لانني كاملة 2 - و ما ربك بظلام للعبيد -

الجزء الخامس

On vient d'un trou, on vit pour un trou et on rentre dans un trou.....اولها و اخرتها انك ليمت و انهم لميتون
حبستلو الصونغي و حطيتو، ندير روحي نسيت و نتبسم و نلعب و نغني قدام ولادي و je me fais forte علاجالهم بالصح مالداخل حتى انا طفلة صغيرة و نخاااااف نموووووت و اكبر مصدر خوف بالنسبة ليا هو هادي لي وقت فات كنت نشوفو هو لمان، سبحان ربي كيفاش القلوب تتبدل و كيفاش الوجوه لي لابسينهم الناس يطيحو.
ماعاودش صونا بقيت لاتية و نسيي ما نخممش فيه والله غير من نيميروه برك سناني ولاو يتخبطو في بعضاهم.
شوية هاكداك و عاود صونا التليفون، يا خاوتي ماجيت نلحق نقلبو نشوف شكون غير حسيت العميرة خرجت، بالصح الحمد لله لقيتها ياسمين
-وي ياسمين
-هانية وين راكي؟!
-فالدار
-واشمن دار
-داري, علاش؟!
-هاداك سواد السعد عيط يحوس عليك و على الدراري
-علابالي عيطلي انا ڨانا ما رفدتلوش، خليك منو مازيديش ترفديلو بالاك يفهم روحو
-واش يفهم روحو اناي واقيل هبلتي، و ولادو كيفاش تريحي هاربتلو بيهم حرام عليك ولادو لازم يشوفهم.
سكت مالقيت ما نقولها ايه ولادو و توحشهم بالصح انا خايفة منو و مانقدرش نقولها واش دار فيا نهار خرج مالحبس.
-خلاص دوك نفريها معاه.
-يا حنونتي ماشي علاجال رخيس كيما هو تعقدي ولادك و تظلميهم عند ربي حرام ماتحرميهمش من باباهم و هو خليه بينو و بين مولاه ياك انتي تهنيتي منو و من زبلو خلاص حاجة ولادو ما دخليش روحك انتي ديري لي عليك و وكلي ربي هو لي يتولاه.
-خلاص d'accord ne t'inquiètes pas je vais résoudre le problème
-انا هاد la situation ڨاع ماهيش عاجبتني واش كانتلك لوكان دخلتي لدار باباك و عشتي فيها ماشي خير ليك
-ياسمين stp خلاص خليني من هاد السوجي انا هاكدا راني a l'aise
-واش نقولك t'es majeur et vaccinée.
كوبيت معاه و بقيت نخمم حتى عاود صونا هو، درت كوراج و ريبونديتلو
-واش الالة وين راكي هادا؟ 3خطرات و انا نجي للدار مانلقاكش و الحوايج ماكاش؟! هربتي ؟! علاش وليت غول خفتي مني و هربتي راح ناكلك ؟!
-صباح الخير
-صباح النور بنتي واش راكي
-الحمد لله، انعم هادي خير
-ينعم عليك عمري، وين راكي ؟!
كي تسمعو صوتو يهدر بالعقل و يضحك جايبها بتمسخير تقولو هادا هايل بالصح لي يعفو صح علابالو بلي هاديك la façon يخبي بيها اعصار تاع زعاف و شر داخلو، خفت نجاوبو فالتليفون خفت منو.
-اني... في داري
-دارك؟! ايه ماعليش وين جاية هادي دارك؟
-دادي il est grand temps باش تفهم que انا خلاص ماوليتش مرتك و نورمالمون حتى الهدرة فالتليفون و ماتكونش بيناتنا و مادامك انت خرجت و راك تدخل للدار la preuve  كي دقدقت و ما فتحتلكش الباب دخلت وحدك صح ولا لالا، و بلا ما تعاود نقولك نهار جيت واش درت كي لقيتني في دارك.
-كيفاش زعمة ما فهمتش فهميني غير بالعقل
-واش ما فهمتش
-هادي حكاية داري و دارك و ما تهدريش معايا و la meilleure، النبرة تاع صوتو تبدلت و تزير, ماوليتش مرتك.
