🔥 رواية #ضحية_انتقام🔥
🦋 الحلقة السادسة عشر 🦋
🌹Hăbošh🌹للكاتبة
........................ 🌺🌺🌺🌺🌺🌺🌺🌺🌺🌺🌺
دق الباب وخشت السكرتيرة جايبة القهوة
السكرتيرة: نورتي المكتب يا مدام. اهلا وسهلا؛ نزلت الفنجان
داليا: خذاته؛ شكرا فرح صحيتي
السكرتيرة: العفو يا مدام؛
شبحت لبراء اللي شبحتلها بستفهام و سالتها برفعة حاجب من هذه
السكرتيرة: ابتسمت و فاها خبث؛ انسيت انعرفك يا براء هذه مدام داليا زوجة الاستاذ
براء: تغير ملامح وجهها؛ من!؟
السكرتيرة: الاستاذ احمد؛ رجعت شبحت لداليا وبخبث؛ كيف حالها رنيم
داليا: بخير الحمدلله
السكرتيرة: ربي يحفظهالك انتي والاستاذ
داليا: امين؛ شبحت لبراء
وهي تشبحلها بصدمة مش فاهمة شن قاعد ايصير و كيف مرته ومن رنيم تخلطوا التسالات و الخبيثة فرح طلعت من المكتب و داليا طلعت تلفون حطاته ع طاولة و كانت الشاشة مفتوحة و صورة احمد و رنيم مع بعض فتحت اعيون براء على وسعهم ولا شعورين خذت التلفون شبحاته عن قرب
براء: بلعت ارياقها؛ من البنوتة؟
داليا: وقفت وسحبت منها تلفون؛ هذه بنتنا رنيم 🔥
براء: بوجع؛ بنته 💔 اها ربي يحفظهالك
داليا: تسلمي ؛
حست براء بنغزة في قلبها و عقلها استك
الحظة هذه كانت ح تنفجر ابكاء بس تمالكت روحها و رجعت لاوراق و ملفات على طاولة المكتب تلم فيهن بيدين ايترعشو و تحط في الدرج و داليا تشرب في القهوة و عيونها عليها😎
داليا: نزلت الفنجان؛ اسمك براء ولا
براء: قامت عيونها فاها شبحتلها؛ ايي
داليا: احمد حكالي عليك و على ظروفك و كيف اتساعدي في عيلتك و مهتمة بدراستك ما شاءلله بنت مثابرة فعلا احمد ما غلطش لما حب ايساعدك؛
كانت تسمعلها و كل شي فاها يهتز و ينغز 🔥💔 اثقل اللسانها مش قادرة تنطق و خافت اتكلم تنهار قدامها
اكتفت بابتسامة متصنعة و هي من داخل خلاص بركان ولازم تطلع من المكتب بسرعة قبل ما يفضحوها اعيونها
براء: ابتسمت برعشة بشفايفها؛ عع عن ااذنك 🔥؛
لفت من وراء المكتب
داليا: بنضرة انتصار؛ اذنك معك خوذي رااحتك😎؛
طلعت براء من المكتب و نادت عليها السكرتيرة فرح ما سمعتهاش طول اتجهت شور الحمامات وخشت صكرت الباب بضهرها وقفت تلقط في انفاسها وتبلع ارياقها بالكي اتنحي الغصة بس اول ما جت وقفت ع المرايا وشبحت انعكاس وجهها انهارت ابكاء و خوفها من يسمعوها كل اللي بشركة صكرت فمها بيديها الزوز و دموعها ايطيحو زي المطر تبكي و جسمها كله يهتز 💔
براء البنت القوية اللي تحدت كل الصعوبات و تحملت مسؤولية اكبر من عمرها توا تنهار مش قادرة تستحمل وجع الصدمة
ان احمد الانسان الوحيد اللي حباته و وثقت فيه طلع يكذب و يلعب عليها 💔المسكينة شعور بالألم اللي بقلبها كان ايموت و ناره تحرق حرق 💔 و تمنت ايكون مقلب دايره ولا داليا هي اللي تكذب..
