لانني كاملة 2 - و ما ربك بظلام للعبيد -

الجزء الثالث

سمعت الدقديق الدم جمد في عروقي مع اللول حسيت روحي اني نتخايل بصك كان بالعقل و تمتم حبس سكت و نضت من فراشي وقفت عند باب بيتي و نستغل شوية و عاود دقديق بالعقل بالصح كاين بقيت واقفة و خايفة زاد حبس و عاود تلات خطرات امبعد حبس بقيت نستنى غير وقتاش يتردخ الباب عليا و يهجمو علينا السيناريوات العيانين كامل تخايلتهم بصح ابشع واحد كان سيناريو هادي يجي زعفان كي خليت الدار و هربت زعاف الحبس و الطلاق و حرقة حياتو لي تخرب و التبهديل لي درتهولو و قيمتو لي طاحت قلت اليوم اخرتي، بالصح والو حبس الدقديق رحت نجري وقفت مور الباب نسمع في حس رجلين و همس ابعد نسمع في حس فالدروج واقيل راحو، فيريفييت الباب ادا مغلوق و بيق متكية على الحيط تماك واحد الربع ساعة نسمع الجري فالدروج جاي و يقرب امبعد دقديق في بابي بالصح هاد الخطرة قاوي على تاع مقبيل دقدت واحد 3 خطرات امبعد راجل بدا يعيط
-عمي حسان ؟! عمي حسان؟
وانا الرجفة حاكمتني ناضت هناء تبكي رحت نجري ليها باينة مام هو سمعها رفدتها و جيت وقفت عند باب بيتي نسمع فيه
- الو وي عمي حسان لاباس ....خير خير برك نسقسيك كريت الدار؟ .....ايواه علابيها...... لالا والو والو غير كي شفت الضو و سمعت الحس قلت نشوفك ادا انت ولا كاش حاجة....ايه بلا ماتوصي ....تعيش و قولهم يسمحولي واقيل خلعت دراري الصغار ..... ايا يعطيك الصحة.
اووووف قلبي خرجتهولي يعطيك غمة، الليلة هاديك بايتة قاعدة كل ما نغمض عيني نتوسوس بلي او جاي ليا، او زدم، او كسر الباب ما جا النهار يطلع حتى قلبي خرج الصباح نوضت الدراري وكلتهم و بدلتلهم و لبست نخرج نقضي و نشوف الدنيا واش تبدل فالحومة و تاني لازم نشوف نوغيس طاطا صليحة راحت لي كنت تاكلة عليها انا حابطة فالدروج نڨاحر في لابوسات غير بالشوية باش ما طيحليش هنا تلاقيت بعمي حسان
-صباح الخير بنتي
-صباح الخير عمي حسان خير ما جابك
-جيت نطل عليك يا بنتي، البارح كاش ما جاو ليك فالليل ناس
-ماجاني حتى واحد من غير هاداك السيد لي زڨالك فالتليفون
-ايه ايه احمد هاداك الجار يسكن فالريدشوسي انسان وليد فاميليا ما تخافيهش
-لالا والله غير ركبلي الخلعة يا عمي حسان رايح جاي يدقدق.
-ايه مام انا تحيرت هاني صبحت هنا دوك نروح نشوف واش كاين و نقولك و ان شاء الله ماكان غير الخير
درتلو براسي و درت حابطة جا مسكين يشد فيها معايا حبطناها حتى التحت يكثر خيرو
-اكي مشغولة دوك
-رايحة نقضي و لازم نشوف نوغيس للدراري على الخدمة
-ساهلة اصبري دقيقة بلا ما نعاود نطلع نعيطلو يحبط نشوفو واش كان مسحق و نديك تسوفي المراة لي تشد الدراري اي غير هنا
بقيت واقفة حتى انا حابة نشوف هاد الراجل لي جا يطبطب و يعاود علاش واش يحوس عندي .
-اصبري او يصوني ....وي الو صباح الخير وين راك احمد ؟.....ايا خلاص اني التحت نستنا فيك
دار ليا تبسم
-او غير هنا خرج يشري الخبز و الحليب
-مزية لي ما نوضناهش
-اواه لالا ينوض بكري خدام الراجل
يا ربي 5 دقايق جا راجل رافد الخبز و زوج ساشيات
كي لحق لينا خزر فيه و فيا و حقق مليح فيا
زينو عادي بالصح طويل و جايب روحو لابس سيرفات فالنواغ بالفاغ
-سلام عليكم
-و عليكم السلام و رحمة الله واش راك احمد وليدي
-لباس عمي حسان انت كيفاش راح صحتك لباس، سلم عليه
-الحمد لله سوال عليك، نقدمك جارتك الجديدة ..هي ماشي جديدة سكنت هنا واحد الوقت و راحت و كتب المكتوب و عاودت ولات
رفد راسو خزر فيا ماكانش اسمر ابيض و عينيه شابين
-صباح الخير جارتي.... سامحيني البارح علابالي خلعتك، حط راسو على شعر ايمن، و خلعتلك الدراري.
