بعد التدريبات مشى وضاح لبيته وكان يفكر في نوير وكان يقول بخاطره الله لو توافق مابقى من الدنيا شي يعنيني غير موافقتها سلبتني راحتي ونومي وتفكيري يارب تكمل فيها حياتي، سطام راجع البيت وكانت عزوه تنتظره وكل منهم يبادل الثاني نظرات حب وغرام وتمكن، اسماء جالسه عند نوير تقنعها توافق لانه واضح ميت عليها وضاح وصادق بحبه لها لكن نوير تقول ليه اتسرع يابنت خليني افكر واستخير ماودي اخذ قرار اندم عليه وفوقها تعرفين ابوي شخصيته عنيده وصعبه معرف وش بيقول
اسماء: مستحيل ابوك يرد الشيخ وولده لاتفكرين كذا
نوير: عيال عمي ناشبين لأبوي كيف ماتبينه يردهم؟
اسماء: لاتفكرين كثير المهم انك بخاطرك موافقه واذا جاء يخطب يصير خير كلميه انك موافقه عشان يجي يخطب وتعرفين رد ابوك لاتجلسين معلقة كذا وتعلقين وضاح اكثر!
نوير وفيها الغصه: والله موافقه يا أسماء وين بلقى شخص مثل وضاح يعيشني الشعور الحلو ذا والحب الصادق بس الخوف تمكن فيني
اسماء: خلاص انا بوصل رسالتك لوضاح وانهي الموضوع يجي يخطبك وان شاءالله نفرح فيكم
نوير بصوت منخفض : امين
، ابو نوير جالس وحوله عيال اخوانه ويسولف معهم ويسمع واحد منهم اسمه فزاع يقول: ياعم ماودك تزوجني نوير واكمل نص دين؟
ابو نوير: الا والله لي الشرف في عيال اخوي واذا ما اخذتوها انتو من ياخذها
فزاع: اجل تسمعه يا ابوي عمي موافق
ابو فزاع: الساعة الطيبة اجل بكره جايين نخطبها رسمي لفزاع
ابو نوير: حياكم الله يامرحبا ،،،،
——
اسماء وصلت عند وضاح وصلت له رسالة نوير بأنها موافقة يجي يخطبها ووضاح ماصدق خبر من فرحته راح يركض لأبوه ويعطيه العلم وضاح: يبه أنا أبي اتزوج
ابو وضاح: والله الساعة المباركة ياولدي
وضاح بأبتسامة: يبه بخاطري وحده من بنات الجماعة
بنت ابو نوير
ابو وضاح: تم وبكره نخطبها ان شاء الله
ابوه مبسوط لأنه دايم يقول تزوج ويرفض وضاح
وضاح رجع لفراشه يقول ياشمس الصبح أشرقي الحين قمت أحسب الثواني ساعات
قال بنام عشان يمر الوقت واصحى على بكره اروح اخطبها
اشرقت شمس اليوم الثاني ووضاح يتقلب بفراشه صحى وقام يتروش ويغير ملابسه ويتجهز وحصل ابوه جاهز قال: مشينا يبه وراحو لأبو نوير وحصلو عنده ناس كثير واخوانه وضاح: غريبه متجمعين كذا اليوم عسى خير
ابو وضاح: وضاح نرجع لهم وقت ثاني؟
وضاح: لا يبه تكفى الحين اذا راحو خطبنا
ابو نوير شاف الشيخ ملفي ووضاح مقبلين وقام يرحب ويهلي فيهم
وقلطهم بصدر المجلس وكانو اخوان ابو نوير حوله كلهم وعيالهم
الشيخ ملفي: عساكم مجتمعين على خير ان شاء الله
ابو نوير: اي ابشرك خير يا شيخ هذا اخوي ابو فزاع وفزاع جايين يخطبون بنتي نوير وزين جيت تكتب كتابهم
الشيخ ملفي ناظر ولده وضاح وفيه صدمه
وضاح من الصدمه طاح فنجان القهوة من يده وشرق
الشيخ ملفي: الله يبارك لهم ان شاء الله بس انا كنت مار من عندكم وشفتكم مجتمعين وقلت اسلم عليكم وامشي لأني مشغول اليوم مشينا ياوضاح