بعد وقت طويل من البكاء مشت تغسل وجهها مضطرة تطلع من الحمام هي قاعدة في مكان عام وفي اي وقت اتخش موظفة و في نفس الوقت تبي تتاكد ابروحها و تواجه احمد 🔥
بعد ما اغتسلت شبحت وجهها في المرايا و مسحته بيديها و ترفع في اعيونها فوق باش يوقفو دموع 💔 خذت زفير و شهيق و مشت للباب فتحاته وطلعت
لما خشت مكتب السكرتيرة عيطتلها
السكرتيرة: براء استني
براء: وقفت شبحتلها؛ شنو
السكرتيرة: ابعثي ملف مشتريات الشركة من تركيا لمكتب الاستاذ اركان
براء: هزت راسها؛ تمام؛ وقفت بتفتح باب المكتب غمضت اعيونها تخاطب نفسها بالثبات و الصبر
بعد خشت كانت داليا اتكلم بالتلفون مشت طول خلف مكتبها و قعمزت ادور في الملف و تتفادا ما تشبح داليا 🔥
خذت الملف وطلعت لمكتب اركان سلمته لموظف الحسابات و رجعت اخرى لمكتب احمد
داليا:اوكي تمام اليوم انمر عليكم ان شاءلله..
مع السلامة؛ نزلت التلفون و شبحت لبراء بعد قعمزت تشتغل ع الجهاز
داليا: مرتاحة في شغلك اهني بالمكتب 😎
براء: شبحتلها بارتباك ؛ اااا اي اا الحمدالله؛ رجعت تشبح لجهاز
تلهي في نفسها مش قادرة تصبر تبي الوقت ايفوت ابسرعة و ايجي احمد ينكر اتكون مراته المسكينة مزال عندها امل 💔
وصل المكتب
احمد: خش ماشي لمكتبه؛ صباح الخير فرح
السكرتيرة: ناضت من ع الكرسي؛ صباح النور استاذ .. استاذ مدام داليا في المكتب
احمد: وقف ايده على مقبض الباب توسعوا اعيونه و التفت شبحلها و طول فتح الباب ليتاكد و جت عينه على داليا و حركها ليشبح براء و الصدمة بتقتلهم الزوز 💔
احمد: رجع شبحلها بغضب؛ شن جابك اهني؟
داليا: وقفت بثقة؛ جاية انشوف زوجي حبيبي مستاحشته 😎
براء: 💔🔥
احمد: جاء لعندها بنرفزة😡 ؛ دااليا اامشي ااحسنلك
داليا: ببرود؛ اوف اوف خيرك عصبت شنو ما حبيت المفاجئة؛
و براء تشبحله بخيبة بلعت ارباقها بغصة و توتر و ناضت تبي تهرب من الحقيقة المرة اللي اتشوف فاها
خذت الشنطة اتحاول تفتحها ما قدرتش من رعشت ايديها
احمد: مشى خطوة نحيتها؛ براااء خليني انفهمك؛
تجاهلته و مشت تسرع بتطلع من المكتب
احمد: مشى وراها بيوقفها؛ براااء اااستني اارجوك؛
طلعت ما لحقش عليه
داليا: بنبرة تخوين؛ هذذذه اللي كرهتك فيني و بدلت حالك ههه و اني اللي فكرتك حق ضايقك غيابي و شغلي طلعت اتحب و تتمعشق
...؛قاطعها صكر الباب خبطه بالقوة و رجع لعندها معصب؛
احمد: عاض على اسنونه؛ ااانتي شششن تبي اااهه مش ااخترتي طموحك و نجاحك ليييش جاااية اااتحااسييني اانتي شن لك علاااقة ااانحب ولا نكرررره 😠
داليا: قربت منه؛ لا ليا علاقة دام كنت اااتخوني و كل يوم ادور معاي في المشااكل و تخلق في الاعذار باش نطلق ويفضالك الجو تقدر تنكر جااوب هيااا
احمد: فنص فاها؛ مش مضطر انبرر شن اللي خلاني انطلقك 😡؛ مشى للباب فتحه بالقوة و طلع خلاه مفتوح
و براء لما طلعت من المكتب طول مشت برا الشركة و وقفت في مكان الانتظار تتصل بالسواقة و يفصل و بعد اتصالين علق معها الخط قعد يضرب
السواقة: ايوة يا براء خير
