لانني كاملة 2 - و ما ربك بظلام للعبيد -

الجزء الاول

شفيتو على ضحكتي؟ شفيتو على فرحتي؟ شفيتو على قلبي؟ احكولي عليه يقولو كان كبير و ينبض بالفرح....
نهار ديسيديت نخرج مالدار كان علابالي بلي راح نبدا مالزيرو كيما الخطرة اللولة بالصح هاد المرة الموضوع اختلف هاد الخطرة في رقبتي زوج دراري والفو معيشة القطن و فالحقيقة حتى انا والفتها
المعيشة مع هادي كانت فوق السحاب قبل ما تتمناي تلقاي حاضر عمري ماكان عندي مشكل ماديات، ساعات نريح نخمم انا علاش ما درتش كي النسا علاش ما كنتش نخبي الدراهم و نقرا للزمان عقوبة سيرتو كي عرفتو خداع.
و الجواب كان ساهل لاني عمري ما خصتني حاجة لي نتمناها يحطها و ساعات قبل حتى ما نتمنى، نحب دار عندو بدل الدار 4، نحب طونوبيل عندو بدل الطونوبيل 6ولا 7، نحب ذهب كان لوكان يزعفني بكلمة يروح يشريلي و اصلا يجيبلي الذهب بسبة و بلا سبة و انا اصلا كنت الذهب ما عندي فيه حاجة و انا اصلا تربيت فالعز شبعانة ماشي نشوف فالراجل بروجي و كنت نحبو....كنت؟؟؟
دوك نفهمكم مليح باش تفهموني.
انا طلاقي ماحسيتلوش تمتم بصح فاللول كانت الحرقة تاع الخدع و الزعاف و الجرح و موراها لتيت فالجري تاع الكوارط و الطلاق و موراها الخدمة و الجريان و في وسط هادا كامل انا كنت في داري و عجوزتي معايا و ماليا كامل دايرين بيا خاوتي و عماتي و خالاتي، نقدر نقول بلي الستة اشهر اللولة ما حسيتش بيهم و هو من داخل الحبس كان يبعتلي دراهم و قضيان حتى التليفون و كان ساعة على ساعة يعيطلي.
المعاناة الحقيقية تاعي كامراة مطلقة بدات من نهار لي خرجت من دار هادي
اكو شافيين واش صرا ؟!
ارواحو نفكركم...
راقدة في فراشي مغطية نص غطا نوم فيه معنقني و يتنفس في رقبتي من وحشو حسيتها صح يدو حسيتها صح على جنبي حطيت يدي عليها حتى لقيتها صح جازو 3 ثواني باش استوعبت، قفزت مخلوعة شكون لي راهو لاصق فيا درت نلقاه يخزر فيا ما فهمت لا خزرة تعب ولا لوم ولا وحش ولا زعاف يخزر فيا وخلاص وانا النفس تنقطع فيا الهدرة ما قدرتش نخرجها من فمي كنت دايمن نحاوز الفكرة من راسي بالصح علابالي بلي نهار يخرج راح ينتقم راح يدير فيا لي مايندارش ماشي هادي لي يسكت على حقو و انا ضربتو ضربة عمرو.
