لانني كاملة 2 - و ما ربك بظلام للعبيد -

الجزء السادس

-ههههه، serieux قول والله
-علاش اني نكدب واش ختي لوخرا انتي تحاوزي فيا و مانيش مرتك مانيش مرتك، انتي لي راكي طبعي فيا ليهم تشوفيهم كيفاش يتمحلسو و يتجاراو عليا واش راكي تستناي
-nonononon  ماشي على هادي روح ربي يعاونك اتزوج بوحدة و زوج و عشرة ادا رضاو بيك
-هه احاي وين راهي لي ما تحبسش
-كيما قلت ماكاش لي ما تحبسش بالصح انا لي راهي محبستلي مخي دوك انا ما محلي من الاعراب واش مدخلني انا فيك جايني عالزوج تاع صباح تحكيلي على زبل حياتك و مشاكلك و زواجاتك؟ حايب تسمعني داير في بالك راح تقهرني ياو الله يجيبلك الشفا..
- وااااااااشمن نقهرررررك واااااش اكي تخلطي ؟!، كوبالي الهدرة يعيط على طوعو, انا قلبي خااارج و هي تقولي تقهرني قالولك عليا مدامة واقيل و نحرحر في عدياني يا ......انتي بنتي تعرفي واش معنتها بنتي معنتها انتي مورصو مني واش نقهر فيك ياو انا لي راح نقنط يا ....راح نهبل و ماكاش لي راهو حاس بيا
-علاواش يحسو بيك عالنسا لي تبدل فيهم تقول تقاشر و لا عالخدع و الكدب لي عايش بيهم ولا على ولادك لي تولد و ترمي فهمني برك انت واشنو جنسك برك و وجهك صحيح و تزيد تقابل و عاطي لروحك الحق، شوف ماللخر تاع اللخر مانسحقش نزيد نلقا نيميرو ديالك مافيشي عندي appel  منك ما نزيد نلقاه عندي اخطيني و ديرني ماكاش تحب تشوف ولادك ابعت ميساج نوصي لانوغيس تمدهملك و رجعهملها، جدد تتزوج تطلق البحر ياكلك مانسحقش تزيد تحكيلي على خماجك.
ما خليتوش حتى يهدر و كوبيت.
درت التليفون سيلونس و فورصيت روحي نرقد، كان علابالي بلي راح يجي نهارها، كنت موجدة روحي ليها، ماشي هادي لي يريح بلا مرا و يصبر عامين و زيادة، امالا علاش دوك هدرتو راهي خنجر في قلبي يدخل و يخرج علاش اني نحس الفراغ و البرد في صدري علاش قلبي او يوجع فيا؟!؟
جازت ديك الليلة بطلوع الروح و الصباح لقيتو باعطعتلي جرنان ماشي ميساج كاتبلي فيه : علاش يا بنتي علاش راكي ديري فينا هكا انا نقولك انتي mon refuge قد ما سييت نفهم و انتي غالقة راسك، يا هناي هاد الطريق ما تلحقش معايا علابالك بلي عندي حمار في راسي و ناذيك و نآذي روحي بيك، حبيبي stp خلاص خلينا مالدواس و المشاكل، سامحي ياك انتي قلبك كبير ماشي علاجال غلطة تسمحي في باباك ياك ماكاش لي يسمح في بنتو و ماكاش لي تخلي باباها.
و زاد شوية و بعتلي  : حبيبي عمري تعيشي ماطبعينيش بيدك نولي للخماج لي كنت عايش فيه stp ما تبوسينيش نولي لل.... لي كنت معاهم ماشي كي تسڨمت و كلش فيا ولا مريڨل تخليني للنسا لي مايسواوش ضفرك.
لكم ان تتخيلو البريئ اللي كتب الميساجات هادو راهو مامن بلي انا لي خربت داري و انا لي سمحت فيه و من كثرة النية لي فيه يا عمري مسكين النسا يدوه و مالازمش نخليه بصك مينوش هو.