براء: شادة بكيتها بغصة؛ تعالي رروحي بيا الحوش توا بسرعة قاعدة نستنى فيك برا
السواقة: راه انا طالعة انوصل في بنات لجامعة مش ح نقدر انجيك توا
براء: دمعتها اطيح و تمسحها؛ شنو نص ساعة هكي و اتجي
السواقة: ان شاءلله
براء: باهي نستناك؛
صكرت و دموعها فاضو بغزارة مهما حاولت تمسحهم ما يوقفوش
طلع من باب الشركة وشبح يمينه ويساره و شبحها واقفة جنب الباركي مشى يسرع لعندها
احمد: براء؛
سمعت صوته بتمشي شد ايدها؛ برااء بالله عليك اااسمعيني خليني اانفهمك؛
نتشت يدها و صكرت اوذانها و انهارت ابكاء
براء: اااووووص مااانبيش نسمععع خليني في حالي و ااامشي لمرررتك 💔
احمد: بضيق؛ لا يا براء لازم تسمعيني
براء: بغضب؛ شششن بنسمع خلااااص فهمت كل شي
احمد: و الله انا كنت بنحكيلك عن وضعي و شن هي ظروفي بس...؛ قاطعته
براء: بعقدت حاجب؛ بسس شنووو!!؟💔 شن ح تحكيلي اااهه ان معليش انسيت انقولك انا متزوج و عندي بنت
احمد: شد يدها؛ ااهدي اشوية و تعالي نحكو في السيارة مش حلوة وقفتنا في الشارع
براء: نتشت يدها بالقوة؛ ووخررر مش ح نمشي معك و لا نبي نسمع كذبك ب...؛
احمد: بغضب؛ ماا نكذبش ااعطيني فرررصة نشرحلك ليش درقت عليك ؛
شبحتله بغضب و مشت سيباته اتجهت لطريق
براء: اشرت بيدها👍🏻 ؛ تاااكسي
احمد: شدها من مرفق يدها برمها له؛ براااء اانا اانحبك والله ما كذبت عليك بمشاعري صدقيني
براء: دموعها ايطيحو بغزارة؛ اانت خليتني انعيش في وهم مستحيييل ااانصدقك و نوثق فيك 💔؛
قعدت تبكي و تمسح في وجها بيدين يرعشو
اضايق احمد و قلبه تقطع من دموعها و حس بالعجز و تمنى لو يقدر ايضمها و يمسحملها 💔 حط ايده في شعره شبح لفوق زفر بضيق رجع شبحلها على رنة تلفونها خذاته من الشنطة و فتحت ع المكالمة
براء: بصوت متقطع؛ و وين و وصلتي
السواقة:اني توا قريبة من الباركي انتي وين
براء: التفتت وراها وشبحت السيارة ؛ تمام شبحتك جاية لعندك
السواقة: اوكي
احمد: براء بالله عليك ما تمشيش قبل ما تسمعي مني..؛
مشت تسرع ماخلاتش ايكمل كلامه
و هو ايتبع فاها بعيونه بأسف لعند ما وصلت لسيارة و اختفيت عليه
كان نادم ما صرحهاش من الاول و ايحسف في روحه ان بتأخيره خسرها 💔
رجع لشركة و مشى يسرع لمكتبه غاضب 😡 خافت فرح من خشته بسرعة و خبط الباب لما خش لمكتبه 🔥
داليا: بعقدت حاجب؛ شن ما لحقت على حبيبة القلب؛
قرب منها عاض على اسنونه
احمد: كنتي تعرفي بعلاقتي بيها و هذا علاش قاطعتي الكورس و جاية اهني !! 😡بس قوليلي من اللي يوصلك في اخباري!؟ اهه
داليا: هههه احساسي قالي 😎 بس زعما لا وين كنت ح توصل بعلاقتكم
احمد: 🔥😠 اوكي ح انقولك لا وين بس عشان تعرفي . . براء ح تكون زوجتي و حبيبتي و ح تربي بنتك اللي انتي ما قدرتش تربيها تمام.. و توا اطلعي و معش اتجي لشركة ؛ اشرلها بيده للباب
داليا: تشبحله بغضب؛ اشبع بيها ما يهمنيش اني ايهمني
بس رنيم و جاية ناخذها منك بالقانون؛ طبست رفعت شنطتها و جت فاتت من بحذاه شبحتله بشموخ وتحدي😎 و طلعت من المكتب هي ماشية غمزت لفرح و طلعت من قسم
.
.
