لانني كاملة 2 - و ما ربك بظلام للعبيد -

الجزء الثامن

3اشهر جازو من نهار راح دادي و بعتلي فهمني بلي لازم يصفي الكازي ديالو باش يقدر يدخل للبلاد ولا يطيحوه فالحبس، وصاني نستحفظ على روحي و الدراري و شهريتي نسيي ما نمسهاش قد ما نقدر و القضيان و المصروف هو يبعتلي بصك معلابالوش واش راهو جاي كاش ما يوقع ولا اوموان نلقا دراهم مخبيين، نكدب لوكان نقول راني مرتاحة هاكدا هادي صح موذي و صح عياني و صح لقيت راحتي و انا بعيدة عليه بالصح في كل الاحوال كان في كتافي، جبل في ظهري من نهار عرفتو ماوليتش نسحق نخمم فالمصروف و المعيشة و الناس و اللي جاي ماشية و مغمضة عينيا مهنية على ولادي و حياتي علابالي باي لي تصرا نعيطلو يجيني ماراحش يسمح فيا، بالصح في غيابو و زيد معلابالوش كيفاش يدير و ماراهو ضامن والو، اول مرة حسيت كتافي بردو و حسيت واش معنتها يتيمة و مطلقة، تقولولي و خاوتك؟! يجي وقتها و تفهمو!
دخلت للخدمة اليوم تاني شوية روطار هاد السمانة التران دار لاڨراف تسمى الناس كامل تروح فالبيس و الطريق مغلوقة، علابالي بلي دوك يبدا التعراش تاع المدير و انا ماعنديش الخاطر
-صباح الخير اسامة
-صباح الخير مدام
-قولي دخل
-لالا هو مازال ما جاش بالصح هادسك الرفادة راهي هنا و اكي علابالك
-خلاص خليني من جدهم صباح لله يا لطيف
-صباح الخير مدام ####
درت نلقا l'assistante du pdg واحد الصفرة مزيتتة الشعر واقفة و شايدة التليفون و تخزر فيا بضحة صفرة كي وجها
- ماسيفا، درتلها براسي و دخلت تبعتني تجري
-علابالك واش قال محمود داك النهار ف la réunion  ؟!
-Non du tout هدرت و افونسيت بلا ما نخزر فيها
-قال بلي لي ما يجيش فالوقت 3 fois de suite sera sanctionné
- Et?
- c'est juste pour vous dire
- merci pour l'info
دخلت لبيرو ديالي و غلقت الباب و خليتها واقفة
حطيت دوزاني و علقت المونتو و شعلت البيسي و ريحت نشوف فالخدمة حتى دقدق الباب
-ادخل
-صباح الخير حنونتي
-صباح الخير مدام دباغ جوزي
-جبتلك تيزانة سخونة تدفي عضيماتك و كرواسون سخوووون
-الله يسترك تعيشي والله غير راني  هاكداك
-علابالي يا بنتي علابالي
مدام دباغ هي اقدم واحدة فالشركة هادي و انسانة هايلة و تروندي السرفيس بالصح عيبها تلحلح بزاف و تخاف مالمدير تموت، غير هي لي علابالها بلي انا مطلقة فالشركة هادي كامل مفهمتهم بلي متزوجة و بيان سور الdrhبالصح هاداك مايهدر نع حتى واحد بزاف واعر و جابد روحو عالناس و سيريو فوق الحد، فالحقيقة انا ما كانش عندي مشكل تاع يعرفو بلي انا مطلقة بالصح هي نصحتني و قاتلي خليها بينك و بين روحك نا تقوليها لحتى واحد، و صح مع الوقت فهمت بلي صح كان عندها الحق
جات قعدت معايا عندي صالون فوتايات و طابلة فالبيرو ديالي بصك انا شايدة التكنيك يعني الكليون يجي ليا نفهمو واش من برودوي يسحقو امبعد يا اما نلونصي الكوموند انا ولا نبعتو للكومرسيال يديروهالو كي تكون كونتيتي صغيرة.
بقينا نقصرو شوية و فهمت منها بلي لازم نطلع للPdg نفهمو ma situation بصك الك،لبة لوخرى دارتني بين عينيها، قتلها في قلبي ايييييه بقالي همها انا هادي ما عمرتش راسي بيها.