-واش نفهمك هادي هي la réalité  لازم دخلها في راسك خلاص المكتوب بيناتنا و ربي يخلف عليا و عليك و يعوضنا، انا مانكرهك ماني حاقدة عليك، بيناتنا زوج دراري مادابيا يترباو على القدر بين والديهم هادا مكان، تسمى تحب تشوفهم ماكاش مشكل وقت لي يساعدك تحب تجي عند لانوغيس تديهم و لا نخرجهماك لكاش jardin شوف انت واش يساعدك
-هانية، تحبسي عليا التمنيك تاع البسيكولوغ و لايف كوتش تاع يوتوب و اهدري معايا هدرة نفهمها، نحا الماسك تاع الكالم و القصرة و بلاصا الوجع المزير و الواعر
بيني و بين روحي صح مني خفت، بالصح لوكان نوريلو بلي خفت يزيد يهيج عليا، درت الكوراج و زيرت وجهي انا قانا
-هادي هادا لي كاين تحب تشوف ولادك هادا هو شرطي ما عينكش الله يسهل عليك، حكاية داري و تجيني oublie
-اكي sure؟؟؟
والله غير هاد السؤال يخوفني اكثر مالتهديد لوكان يهددني
-اني سور
-خلاص ماشي مشكل كيما حبيتي، ايا اتهلاي.
كوبا و ما كثرش معايا الهدرة و ما قلقنيش و ما كعررش و ما عيط عليا ما هدد ما سب ما دار حتى ردة فعل، خلاني نتهلوش مهاوشة نخمم غير فاللي راح يجي و صح وليت مرعوشة كل هفة نقول او زدم او جا عيشني الرعب على قانيه.
خلاصلي الكونجي و وليت للخدمة و حطيت الدراري عند النوغيس هاديك و جوزت ياماتي باللي كتبها ربي.
واحد ال15 يوم موراها انا خرجت حطيتوالدراري و رايحة نركب البيس و نروح للخدمة، عيطلي
انا قلت الو و بداني
-اني جاي ليك تعرفي واش معنتها .......نحيهولك اليوم
-استغفر الله يا ربي، خير صباح لله
-خير!! اني جايك نوريلك الخير كيفاش داير
-وين اك جاي واقيل شفتني في منامك واش كاين صابح تكفر عليا
-وليتي طولي في لسانك و تعلي في صوتك اني لحقت نڨاري و نطلع اليوم ....و نباصي على ......في زوج
-شكون هادا وين تطلع واش كاين
-اني جيت ل.....
كوبا و خلاني
خزرت فالتليفون و خبيتو حسيتو مهبول
كملت نمشي و نقرا في سورة الواقعة نحفظ فيها فالطريق حتى عاود صونالي
-وي دادي تكاكيت لعمرك
-وين رحتي يا ..... حلي ....الباب خير ما نكسرو
-يا راجل واشبيك علاش انت علابالك وين راني اصلا  ولا راك متلف بيني و بين كاش واحدة
-اكي تتمنيكي بيا درتي درتي و وليتي لعند الفرخ هاداك تسكني قدامو و ما تلقايليش السبايب الدزاير بطولها و عرضها ما لقيتي غير الدار هادي توليلها، حلي الباب ما تنشعينيش
فهمت الحكاية، عرفني وين راني ساكنة و حسباتلو محسن مازالو هنا و راهو ناوي يدير السينما فالباطيمة قدام الناس و نتبهدل
-هادي حنوني اتكالما راك غالط والله غير غالط، ادا بيك على وليد طاطا صليحة ماكاشو السيد راح والله راهو في عامبن ملي ايميڨرا راهو عايش في لالمان و متزوج تماك و اصلا طاطا صليحة رحلت من هاديك الدار alors stp يرحم باباك بركا ما دير فالتبهدايل تحط غير العين عليا و الناس لي ما يسمعوش صوتي يولو يتشارو عليا
سكت بقيت غير نسمع فيه يتنفس و يمشي
-وين راكي دوك
-فالبيس رايحة نخدم
-علاش راسك خشين ... واش داك تخرجي مالدار و تحوسي عالزنق و الخدمة و الدراري وين خليتيهم
-حطيتهم عند لانوغيس
-وين هاد الزبل
-ماشي بعيدة تحب نوريلك وين
-ايه وريلي وين
وريتلو دارها وين و راح عيطتلها قتلها جاي يديهم باباهم وجديهملو
دخلت لخدمتي و جوزت نهاري بالستراس مالخلعة تاع الصباح من جيهة و من خوفي لا يهربلي بيهم ولا يديرلي الشونطاج، بالصح الحمد لله جازت سلامات ديك العشية عيطلي قالي ادخلي للدار ما نطولش نجيبهملك و كيما كان الحال ماطولش و جا جاب قضيان و خير كبير و مام دراهم و حوايج بالصح انا قتلو غير تلحقو عيطلي نحبط نطلعهم فهم بلي مانيش حايباتو يطلع مالا واش دار طلعهم و جاب القضيان و صونالي غير فتحت الباب حبط حتى الشوفة ما شفتوش لحقت غير بضهرو كي حبط.