بقيت نخزر فيه و هو يخزر فيا امبعد مدلي يدو و دارلي بيها الجاست تاع ارواحي
درتلو براسي لالا
قالي : ايا بنتي عندي
قوتلو : واش جابك لهنا علاش جيت
قالي : كيفاش علاش جيت وين نروح مالا عندمن حبيتيني نروح
قوتلو : ماعلاباليش و ما يهمنيش بالصح ماشي عندي
ناض وقف و دنا ليا
قوتلو: واش وين اك جاي بعد عليا اخرج من داري
زاد يدنا تقول ماني نهدر : مافهمتش وين حابتني نروح كيفاش هادي مانجيش عندك مريضة انتي انا 18 شهر و انا مصبر روحي غير بيك نمني روحي غير بيك، حط يديه على وجهي، نتخايل غير فيك معايا وين ما ندور تكوني معايا، حبط يديه عليا بالشوية و انا نرعش بالخوف، جيت لداري عند مرتي و ولادي، شحال كبرو الدراري شحال توحشتهم ولادي
قوتلو هادي بعد عليا علاش اك دير هكا
قالي : وين نبعد علاش انا نقدر نبعد 18 شهر و انا بعيد ما كفاكش؟ ديتي حقك فيا ماكفاكش ؟
انا: هادي تعيش روح دوك و غدوة نهدرو ما جاياش عيب و حرام الناس واش يقولو و ربي كيفاش رانا مطلقين ماتجوزليش ماراكش راجلي و ما نيش مرتك (قلتها و ياريتني ما قلتهاش) تحول فالبلاص عينيه ولاو تاع غول دورني رماني عالفراش و بلا حتى كلمة حكم حوايجي على زوج عراني و دخل فيا و انا نطبع و نعيط و هو داير يدو على فمي نخبش فيه و نعض في يدو و نضرب فيه برجليا بالصح احاي وين راح نقدر انا عليه غول و هاج عليا كلاني قطعلي لحمى و حكم سروالو فتحو و نحاه و راح يدخل فيا وليت نبكي ماقدرتش نقاومو دخلو فيا و انا نبكي و هو يزيد وليت نقول وكيلك ربي يا هادي حسبيا الله و نعم الوكيل الله يعطيك موت و لا يديني و يهنيني منك و دموعي يطيحو رفد راسو شاف فيا و حبس واش كان يدير مسحلي دموعي و باس عينيا و حكمني عنقني هكاك عريانين في زوج و بدا يبكي يبكي يبكي و انا نبكي قالي مانقدرش يا هانية والله ما نقدر نعيش و انتي بعيدة عليا والله ما نقدر نخليك تروحي لغيري خليني نموت و ديري لي حبيتي سامحيني بنتي على قاع واش درت فيك عندك الحق والله ما نستاهلك انا خامج و رخيس و ما نسواش بالصح والله ما نقدر نعيش بعيد عليك والله غير نحبك اكتر من كلش، عنقني زير عليا و ناض لبس و خرج.
ماكاش لي يعرفو كيما انا، و ماكاش لي راح تتحمل نتيجة هبالو و انانيتو قدي انا و مانيش قادرة نزيد ناذي روحي بيه اكثر
بايتة ليل كامل لابسة حجابي و خايفة وجدت حوايج ولادي و حوايجي مزية لي كنت جبت الفاليزات الكبار من دارنا سبحان الله تقول حسيت، كنت قلت لياسمين جابتهملي نحبط فيهم الحوايج تاع الصيف و لي مانسحقهمش، بالصح ربي كاتبلي حاجة وحدوخرا
ماديت والو اصلا كنت نشوف بلي الحاجة لي مدرتهاش بدراعي ماشي ديالي مزية كنت مخبية دراهم قيمة 55 مليون هكاك تكلت عليهم ما رفدت معايا من قش الدار غير البارك تاع هناء ادا تعرفوهم المطارح تاع لي بيبي هادوك لي يجو حديد و قماش و يتبليياو ينطواو ديتو هاداك برك ما نحلفش عليه غير صبحت الدنيا لبست للدراري و درتلهم ياكلو حوست في تليفوني لقيت النيميرو تاع مول الدار لي كريتها قدام طاطا صليحة عيطتلو قالي اي فارغة من زهرك الكاري خرج عندو يا ربي سمانة.
رفدت روحي و خرجت عيطت لڨارديان يجيبولي طاكسي و يجو يحبطولي القش ( يا حسرا عالعز ) داني الطاكسي حطني و راح الفاليزات عاوني فيهم 8و نص تاع الصباح كنت واقفة قدام البطيمة وليت لنفس البلاصة بعد 3 سنين كيما قاتلي طاطا صليحة سلكي امور ولادك و طلقي جدو، بالصح لي طاطا صليحة و غيرها ما يعرفوهش بلي واعرة واعرة بزااااااف المسؤولية و الحياة كي دور عليك، سيرتو كي يكونو كتافك باردين و الناس تلوم فيك، اييييييييه يا سامعين الناس كانو يلومو فيا.
