🔥رواية #ضحية_انتقام🔥
🦋 الحلقة الاولى🦋
🌹Hăbošh🌹للكاتبة
..................... 🌺🌺🌺🌺🌺🌺🌺🌺🌺🌺🌺
وعي مفزوع من صوت كسر مرش تبعتها صرخة‼️
قفز من ع سرير وطلع يجري باتجاه المطبخ
كانت جود واقفة وايديها على وجهها و تشبح للفازة المكسورة و متناثرة في كل مكان فالمطبخ
اركان: جاء لعندها شد ايديها بخوف؛ ااانتي كويسة حبيبتي؟ تاذيتي. صارلك شي؟
جود: بلعت رياقها؛ لا الحمدالله؛نفخت😤؛ مش عارفة كيف طاحت مني؛ جت بتنزل للارض اتلم المرش
اركان: وقفها؛ لااا خليه توا انلمه. هيا تعالي و انتبهي للمرش يجرحك ؛ خذاها من يدها
جود: باهي انجهزلك الفطور
اركان: توا انديره اطلعي بس؛
طلعوا من المطبخ وجود تمشي بشوية وايدها على ضهرها ساعدها تقعمز ع الكنبة
جود: بوجع؛ ااااه 😩
اركان: شبحلها بخوف ؛ خيرك
جود: مسحت على بطنها مع ابتسامة؛ هذا ولدك المجرم زقني برجله😊
اركان: ضحك و نزل ع ركابه حط ايده على بطنها؛ لا لا اني ولدي مش مجرم هو بس زعلان عشان تعبتيه معك و ماتسمعيش في كلام بوه. صح يا بطل
جود: تشبحله بضحكة و مررت ايدها في شعره؛ و انت عاجبك عاد
اركان: مش عاجبني بس انتي عنيدة وضروري ما اديري اللي براسك
جود: ماهو انضيع في وقتي و بعدين الحركة كويسة في شهري احسن ما نقعد راقدة و انزيد نثقل
اركان: تحركي بس مش اتقيمي ثقيل و تجهدي نفسك؛
وقف و مشى للمطبخ و هو ايكلم فاها ع الخدمة ما يبهاش ادير حاجة في الحوش
نظف المطبخ و بعدين جهز الفطور ع طاولة وحط براد الشاي ع نار و مشى للحمام ايدوش
اما جود خشت تلبس لان عندها موعد مع دكتورتها
بعد ما لبست طلعت للمطبخ طفت ع غاز وحطت براد الشاي ع طاولة وقعمزت تستنى في اركان اللي بعد ماخذا دوش ولبس جاء يسرع سحب الكرسي و قعمز وتلفونه بدا ايشرين
اركان: طلعه من جيبه؛ اوف قعدين ايرنوا عليا في الشغل
جود: حبيبي امشي لشغلك اني توا نمشي بروحي..؛ قاطعها
اركان: لا لا ممنوع اتسوقي الفترة هذه؛ رجع ياكل
جود: بس لو ترفعني ح تزيد تتاخر ع الشغل
اركان: شد يدها ؛ انتي و صحة البيبي اهم من الشغل والدنيا كلها. اوكي
جود: ابتسمت؛ اوكي. 🥰حليلي منك و من كلامك الحلو مووووواه😘 ؛
اركان: برفعت حاجب؛ هيا افطري وخلي الغزل بعدين😉
جود: 🫣؛
بعد فطروا ناضت جود تاخذ شنطتها و اركان طلع لسيارة شغلها و استنى جود باش جت ركبت بحذاه ومشيوا للعيادة
وفي الطريق اتصل بالشغل وقاللهم يبي يتاخر اشوية
المهم مشى مع جود و خش معها على الدكتورة اعطتها التحاليل اللي طلبتهم
الدكتورة: تمام التحاليل كلها كويسة
اركان: برضى؛ الحمدلله
الدكتورة: شبحت لجود؛ تفضلي انديرلك صورة
جود: ناضت طلعت ع السرير بمساعدة الممرضة؛ ليه يومين ايتحرك هلبا يا دكتورة
الدكنورة: ابتسمت؛ اي حركة طبيعية ما تخافيش. شوفي كيف نازل مستعجل يبي يطلع
جود: بفرحة؛ والله اني اكثر منه متشوقة باش انشوفه ونضمه لصدري 🥹؛
الدكتورة: خلاص كلها كم يوم وتولدي بسلامة ان شاءلله؛
و اركان يشبح لشاشة ويشوف في ولده و حس بشعور غريب تمالكه بين فرحة و خوف زادو من نبضات قلبه السريعة.
