لانني كاملة 2 - و ما ربك بظلام للعبيد -

الجزء السابع

وليت لعقلي كي صونا التليفون في يدي لقيتو باعتلي ميساج (ما تخميش بزاف بنتي يحلها ربي من عندو انتي ريحيلي عاقلة برك و خليها على ربي و عليا )
كتبتلو لاجوو النيميرو تاع السباط تاع الدراري و حطيت التليفون و نضت ندير لقمة للدراري.
واحد الساعة هاكداك صونالي الباب لقيتو امين و خوه محمد رافدين شوفاج و زادو حبطو جابو شوف بان و زادو جابو زوج لي كوات كبار و كوفيرطا هادوك الحنان تاع الفورير غوز و زوج صغار تاع دراري تاع بلاصة و نص و جا معاهم بلومبي بلاصاولي الشوفبان كبير هايل الدار كان فيها واحد هادوك الصغار تاع بكري لي تمتم يطفاو جابولي هادا و انا بسلامتي الدوش ندوش ب ساعتين و تلاتة و نحب الما يغلي كنت نسوفري و الله غير طلي على قلبي و زادو بلاصاو الشوفاج بالصح ما شعلتوش غير الفيوزة مازال الحال عليه.
بعثتلو ميساج قوتلو merci D,رجعلي تمتم بلا مزية بنتي باباك مازالو حي ماتخافيش.
يومين موراها الصباح الشتا تصب دايرة حالة و صبحت حايرة في روحي كيفاش ندير للدراري خرجتهم عاودت دخلت نجيب البوسات قلت نحط فيها ايمن و نخبي هنا داخل مونتويا و نديهم للنوغيس، حرف كيفاش نحبطهم هوما ولا البوسات حتى وليت قريب نبكي و هوما رحلو عليا الباطيمة بالبكا تهيقلو مساكن، مع لحقت للتحت لقيت ليلى فاتحة الباب تسقم فالبوني و المونتو لبنتها، شحال تعجبني هاد المراة كيفاش بيتوتية و مرتبة و قايمة دارها راجلها و بنتها و عتبتها دايمن يشعلو شعيل و الريحة البنينة جامي تحوزي و ما تشميهاش عندها و كل ما نتلاقاها نلقاها جبة و طابلية اسوختي و مكحلة و ريحتها هايلة، كي شفتها هاكداك غاضتني عمري، ايه يا دنيا علاش واش خصني انا فاش ناقصة انا باش نكون هكا مهنية و دافية في داري متولة و مرتاحة قايمة روحي و ولادي و راجلي فوق راسي مسترني و مهنيني و رافد عليا هم الزنقة، بالصح واش يقول الواحد الحمد لله على كل حال، لا راد لقضاء الله.
-يا ربي عليك هاتي نعاونك اختي
-صباح الخير ليلى ختي
-صباح الخير هانية ختي واشبيهم البوبونات يبكو
-تقلقو مساكن مالحوايج و قستهم بالبوسات ما قدرتش نحبطهم في 3
-علاه عليه اختي لاه هازتها
-باش نحط ايمن فيها و هنا نديرها في عبوني تحت المونتو
-اشومي و انتي لا تخرجيهم في هاد الشتا
-واش ندير يا حنونتي وين نخليهم
-محتمة عليك تخدمي اليوم ؟!
-ايه والله غير محتمة بعظا اليوم عندي رونديفو مع مليون لازم نريقليلو كلش
-يا ختي زهرك العايب ماعرفتو عين ولا تابعة، نقولك حاجة اصبري ما تتحركيش من هنا
-اني مزروبة يا ليلى ختي كي نجي نقصرو
-لا والله لا تحركتيها اصبري
-علاش
راحت دخلت للدار و عاودت جات و عجوزتها موراها
-صباح الخير يا العدرا
-صباح الخير خالتي، رحت سلمت عليها
-تبوسك العافية بنتي
-هاتي الطفل هنا و انتي دخلي الطفلة
-وين ندخلها يا ليلى والله غير راني مزروبة
-علاه ابنتي يعني ربي يرضاها هادي نخلوك مرمدة بهاد الملايكة و نسكتو
بقيت نشوف فيها زادت نحاتلي العجوزة هنا و دخلو بيهم و انا موراهم، من هاداك النهار ولات ليلى تشدلي الدراري هي قالت تشدهم باطل و انا حلفت ما يريحو باطل و لي كانت تديهم النوغيس لوخرا عطيتهملها و سبحان من سخرهالي هناتني و نحات عليا هم الشتا و البرد و هنا لي مشيطتني ياك راهي قريب دير عامين مازالها ترضع و متروح لحتى واحد بالصح عند ليلى ترقد بالنوم، حبتها و ما نكرتهاش.