وضاح ماقدر يوقف من الصدمه يحسب نفسه بحلم ينتظر يصحى منه لكن هذا واقعه المرير
مشى وضاح وابوه وكان ابوه يكلمه ومايرد عليه ترك ابوه ومشى برا القرية
——
نوير تسمع ابوها وتشوف وضاح وابوه طالعين وداخلها يقول شصاير
ويدخل عليها ابوها يقول نوير ابشرك جايك خطابه نوير فرحانه وبنفس الوقت تقول غريبه خطبني وطلع بذي السرعة
نوير: من يا ابوي؟
ابوها: ولد عمك فزاع وابوه عندنا ويخطبونك
نوير انصعقت وانهدم جسر أمالها وماردت على ابوها تسمع صوته وكانه صدى وداخلها يقول والله ما ابيها خاطري عند وضاح
ابوها: ها يابنتي شرايك ترا ولد عمك اولى فيك ومحد بيصونك مثل ولد عمك
نوير: مقدر اقول شي يا ابوي الموضوع عندك
( من عادات وتقاليد الاولين البنت لولد عمها قبل الغريب )
طلع ابوها يبشر فزاع بموافقة نوير والكل فرحان له
ونوير منكسر خاطرها على وضاح وكيف انه طلع من عندهم
——-
وضاح ركب حصانه وطلع برا القرية يبي يبعد عنهم ماوده يشوف زواج نوير على غيره وخاطره مكسور وحزين كيف انه بالامس فرحتي بوصلك واليوم حزني على بعدك
وصل الخبر لسطام وانصدم سطام وكان يحمل بداخله حزن اشد من حزن وضاح وطلع يدور لوضاح ماحصله محد يدري وين رايح
مرت الايام وتزوجت نوير ولد عمها وعاشت مع ولد عمها بالأكراه هي ماتبيه ولا تقدر ترد ابوها
سطام مازال يبحث عن وضاح ولا يدري وين اختفى
ووضاح لليوم مختفي عن القرية وماله نيه يرجع
عرفت نوير بأن وضاح مب في القرية ومتغيب عنها كم يوم
وقررت ترسل رسالة لسطام لأنه الاقرب لوضاح مضمونها:
ما ادري وش اللي حصل للأن لكن أبي وضاح يعرف أن كل شي حاصل معي ماني راضيه فيه وكانت أحلامي متعلقة في وضاح أكثر من غيره ،، حبيته ولكن النصيب يمنعني عنه، وأتمنى يرجع للقرية على الأقل أحس بوجوده وأتطمن على سلامته ،
—-
وصلت الرسالة لسطام وقال بطلع ابحث على وضاح مستحيل اتركه لحاله ركب حصانه سطام وبدأ يبحث عن وضاح في كل قرية حولهم ويسأل الكل يقولون شفناه لكن مانعرف وين راح
وصل أخر قرية سطام وسأل عن وضاح يقولون أنه راح الشمال
وترا الشمال معروفين بشدتهم وقسوتهم نصيحة أرجع لقريتك
اللي يروح الشمال مستحيل يرجع حي ما اهتم سطام وقال وضاح والله ما اتركه لوحده وكمل طريقة لشمال وقبل يوصل لقرية أحد حكام الشمال وقفوه حراس القرية وقالو من أنت قال لهم أنا دخيل اخذه الحراس للحاكم وصلو عند الحاكم وقالو هذا دخيل قبل أن تسأله عن أسمه قالت دخلت ووزيت فينا اكرموه وكانت حاكمة القرية سيدة تسمى جوزاء وكانت معروفه بأنها شديده وماترحم أحد لكن سطام كانت نيته واضحه ودخيل عندهم اكرموه وجالس الحاكمه قالت وش صاير معك ومن اللي ناويك
سطام: محد ناوي علي أنا لي صديق خرج من قريتي وللأن ما اعرف عنه شي وكنت ابحث عنه في كل قرية حتى وصلت عندكم
الحاكمة جوزاء: تقدر توصفه لحراسي؟
