☁️رحيق الأمل ☁️في غياهب اليأس وجدتني ✨

part 1🎀

فاش كانت عندي 18 عام تزوجت بدري كنت تعرفت عليه فالفيس بحكم خرجت من قرايتي قلت اللهم نضربها بتزويجة ولا نبقى لا خدمة لا قراية ونا مزلجة أصلا... راجلي صدق معايا ولد الناس وفى بكلمتو وتزوجني بصح وسكننا فمدينة بعيدة على دارهم وعلى دارنا، كان أقل ما يقال عنه ضريف وحنين والتعامل فوق المزيان والزوين ولي بغيتها تحضر، كايبغيني بعيوبي وماعمرو خسر ليا خاطري وخا أنا كنت مبرهشة ومراهقة ديال بصح وعيني زايغة وضاسرة ومادايرة ليه حساب يذخل بالنگير ويخرج بالنكد، ديما كنقارنو بخوه لي مشا حرگ البرا وكنقوليه كون غير حرگتي حتى نت وبدلتي حياتك وحياتي حتى أنا.... حتى حاجة مامقادة فحياتنا الزوجية والسباب أنا ومع ذلك يدير ليا الخاطر ويراري بيا ولكن الدحشة دحشة، كنمشي نغضب لدارنا ويغيب يخدمتو ويجي يشري ليا ويحزرني ويرجعني ونرجع نخرج بلا خبارو ونلبس لي يعصبو، ويجي يعتاذر ليا وخا أنا الغلطانة، ساليرو كولو كايخسرو عليا ولكن أنا كنت كنشوف بعييد وباغا حوايج فوق الشبعة وباغا نعيش حياة الأفلام بحال سامحيني والأفلام التركية والكورية والهندية... بااغا نسافر وندور وندير الصحابات ونذخلهم ونخرجهم وقتما بغيت وندير الصحاب، المهم مرضتو فحياتو و خرجت منو الشيب فالعشرينات، بعد قل من عام ديال الزواج والشبعة لي فيا طلقت، أيه طلقت من أحن إنسان ممكن للوحدة تعرفو فحياتها تجرجرنا فالمحاكم وماعمري نسى شوفتو فيا فآخر جلسة ونضرة خيبة الأمل لي وجهها ليا... رجعت لدارنا و دارت بيا الدنيا وضاقو عليا الحيوط وتحنسرت ديال بصح، فالأسابيع الأولى ديال الطلاق وصلاتني الخبار بلي بدل الدار وحتى نمرتو وكونتاتو بدلهم وغبر... مابقى حتى تواصل بيني وبينو ولا خبار
دازت عليا خمس سنين بحال لا ماكنتش عايشاها بحال إلى غير كنت شبه حية فالدنيا عايشة النهار بنهارو حتى حاجة مامميزة حتى للسنوات الأخيرة عاد جمعت راسي شوية من بعد ما ضربات بيا الدنيا ولقيت بلي فرطت فعيشة الهنا وراحة البال والسند.... درت الفندقة حيث هادشي لي كان داير راجلي قبل قريت بالضبط شاف كويزين وشديت ديبلوم ومالقيتش خدمة بحكم المدينة لي كانو فيها واليديا صغيرة ومافيهاش الخدمة..... هضرة تجيب هضرة بنت جيراننا كانت تقبلات كموضفة فواحد الشركة فالمدينة لي كنا ساكنين فيها أنا وراجلي قبل وكان خاصها مع من تكري، قلت ليها جابك الله حتى أنا باغا نمشي نقلب على راسي..
ديرو vote✨