ما طولتش و راحت و انا بقيت لاتية في خدمتي حتى عيطولي قال يسحقني عرفتها بلي رفدتهالو تجري
طلعت ما جزت عندها ما حلبتها رحت ديراكت دقدقت و دخلت
-Bonjour Mr AMRANE, قالولي تسحقني
-وي مدام تفضلي ، دارلي بيدو نريح فالفوتاي مقابلو
-يزيد فضلك انعم ، ريحت و قابلتو
-نورمالمون فهماتك ماسيفا على le nouveau règlement intérieur ؟!
-اك تهدر على les retards?!
- effectivement
- وي الصباح جات حكاتلي شوية
-و راهو جاني الخبر بلي راكي دايمن تجي روطار مادام و انا هاد الشي ما يساعدنيش سورتو فالبوست ديالك
- Honnêtement Mr AMRANE, je ne peux pas faire mieux (بصراحة منقدرش ندير ما خير من هاد الشي )
- c'est a dire?! طلع حاجبو و خزر فيا مليح
انا عمري ما حققت فيه بالصح صباح ربي يصبحو عليا بالتكعرير ما عنديش الخاطر باش نريح نساعف ولا ادا راهم يستناو فيا يتمحلس و نسيي نبلعطو هههه غير زيد استنى
-cest a dire، هادا هو حدي!!!
- واش ندير نخرج ولادي انا على 5 تاع صباح علاش راني جاية مالبلاد نمشي انا؟؟ الله غالب بروبلام تاع لاشارج فالسيركيلاسيون temporaire واش لازم عليا انا ندير، معرفتش كيفاش خرجت على طوعي كلاطيت عليه ضربة واحدة
-اتكالماي مدام مانيش نقولك اخرجي على الخمسة و علابالي بلي الحكاية تاع سمانة ولا عشر ايام و تتريقلا بالصح الهدمة تقول هاكا لازمك تكوني فالوقت ولا اتفاهمي مع مولا بيتك هو يدي دراري و انتي تجي ديراكت
-الوغ موسيو باش ما ندخلش فلي ديطاي تاع حياتي بزاف انا قتلك بلا ما نسيي نبلعط و نلقالك excuses  ولادي مسؤوليتي انا، و هادا واش نقدر ندير ادا شافني ماراحش نقدر نساعدك ماكاش مشكل نحط la démission tout de suite.
نحا نواظر و بقا يشوف فيا و ساكت امبعد قالي
-راكي تبانيلي مقلقة شوية هانية ! روحي كملي واش عندك خدمة تلحق الطناش يلحقك رابح للدار و هاكدا باش يولي يعرف الطريق من غدوة الصباح يولي يجي يديك، تبسملي و عاود حبط راسو يخدم
بقيت نشوف فيه مستغربة ماشي هادي هي الرياكسيون لي كنت نستنى فيها منو وقفت و درت خرجت لبيرو ديالي ديراكت و صح غير لحقت الطناش جاني عمي رابح الشوفور باش يديني و لحقني حتى للباطيمة و راح.
الحكاية هادي ما قلقتنيش بصك الطونوبيل فيها اللوڨو تاع الشركة و انا نركب ماللور و عمي رابح شيخ كبيريعني الحكاية ما فيهاش توسويس، و من داك النهار وليت نخدم بالشوفور و الحمد لله نقصتلي بزاف لابريسيون و التعب، والله يا هدمة الزنقة غير تمرميد كحل الله يكون في عون الوليات.
واحد النهار جات عندي طاطا صليحة و كونا طالعين تلاقينا ببنت ليلى و جداها عرضتنا بالصح انا ما حبيتش قتلها هاد الخطرة عليكم انتوما تجونا و كيما كان الحال ديك العشية وجدت شوية قاطو و شريت الباقي قهيوة و جي و لاتاي و رانا قصارين جات العجوزة و عروستها و مسكينة جابت معاها الغرايف كيما قالت هي حنا نسموه البغرير داراتو الله الله بازبيب و المكسرات و سقاتو بالعسل و الزبدة.