سيبريميتهم ديراكت و خرجت نخدم على ولادو لي شهرين ما تفكرهمش ب حبة بطاطا و جاي يقولي ما تسمحيش فيا.
حابطة فالدروج بدا يبرد الحال ايمن في يدي محبطاتو و هنا رافدتها و نحسبو فالدروج نعلم فيهم الحساب بالونغلي و تاني باش ما يغيرش يقولي انا ڨانا ارفديني، كي لحقت لتحت نلقا ليلى جارتي و راجلها احمد واقفين و العجوزة معاهم سلمت عليهم و صبحت عليه و افونسيت حتى خرجو مورايا بالطونوبيل نسمع في الكلاكسون مورايا، و انا ياك حاسبة روحي فيا طبيعة لوكان ما تزڨيليش باسمي كي تموت ما ندورلكش، حتى رالونتاو قدامي نطقت العجوزة
-يا هانية بنتي ماكيش تسمعي فينا نزمرو عليك مالصباح
-سامحيني طاطا ما عرفتش بلي انتوما
-لاه تڨوليلي طاطا كلمة ما جاتك ذڨيلة على لسانك
-هههه ما البنات هنا مايڨولوش ما يقولو طاطا
-ههههماعليش تحبي نزڨيلك ما نزقيلك و لا نقولك خالتي
-هيه حتى خالتي مليحة خير من طاطا هادي لي يطوي جناب عداك، هاتي الطفلة لهون و اطلعي لور
-وين نطلع رايحة نحطهم عند لانوغيس و نروح للخدمة
-ايه نلحڨوك معانا
-بالصح النوغيس فالدورة ماشي طريقكم
-اخلايا لاه نموتو كي ندورو فالدورة هاطلعي بركاي ما تعوجيلي في مسلانك فالطرقان
شوكاتني كيفاش تهدر بالصح ضحكتني، خطفتلي هنا من يدي و احمد وليدها خرج و جا رفد ايمن باسو و حطو ماللور و بقا شايدلي الباب
-هيا مدام اركبي نوصلوك خير ما يروح عليك الحال
-ماعليه
ركبت معاهم و انا ساكتة اصلا حشموني و انا منحبش نداصر، باقيين يلعبو في زوج مع الدراري هنا في يد يماه و هو يلعب مع ايمن حب يروح يركب عندو ما خليتوش، ايمن وليدي من اكثر الناس لكفا فالدنيا عااااااقل مسكين و بشوش يضحك و يفرح بالناس و تقريبا ما يبكيش ڨاع لحقت عند النوغيس وريتلو الدخلة هي غير فالحومة بالصح بلوك شوية بعيد، كي ڨارا حبطت و حبطت وليدي و رايحة نشد بنتي سبقني احمد و شدها و حبط، باش يجي معايا
-يعطيك الصحة، حبطت راسي للطونوبيل، تعيشي خالتي عايشة.
نحيتلو هنا من يدو، واش يدير موسيو يرفد ايمن
- بلا ما نعطلك خويا يكتر خيرك خليه يمشي خير
-لالا روحي انتي قبلي نحطوهم و نروحو نوصلوك
-وين توصلوني ؟!
-للخدمة
-ياحي لالا يعطيك الصحة بعيد الحال عليكم لالا والله ما تشقي روحك
-ما فيها حتى شقوة و زيد ياك يما هي لي بروبوزاتلك
-يكثر خيرك و خيرها بالصح نا نقدرش سامحوني ديجا لهنا و بزاف راني كثرت
-ما بيناتناش جارتي، و غمزلي
و انا مع الغمزة هاديك الجنون ركبوني ياك نعرف سواد سعدي كيفاش و الدصارة تاع الرجال ماكرهني ربي في والو قد ما كرهتها
-جبدت ايمن من يدو نحبط فيه
-لالا خويا اسمحلي انت بالصح مانقدرش نقبل عيب و انا ما نحبش الخلطة و نحط العين عليا و الناس راهي تشوف مانحب حتى واحد يقول عليا نص كلمة
-شكون لي يقول عليك جارتي و وصلتها في طريقي ولش فيها
-لالا فيها و فيها و انت اك راجل و علابالك الناس واش تقول
-بالصح يما اي معانا
-لالا الناس ما شافوش يماك شافوني انا و ولادي و انت رافدهم و حابط معايا، الله يسترك، علابالي بلي نيتك هير بالصح انا هاكدا نكون مرتاحة.
