ده ولد بس انتي بنت !!!!!!
نعممم يعني ايه اللي فوق ده 👆🏼
جملة دايماً بنسمعها عشان احنا للأسف عايشين في مجتمع فاسد ما يعرفش اي حاجة في اي حاجة
_____________________________
يروح الولد يقول لـ أبوه " انا خارج شوية مع أصحابي"
و طبعاً الأب المثالي الرائع اللي مافيش زيه يقوله
" ماشي يا بطل "
الواد يروح خارج مع أصحابه و يرجع واحدة بالليل
الأب طبعاً مش هيكلمه ولا يقول له حاجة ما هو راجل فيها ايه خليه يعيش حياته و هو اصلا يا عيني مش عارف ان ابنه كان خارج مع البت هايدي و نرمين و طبعاً
ما ننساش صاحب السوء ااا قصدي صاحب عمره عماد
طب و لما البنت تروح تستأذن من أمها او ابوها
طبعاً مش بيرضى و لو رضي بيبقى بعد ما البت يا عيني تزن و تعيط و يتحرق دمها و تكره أم الخروجة على أم الدنيا يروح قايلها ابوها "تمام روحي بس لو اتأخرتي هيبقى يومك مش فايت"
البنت تحمد ربنا انه وافق و بسرعة تلبس و تروح عند صاحبتها في البيت ولأ بعد كل ده لما ترجع يستقبلها ابوها بالتهزيئ " هو انا مخلف رقاصة راجعالي نص الليل
طب والله ما أخليكي تعتبي باب البيت تاني "
نعممم !!!!!
ده يادوبك الساعة لسه 9 ليل ايه؟
و ياريتها كانت قاعدة برا لا دي كانت عند صاحبتها فطيمة في العمارة اللي في وشهم !!!
مش بس كدة ده حتى في شغل البيت يبقى الواد قاعد
على الكنبة حاطط رجل على رجل و ماسك الموبايل بيكلم واحدة و يبعتلها كلام زي العسل ما بيطلعش من بوقه لما أخته تعمله حاجة حلوة و لما الأم بتبقى عايزة
حاجة تروح تكلم البنت تعملها طبعاً ما هى بنت
و لما البنت تشتكي و تقول ليه هى بتشتغل في البيت و اخوها لأ يقولولها " انتي ازاي عايزة راجل يقعد يكنس و ينظف و يطبخ ليه هو بنت "
و طبعاً البنت مش بأيدها تعمل حاجة فـ بتسكت و تستحمل كل القرف ده و تستنى فرج ربنا
و البنت بعد ما ترجع من المدرسة تعبانة هلكانة تروح تساعد مامتها في الغداء و التنظيف و غسل المواعين
و بعد كل ده ما بتصدق تقعد ترتاح فـ تاخذ الموبايل
تقعد تتكلم مع صحابها شوية و هنا بقى تقوم القيامة و الأب و الام بقى لما يشوفها ماسكة الموبايل و ابتسمت
ولا ضحكت و لا ان شاء الله بينت سنانها و هى بتتثاوب
يقوموا شادين منها الموبايل يقعدوا يفتشوا فيه على اساس انها قاعدة بتكلم ولد يعني و يزعقوا فيها من غير
سبب و لأ مش بس كدة ده حتى الأم نفسها كل يوم بتفتح موبايلها و تقلب في الواتس و تقراء كل رسالة
ان شاء الله رسالة من شركة فودافون أهم حاجة انها تبقى عارفة بنتها بتعمل ايه و بتقول ايه
و لما حد يسألها ليه بتقول انها بتحافظ على بنتها اصل بنتها جوهرة و لازم دايماً تعمل كل حاجة صح و هى بس بتشرف عليها مش اكتر و المشكلة انها لما تفتش موبايلها بتفتشه قدامها ياريتها بتعمل كدة من وراها عشان ما تكسرش البنت !!!
طيب حضرتك عارفة انك دلوقتي بتدمري بنتك ولا مش عارفة؟ ...... انتي بس لو وثقتي فيها او بس حسستيها انك واثقة فيها هى لما هتمسك الموبايل و يبقى مثلا؟ ولد بعتلها رسالة هى بقى ساعتها هتفتكر ثقتك فيها و مش هتقدر تكسرها و خاصتاً لو انتي دايماً معلماها تهتم بصلاتها و بالقرآن و يبقى إيمانها قوي مش هتعمل كدة
بس مش علشانك عشان ربنا
عشان هى عارفة كويس ان ده حرام
اما بقى أبنك ي أستاذة اللي الصبح بيكلم ملك و بالليل
نرمين و انتِ طبعاً بتبقي عارف انه بيكلم بنات بس
مش بتتكلمي لييييه؟
تقول بكل بساطة عشان هو راجل
ايوة معلش اصل الرجالة كل حاجة عندهم حلال لكن احنا البنات لاا حرام ما ينفعش !!!!
انا بجد لو قعدت اتكلم من النهاردة لحد بكرة مش هكمل
لأن اللي بيحصل ده ما ينفعش يستمر بجد بقى فيه بنات كارهين انهم بنات اه والله زي ما بقولكم كدة
يعني استغفر الله العظيم يارب كارهين ان ربنا خلقهم بنات انتوا متخيلين انتوا بتعملوا ايه و بتزرعوا جوانا ايه؟
اتقوا الله شوية و خلوا عندكم حاجة اسمها المساواة
يا اللي عاملين فيها شيوخ ايوة بكلمكم انتوا اللي المفروض نسميكم أهل و سند بس انتوا في الحقيقة
مش كدة خالص نادراً جداً لما تلاقي عائلة عارفة تربي عيالها صح و تعلمهم الصح من الغلط و ان الذكر زي الانثى و ان كلنا في الآخر بني آدمين
ده حتى علي بن ابي طالب رضي الله عنه يقول
" إذا دمعت عين أنثى بسبب رجل تلعنه الملائكة في
كل خطوة يخطيها "
اتمنى بجد اكون وصلت رسالتي ليكم
_____________________________