طلعوا من عند الدكتورة بعد ما طمنتهم على صحة البيبي و الام
اركان: شغل السيارة؛ انروح بيك الحوش؟
جود: لا ارفعني عند اهلي عشان نمشوا اني و ياسمين لسوق
اركان: اوكي؛
جود: حبيبي
اركان: همم
جود: ناقصني افلوس اللي معاي ما يكفوش
اركان: كم تبي
جود: الف وخمس مائة
اركان: علاش ما قلتيلي في الحوش توا مش معاي المبلغ هذا
جود: ذبلت عيونها؛ طلعنا بسرعة و نسيت انقولك 🥺
اركان: خلاص مالا بعد انروح نعطيهملك
جود: شدت في ذراعه؛ تعرف انت احسن واحد و اني انموت فيك😘
اركان: بضحكة؛ وانتي تعرفي اني ما نقدرش على زعلك و لو تطلبي روحي ترخصلك
جود: 🥺 يا عمري. ربي ما يحرمني منك
اركان: ولا يحرمني منكم؛ تنهد بضيق و كانه في جبل على صدره كاتم انفاسه
جود: بقلق؛ خيرك حبيبي. حسيتك مضايق
اركان: لا مافيش يمكن متوتر
جود: من شنو
اركان: تبي الحق كل ما يقرب موعد ولدتك نحس بالخوف كانه اني اللي نبي نولد 😣
جود: 😂هههههههه واااه علياااا ههههههه
اركان: شبحلها بطرف عينه؛ قاعدة تضحكي!
جود: تاخذ في نفس من الضحك؛ اي فرحانة لان اللي تحس بيه مش اي زوج ايحس بشعور هذا الا اللي يحب مرته حب حقيقي و اني توا تاكدت 😊
اركان: يعني كنتي شاكة في حبي لك ولا شنو
جود: مش شك بس زدت اطمنت 😁
.
.
سالم: صباح الخير يا حميدة
حميدة: صباح الخير.
سالم: بسم الله؛ قعمز باش يفطر و شبح لحميدة بتساول؛ قيس روح؟
حميدة: هزت راسها؛ لا مزال توا كلمني و قالي يطلع بعد العصر
سالم: على خير ان شاءلله؛
حميدة: ان شاءلله
قبس: طلعت من غرفتها؛ صباح الخير
سالم: شبحلها ؛صباح النور. شن درتي اليوم
قبس: بصوت ضعيف؛ الحمدلله؛
مشيت خشت الحمام
سالم: تنهد بوجع؛ لا حول ولاقوة الابالله؛ شبح لحميدة؛ البنت ح تضيع منا يا حميدة 💔
حميدة: تجمعوا الدموع بعيونها؛ شن في ايدينا انديروه. لا خلينا دكتور ولا مستشفى مارفعنيها له و مافيش حد عرفمرضها شنو😞
سالم: بضيق؛ لا حول ولا قوة الا بالله
حميدة: الراجل اللي كلمته مازل ما رد عليك
سالم: لا مزلت نستنى؛
سكتوا على طلعة قبس من الحمام و هي تمشي حست بالدوران وقفت استندت ع جدار الممر و خذت نفس طويل
حميدة: جتها تسرع شدتها من ذراعها ؛ رجعتلك الدوخة
قبس: اي
حميدة: تعالي ارتاحي في سريرك
قبس: لا خليني نقعمز معكم مليت من السرير؛
حميدة: باهي على راحتك؛ ساعدتها تقعمز بحذا بوها
سالم: خذا خبزة غمزها في جبنة و قربها لفمها ؛ هيا افطري سلم بنتي؛ هزت راسها بامتناع
سالم: بوجع؛ عشان خاطري ضروري تفطري؛ قرب القمة لفمها واصر عليها باش قعدت تاكل
قبس: خلاص يا بابا. الحمدلله
سالم: صحة
قبس: سلمك
سالم: وقف بيطلع؛ ماشي تبي شي
حميدة: لا سلامتك
سالم: شبح لقبس؛ وانتي يا قبس يا بنتي
قبس: بابتسامة؛ نبي سلامتك
سالم: الله ايسلمكن. هيا في امان الله؛
طلع و صكر الباب و حميدة خذت سفرة الفطور للمطبخ اما قبس حست كبدها و حاولت اتقاوم باش ما اترجعش بس للاسف فشلت وناضت تجري للحمام 💔
سمعتها حميدة اللي صعبت عليها بنتها اللي كانت زي الوردة و قعدت تبكي في المطبخ بحرقة و تدعي ربي يشفيها 💔
.
.