تبسمتلو و ديت ولادي و رحت، هادا لي قالها واش خصك يا العمية قاتلو خصني الكحل.
جوزت سمانتي فالخدمة و الدار مع ولادي و بالويكاند ديتهم و حبطت لدارنا، ريانويوجد في روحو رايح يكمل قرايتو في كندا كنت مازالني مخبية قيمة عشر ملاين جبدتهم و مديتهملو، انا اصلا عندي سنين و انا سامحة في حقي تاع الكرا تاع الديبو و القراج و الستوديو، خاوتي لمو كلش و مدولو بصك رايح يقرا و يخدم و كندا ماهيش ساهلة سيرتو هليه هو الصغير المعزز صح يتيم بالصح لا انا لا ياسمين خليناه يسحق حاجة نقدر نقول رضا كي كبر حساها شوية بصك ولا هو الراجل بالصح ريان الحطة و القرايا و وين ما فتح فاستفود ولا ريسطو جديد يلايمنا عندو.
جوزت معاهم هادوك اليومين و عيات فيا ياسمين باش ندخل للدار ماحبيتش سيرتو كي شفت صاحب رضا هادا ميڨري والديه فالخارج و هو قرا بين هنا و لهيك و يجي بزاف للدزاير كي يجي مايروحش لدارهم يريح في دارنا و زيد كاين واحد فاميليا من بعيد بالصح صح تقدرو تقولو اخ يامات لي كانو خاوتي مراهقين و احنا بنات وحدنا اكو تعرفو الطفل كي يشوف روحو بدا يكبر و صوتو يخشان يحب يرجل كان السيد يروح يجيبم وين ما يكونو و يعرش و يعاون و نهار لي ما كناش نلقاو الماكلة كي كونا صغار و عماتي حجرو علينا مان يصرف علينا تقول ولادو دوك كي كبرو خاوتي هو عايش وحدو كاري و عندو حوانت تاع حوايج مالا ماخلاوهش يسكن وحدو سيرتو مور ما ياسمين خرجت مالدار، ماوليتش نحس روحي نقدر نعيش فيها معاهم هوما راهم مرتاحين هكا و انا مرتاحة في داري.
نهار السبت العشية عيطلي امين
-وي امين
-الو سلام هانو.. اي بالعقل ...واش راكي
-الحمد لله سوال عليك واش بيك ؟
-والو والو الحمد لله رانا عڨابها
-ربي يقدرك، خير امين
-يا ختي حبيت نجوز ندي دراري ادا تمديهملي
-وين تديهم
-اكي علابالك توحشناهم يما و بابا حبو يشوفوهم
-ايه ماشي مشكل، بالصح علاش ما جاوش مرحبا بيهم انا راني في دارنا تحب تجوزو مرحبا بيكم
-اه راكي فالدار، انا حسبت في دارك خلاص دوك ندور
-اوكي اني نستناكم
كي كوبيت صرالي le déclic, يماه و باباه عامبن جامي قالو توحشناهم جيبيهم نشوفوهم صح كانو يعيطو يسقسو ساعات بالصح ماشي لدرجة يجو يدوهم وزيد امبن وين يعرف داري ولا زعما او يهدر على دار هادي، ايه الله اعلم.