دير العشية كي جيت داخلة للحومة نلقا ايمن مع احمد في يد و بنتو في يد شاريلهم الشيبس و الجايبهم، الحال مغين بالصح الشتا حابسةبقيت نمشي موراهم حتى لحقت بيهم عيطتلو بالعقل دارو ليا، طلق الراجل و جا عندي يجري رفدتو و بستو و افونسيت
-عالسلامة جارتي
-يسلمك تعيش
-ياواحد الستوت غير شفتها نكرتني
-ان شاء الله ما قباحوش و هبلوكم
-غير خليهم يقباحو ياك الجيران تحتنا ماكاش خليهم يديرو رايهم
-يا طاطا ولادك شحال عاقلين هايلين خليهم كل يوم يجو عندنا
-تعيشي حنونة
عاودت حطيت ايمن و افونسيت نسبق
-هانية !!
درت ليه، جاتني بيزار عيطلي باسمي ما علاباليش علاش بالصح  ما جاتنيش تبانلي كي شغل دصارة
-انعم
-واش من جيهة راكي تخدمي ؟!
-كيفاش واش من جيهة ؟!
-وين تخدمي ؟!
-ماشي بعيد بزاف علاش ؟!
-واسمها الشريكة تاع دولة و لا بريفي ؟!
-لالا بريفي علاش بالصح؟!
-شفتك تخرجي الصباح بكري بزاف و العشية تولي روطار
-سامحني قلقوكم الدراري الصباح والله غير تحتمت، انا فهمتها بلي ديرونجاوه و بطيت عليهم
-واش من دراري لي قلقوني ياخاه شحال موسوسة, انا نقولك وين تخدمي و انتي فهمتيها بلي تقلقت من ولادك
-..., بقيت نشوف فيه، فهمت و ما فهمتش و مانيش حايبة نبينلو بلي فهمت مانيش حايبة ينطق و نولو فالدصارة
-انا قصدي عالبلاصة باش نشوف ادا طريقي الصباح نحطك معايا وكي نولي نريكيبيريك ماتريحيش تتمرمدي فالبيس و الشتا داخلة بزاف عليك
-اه لالا يعطيك الصحة ماشي بعيد و ديجا اني هدرت معاهم راح يديرولنا طرونسبور ينقصو علينا ، قلتها و درت زربت فالخطوة.
هادي المرة الدوزيام لي يقولي هدرة هاكا و نعكسو ان شاء الله ما يعاودهاش، و ان شاء الله يفه‍م بلي منحبش الدصارة بصك ادا مرتو شدتلي الدراري فري هناتني مانيش حايبة نخسر معاهم.
هاديك العشية جا باباهم حبطتهم جاو خواتاتهم داوهم مالباب تاع البطيمة و هو ماشفتوش ما جابهمليش حتى لليل و كي جاو كي العادة الصاشيات و الحوايج و القضيان بالصح طلعوهم خياتهم هو مالقيتوش و كي راحو دخلتهم لقيتو عشاهم بدلتلهم و رقدو ديراكت بقيتونفرز فالحوايج لقيتو شرالي مام ليا مونتو كاشمير و بارابلي و كافالياغ و صاك ديالو Ive Saint Laurent كوراغ نواغ و جابلي سيرفات غوز وبيجامة بلونوي و زوج تريكوات تاع صوف واحد باج واحد مخلط فالالوان و طايح عالكتف و ليڨينز نواغ و ماغون و سروال جين و و ليكات نواغ و فيستا سيميلي كوير فالكامل بالريش و معاها صاك و بوت نفس اللون Prada و ريحة لي يحبها devine vanille، و لي عجبتني كامل الطزينة تاع تقاشر لي جابهالي من مل الالوان و الاحجام. و زوج لي زونسومبل سوفاتمون.