بقات العجوزة مع طاطا صليحة يقصرو حتى ترطقت طاطا
-يا ربي راني رايحة نجهل
-علاش غير الخير
-مع الخايبات لي بلاني ربي بيهم يجيني الخير، يا الحبيبة ربي يبقي عليكم الستر والله ما نحسدك انتي ربي رازقك بعروسة من كلش ماشاء الله قايماتك خير من بنتك و شوفي حطتها و قعدتها و انا اللي عندي الله لا يبلي بيها مومن و زيد مالفوق ترفد و تفرخلي
-بوه صليحة الضناية مليحة باه انا صبتها راني شاتية ولد بني نهزو و نفرح بيه و انتي ربي عطاك الهير و ماهوش عاجبك هادا لي قالو يعطي اللحم للي ما عندوش السنان
-ايه صح تحوسي على وليد وليدك بصك علابالك بلي يماه مراة ياو انا هادي راهم عندها زوج و وليدها الصغير 3سنين و نص مازالو بلي كوش و نحلف بالله غير تخليه بيها نهار كامل حتى لحمو يطيب و هي غير فالجمابع و التمنشير، الدود راح يمشي معاها فالحيوط و هي والو ولي تزيد تغددني الداندو تاع وليدي لي فرحان بيها و جايبهالي في يدو فريدة اي ثقيلة و يضحك من وذن لوذن ااااااه يا ربي
جاني الضحك من مغامرات طاطا صليحة و عرايسها  بالصح ما قدرتش نضحك كي شفت ليلى عينيها مسكينة غرغرو، انا صح نقصر معاها بالصح ماشي مداصرتها تعرفوني ما عنديش مع الخلاط و الصحابات، مي من خزرتها و وجها كيفاش ولا كحل باين بلي عاد السوجي يوجعها مسكينة قسمتلي قلبينضت نرفد الدوزان
-ليلى حنونة معاليش ترفدي معايا
-ايه ماعليه، ناضت رفدت معايا ديتها للكوزينة و ريحنا كنت درت ديسار بالفاكية جبدتو نحط فيه فالسنيوة و هي قاعدة فوق الطابلة
-خير ليلى واش بيك اختي
-اها والو
- كيفاش والو انتي وجهك كحال ضربة واحدة من هدرة عجوزتك
تنهدت مسكينة تقول كانت تستنى فيها
- علاجال الدراري؟!
-علاش انا مانيش شاتية طفل نفرح بيه انا و باباه يا كي نشوف احمد يدنڨ فالذر برا واش يغيضني
-و ماعلابالكش منين ولا علاش ماقدرتيش تزيدي؟!
-واش نحكيلك يا ختي وين روحت وين داويت ربي ما سهليش و المشكل مابانش واشنو السبة
-اصبري نسقسيلك على واحد الطبيبة و نقولك هادي سبحان الله ربي مسخرها للعلاج
-ايه يا ختي والله غير مادابيا الواحد راه يكبر و كي نشوفو كيفاش يدير مع وليدك والله غير يڨسملي قلبي.
سبحان ربي كل واحد واش يجوز و واحد ما راهو مهني انا داك النهار حسدتها على الدفا و القعاد فالدار و راجل في كتافها و هي مسكينة مشوية و تشوف في ولادي و تتشهى فيهم كل واحد منين جاتو، و صح جبتلها النيميرو تاع الطبيبة هادي حبيبة اختي و زقيتلها و انا عندها فالدار كي رحت نجيب الدراري جوزتهالها فهمتها و عطاتها رونديفو و عجوزتها فااااارحة و غير تدعي و تحلف لوكان يرزقها ربي دير سبع قصعات في سبع جوامع، كي كملت قاتلي - السبت انا نشد الذراري و انتي روحي معاها نقول لاحمد يوصلكم
-ماكاش مشكل عسى ربي يجعل الشفا قريب و على يدها
-امين يا بنتي والله غير تهز الكرش غير نشريلكم حاجة ذهب كي انتي كي هيا
ضحكت عليها و ديت ولادي و طلعت، على دخلتي للدار صونالي الفايبر ابال فيديو مديتو ديراكت لايمن و دخلت لبيتي نبدل حوايجي حتى نلقاه شاد التليفون و يقولو هاهي بابا و لوخر يقولو
-شد التليفون مليح يا دين باباك خليني نشوف ههههه
ضربت على عقلي ما لقيتوش رحت نجري نحيتهولو كوبيت و عيطت عليه
-ماما بابا قالي نشوف ماما وحشتها
ما ضحكت ما بكيت و انا عريانة لبست دخلني ميساج
(بركاي ما تاكلي في روحك و فالطفل ما شفت والو ما يبانش مليح وليدك الستوت يرعش وحدو )
يا ختي وجهو صحيح مالقيت ما نقولو حطيتو يتشارجا و خرجت نتوضى نصلي و ندير العشا.
الصباح كي نضت لقيت ابال من نيميرو ما نعرفوش ما حوستش عليه ادا يسحقني يعاودلي حبطت الدراري فتحتلي ليلى وجها يخوف ماحبيتش نسقسي بصك كانت تبان في حالة و انا مزروبة قلت العشية نجي نشوف واش بيها، خرجت لقيت عمي رابح جا ركبت و ديماريت للخدمة.