درس السيارة و نزل مشى فتحلها الباب و شد يدها يساعدها تنزل
اركان: بشوية وحدة وحدة
جود: نزلت شادة بيده؛ صحيت حبيبي
اركان: سلمك. هيا ديري بالك من روحك و سلمي على عمتي و ياسمين
جود: يوصل؛
رجع لسيارة وجود عيطتله
جود: اركان ماتنساش اللي وصيتك عليهم
اركان: لا اوكي بعد الطناش تلقيني عندك
جود: بابتسامة؛ تمام. باي
اركان: باي؛
ركب ايسوق وانطلق للعمل بتاعه و جود مشيت رنت الجرس شوية وفتحتلها امها
جود: صباح الخير لاحلى ماما في دنيا؛ حضنتها
امال: اهلين جود. صباح النور؛ خشت جود وصكروا الباب
امال: كيف حالك و كيف حال اركان والبيبي
جود: الحمدلله ياماما كلنا بخير. توا كنت عند الدكتورة وطمنتنا ع البيبي
امال: باهي الحمدلله
جود: التفتت لامها؛ ياسمين في جامعة؟
امال: لا قاعدة راقدة البارح كله وهي تعيط من اجنابها
جود: بخوف؛ خيرها
امال: والله ماني عارفة. فجاة ناضت تعيط و تتوجع
جود: بخوف؛ رفعتوها المستشفى
امال: بروحها ماقدرت تمشي وخوك تلفونه مقفل
جود: الله يهديك يا ماما علاش ما رنيت عليا انجي اني و اركان رفعناها
امال: من اختك ما خلتنيش نتصل
جود: نفخت؛ توا شن حالها
امال: بعد خف عليها الوجع رقدت
جود: فتحت الباب وخشت عليها قربت منها تمسح على شعرها؛ ياسمين ياااسمين
امال: واقفة وراها؛ علاش اتوعي فاها خليها راقدة
جود: نرفعها المستشفى. ياسمين حبيبتي نوضي
ياسمين: فتحت عيونها بتعب؛ جود
جود: هيا نوضي نرفعك للمستشفى
ياسمين: بصوت ضعيف؛ لا مافيش داعي خف الألم
جود: عقدت حاجبها؛ غصب عنك. هيا يا ماما ساعديها تلبس؛
طلعت تلفونها و اتصلت بصحبتها
جود: الو صباح الخير مودة كيف حالك
مودة: صباح الورد جود. اني الحمدلله. انتي كيفك وكيف حال البيبي
جود: تمام الحمدلله. مودة قاعدة في المستشفى
مودة: اي
جود: ياسمين مريضة بنرفعها لعندك
مودة: اوكي حبيبتي. ان شاءلله لاباس عليها
جود: ماتشوفي باس يارب. مسافة الطريق ونكونوا عندك؛
صكرت منها ومشيت تساعد في امها باش لبسوا ياسمين و امال مشيت حتى هي تلبس باش تمشي معهن
جود:وين مفتاح سيارتك؛
ياسمين:تلقيه في شنطة؛ مشت فتحت الشنطة وطلعت المفتاح و رجعت لياسمين
جود: هيا تعالي؛ خشت امال ساعدتها و خذنها بيناتهن لسيارة و مشيوا للمستشفى. في طريق اتصلت جود ب اركان و هو كان في اجتماع والتلفون ع silent 🔇
بعد نص ساعة
جود: طمنيني
مودة: ضربنالها ابرة مسكن بس الحقيقة ياسمين عندها التهاب زايدة وتبي عملية
امال: ضربت على صدرها بصدمة ؛ عملية!
جود: شبحت لامها ورجعت شبحت لصحبتها؛ قصدك اليوم بديرولها العملية
مودة: لا هي ح تقعد يومين تحت العلاج وبعديها العملية
امال: بدموع؛ يا حليلي عليك يا بنتي 😢
مودة: طبطبت عليها؛ ما تخافيش يا خالتي العملية بسيطة وناجحة باذن الله
جود: حضنتها🥺؛ ادعيلها اتنوض بسلامة
امال: ببكاء؛ ربي يشفيها ويعافيها و اينوضها بالسلامة ياارب😢
جود: عادي نقدروا انشوفوها
مودة: اي. بس هي توا راقدة
امال: نبي نقعد بحذاها لين اتنوض 🥺
مودة: تمام مافيش مشكلة يا خالتي ؛
خشوا عليها وقعمزت امال بحذاها تمسح على راسها و وجهها وتبكي وتدعيلها..