وصف لهم سطام شكل وضاح وعلمهم بأسمه وطلعو الحراس يبحثون وكان سطام بيطلع معهم
الحاكمة: وين رايح؟
سطام: بكمل بحث مع حراسك
الحاكمة: ريح اليوم انت جاي من طريق طويل ومتعب حراسي بيقومون بالواجب انت ارتاح وطمن بالك
سطام: وكيف ارتاح ووضاح ما اعرف وينه حي ميت عن اذنك
الحاكمة انصدمت من وفاء سطام لصديقة وكيف انه مايبي الراحة ويكمل بحث عنه
طلع سطام وكمل بحث عن وضاح والحراس يبحثون معه
لكن مافيه فايده وضاح ماهو موجود هنا
وقف سطام عند اهل السوق يسأل وناظرت فيه واحده منهم وغضت طرفها
سطام: تكفين اذا تعرفين عنه شي قولي
البائعه: مقدر اتكلم
سطام: ادخلي داخل الدكان وكان
وكان سطام يسألها وهو يفتش بالبضاعة مايبي احد يشك
قالت: اللي وصفته كان بالأمس هنا وسحبوه حراس الحاكمة
سطام: تعرفين وين اخذوه؟
قالت: لا ولكن عندهم سجن في نهاية القصر
—-
دخل سطام على الحاكمة وقال لو كان صديقي واحد من سجناء قصرك بتخرجينه؟
الحاكمة: وكيف يكون من سجناء قصري كيف عرفت
سطام: وكيف لحاكمة مثلك وقصر بهذا الحجم ومايكون عندك سجن
الحاكمة: نادت على الحراس قالت خذوه لسجن ليبحث عن صديقه
نزل سطام لسجن الحاكمة وكان يبحث عن وضاح لين حصله
سطام: وضاااححح
وضاح: سطااممم وش جابك وش مسوي
سطام: اخرج اخرج بس
وضاح: شسالفة وش صاير
طلع وضاح من السجن وقام يحضنه سطام وفرح لأنه حصل صديقه
طلعو للحاكمة وشافتهم الحاكمة
الحاكمة: لو أعرف أن هذا سجيني ماتركته
سطام: ليه وش مسوي؟
وضاح يناظرهم
الحاكمة بأبتسامة: وسيم وشجاع دخل قريتي وما اهتم لحراسي
سطام بضحكه : أتركيه لي أنا اخرجه من قريتك
وضاح مكشر : خلنا نمشي بس
الحاكمة: وين تمشي بهذي البساطة؟
وضاح وسطام يناظرونها وش تبي ذي
قالت مابترككم تطلعون الا واكرمتكم وجهزو لهم الغداء وتغدو عندهم وقبل يغادرون عطتهم ناقتين حماله فيها من كل خيراتهم
وضاح مستغرب: سطام ماتحس الوضع مريب شوي؟
سطام بضحكه: من اعتاد على القلق ، ظن الطمأنينة كمين
وضاح: والله ماتدري كيف تسوي معنا كذا وماتعرفنا
سطام: امش بس خلاص لاتصير شكاك
وطلعو من قرية الحاكمة الجوزاء متجهين لقريتهم وصلو القرية بعد اسابيع وكانت عزوه تنتظر سطام على احر من الجمر خوفًا عليه وعشان تتطمن انه بيرجع ووضاح معه
وصلو القرية وكان معهم خير
سطام: التقيت بوضاح في طريقي ومعه كل هذي الخيرات
وضاح مبتسم: تعرف تنهي خوفهم
نوير من ورا تناظر وضاح وخاطرها منكسر كانت تحلم تكون معه هو لكن نصيبها اخذها
،،،، يُتبع
أنت تقرأ
( سطام وعزوه ) تهزمني النجلاء وانا ند فرسان
Fiksi Umum-سطام بعد ولادته بسنة توفي أبوه في غزو وماتت أمه من قهرها على أبوه وتربى على يدين جدانه وكان سطام منذ الصغر يملك شجاعة ( ورثه الوحيد من ابوه ) حتى كبر سطام وصار من أشهر فرسان قبيلته حتى ان القوم كانو يغزون بعد مايعرفون ان سطام سافر عن ربعه لمعرفتهم...