شهرين و زيادة جازو على داك النهار و هو ريحتو فالهو ماكاش.
راقدة في نص ليل صونالي التليفون قفزني انا و الدراري، ريبونديتلو مخلوعة مافهمتش واش صرا
-وي الو
-وين راكي
-هادي واش كاين
-وين راكي ....
-وين حبيتني نكون عالزوج تاع صباح
-خلاص اني جاي
-وين جاي واقيل هبلت انت
-هناي عمري ماتزيديش عليا علابالك بلي عندي غير انتي لي تحن عليا و تحس بيا و علابلك بلي كي تدياق عليا نولي نحوس غير عليك
-لالا سامحني هاديك بكري كي كنت مرتك دوك هاد الكلام ما عندو حتى معنى و ماعندي ما نحس بيك ما نحن عليك ماعندي حق فيك ما تسال فيا ما نسال فيك
-واشنو!!!!! مالا والله غير مرتي و تموتي مرتي و نسال فيك حتى فالقبر نسال فيك و الراجل يدور بيك و ديجا اني جاي نكسرلك فمك ضربة واحدة باش الخرا تاع مانيش مرتك مانزيدش نسمعها
-هادي واش راك تحوس عندي في نص ليل, تخلع فيا و فالدراري دوك انت ماعندكش عقل تخمم بيه ماراحش تخاف ربي فينا خلاص احبس ما تورم فيا وين نروح منك علاش راك تقنط فيا ؟!!!!!
في دقيقة حسيت راسي تزير و ودنيا يصفرو مانيش قادرة نزيد نحمل الرعب ديالو
-علاش راكي تعيطي دوك واشبي ....
-ما بيني ما بيك اخطيني برك و ديجا نقولك انا لي غالطة و ريبونديتلك شهرين ما تفكرت ولادك ما حوست عليهم و دوك بانتلك تجي عالزوج تاع الصباح علاش قالولك دار الزغاريت
-علاش دايمن ظالمتني علاش؟ شفتيني انتي كيفاش كنت عايش هاد الشهرين ولا وين كنت ولا فاش كنت غارق
-ماشفت ما يهمني اني نقولك برك بلي في كارها ما نريبونديلكش مامبا و دوك تصبح بخير غدوة نصبح خدامة على ولادك لي ماكش سامع بيهم و لا تتفكر نفقتهم اصلا
-هناي بنتي علاش وليتي جافية، اني نقولك ماعنديش من غيرك و راني في حالة يعلم بيها الله حاب نحكيلك و نريح عندك برك هادي عازتها فيا، يا سيدي ما نجيش دوك نريحو نقصرو برك نحكيلك و تهوني عليا حتى نلحق
-وين تلحق هادي
-نلحق للدار ماتخافيش مانيش جاي عندك نروح لداري انا كي ولينا في داري و دارك, علابالك واش درت اليوم؟!
-لالا ما علاباليش و مايهمنيش دوك خليني نرقد
-كسرتلها فمها، كمل يحكي تقول ما قتلو مايهمنيش
-شكون هادي
-هههه مرتي الجديدة لي عندي سمانة ملي درتلها العرس هههه
خلعني والله ما جات في راسي قاع ....هادي تزوج ...