ضحكت و فرحت بيهم ستفتهم و درتولحوايج ولادي لقيت فيهم 10ملاين في اونفلوب ما فهمتش علاش نحبتهم حطيتهم فالخزانة و خملت و رقدت
الصباح نضت نلقاه باعتلي ميساج بلي راهو رايح للخارجةو معلابالوش وقتاش يولي و كاش ما نسحق نزڨي لامين و بلي ما نبدلش نيميرو ديالي غير يلحق يزڨيلي بتليفونو جديد.
كيما كان الحال، راح دادي و خلاني انا و ولادي وحدنا، هو صح ماكانش معانا بالصح علابالي بلي بوكان نسحقو راح يجي بالصح دوك لالا و موراها عرفت بلي لافار ديالو تاع الحبس ظهرت قضية فساد كبيرة و طاحو فيها مسؤولين كبار و هو خرج منها على شعرة هرب و شارع على برا و ما يقدرش يدخل للبلاد حتى تفرا.
طاطا صليحة تروح و تجي و كل ما تجي تريح تبات معايا الدار عمي حسان ما طولش و رجعها شونطي قالها نعاودها بالصح انا بيعلي بلي غير باش ما تهربلوش ماحملتش تريح تماك مع عرايسها دايرة فيهم الباطل، و يا نهار لي رفدت كابتها و جات مولية لدارها و كي لحقت لقاتها حالة فمها و الخدامين يعاودو فالدال دوصول و الصالدوبان و ريبو البوطاجي الباطيمة رحلتها حاوزتهم كامل و طلعت لعندي و عبطتلو غسلاتو و نشراتو ما خلات ما عايرت و هو غير ساكت و يضحك
-يا السوكارجي يا بوقرعة يا البقار يا بوبلاد حليتلك عينيك و حلبتك و وليت تعرف تكومبلوكي عليا و تتحكم في داري و دار يما، حاب تربطني عندك في خلية الخلا لي تربيت فيها (السيد عندو شاطو و الله غير شاطو دارو تشبه للقصور تاع الصعايدة تاع مصر لي فيهم الدرج يطلعو للفوق من زوج جوايه و الجاردان و كلش رخام و هي تخوس على f2 في باطيمة ) حسباتلك ماعنديش وين نروح واقيل
-يا زينة علاش تزعفي انا حبيت نعاودهالك نرجعهالك عروسة و تحبي نولو ليها نولو اصبري علينا غير قيس ما نعاودوها كلش جديد كلش ماماي و كيما يحب الخاطر يا زهو الخاطر
-سقم دار ماليك لي من وقد التراكة ما بدلتوهاش و مادهلش روحك في داري و ريحة ميمتي
سباتو سباتو و كوبات.
علاقتي بالجيران غير صباح الخير و مساء الخير و هاد الشي غير كي تكون هي معايا، كي نكون وحدي والله ما نرفد راسي فيهم، من غير دار احمد لي ندخل عندهم و نهدر معاهم بحكم شايدينلي الدراري و مع الوقت فهمت بلي ليلى مسكينة قد ما دارت و جرات باش تزيد تولد و ربي ما عطاهاش و عجوزتها صح تحبها و كلش بالصح كل خطرة تجبدلها السوجي و تفكرها بيه، على حساب ما حكاتلي راجلها ما قال والو و يقولها لي جات من عند ربي مرحبا و كي تكثر يماه ينوض ليها، كي حكاتلي هكا حسيتو فحل و راجل و على ما سمعت عليه و حكاية يماه يعني ماعندك ما تقولي و انا ڨانا من نهار عكستو على التوصال للخدمة يعني الحق شد سابعو مازادش عاود جبدلي و اصلا قليل وين نتلاقا بيه، بالصح انتوما شفيتو نهار قتلكم ادا جر،حك شيطان و مامتش واش راح يصرالك، هاكداك انا صرالي، عمري مارتحتلو و ما تهنالو خاطري...و ماكنتش ظالماتو.