وجدت القهوة و القاطو انا و ختي و شديت خاوتي فالدار و لبست لولادي مسقم و ستنيتهم حتى عاودلي امين
-هانية ختي اني لتحت
-دقيقة دوك يحبط خويا يفتحلكم
-لالا بلا ما تشقو رواحكم غير نديهم و نروح
-بوه علاش جامع جوزو
-non تسمى مانيش وحدي منقدرش نريح
-اه داكوغ حسباتلي طاكا اي معاك خلاص دوك نحبطهملك بالصح ما طولش عليا تعيش بصك لازم ندخل للدار غدوة نصبح خدامة
-خلاص مالا ايا ارواحي نوصلك معانا و منها تشوفي يما و مور العشا نرجعكم
-ياخاه لالا يكثر خيرك و زيد راك مع الناس ما تصلحش
-هههه نورمال نليكيديهم الناس هادو علاجالك ايا ارواحي
-لالا والله ما نقدر شوف انا دوك شوية نبوجي للدار مع رضا و نبعتلك لوكاليزاسيون و انت ماطولش و جيبهملي
-خلاص على راحتك.
حبطهم رضا و جا قالي بلي لقاه وحدو فالطونوبيل قالو السيد بوجا يشري و يجي
انا تمتم وجدت روحي و داني رضا للدار جبت معايا العشا تسمى ما نطيبش خملت شوية و تبقت الحوايج و وجدتلهم كراطبهم لغدوة و ماكلتهم و بقيت نستنى فيهم جوايه التسعة صونالي الباب طليت لقيت امين رافد هنا و ايمن في زوج راقدين
فتحت الباب لقيتو قاضي قضيان عظيم مدهملي غير مالباب و راح
دخلت و حطيت و ستفت واش جاب بالصح عرفتو القضان تاعمن نعرف شكون لي يقضي هاكدا تاع يخليك ستة اشهر ما تشوفيش فالبيسري.
زادو جازو اليامات خطرة عيطلي نيميرو ما نعرفوش كي رفدت لقيتو هو
-وي الو
-وي بنتي
سكت ما لقيت ما نقولو، نكدب لوكان نقول ما يزعزعنيش صوتو، قد ما ندير باش نخرجو مي باقي عندو بلاصة في قلبي.
-هناي حبيبي واش راكي
-الحمد لله
-توحشت صوتك، توحشت نشوفك، تامنيني توحشت دموعك، dis moi que dois je faire, غبنتيني و الله غير غبنتيني و ما عرفتش واش لازم ندير معاك
-مالازم دير معايا والو هادي عيش حياتك كيما يساعدك و يريحك ياك ولادك نهار حبيت تشوفهم بعتهملك و يكثر خيرك على القضيان بالصح ماكانش لازم دير قالب و فيلم زعما خالك و مرتو...
-خفت تزكري فيا ما تخلينيش نشوفهم
-شوف نهار تزوجت بيك قتلك زوج شروط و شديت فيهم حتى نهار اللخر تاع زواجنا معلاباليش ادا تشفالهم
-ههه ما ندوس مع الناسا علاجالك ما نخليك تدوس مع الرجال علاجالي
-ايوه اك شافي
-شافي شافي على كلش نا تخافيش مازال ما كبرتش
-لالا ماشي الكبرلوكان جات فالكبر ماعليش بالصح هكا اكوتقول بلي انت درت واش درت و انت معمد لوكان نسيت بالاك نعدرك mais bon ...
- مانقدرش نفسرلك و علابالي بلي ماراحش تقدري تفهمي علاش درت واش درت و واشنو هوما الظروف لي بوساوني ندير هاكداك
- honnêtement  والله ما يهمني في ظروفك نعيا نقولك ربي لي يحاسب عالنيات انا من عندي نحاسبك على افعالك و اصلا cest pas notre sujet دوق
-هاه واشنوه le sujet لي راكي حايبة تحكي فيه احكي بنتي اني نسمع فيك
- كون مهني من جيهة ولادي عمري ماراح نحاسبك و لا نزيرك بيهم انا مادابيا ولادي يكبرو في جو باباهم و يماهم متقادرين و متفاهمين يعني وقت ما حبيت تشوفهم تلقاهم و عمري ما راح نكرهم فيك و لا نحرشهم عليك و مام النفقة ديالك يقدرني ربي نعيش ولادي ما يسحقو حتى واحد تبعت ما تبعتش بينك و بين مولاك.