بعد اطمنت جود على اختها طلعت اتصلت ب اركان و تلفونه يضرب بس مايردش. خذت زفير و رجعت اتصلت بخوها ومن اول ماضرب رد عليها
اكرم: الو. اهلين جود
جود: كيف حالك يا اكرم و كيف حال هدى والعيال
اكرم: كلهم ابخير الله ايسلمك. شن اخباركم انتي و اركان
جود: الحمدلله. انت وين توا؟
اكرم: في العمل. خير صار معك شي ! ؟
جود: لا اني كويسة. هذه ياسمين تعبت رفعناها المستشفى
اكرم: بستغراب؛ اوف اوف. خيرها امس كانت كويسة
جود: طلع عندها الزايدة ودكتورة قالت ضروري من عملية
اكرم: يا ساتر. انتوا في اما مستشفى
جود: في ******
اكرم: هيا جاي لعندكم؛ طلع طول واتجه لسيارته ومشى للمستشفى
اما جود شافت مودة سالتها ع العملية وكم تقعد يوم في المستشفى وبعديها رجعت اتشوف اختها اللي مزالت راقدة من اثر المسكن. جت قربت لسريرها وقعمزت بحذاها تتاملها بوجع و خوف ما ترجع اتشوفها 💔 كان قلبها مقبوض و يضرب بالقوة و حاسة بضيق غريب 💔
شافت لساعتها
جود: اكرم عطل
امال: قلتيله على اختك في المستشفى
جود: اي بلغته وقالي جاي.
امال: كلمتي راجلك
جود: رنيت عليه مرتين مايردش؛ وقفت بصعوبة شادة ضهرها؛ نمشي انجيب غيار لك و غيار لياسمين. تبي شي أخرى انجيبهولك؟
امال: لا. ديري بالك على روحك من الطريق
جود: ان شاءلله. باش اتقولي لاكرم ايشوف اجراءت المستشفى
امال: تمام؛
طلعت جود من المستشفى و عاودت اتصلت ب اركان و كان وقتها طالع من الاجتماع و قاعد في مكتبه بس ناسي تلفونه ع silent و يشتغل ع الجهاز الكمبيوتر
جود: اووف خيره ما ايرد 😕؛ ركبت السيارة معصبة عزقت تلفون ع كرسي ولعت السيارة واتجهت للحوش ....
.
.
خشت حميدة معها كباية عصير وجت قعمزت ع سرير
حميدة: اشربي عصير ايريح كبدك شوي ؛
قعمزت خذت منها الكباية شربت شوية ونزلتها ع كومدينو
حميدة: بوك شاف شيخ كويس يرفعك له بدل الدكاترة اللي ما درولك شي
قبس: بستفهام؛ علاش الشيخ
حميدة: بالكي مرضك سحر ولا نفس. راه كلها تشكي منه
و كل يوم نسمعوا شادين ساحر امداير سحر لهلبا ناس
قبس: ضحكت بهزوة؛ و اني من يبي يسحرني. فوتي عنك مش كل حاجة تسمعيها اتصدقيها
حميدة: نحن شن خاسرين خلي ايشوفك لو طلعت مشكلتك سحر ولا حسد ايعالجك منه
قبس: تنهدت بضيق؛ اني خايفة من حاجة اخرى
حميدة: بتسأل؛ من شنو !؟
قبس: نزلت رأسه و خنقتها العبرة؛ خايفة يطلع عندي السرطان 💔😢
حميدة: بشهقة؛ فال الله ولا فالك . بعيد الشر
قبس: بوجع؛ اني مش خايفة من الموت بس ما نبيش انتعبكم و نزيد هم فوق هم...؛ قاطعتها
حميدة: تعوذي من الشيطان ماتحطيش الوساوس في راسك؛ مسحت على شعرها بحنية؛ هيا سلم بنتي كملي عصيرك ؛ مدتلها الكباية
قبس: خذتها؛ قيس امتى يبي ايروح
حميدة: العصر ان شاءلله. ذكرتيني امبكري كان يسال عليك يبي ايكلمك. خلي نتصل عليه؛
ناضت جابت تلفونها واتصلت على قيس قعد تلفون يضرب 📲
قيس: خيرات يا امي كيف حالك توا
حميدة: الحمدلله.صوت سيارة انت طلعت ولا شنو
قيس: اها توا خشيت طرابلس
حميدة: امبكري قلت تبي تطلع العصر. كيف صار
قيس: مانبيش نشغلك بس🙂
حميدة: باهي الحمدلله على السلامة
قيس: الله ايسلمك يا الغالية. تبي شي انجيبه معاي
حميدة: سلامتك...؛
انتهت المكالمة
نزل تلفون و شد الستيرسو ايسوق ومنتبه لطريق و كان خاش لجزيرة دوران وفجاة خشت قدامه سيارة حاول يتجنبها بس للاسف كان الاصطدام هو الاسرع 💔
.
