً جداً وتحب الاهتمام والشياكة ، رزينة ومو اي احد يدخل مزاجها .
•
عائلة خالد بن صالح:
١/ خالد ، ( ٤٦) شخص مثل ابوه ولكن الي يميزه انه يحب بنته [ انهار ] ولا يرضى عليها الغلط ويتونس معها اكثر من عياله [سلطان ، بدر ] بمعنى اصح موريهم نجوم اليل بعز الظهر😭 ، مُعلم لغة انجليزية .
٢/ فرح زوجة خالد ، ( ٤١ ) انسانه طيبة وماخذه من اسمها نصيب ، بس من تحت لتحت وغيورة وتغار على خالد غيييرة فضيعه ،وتوقف دايم بصف سلطان وبدر ، ربة منزل .
٣ / سلطان ، ( ٢٧ ) شخص فكاهي واجتماعي جداً جداً لكن لا صار الجِد جِد رجع له العقل ، يحب الهدوء وهو اكبر مزعج ، ضابط .
٤/ بدر ، ( ٢٤ ) ، لو فيه شي بعد ثقاله الدم كان دمه ، ولو شاف ابوه معصب منه يقمط العافيه لانه يجيب العيد قدامه دايم، شاعر بس محد يعرفه الا افراد قبيلتة فقط ، اعمال حُرة .
٥/ أنهار ، ( ١٨ ) الجنس اللطيف بحد ذاته ، طالبة بالصف الثالث ثانوي ، محبوبة من الكل ولا قصور في بنت عمها ثنيان وجدان هذولا الثنتين الاحب للجد صالح ، اطيب من قلبها مافيه ، الرزانه والجمال واللطافة كاملة والكامل الله ، طالبة .
•
عائلة ثنيان بن صالح :
١/ ثنيان ، ( ٤٥ ) ، رجُل صعب الفهم ، شدته اقوى من ابوه واخوه ، صلب الملامح والغموض يجتاحه ، لكن لو يرتاح لك تشوف السواليف والوناسه والضحك وهذي من طبع عيال صالح ثقال بالبداية ! ياخذون راحتهم بشكل حلو مع الشخص بوسط السوالف ، ضابط على وشك التقاعد .
٢/ لطيفة ، ( ٤٤ ) م لها من اسمها نصيب أبدأ ، الي بقبلها على لسانها و مكروهه من الكل ، واذا زعلت من شي تروح تنفجر في وجدان بنتها الوحيدة اللي تكسر خاطرها بكلام يوجع جداً ، معلمة فيزياء .
٣/ مشعل ، ( ٢٧ ) بنفس عمر سلطان بس م يحتكون في بعض ، اغلب وقته بغرفته ومحبوب من امة جداً ، محامي مفلس قضايا .
٤/ وجدان ، ( ١٨) بعمر أنهار وكأنهم توأم من قوة الشبهه ، وجدان دايم خاطرها مكسور من امها الي كاسره خاطرها بكلامها ، وطبعاً مو اقل من جمال أنهار ، ابوها يحب يداريها ويطيب خاطرها ولا ترتاح الا لابوها تفضفض له ويجبرها ، طالبة .
•
عائلة تهاني بنت صالح :
١/ طارق (٤٠) ، شخص من حاله في باله ، اعز الاخويا هو وخالد وثنيان ، حنون وحنيتة م تقل عن حنيه تهاني .
٢/ تهاني ، (٣٩) ، ذراع ابوها اليمين، اطيب قلب واذا اجتمعت مع فرح يزيدون البيت بهجة وسرور ، عليهم توأم [هيام _ هادي ] ، عايشين بالرياض وزياراتهم قليل ربة منزل .
٣/ هيام وهادي ، (١٧) اخبل الخبلان ولا فيهم ذره عقل ، طُلاب ثاني ثانوي .
•
وجود بنت صالح :
صار لها ولعمها سالم حادث شنيع تسبب بوفاتهم .
•
عقاب بن سالم :
( ٣٣ ) شخص كئيب وغامض جداً وهو الاكثر تعقداً بوفاة ابوه ، كان متعلق بأبوه جداً بحكم ان امه متوفيه ، الصديق الصدوق لسلطان لان سلطان هو الي يفهمه ويحبه ويرتاح له ويجبر بخاطره ويداريه ، كان دكتور لكن بحكم الصدمه النفسيه الي جاته انفصل .
" باقي الشخصيات بنتعرف عليهم بالبارتات الجاية " ❤️.