حميدة: خشت لدار وفتحت الروشن؛ هيا قبس نوضي ياسر عاد من مغرب امس راقدة ؛ جت نحت الغطاء من وجهها؛ تي وين النوم هذا كله
قبس: فتحت عيونها المتورمات؛ صباح الخييير؛ شبحتلها بستغراب؛ وين ماشية؟
حميدة: صباح النور.. ماشية لعيادة الاسنان سني امس ما خلتني نرقد
قبس: من بيرفعك؟
حميدة؛ محمد..؛جت تبي تطلع وقفت شبحتلها؛ كان عطلت حطي الغداء ع النار
قبس: باهي قولي لمحمد ايجيب معه كرت مدار
حميدة: باهي؛ طلعت و قبس نحت الغطاء وجت نزلت من السرير ماشية للحمام حست بدوران و اول ما خشت و شمت ريحة الديتول كبدها لعييت طارت للحوض تستفرغ
بعد المعاناة من الترجيع غسلت وجهها وطلعت تمشي ساندة روحها بالحيط خشت دارها قعمزت ع السرير تتنفس بسرعة و تخمم من اللي شاكة فيه بعد وقت من التفكير قررت ادير تست منزلي و مافيش الا براء اتساعدها.. ناضت خذت التلفون من ع الكمدينو و قعمزت تتصل و تلفون براء ايشرين في الشنطة و هي تشبح من مرش السيارة و دموعها ينزلوا بغزارة و السواقة تدويلها و بعديها نبهتها ع التلفون وهي ولا رد ما تسمع ولا اتكلم امغير ساكتة بغصتها و عيونها يمطرو 💔
قبس: تنهدت بضيق؛ اووف براء رردي🥺؛ كتبتلها رسالة
👇🏻(صباحو براء ردي عليا ضروري)
بعثتها و خلتها شوية و اتصلت اخرى و عاد براء لو اترني عليها مليون مرة توا مش ح اترد ساد ما فاها🔥
نفخت و عزقت تلفونها بياس و شدت راسها بين ايديها محتارة و مش قادرة تصبر ما تعرف شن اللي قاعد ايصير معها..
ناضت خلاص خذت قرارها و تشجعت تمشي بروحها لاقرب صيدلية و توا فرصتها خصوصي ان الحوش فاضي مافيش الا هي و قيس قاعد في داره مش ح ينتبهلها كان طلعت و رجعت بسرعة
مشت تلبس و خذت الشنطة فتحتها لقت عندها بس خمس شدته شبحت فيه بتخميم و رجعته لشنطة و طلعت من الدار شبحت لباب دار قيس و مشيت على روؤس اصابعها فتحت باب الصالة بشوية وصكرته وراها و طلعت لسور تمشي بسرعة بعد وصلت للباب الخارجي فتحاته و خلت ع الباب قطعت حديد باش ما يصكرش وراها
شبحت لشارع و خذت نفس طويل و مشت تلتفت وراها لعند طلعت من لفة الشارع تمشي و خايفة من زمان ما طلعت ابروحها و بعد مسافة لاباس بيها وصلت لصيدلية وقفت ع الباب تلقط في انفاسها و فتحت الباب خشت
قبس: بتوتر؛ االسلام عليكم
الصيدلانية: و عليكم السلام
قبس: شبحتلها؛ لوسمحتي نبي ت تست حمل
الصيدلانية: تمام؛ مشت جبتهولها؛ 3 دينار
قبس: اوكي؛ فتحت الشنطة اعطتها الخمسة دينار و خذت شريط التست؛ صحيتي؛ حطاته في الشنطة قلبها ايدق
الصيدلانية: تفضلي؛ رجعتلها الباقي خذتهم منها وطلعت من الصيدلية
مشت للحوش بخطوات اسرع و اول ما خشت لشارعهم جت سيارة ماشية نفس الاتجاه و صاحب السيارة فتح اعيونه كويس يتاكد منها هي او لا و نقص من سرعة السيارة و خلاها تمشي قدامه و فعلا اول ما وصلت حوشهم و دفت الباب تاكد ان هي و ضحك ضحكة خبيثة و مشى كمل طريقه لعند ما وصل حوش عمها جبريل درس سيارته ونزل مشى ايدق ع الباب و التفت يشبح لحوش سالم بابتسامة شريرة 😈
.
.