زعمة انا قليلة اصل الراجل عازني و دار عليا لي ما يندارش و دايرلي فالدنيا دنيتين بالصح انا مايقرش فيا الخير نهار لي طاح و انظلم و دخل للحبس رحت نجري طلقتو و خليتو وحدو، و اللي تقهر ماشي غير ماليه حتى ماليا و قالوها و قادرة مام انا لوكان شفت معيشة كاش ناس من برا نحكم عليهم هكا بالصح انا و انتوما نعرفو الحقيقة، حقيقة يا لي مشبح من برا واش حوالك من داخل.و قفت بين فاليزاتي و ولادي هنا في دراعي و ايمن واقف معايا شاد يدو في يدي و يشوف تايه و باش ما نكدبش حتى انا حالي ماكانش خير من حالو ندور في عينيا كاش ما نعقل كاش واحد يعاوني حتى نشوف مول الدار شيخ مستكبر جاي و يشالي بيدو.
-صباح الخير بنتي
-صباح الخير عمي حسان واش راك لباس صحتك بخير
-الحمد لله سوال عليك بنتي اوووووو البوبون هادا لي كان بيبي كي جيتي ، حبط باس ايمن و ايمن يضحك معاه بسلامتو وليدي حجرة سكر عمرو ما يشنف و لا يعكس الناس يضحك و يجبر خاطر اي واحد يلاقيه، تقول ربي بعثهولي باش يطببلي قلبي من هم الدنيا والله الحنانة لي فيه مخففة عليا وجع القلب.
-ايه ايمن، شفتو كبر
-الله يبارك او ولالك راجل في كتافك و هادي الشابة شكون بنتك فوطوكوبي منك
-هههه ايه هادي المشنفة
-خليها تتفشش في حياة يماها و.. ، واش بنتي وين راه الراجل
-ماكاش عمي حسان غير انا وياهم، سكتت شوية خفت نكمل، تكريلي و انا وحدي معاهم ؟
- ماكان حتى مشكل انا نعرفك و تعاملت معاك و نضمن فيك و في تربيتك بنتي و لي ثقيلة عليك خفيفة عليا ان شاء الله و ما تقلقي روحك ما والو ماكيش وحدك و شوفي بنتي انا من نهار شفتو مع محسن الطفل عاقل ماهوش تاع مشاكل و كانت صليحة حكاتلي عليه كي عطاتلي المفتاح يا بنتي انا خاطيني حكايات الناس بالصح كلمة الحق نقولها قلتها لصليحة و لمحسن و مام ليه و نقولهالك دوك والله ما ديالك هداك الراجل والله ما يوالمك و مازالك صغيرة و بوبية هاداك حڨار هداك يبان بلي موذي.
ضحكت عليه عمي حسان راجل كبير فالعمر و وليد البلاد الشونڨاي و البيري بالصح يعرف يميز فالناس
-ههه والاه ما كدبت يا عمي حسان عندك الحق
-معلوم عندي الحق و لوكان جيتي بنتي والله ما يشوف شعرة منك ما عجبنيش و نزيدك حاجة مازال يزيد يدور بيك مازال يزيد يكسرلك راسك بالصح ماكيش وحدك انا راني في مقام باباك و الحومة هادي كاملة نوصيها عليك
-الله يعزك عمي حسان ما تهدر لحتى واحد ما توصي حتى واحد مانيش حابة الناس يدو شوايعي ولا نولي حكاية في فم الناس و من جيهة بابات ولي ما تخافش ما علابالوش اصلا وين راني و ادا دار كاش مشكل نخرج ما نديرلكش بروبلام
-لالا بنتي انا خايف عليك برك هو ما عندو ما يديرلي بروبلام راكي كارية بكوارطك يقلقك عيطيلو لابوليس يرفدوه بالصح عندك الحق ماكالاه نحط عليك العين.
تفاهمت معاه و ساعدني مسكين حسبهالي بالسومة اللولة و قالي شهر من عندي و تفاهمنا غدوة نروحو للنوتار عطاني المفتاح و جاب زوج لي جان عاونونا طلعو معايا القش و عطيتلهم مية مية الف و دخلت لداري الجديدة و الحياتي الجديدة و انا نشوف فيها فارغة و مظلمة و نخمم وين نبدا و باش نبدا و عليمن نتكل.....