-علابالي بنتي ماصلة علابالي و انا علاش نت.... عليك مالا
قد ما الكلمة لي قالها تاع كلام الشارع لي انا نعيفو بالصح والله غير تقول طفلة صغيرة كيفاش حسيت بيها غلغلت فيا ربي لي عالم (الجفافةالعاطفي واعر ).
-بالصح كاينة حاجة لوكان تغلط معاهم خطرة واحدة، بيني و بينك ازعفوشنف سب كيما تحب بالصح تغلط تاذيني فيهم خطرة واحدة والله يا هادي غير تحرم عليك شوفتهم و لا تسمع صوتهم مادامني حية.
-ماتسييش تهديني، ياك دوك كونا ملاح
-مانيش نهدد راني نانفورمي فيك برك و لالا ماناش ملاح راني نحطلك في شروط باش تعرف كيفاش راح تكون علاقتك مع ولادك
-ما فهمتش محسوب انتي تجيريني كيفاش تسير معاهم
-لالا تزقي عليهم ولا تربيهم و لا حتى تضربهم ضربة خفيفة هادو ولادك و رافدين اسمك ربي يساهل بينك و بينهم
-مالا واش زعما نغلط معاهم
-هادي انت impulsif فوق الحد و كي تزعف يروحلك العقل و ادا انت نسيت لحمي شاهد عليك، سمعتو كيفاش تنهد من قلبو، و نعرفك تتقلق ما تبردش لوكان ما تخلفش ضربتكمالا من دوك نوصيك كي تزعف مني ما تخلصهاش في ولادي بصك انت تيرد و تتكالما و تنسى بالصح انا وحق ما نزل على محمد ما ننسى و ما نمدلك اوكازيون وحدوخرا كلش كلش و ولادي لالا.
-و انتي علاش تزعفيني ؟! كي تعرفيني نتقلق و نخلف ضربتي علاش تلحقي روحك
-انا ما نلحقش روحي اك غالط انت لي ما تعرفش حدودك و تمد لروحك الحق في حاجة ما ولاتش رزقك
-رزقي رزقي و راسك غير رزقي اعطيني شوية وقت برك و كل حاجة تولي لبلاصتها, اني مخليك تتكالماي و يروحلك الزعاف و تلعبيها strong independent woman يامات و نرجعك لبلاصتك في عبوني ما تخافيش.
كلامو كان كالم و بالقصرة بالصح تحتو كان تهديد صريح و واضح تاع ماعندك وين تبوجي.
درت لروحي الكوراج و كملت نحكي مانحبش نوريلو ضعفي باش ما يطغاش
-المهم انا قلت لي عندي و انت دير واش يساعدك
-ماشي مشكل انتي هدرتي و انا سمعت، اسمعي هاد اليومين نجي نديهم حبيت نخرجو نشرولهم شوية حوايج و مونتوات قوليلي عندك شوفاش فالدار او دخل البرد و انتي تخرجي فيهم صباح ربي
-قريب نشري واحد و تحب تديهم قولي كي تكون جاي نبعتلك
-لالا انتي تجي معايا انا مانعرفش نخير
-سامحني ما نقدرش، بالصح نمدلك l'âge et la pointure ديالهم.
-خلاص ابعتيهملي دوك نشريلهم دوك و كي نجي نديهم نقيسلهم
-فوالا خلاص ايا تهلى في روحك
-هانية!!
-انعم دادي (قلتها بلا ما نجيب خبر )
-نحبك عمري
تسكجت، ضحك و كوبا.
بقيت ساكتة و غايسة انا لوقتاش يريح هاد الهم يخربلي في مخي لازملي مزير روحي شوية و نحبس التبهليل هادا و نزبطلو وجهي يالوكان نولي ما نريبونديلوش اصلا و لا حتى نعاود حياتي بالاك يفهم  بلي خلاص، هههه عجبتني الرجلة لي رجلتها و ياريتني ما خممتش يا ريتني بقيت نتزعزع بكلامو و كملت حياتي في هدوء....