في الجامعة
انتهت المحاضرة و بدو الطلاب يطلعو و ايهم يجمع في شيتات حطهم في الشنطة و شبح لياسمين هي نازلة من المدرج و جاء وقف قدامها شاب يدوي معها و ايهم عيونه طلعو لما شبحها تضحكله 🔥 خلاها لعند مشى الشاب و نزلت وراه و اول ما قربت منه عيطلها
ايهم: طالبة ياسمين لحظة شوي 🔥
ياسمين: شبحتله بابتسامة وشبحت لزميلاتها ؛ امشو يا بنات توا نلحقكن؛ طلعو صحبتها هاجر و بنت اخرى و هي رجعت لايهم وقفت قريبة منه
ياسمين: شبحت لباب وشبحتله؛ شن استحشتني☺️
ايهم: فنص فاها؛ شن قصته الشاب اللي واقفة معه 🔥😠
ياسمين: ضحكت؛ غرت منه 😂؛ قاطعها
ايهم: عض على اسنونه؛ ياااسمين ااادوي شن يبي الفرخ
ياسمين: موضوع سخيف اضطريت انسايره
ايهم: اها اتسايري فيه و تضحكيله 😡
ياسمين: عقدت حاجبها؛ والله جد غرت؟
ايهم: بغضب؛ و انتي شن رايك نشبحك تضحكي لشباب و نفوت عادي 🔥
ياسمين: باهي اسف حبيبي ما تزعلش 🥹
ايهم: اخر مرة نشبحك واقفة معه
ياسمين: حاضر🥺 شنو نمشي؟
ايهم: اوكي.. اسمعي
ياسمين: شبحتله؛ نعم
ايهم: لامتى الوضع هذا
ياسمين: بستفهام؛ وضع شنو
ايهم: بعقدت حاجب؛ وضعنا ياسمين شن عاجبك يقعد هك واقف على نفس الخطوة من اربع اسنين
ياسمين: بحزن؛ مش بيدينا الظروف منعتنا
ايهم: قرب منها خطوة؛ خلاص نهاية الشهر انتزوجو و خلصت..؛ فاطعته
ياسمين: تبي انتزوج و اختي مالهاش اربع اشهور ميتة 💔 مستحيل 😢
ايهم: حرام عليك انا تعبت نبي انتزوج
ياسمين: بزعلة؛ خلاص ما تبيش تستنى امشي تزوج
ايهم: اووووف.. اني نبيك انت علاش صابر السنين هذه كلها
ياسمين: و اني هذه ظروفي ما نقدرش نتزوج تو.. نحن يا ايهم مزلنا نبكو عليها 💔😢؛ قعدت تبكي
ايهم: لا حول ولاقوة الابالله.. يا ياسمين الحزن مش كويس و صدقيني الحزن يقعد في القلب و صاحبك مش ح تنساه حتى لو بعد مية سنة ح تبكي عليه.. و الحياة ماشية و انت تبي تعيش حياتك لان هذه ارادة الله و هذه حكمته
ياسمين: بالبكاء؛ بس اني مش متخيلة روحي نفرح و نلبس الابيض و جود ما تكونش بحذاي 💔😢
ايهم: شبح للباب و زاد قرب منها مسح دمعتها؛ تعرفي شن أعلى درجات الحب
ياسمين: شهقت؛ لا
ايهم: ابتسم؛ الهيام ❤ و انا هايم فيك لحد الجنون
ياسمين: 🥺 يعني انت اتحبني
ايهم: ضحك و بصوت ضعيف ايذوب؛ تي هايم فيك اتقوليلي اتحبني اااخ بس؛ عض على شفته و عيونه يشبحوا لشفايفها بلهفة 🤤
.
.
خشت الحوش و طول خشت دارها نحت عبايتها حطتها في الدولاب و خذت من الشنطة طلعت التست و مشت للحمام
كان عندها تضارب في الشعور بين الخوف و الامل
بدت تستخدم فيه و قعدت تستنا في النتيجة توضح و شوية و طلع عندها خطين 🥺 تشبح لنتيجة و قلبها ايخبط و عيونها بدو يمطرو بالدموع
طلعت من الحمام بعد ما تاكدت من الحمل و خشت لدار طاحت على سريرها قعدت تبكي و تحسس في بطنها و صورة اركان ما فارقتها لحظة و احساسها بالوجع الحب من طرف واحد جارحها موت و خصوصي انها تعرف قداش ايحب جود و مش ناسيها حتى هي ميتة اتشوف في حبه لها بعيونه 💔
المسكينة رقدت هي تبكي و كان حملها جاي ع النوم ترقد بالساعات في اي توقيت
روحت حميدة و شبحت المطبخ مافيش اي شي ع الغاز و كل شي امخليته قاعد زي ما هو.. مشت خشت عليها لقتها راقدة
حميدة: العفو ياربي؛ مشت لعندها حركتها من رجلها؛ هذا شنو بالله عليك قبس قبببس نوووض؛
فتحت عيونها و حطت ايدها على جبينها