.
✊🏻
اركان: تفضل
احمد: خوذ فاصل و الحقني ع الكافي عازمك
اركان: شبحله ورجع لشاشة الكمبيوتر؛ تمام شوية ولحقك
احمد: اوكي؛ صكر الباب ونزل للكافي
و اركان تمم الادخال و تم الشغل اللي بيده و ناض يتكاسل مرهق من الجلوس ع المكتب لساعات طويلة. تحسس تلفونه و طلعه من جيب الجاكيت و لقى سبع مكالمات فائتة من جود..
اركان: اوف نسيته ع صامت الزح 😩؛
طلع من المكتب وكان متوقع اتصلت بيه عشان اتذكره بالفلوس اللي تبيهم ..
عاود اتصل عليها و تلفونها يضرب بس مافيش رد. انفصلت المكالمة ورجع عاود اتصال وبرضوا مافيش رد 📱
اركان: اهي زعلت توا شوف كيف اتحلها يا غبي؛
فتح ع الرسايل و كتبلها 📩
( عارفك زعلانة مني بس و الله كنت في اجتماع ونسيت تلفوني ع صامت . سوري يا روحي. انحبك ❤)
خش للاصنصير نازل للكافي و عاود اتصال مرة اخرى لعند ما فصل استغرب رجع كتبلها رسالة اخرى📩
( جود ردي بالله عليك)
استنى اي رد منها وهو خاش للكافي اتصل با اختها ياسمين وهي الاخرى تلفونها يضرب بدون رد.. عصب جاء شد الكرسي بنتش وقعمز ينفخ عاقد حواجبه
احمد: يشبحله؛ خيرك معصب
اركان: نتصل ع العيلة مايردوش 😡
احمد: عادي ماردوش توا ايردوا بعدين مش قصة اتخليك اتعصب
اركان: بعقدت حاجب؛ طلبت قهوة ولا
احمد: كنت نستنى فيك. هيا توا نمشي؛
ناض من ع الكرسي ومشى
و اركان ينفخ و ايقلب في تلفون حط على رقم امال ام جود و دار اتصال و كان ناوي يشكيها من جود عشان ما اترد عليه
ضرب مرتين و انفتح الخط و صاحبه احمد جاي معه القهوة والحلو
امال: الو اهلين اركان
اركان: كيف حالك يا عمتي شن دايرة
امال: الحمدلله على كل حال. انت كيف حالك وكيف حال امك و خياتك
اركان: تمام الحمدلله. ااا جود بحذاك تعطهالي؛ شبح لاحمد حط الفطور وجاء قعمز
امال: لا مشيت للحوش اتجيب غيار لاختها
اركان: بستغراب؛ مافهمتش هي وين كانت و مع من ماشية راه راسي داخ
امال: بتسأل؛ هي ما قلتلك ياسمين في المستشفى عندها الزايدة و بيدرولها عملية !؟؟
اركان: لا سمعتها منك توا
امال: اتصلت عليك امبكري عشان اتقولك
اركان: ايي لقيتها متصلة واني تلفوني ع صامت ولما عودتلها ماتردش. باهي مع من طلعت
امال: بروحها
اركان: قصدي من رفعها للحوش ؟
امال: لا هي معها سيارة ياسمين؛ قاطعها
اركان: بغضب؛ شنووو. تي كيف تسوق بالوضع اللي هي فيه
😡 ؛ نفخ بغضب؛ ياريتها بس ااترد اووووف ااستغفر الله العظيم و خلاص
امال: بخوف؛ ان شاءلله خير يا وليدي ماتخافش عليها توا يمشي اكرم ايجييها
اركان: لا اهو ماشي لعندها؛ ناض ياخذ في مفتاحه و انهى المكالمة
احمد: بستفهام: خييير !!
اركان: ماشي انشوف المراة. كان حد سأل عليا توا انجي
احمد: ناض مشى خطوة؛ لاباس في حاجه صايرة
اركان: بستعجال؛ لا تمام؛
مشى يسرع طلع من الشركة وهو يتصل بجود
اركان: بغضب؛ تي ررردي الززززفت 😤؛
وصل سيارته ولعها ودور لعند ماطلع من الباركي واتجه لحوش انسباته
في طريق ايسوق ويشبح لتلفون بحذاه و قلبه مقبوض و مضايق من عدم الرد عليه 💔 صح كان زعلان منها بس مابطلش يدعي بقلبه واللسانه انها اتكون بخير. بخير وبس
