☁️رحيق الأمل ☁️في غياهب اليأس وجدتني ✨

part 3 🎀

الجزء الثالث ❤️
ومع ذلك قلت غير صدفة خصوصا أنني كنفكر فيه بزاف من لي حطيت رجلي فهاد المدينة، قلبتها فعقلي وبديت كنفكر فالسيڤي ديالي وواش يشوفو فيه وسط دوك السيڤيات ولا لا أصلا وخا كلشي درتو فيه مقاد من التصويرة للمعلومات لكلشي... دزت لريسطو آخر، مشطت الدنيا كلها ورجعت للدار فالليل وقبل ما نعس طليت على الجيمايل ديالي لعل وعسى نلقى شي حد قبلني ويافرحتي غوتت فاش لقيت واحد من الريسطوريا طلبو مني نحضر عندهم الغد ليه زعرت أحسن تزغريتة عندي وعنقت البنت لي معايا ومانعستش من الفرحة أخيرا شي حاجة كتفرح من مدة طويلة هادي فحياتي، أخيرا غانولي خدامة بحال الناس ونشد صاليري بداية كل شهر....

بكل فرحة عندي مشيت الغد ليه فالموعد لي طلبو مني ونا غا ضرسة العقل هي لي مزال مابانتش ليا من كثرة الضحكة وصلت جوايه الستة ديال العشية كيما علموني تماما ذخلت ولقيت البنت فالإستقبال مشات معايا أنا وبنت أخرى لذاخل لاكويزين وكي ذخلت بانت ليا واحد لالة مولاتي روينة منها ماكان الماعن بقا ليهم غا لسقف لي مزال ما وصلوهمش الكيسان منشورين فالدنيا والفراشط والمعالق مشتتين فكل قنت قلت إحسن عوان لي غا يغسل هادشي كولو، فيقاتني من السرحة البنت لي مدات لينا اللبسة ديال الفام دميناج وقالت لينا وحدة فيكم ها باش تبدا وهاشنو توخر وفاش تسالي ويخرج كلشي فاللخر ديال السيرڤيس غاتسيق الكوزينة كلها وتسالي لي عليها قبل ما نسدو مع 1، بقيت غا حالة فمي فيها وحسيت بداك الريسطو كولو دار بيا بحال شي زلزال ضرب، وكملاتها وقالت ولا فالصباح التالي غاتجي مع 7 وتسيق الريسطو من الفوق للتحت وتقاد الطبالي وتسيق التواليطات وطاطاطاطا، قالت لينا ختارو كل وحدة يا تخدمي فالعشية من 7 للوحدة دالليل، يا تخدمي فالصباح من 8 للجوج دالنهار، إلى ما تافقتوش غانوزعو عليكم حنا.... نقزات البنت الثانية قالت ليها أنا ما يصلاحش ليا الليل واليديا ما يقبلوش ليا غانختار الفترة الصباحية، قلت ليها ياكي أختي ونا ما علياش الله، نقزات بنت لاكيس قالت لي هي هضرات الأولى إذن الأسبقية ليها وإلى ما عجبكش الحال تقدري تمشي نعيطو على غيرك... سربيت بالهضرة وقلت ليها لا صافي اللهم العمش ولا العمى تافقنا على الصالير لي غايولي يدوز ليا فكونط فالبنكة لي مزال ما عنديش أصلا... مدات لينا شي وراق نسنيو عليهم كانت قادات فيهم معلوماتنا من لاكارط ناسيونال لوقت الخدمة للصالير لأدق التفاصيل ومگاليزية من الفوق باش حد ما يدير لا هاه ولا هاه وفيه شروط وقوانين زجرية غاتطبق علينا لا تودرات ولا طرات أي حاجة فالريسطو وهو فمسؤوليتنا من بعد ما عطات نسخة ديال الساروت ليا وللبنت الثانية وهادشي كولو مول شي مزال ما شفتو ولا بان وخا عليه الأمان...من بعد داك الحزم لي شفتو وداك الإلتزام كولو قلت فراسي مول الريسطو غالبا شي شارف كبير مدوز الدق فالحياة وما تخفى عليه ولا تغيب حاجة... شديت اللبسة ديال فام دميناج مشيت لبستها وجاتني كبيرة گفطت يديها وخرجت كنشوف فالحريرة لي تابعاني،
ما وصلات الوحدة حتى يديا طابو بجافيل والحكان، سيقت الكوزينة ودزت للاپوبيل والتواليطات وحالتي كلي فزگت كلشي مشى تقريبا بقا غير الدري لي فلاكيس من بعد ما مشات البنت كيشوف فلوس السلعة وداكشي ماجيت نخرج من التواليطات حتى جبت الربحة فالأرض ونضت كنكمد عضيماتي كليتها الدبة وماجيت نخرج غير على واحد الطولة
توصلني لكمالا نحطها ليكم ❤️