حميدة: عتاب بغضب؛ اااللي يعبى عليك مرة تاني توا اني شن وصيتك قبل ما نطلع 😠
قبس: تنهدت بضيق؛ رااسي واجعني ماقدرتش انوض
حميدة: راسك من كثر النوم عاد من امس وانتي راقدة.. تي هيا نوضي ديريلك قهوة باش اتصحصحي
قبس: بوجع؛ باهي خلاص وعيت 😟
حميدة: وهي طالعة؛ مش ترقدي ؛
نزلت رجليها من السرير و شبحت لبطنها و اتحسس بايدها
تخمم 🔥
ناضت مشت المطبخ حطت قهوة ع النار و شوية خشت حميدة بعد ما بدلت حوايجها و جت اتحط الغداء ع النار
قبس: صبت القهوة في الفنجان؛ شن صار في سنك
حميدة: قال ملتهبة اعطاني مسكن و مضاد اسبوع و نعاودله
قبس: رفعت فنجانها؛ المهم وقف الالام توا
حميدة: الحمدلله مش كيف امس قريب هبلت منها
قبس: جبتولي كرت
حميدة: اي في شنطتي.. اشربي قهوتك و تعالي اغسلي الموعين خلي اندير الغداء
قبس:و هي طالعة؛ باهي؛
مشت لدار امها خذت الكرت من الشنطة و مشت خذت تلفونها من دارها وطلعت قعمزت في الصالة حطت الفنجان قدامها و قعدت تعبي في الكرت
اشتركت بالنت و خشت ع القوقل تبحث في معلومات عن الحمل.. فات وقت تتصفح بالنت
حميدة: بمنادا؛ قبببس وين مشيتي
قبس: باااهي جاية؛ نفخت طفت التلفون ومشت المطبخ وعاد ريحة الطعام لعب في كبدها و تشم في زفرة نفخت
قبس: بئشمزاز؛ اووووف شن طابخة 🤢
حميدة: اسهل شي درت امبكبكة معش في وقت
قبس: خيرها هكي زفرة ااعع
حميدة: قعدت اتشم؛ وينها زفرة والله ما فاها حاجة؛
تذكرت قبس اللي قراته ع الحمل و الوحم تاففت و مشت وقفت ع الحوض تغسل في مواعين الفطور و كبدها نايضة عليها و اتقاوم بطلعت الروح 💔
.
.
ربيعة: خشت لدار و قعمزت بحذا راسها؛ ماتبيش اتقوليلي خيرك رجعتي بكري اليوم
براء: راقدة على جنبها و تشبح بسرحان؛ قلتلك مريضة 😞
ربيعة: مش عوايدك قبل حتى وانتي مريضة تمشي لشغلك و جامعتك شن زاد اليوم
براء: بوجع؛ سيبت الشغل؛ غمضت اعيونها و طاحو دموعها
ربيعة: بستفهام؛ علاااش.. شن صاير
براء: بلعت بغصة؛ مااصاير شي سيبت و خلاص 💔
ربيعة: عقدت حاجبها؛ نوضي ااشبحيلي و ادوي حاجة اتخش الرأس قصة انك هك من لا شي سيبتي شغلك مستحيل انصدقها 😡 قولي شنو فيه
براء: قعمزت تمسح في دموعها ؛ ط طلععع متزززوج و عنده بنت؛ انهارت ابكاء بصوت
ربيعة: تشبحلها بصدمة و استغراب؛ منو؟ قصدك 😨
براء: بغصة؛ اايي االكذاأااب 💔 قدر يضحك عليا و خلاني اانتعلق بيه و نبني في احلامي معه و في الاخير طلع متزوج و عنده بنت 💔😭
ربيعة: بخوف؛ انتي مش دايرة شي ولا
براء: شبحتلها بعيون فايضة دموع؛ حراام عليك تساالني هك سؤال شنو اني حمارة؛ شهقت و زادت ابكاء؛ لا اني حمارة وغبية صدقت واحد عنده افلوس و صاحب شركة ايجي ايتزوج بنت زيي موظفة عنده 💔 ااخ يا ماما لو شبحتي مراته اتقولي عليا مش بس حمارة 💔😭
ربيعة: بغضب؛ حسبي الله ونعم الوكيل فيه ان شاءلله زي ما لعب على بنات الناس تعاودله في بنته 😡؛
زادت براء ابكاء لين راح صوتها
ربيعة: خذتها في حضنها؛ خلاص سلم بنتي و قولي الحمدلله عرفتي حقيقتي بكري و الله ما يستاهل لين تبكي عليه؛
قعدت تمسحلها على راسها و اتهدي فاها لعند فعلا هديت وقفت ابكاء
ربيعة: باستها؛ هيا توا نوضي صلي فاتك الضهر
براء: مزال ما انصليش؛ نزلت راسها ع مخدة؛ طفي الضي نبي نرقد شوية راسي يبي ايتفجر؛ غطتها امها و طبطبت عليها بحنية و ناضت طفت الضي و طلعت صكرت وراها الباب
.
.