عاود عيطلي النيميرو تاع البارح ريبونديت
-وي الو
-صباح الخير، عرفت لافوا تاع احمد ، حبيت نهدر معاك في واحد السوجي
-تفضل
-مادابيك ما تحليلهاش عينيها ما نحبهاش داصر و تولي تعرف و تخرج
-اه
-ايه حكاية الطبيبة و الدراري خلينا منها
-ماعليه كيما تحب و سامحني .
الشوك حكمني، بالصح ماعندو ما دخلني...
جوزت نهاري كانل مخي يخدم كيفاش هادي نحللها العين المخلوقة تحوس ترفد و تجيبلو الدراري يقولي تحليلها فالعين لا اله الا الله انا بالمغرف لفمو و هو بالعود لعيني
العشية كي رحت لقيتها وحدها غير هي و ولادي لا عجوزتها لا بنتها لا راجلها ولات بكي مسكينة قلبت الدنيا قاتلي بلي قالها مانيش حاب نزيد نجيب دراري شكون قالك نحوس عليهم و كي زقات عليه يماه ولا يعرش حتى غضبت و راحت الصباح بكري نضنا ما لقيناهاش و دات حتى بنتي معاها ولا رفد روحو راح يجيبهم و حلف فيا لا نعاود نجبت الحكاية هادي طول.
واش راح دير راجلها و هي ادرى بيه كالميتها شوية و طلعت لداري.
جازو ياماتي روتين بين الدار و الخدمة و هادي كل يومين يعيط و كل ويكاند يبعث القضيان بالصح الدراهم لالا امبعد عرفت بلي فتح حانوت تاع خضرة و فاكية لولاد خالو قبل ما يروح يصرفو بيه على رواحهم و على ديارو بصك دراهمو كامل خرجهم ما خلا والو على اسمو باش ما تسيزيهمش الدولة، و بين خدمتي لي بديت نحس فيها امور يتبدلو مثلا  ماسيفا لي مازادتش دارت بيا و الديراكتور لي ولا يجيني تقريب كل يوم للبيرو يسقسي واش خص واش نسحق و حتى مالفوتاي بدلهولي و الكرسي كيفكيف جابلي كلش جديد قالي راكي تمثلي ليماج تاع الشريكة.
جاز الوقت تمتم و بقالي شهر و نص و يخلاص الكرا
و انا منحبش الكرا تاع بشهرين و تلاتة و ستة نحب نخلص عام و نتهنى مالبريسيون ديالو شفت واش عندي دراهم لقيت خاصيني شوية واحد 7 ولا 8ملاين و انا ساكنة في بلاصة لي تحت 36مليون ما تتسماش دار تتسمى خربة، عيطت للدار قلت نقول لخويا يعطيني من حقي لي راني فايت 5سنين ما هدرتش عليه
- وي رضا حنوني واش راك
-لاباس لاباس شوية مع الشغالات
-قولي حنوني تقدر تجي عندي نسحقك
-ايرجون ولا لالا
- نورمال ادا مشغول اليوم
-ايه تسمى راني خارج مع صحابي نحوسو واحد السمانة هاكداك
-اه بصحتك معليش
-خير بالصح واش كاين
-ماكاش جيست سحقيت شوية دراهم باش نخلص الكرا
-علاش و البغل هاداك ماهوش يخلص فيه
-شكون هادي ؟!
-ايه
-بوه عليك هادي ماكاشو فالبلاد اصلا و زيد هو دراهمو بح
-ايه راكي تقصري معاه و عندك خبارو تسمى يامات و تعاودينا الحكاية تاع راني ثقيلة و نوليلو
-كيفاش، تشوكيت
-كيما سمعتي، و شوفي هاد الخطرة غير ماكالاه تعيطي تبكي و تشكي توليلو ربي يسهل عليك بيه
-هادي هدرة تهدرها لختك الكبيرة يا الماشي متربي، شوف واش ندير في حياتي ما يخصكش حتى انا مانيش قاصداتك باش نبكيلك و نشكيلك
-و دوك واش راكي ديري اعطيني نخلص الكرا ؟
-لالا حبيبي اني نقولك مدلي حقي ولا نسيت بلي عندي حقي معاكم  
-ماعندك حتى حق الدراهم خلاصو تحبي تروحي تشكي دار الشرع تعرفيها وين جاية و اكي مالفة بيها
-يطيك الصحة يا الراجل
كوبالي في وجهي و خلاني نغلي ....