لانني كاملة 2 - و ما ربك بظلام للعبيد -

الجزء الرابع

دخلت للدار خملت القضيان و اول حاجة درتها عيطت لطاطا صليحة، الحاجة المليحة لي ديتها من هادي هي اني تعلمت نقرا خزرت الناس و خزرة احمد ماكانتش صافية
-صباح الخير صلوحتي ....ايه نضت و خرجت قضيت و جا عمي حسان عرفني على واحد الجار يسكن فالبروميي و شفت نوغيس للدراري بصك انتيا جبدتي بيا الطابي كنت تاكلة عليك فيهم حشيتيهالي..... ايه نسيت اسمو ....ايوه احمد هادك هو واحد الطويل شوية يكون كيما رضا خويا .....ايه هو بالدات .....سيرفات سواسوا ....اااااه عايشة عندو يماه ؟؟ ....اسكتي برك ....جا بصك البارح زدمو في نص ليل يدقدقولي ...ايه والله غير خممت فيه ...الموت حكمتني..... ايا خلاص ارواحي اني نستناك....من عيوني حاضر ندير لحنونتي واش تحب.
كوبيت نضت نضحك مسكينة بزوج كلمات نكلخلها تفرشلي كلش و كيما نحب كنت حابتها تجي عندي و تحكيلي و تنشنشلي عليه بالصح المخلوقة رحلت البارح مانقدرش اليوم نقولها ارواحيلي مالا مانيبيليتها باش تجي من عندها، كاين نظرية خيالية تقول باللي ادا جرحك شيطان و ما متش راح تكتسب من قدراتو، هي خيالية بالصح حقيقية ادا في حياتك واجهت انسان مؤذي و متشيطن و سلكت منو راح ترفد بزااااف منو و اكثر حاجة تقدر ترفدها منو هي الla manipulation تولي تقدر تتحكم فالناس و تسيرهم على حساب رغباتك بلا مادير حتى جهد، هاكداك انا وليت برك غالبني الخوف وليت بزاف موسوسة و قليل وين ندير لامان.
نضت نقيت الخضرة و درتلها لوبيا ماشطو بصل و طوماطيش باللحم كيما حبت و وجدت ماكلة الدراري و غسلت بيدي الحوايج ديالهم و نشرتهم ماعنديش ماشينة و نخاف يتلايمولي نباصي بيهم، حتى سمعتها دقدق فالباب ضحكت و رحت فتحتلها.
-امممم الريحة شميتها مالدراوج تنفنف
ضحكت
- مرحبا بالزينة و انا عندي 10 منك باش نعز فيك
دخلت و نشوف فيها مدخلة كابة فيدها
قصرنا و فطرنا و ريحنا امبعد حكيتلها كامل واش صرا و واش قالي عمي حسان و حكيتلها مام على احمد
- ايه مزية شفتي ايه يديروها يديروها الفروخة هادوك يا الحنانة ڨابروك كي كنتي داخلة انتي تقولي في هاديك المعمعة مع الرحلة ديالي واحد ما يرد البال بالصح قوليلي هادوك العرايا قاعدين غير لدعاوي الشر يعمرو راسهم و يسرقو و يتبلاو في بنات الناس
-ايه هاكدا قال احمد
-يا بنتي انتي عندك دعوة خير ساترك ربي بيها والله مزية لي احمد شافهم و تكاكا بالصح ما تخافيش اني مريحة هنا دوك نريح معاك سمانة و نخرج معاك و ندور بيك و نقول بنت ختي خليتها في داري و راجلها خدام بعيد يجي في نص ليل و الناس خدمتهم ينشرو الهدرة هكا ينقص عليك البلا و مام مادام احمد حاط عليك العين مام هو عاقل و الناس مقادرينو نوصيه يقول كيما انا باش تكوني في امان
حكاتلي بلي مزوج و عندو طفلة كبيرة في عمرها 12 سنة و مازادش موراها و العجوزة يماه قالت مرتو عڨرت فهمتني بلي دارو و يماه كي مات باباه خاوتو باعو الدار و ما حوسوش على يماهم مالا جابها عندو و عادا خاوتو لي رماو يماهم على جال الدراهم، راحت العجوزة بحقها شرات مورصو تراب و كتبتهولو نهار عرف دار حالة تعرفي الباطيمة رعدها و موراها تكالما و بناها في عامها و خاوتو كي سمعو ڨابروه كي راح ميسيون جاو يشارعو في يماهم كيفاش تشريلو التراب على اسمو حاوزتهم و تبرات منهم و عطاتهم دعوة الشر قدام عباد ربي و شهدت صحاب الباطيمة و الجيران مور ما تموت ادا دناو لاحمد و حبو يورثو معاه باش يشهدو بلي هي لي كتبتلو و هي عطاتو و بكامل قواها العقلية بصك ولادها خرجولها حراميين و لوكان ماشي هو ام رماوها في دار العجزة و خلاوها كي القبر المنسي لا من زارها لا من درا عليها.