اما احمد بعد طلعت داليا خذا تلفونه و كل اشوي يتصل و يبعث في رسالة و كلهم اعتذار و يبي بس ايطمن عليها
و تلفون براء بالاول كان ايرن بنغمة هادية في الشنطة و بعديها انقفل تم عليه الشحن
المهم فات نص اليوم و جاء الليل
كان امقعمز في حوشه و بنته ترسم بحذاه و كل اشوية يرفع تلفونه ايرن عليها مقفل
اضايق هلبا و الوقت يمشي بالبطي يستنى في الصبح امتى يطلع و من حرقة قلبه ما ذاق حاجة من فطور الصبح و كملها دخان و قهوة 🔥
بعد ناضت طلعت خشت الحمام و بعديها طيبت قهوة و على ما ضغطت عليها امها تاكل ما بت اتحط ماكلة في فمها و النية كانت مسدودة بكل و غير ان وجعتها بطنها من اعصاب المعدة
خشت لدار و تذكرت اتشوف التلفون طلعاته من الشنطة جت تبي تفتحه لقاته مقفل مشت حطاته في الشحن و طلعت قعمزت مع امها و خوتها ع الtv و عقلها يسترجع في كل لحظة معه و الحب اللي ساكن في قلبها و توا ايقطع فيه شن ايطلعه و شن ينهيه 💔🔥
قعدت ساعة بس جثة معهم وبعديها ناضت خشت لدار
قعمزت شافت التلفون واصل لشحن 60٪ نحته و دارت تشغيل
لما فتح كان فيه فوق من 15 مكالمة من احمد و قبس و مكالمة من زميلة في الجامعة
فتحت ع الرسايل تقراء في اعتذراته بستهزاء و تخوين
بعديها شبحت من بين رسايله رسالة من قبس
اتقول فاها اترد عليها ضروري خافت ايكون صايرلها شي عاودتلها الاتصال وقعد تلفون قبس ايرن
و هي كانت امقعمزة في سريرها مسندة راسها ع لوح السرير و التفكير يبي يقسم راسها نصفين
التفتت على رنت تلفونها ع الكمدينو و خذاته فتحت المكالمة
قبس: الوو
براء: ايوة قبس كيف حالك
قبس: بتنهيدة؛ الحمدلله انتي كيفك
براء: اااخ زي الزفت قسم بالله 💔؛ قعدت تبكي
قبس: بخوف؛ خيرررك شن صاير
براء: تمسح في دموعها؛ طلعوا كلهم زي بعضهم قلوبهم حجر و كذابين 💔
قبس: شن في خوفتيني
براء: ببكاء؛ اااحمد طلع متززوج يا قبسسس😭
قبس: بصدمة؛ شنووو!! تحكي جد
براء: مالا بنكذب عليك 💔😢 الكذااب الخاين
قبس: كيف عرفتي انه متزوج!!؟
براء: شبحتها بعيني جت لعنده المكتب 💔 حصلت صدمة قوية لما قالت مرته مش عارفه كيف تماسكت قدامها💔 اااخ يا قبس قهررني و كسر قلبي 💔😭
قبس: باسف؛ حبيبتي ما عاش اللي يكسر قلبك خلاص ما تزعليش روحك ربي ح ايعوضك باللي احسن منه
براء: اني خلاص معش عندي ثقة في حد كلهم كلاب زي بعضهم 💔
قبس: و هو شن قال؟ كيف كانت ردت فعله
براء: انصدم طبعا ما توقعهاش اتجي المكتب و ينفضح قدامي 💔معش قدرت سيبتهم و طلعت من الشركة و هو مزال يبي نسمعه لحق عليا و قعد ايبرر و ايتحلف يحساب بنصدقه الكذاب
قبس: والله ما اتوقعي يطلع منه هك.. شخصيته من كلامك عليه خليتيني نشبحهه ملاك نازل من السماء
براء: بوجع؛ كنت مخدوعة فيه لتوا مش قادرة انصدق نحس روحي في حلم..ااخ يا قبس الحب واعر ياريت ما حبيت 💔😭
قبس: معليش حبيبتي توا مع الايام تنسيه
براء: ان شاءلله 🥺؛ خشت عليها مكالمة نزلت تلفون تشبح لشاشة و رجعاته؛ الحيوان قاعد يتصل مصح وجه
قبس: شنو تبي اتردي عليه
براء: انرد عينه 😠 استني خلي انحطه في الحظر؛
خشت على رقمه و دارتله حظر و مشت حظراته ع الوتس و الفيس و التليجرام و هو قاعد يتصل و يعطي فيه مشغول عرفها حطاته في الحظر خش شبح الفيس لقاها دايرة الحظر على كل وسائل التواصل عصب وعزق التلفون لين رعش بنته