-جبستومون حتى انا خلعتني علابيها صبحت جاي الطفلة اي امانة عندي و حبيت نعرفها عليك ادا كاش ما خص راك هنا
خزر فيه و عاود خزر فيا، فهم بلي راني وحدي فيكساني بقا يشوف في عينيا، حشمت انا حبطت راسي ، من بعد طلاقي وليت نيفيتي التعامل مع الرجال سبحان الله نخافهم وليت ما نامنش فيهم و مام رجال الفاميليا و صحاباتي و معارفي علابالي المجتمع لي رانا فيه كيفاش يشوف المراة المطلقة النسا كامل يشوفوها خطافة رجال و الرجال كامل يشوفوها لقمة ساهلة مالا انا ماللول ما نتعامل معاهم ما نحط روحي محل شك ما نمد اوكازيون يخمو فيا.
-اي في عينيا هي و هاد الملايكات، انا البارح جيت داخل للدار نخرب فالطونوبيل خرجو زوج مالباطيمة ظصاغر بالصح يبانو دعاوي الشر نسمع في واحد يقولو (اني نقولك شفتها فالنهار كي جات انت ما فقتش و زيد شفت الضو كي طفا تسما اي تماك خافت ولا راقدة ما سمعتش.... ياودي ماكان حتى واحد اك تخلط برك و هاديك الدار فارغة كانو كاريين و خرجو .....اواه مانيش مهبول اني نقولك واحد المورسو والله ما يتراطا خلي نرقدو اللعب يومين ولا تلاتة و نعاودو نولولها) هوما ما شافونيش فالظلمة و مام انا ما شفتش وجهم بالصح عرفت بلي على دارك و ماعلاباليش ادا انت جيت و لا كريتها من هدرتهم باينين ناويين على حاجة عيانة والله غير خليت القضيان و لا مال مفتوحة و طلعت نجري نشوف واش كاين
انا الدم نشف في عروقي
-ما تخافيش هانية بنتي ماكاش لي راح يدنا دوك نوصو الجيران و نشوف شكون هاد الفروخة
-ما تخافيش جارتي او واشبيك خلعتي هاكدا اني هنا او
الهدرة ما قدرتش نهدر كنت خايفة من هادي يجيني فالليل كاش ما يديرلي وليت فالكلوشارات حابين يزدمو عليا انا لي دعا عليا وين همل.
-شوف وليد الحرام ڨاربها كي دخلت الصباح فالرحلة تاع دار حسين
- ايه يمكن تماك انا مكنتش الصباح البارح ما دخلتش حتى لليل و ديجا دوك نروح نجيب فاشات جديدة للباب التحت و نخدمو نغلقوه و نسقمو لانترفون و اي عندي فالدار كاميرا نبلاصيها فالدخلة، دار ليا، ما تخافيش جارتي والله ما تقيسك حاجة علاش ماناش رجال حنا في وسطنا يدناو ليك؟
جبد صاشي فيه كرواسون و صاشي فيه jus لايمن الكرواصون و حطلي الصاشي لوخر تحت لابوسات كاين هاداك الباك
-سامحوني البوبونات، و باسهم
انا كنت مازالت غايسة مخي بعيد
-ايا خلاص مالا نتكل عليك احمد و كاش ما يخص مصاريف اني هنا وليدي
-ما يخص والو عمي حسان ريقلاج برك فالانترفونوو الكاميرا و هاديك خدمتي و سامحني خلعتك في نص ليل
-ياوليدي واش نقولك الله يعلى علامك راك حامي الدار، و كيما وصيتك هانية امانة عندك.
-يسلمك تعيش اواه تهنى والله في عينيا بلا ما توصي.
-يعطيك الصحة، قلتها بالعقل ماشي قصدي زعمة نرقق صوتي ولا بالصح كنت خايفة و عقلي بعيد.
-ايا مالا نخلوك وليدي
-ربي يسهل عمي حسان
نحالي عمي حسان لابوسات لي كنت واقفة موراها وشادتها افونسا هو قبلي و انا قدامو, هاد الراجل خيرو ما ننساهش عاملني تقول بنتو و اكثرساعات الانسان يسخرو ربي ناس ما يكونوش قاع في بالو يحطهملو في طريقو ينقصو عليه بزااااف تعب و عمي حسان كان واحد من هاد الناس.
-شوفي نديك معايا للمارشي بصك كامل لي فيه ولاد حومة كي يشوفوك معايا يعرفو بلي بنتي ولا بنت خويا و لي يسقسيني نقولو بنت خويا و عالراجل نقول خدام و يجي فالليل هكا خير
-ايه معليه هكا خير
خطينا يا ربي 4 خطوات و نسمع في احمد مورانا
-عمي حسان!!
درنا في زوج
-هاكي هاكي ماركي نيميرو ديالي هادي دنيا كاش ما يوقع ولا يخص ليك ولا للدراري تعيطيلي
-ايه صح والله ما جات في بالي ماركي
جبدت تليفوني و راح نماركي خطفهولي من يدي و ماركا نيميرو و مدهولي
- merci تعيش
-ما صوناش !
-اه ؟!
-عيطيلي باش نماركيه اسمك كي تزقيلي نعقلو
خزرت فيه درتلو براسي و عيطتلو صونا عندو كوبا
-ايواه هاكا خير جارتي هانية، رفد راسو ياك هانية؟
-ايه هانية
ضحك معايا و راح
كملت مع عمي حسان داني للمارشي كوفار واحد لومبيونص تماك مع صحابو الشيوخة يقتلو بالضحك و قضيت تماك حالة و زاد شافلي واحد العجوزة و بناتها 2 كبارات مساكن و ماشي مزوجين شدولي الدراري كملنا و رجعني لادار مسكبن رفد معايا القضيان للدار و راح