-يا عمري مسكينة
-ايه يا بنتي كي تبدا تحكيلك تقسم القلب واش دارو فيها مرا كي الويز و بالطبع تشوفيها ديك القعدة و ديك الرزانة و تشوفي دوك الدهوبات و ديك الجبة و هاداك الكحل و الحنة و الظفاير
-شفتي متهلية في روحها منينها هادي
-هوما مالشرق
-ماتقوليليش شاوية
-لالا ماشي شاوية
-ايه خلعتيني بصك الشاوية يعزو يماهم
-بوه عليك المليح و الدوني في كل بلاص ما تامني في حتى واحد
-ايه هي من جيهة لامان عندك الحق، تسمى احمد ناس ملاح ما نخافش منهم
-لالا ناس ملاح، اصبري العشية نخرجو ندورو و نجوزك تشوفي مرتو
-اوكي
كيما كان الحال، ديك العشية خرجنا شرينا الكرواصون و الخبز و دينا دراري لعبو شوية فجاردان قريب و فالروتور جزنا على بابهم لقينا مرتو عندو شاقاتو تبعت فالطفلة بنتها تقضي كانت بيضة و تكون مولات 35 حتى 38 سنة عادي ماشي تخلع فالزين و ماشي غولة لابسة جبة و مكحلة عينيها، تعرفو زين تاع البلاد شفتو لي يخدم فالمدينة و يجيب مرتو مالبلاد (الدوار ) يجي زينها مخالف و حطتها و لبستها و لهجتها مخالفة ماشي كيما ناس المدينة، هاكداك كانت مرتو.
غير شافت طاطا صليحة ضحكتلها و سلمت عليها تمرحب بيها و تعاود
-يسلمك ليلى بنتي والله غير مزروبين مشغولين مع الرحلة تاعي و زيد بنت ختي جات تسكت هنا راني معاها نعاون فيها
دارت ليا هاداك وين تكاكاتلي
-اي عالسلامة ختي سامحيني والله ما شفتك
-ماعليش ختي ماشي مشكل
جبدتني ليها سلمت عليا
-مرحبا بيك معانا
-يسلمك تعيشي
درنا طالعين و نقصرو لحقنا درنا قهيوة و قاعدين فالكوزينة نقصرو حتى دقدقو فالباب
-ريحي انا نوض نشوف شكون
نسمع فيها تهدر مع راجل طليت مالكوزينة نشوف فيه احمد عاودت دخلت راسي بخطفة مزية مارحتش فتحت ياك انا فيا طبيعة نفتح بلا ما ندير خمار
شوية و غلقت الباب و جات، في يدها طنيجرة و مغطية بسربيتة
فتحت لقيتها زوج مطلوعات و تحتهم طنيجرة فيها شطيطحة بطاطا راڨو بالجاج مرقة حمرة
- قوتلك مليح كي نخرجو و نعرفك بالناس ولا ماقلتش
- قلتي ، ضحكت، شكون بعت هادو
-ليلى مرت احمد بعتتلنا العشا قالت مع التخمال و التحرحير باش ما نشقوش رواحنا
-كثر خيرها المخلوقة
-ايه قتلك مراة مليحة كي يماه كي مرتو كي هو الحق وليد فاميلية
رفدت الماكلة هاديك حطيتها فوق البوطاجي، هي انا فالعادة مانكلش ماكلة الناس بالصح منعرف هادي بالدات ما توسوستلهاش.
كملنا نقصرو و تعشينا و رقدنا، العافية واحد ما دار
غدوة من داك جات بنت ليلى قالت عرضتنا جداها لقهوة باش تتعرف عليا
-هاي لي كنتي حابة تشوفيها ام القلوب عند بعضاهم سبقاتك هي
نضت حبيت ندير موسكوتشو ولا قاطو بالاناناس ملقيتش عندي المول مالا درت بريوش بالكرام باتيساغ و الشوكولا، والله غير سترتني طاطا صليحة بهاداك الفوغ و يطيب حالة.
خرجت شريت jus و فاكية و باكي سكر و البيض درتهم فالطنيجرة و مع ال4 تاع العشية حبطنا عندها، دارهم بالطبع ديك الشورة العزيزة و لي كادغ سنيي تقول ماكي في برطمة متحوفة ماشاء الله و مام رحبو بينا و الماعن لي حطتهم غير العزيزة، اصلا معروفين بلادهم بالماعن و معروفات نساهم ما تفوتيهم لا بشطارة لا بوعارة.