زفر بنفس طويل و مشى خذاها في حضنه باس راسها و يتاسفلها
اما براء رجعت اتصلت بقبس و كملت هدرزة معها وبعديها تذكرت رسالتها
براء: نسيت نسالك على رسالتك توا شبحتها بعد فتحت التلفون
سامحيني والله ما انتبهت كنت في حالة ما يعلم بيها غير ربي💔
قبس: لا ولايهمك عادي كنت بس نبيك اتجيبيلي تست الحمل
براء: مازلتي شاكة اتكوني حامل
قبس: تنهدت بضيق؛ معش قعد شك طلعت صح حامل 😞
براء: بشهقة؛ ااايييي 😳 كيف عرفتي
قبس: مشيت خذيت تيست من الصيدلية
براء: متاكدة من النتيجة ان حمل
قبس: ايي متاكدة و بحثت في القوقل طلع نفس الاعراض
براء: بضيق؛ اووووف مش عارفة شن انقولك انباركلك ولا انواسيك
قبس: بحزن؛ اني بروحي مشاعري ملخبصة و خايفة 🥺
براء: باهي شن تبي اديري؟ قلتيها لخالتي حميدة
قبس: لا ما نبيش حد يعرف 🥺
براء: بعقدت حاجب؛ علااش انتي مش حامل بالحرام باش ادرقي عليهم
قبس: لو انقولها لماما ح اتقولها لبابا و مش بعيد ارجعوني له بعد يعرف بحملي
براء: يعني انتي ما تبيش ترجعيله
قبس: زواجي منه كان غصب عليه و توا ما نبيش ايرجعني غصب عشان اني حامل😞 انموت اهون من نعيش مع شخص ما يحبنيش 💔
براء: بعيد الشر عليك.. بس مصيرهم يعرفو لما غدوة بطنك تكبر راه مش ح تقعد ديما صغيرة
قبس: نفخت بضيق؛ مش عارفه بس حاليا مانبيش حد يعرف 💔😞
براء: باهي على راحتك اهم شي تهتمي بصحتك و ان شاءلله ربي اينوضك بالسلامة
.
.
راوح اركان من الشركة و خش طول طلع ع الدروج ماشي لشقته سمعاته امه طلعت نادت عليه قبل ما ايخش لشقة
ساسية: اركاااان ااستنى يا امي
اركان: التفت؛ ايووة؛ مشى خطوتين طبس راسه لتحت شبحلها؛خير يا امي تبي شي
ساسية: يا اوليدي ليك كم يوم لا جيت قابلتنا على غداء ولا على عشاء.. سلم اوليدي انزل تغداء مع بوك وخوتك ما تقعدش بروحك
اركان: انروح تاعب زي توا ما خطريش ناكل
ساسية: مالا تقعد بلا ماكلة اليوم كله!!
اركان: ما تشغليش بالك اني بعد نطلع انتعشى برا
ساسية: بتنهيدة؛ ربي يهديك و يصلح حالك .. والله ديما شاغلني ما ارتحت ولا اتهنيت في حياتك زي الناس 💔
اركان: قلبه نغزه؛ الحمدلله على كل حال؛ رجع لباب الشقة فتحه بالمفتاح و ساسية خشت الحوش تدعيله من وسط قلبها
لما صكر باب الشقة جت عينه ع الدار اللي كانت ترقد فاها مشى خش لدار و كانت ناسية شوية حوايج و كتب حاطهن ع الكنبة اللي ترقد عليها قعمز رفع قفطان بتاع حوش قربه لوجه قعد ايشم في عطرها عليه 💓 و شبح لباقي الحاجات حركهم بيده التانية فتح على كتاب يقراء في خربشاتها عليه
كان ايحس بشعور غريب و يسأل في روحه ليش الشعور اهوا
و علاش ما قدرش يتخطاها و ايطلعها من راسه
خاف ايكون بدا ايحبها و يتعلق بيها خصوصي مزال ايحس انه قاعد ايخون في جود 💔 والشي هذا خلاه ينكر و يرفض احساسه الجديد 🔥و عشان ينهي ايجي كل يوم ايتامل حاجاتها و بسترجع ذكرياتها وبعد تفكير قرر ايرجعلها الاغراض هذول و افضل شي يمشي يعطهولها غدوة
ناض حطهم في كيس هدايا حجم كبير و خلاهم ع الكنبة و مشى خش داره بدل حوايجه و مشى للحمام و رجع رقد