لقينا العجوزة كيما وصفتهالي طاطا صليحة سواسوا زيديلها غير وشام صغير في فكها التحتاني.
قصرنا معاهم و عجبونا و عجبتهم و طاطا صليحة توصي و تعاود بنت ختي و يتيمة و بدات تحكيلهم على اللي طلعولي و كي شافتهم ما حكالهمش وليدهم واش دار قاتلهم منعرف شكون لي دقدق و كي شافها مع حسين راجلي (قلبت السيناريو باش ميقولوش مقطوعة من شجرة) جا حكالو هي ما عرفتش الراجل.
المهم خيطتها مليح و حنا قاعدين دخل هو و هوما الصالون ديالهم فاتحينو عالكولوار موسعينو تسمى تدخل ديراطت فالصالون و انا بلا خيمار شعري طويل مغطي ظهري لابسة اونسومبل و ماكية، عينيه رشقو فيا ديراكت ام بعد عاود تكاكا دار لطاطا صليحة سلم عليها و جاز سلم على يماه و قعد
-عالسلامة جارتي واش راكي
-لباس الحمد لله وانت احمد واش راك
-واقيل ما حملتيش لهيك ولا توحشتينا
-هي حقيقة ماحملتش ماحملتش انا هنا تربيت واش داني للبواهر هادوك
-واش يدير الواحد مكتوب
-لالا يا وليدي فرق لي يخلي بلادو والله غير تجيه بعيدة
-ايييه يا صليحة في هادي ما غلطتيش اصلك اصلك انا واش ريبني من غير البعد على بلادي و ناسي هاكي تشوفي حتى ركايبي و خانوني
- يما انتي بيك الدخلات و الخرجات هنا خاناتك الطريق برك خفتي تخرجي تتبحري و ماعندك لا بنت خالتك لا بنت عمك اما البلاد ڨاع واحدة
خزرت فيه و عوجت راسها ولا يضحك عليها.
جات مرتو و هناء فيدها ماللي دخلت و هي شادتها تلعب معاها و هناء لي مالفة مشنفة حاليتلها معاها و تضحك قعدت قدامو نحاهالها يلعب معاها
-ماشاء الله ماشاء الله ايا بابا ايا بابا
-شفتها شحال حلوة سكرة
-منعرف كيفاش رضات عليك مالفة من حجر يماها ما تنوضش انا بالتحلال و الف ويل باش تسكتلي، شفتي الستوتة هانية ؟!
-ايه والله مام انا خلعتني اني نشوف بالوجوه ماليكاتك خفاف حباتك
رفد راسو كي شغل اول مرة يشوف بلي راني هنا
-واش راكي جارتي صافا ؟! كاش ما زاد ديرونجاك كاش واحد ؟!
-لالا الحمد لله
-صار انت لي شفتهم ؟! ايه خزر فيا يستفسر ، ما قاتلكش؟!
-لالا قاتلي بالصح ما عرفاتكش انت شكون
-نسيت برك الاسم، هدرت بالعقل داخلة فاللعبة تاع طاطا صليحة.
-ااااه ايه ماعليش انا احمد اشفاي احمد بالاك كاش ما تسحقي ولا اشفاي احمد، و دار لمرتو، اعطيها النيميرو كاش ما تسحق ولا و ماركيه اح-مد
جاني الضحك كيفاش داقتلو كي نسيت اسمو زعما و كيفاش بقا يانسيستي احمد اح..مد اح..مد هههه
قعدت معايا طاطا صليحة سمانة، و هي كانت كي دخلت لقات العرايس ياك عندها زوج فالدار لقاتهم مداوسين و واحدة ما خملت ما نقات كل واحدة شادة جيهتها و مخلية الدار ترعي على قولها، غسلتهم و نشرتهم و حلفتلهم لوكان تولي تلقا الدار هكا غير برا و ولادها جاو معاها، ماراحتش من عندي غير بالتحلال قالك الدار رجعوها جديدة
-الخوف يجري الشيوخة يا وليدي ماعليش ياك انا كنت هاربة منهم و هوما تفرعنو، قولهم او جاكم قباض لرواح والله غير الخل نعصرهولهم في عينيهم.
ضحكت عليها و غاضوني مساكن عرايسها مالقري ما نعرفهمش مليح بالصح ناويتلهم على نية زعاف الدار و محسن لي توحشاتو و راح عليها تخرجو فيهم.
جازت السمانة و تخدم الباب ولا بلانترفون و الكود و لا بيس تهنيت و صح الحيران عرفوني فاميلية صليحة مازاد دار جيهة بابي حتى واحد، واحد 10 ايام ملي رحلت باش صونا التليفون، انا شفت النيميرو و انا الدم جمدلي فالعروق كنت قريب ننساه بلي خرج. نيميرو عندي عامين ما شفتوش مافيشي في تليفوني...