الشوق لِك مَخلوق في قَلب وعيون ‏والحِب لِك مَزروع بين الحَنَايَا

بارت 1

البدايه من وسط نجد العذيه مابين زحمه المدينة وصخب السيارات بأقصى الرياض هناك قريه هاديه جداً وبيوتها تنعد على الأصابع اشرقت الشمس على قريه ينتشر السلام بين الآخرين وتنتشر البسمه على الوجوه ويبدا صباحهم بسرور

نجي لبيت ابو نواف
كان الصباح يشرح الصدر وهم مجتمعين على السفر وكان الكل تعتلي وجوههم السعاده
واهم شي مناقره هاني وعبير
عبير: يبه حبيبي طلبتك قول تم تكفى
ابو نواف: تم وابشري وسمي وش تبين بس؟
تعلقت عبير بذراعه وتكلمت وهي تناظر اخوانها عبير: تكفى يبه اليوم عازميني بنات ابو سامي وامي راحت لجارتنا وهي ماعندها بنات قول لـ هاني أو نواف يودوني هنا طفش مافيه احد عندي وانت بتطلع لشغلك خليهم يودوني بطريقهم وش رايك يبه عيالك يطلعون ويستانسون وانا هنا اقابل اربع جدران يرضيك؟ بقق نواف عيونه وقال: الحين حنا نقوم مع صباح الله خير وحالتنا حاله وتعبانين ونروح غصب عنا لدكان ونجلس لين الظهر والشمس تحرقنا وتجين انتي وتقولين يستانسون
كمل هاني وقال:وين الوناسه اللي تقولين عنها لنا اكثر من 15 سنه وحنا ماشفناها
ناظرت عبير ابوها بدموع: يبه انا تعبت وانا اجلس لحالي ماصدقت احد يجي اتعرفه عليه ماحد يحس فيني انا تعبت وانا اقابل اربع جدران مابي اقعد لحالي كانت عبير تعاني من الوحده صح اخوانها مايرفضون لها طلب لكن حب الأخت غير
فزو هاني ونواف عندها وهم كانو يمزحون ماهم مصدقين ان عبير اللي دايم تتضارب معهم تبكي على اتفه سبب وقال نواف:عبور حبيبتي حنا نمزح والله نوديك لو حافين بس خلاص لاتبكين وإذ ودك احد يسليك فالبيت هنا خلاص محلوله نزوج هاني ويسكن عندنا
رفسه هاني وقال: لايشخ ماصدقت يجي الوقت اللي تفتك مني فيه معصي ياحبيبي انت اكبر مني يعني انت تزوج الله اكبر قال ايش قال هاني يتزوج قال أبو نواف:ماباقي غير تتهاوشون قدامي
كلهم: محشوم يبه
أبو نواف مسك كتوف عبير وقال:لايبوك لاتبكين وتنزلين دموعك تراها غاليه وانا والله الحين اوديك بنفسي واي شي تبينه قولي للكلاب اللي وراك وخليهم بس يقولون لا
حضنت عبير ابوها وقالت:الله لا يحرمني منك يبه وانا الحين بلم السفره وتجهز وروح معك مابي اروح مع الكلاب ذولا على قولتك
طلع الكل على شغله وراحت عبير عند بنات ابو سامي وهم قلوبهم صافيه على بعض ومستحيل يمر يوم بدون مناقره بعض

في بيت ابو سامي
كانو كلهم مجتمعين على السفر قال ابو سامي: سامي امش معي لسوق خلنا نفتح دكانا وانت ياوسيم تشوف وش ناقص على البيت وتمر الدكان وتجيب اللي ناقص وتروح العزبه وتشوف الحلال وتمر ابو نواف وتقوله تعال العصر تسمع ولا اعيد كلامي مره ثانيه
وسيم:اسمع يبه اسمع بس وش له اكلم أبو نواف رفع صوته ابو سامي وقال:وش لك به انت سو اللي عليك وانت ساكت قال سامي بعد صمت طويل:يبه انت بلعاده تخلي ورعان الحاره يكلمونه بس مدامك قلت مره وخله يجي العصر اكيد فيه شي مهم وش هو؟
قال أبو سامي بعصبيه:انت وش عليك به عندنا موضوع مهم ويلا امش على شغلك انت وياه
قال وسيم وهو يبتسم طيف ابتسامه: خلاص روحو انتو وانا بأخذ الاغراض الناقصه وروح اجيبها صد ابوه عنه وطلع هو وسامي
قال وسيم وهو مستعجل:يلا سريع ابوي لايجي وانا ماروحت والله يخليني ارقد الليله عند الغنم
ضحكت اريام وقالت: هههههههههههه والله تجي على ابوي
قالت حنان وهي تكتب:وسيم روح شوف السكر يكفي الشهر ذا ولا لا وانتي يا اريام روحي لسطح ونظفيه بيجونا ضيوف بسرعه
راح وسيم المطبخ وحنان كانت على الورقه تكتب وش ناقص على البيت دق الباب راحت حنان وفتحت الباب لقتها عبير قالت حنان:هلا عبور الحمدلله جيتي يلا تعالي عاد امس حظك فنانك المفضل نزل له اغنيه جديده الحقي عليها ضحكت عبير وقالت:يلا زين بنزل عبايتي وارقص لك رقص يحبه قلبك وانتي يلا هاتي الراديو نزلت عبير عباتها ودخلت الحمام تشوف نفسه بالمرايه المكسوره ماباقي إلا القليل منها وراحت حنان تدور الراديو فالسطح
طلع وسيم الحوش يدور حنان لان السكر باقي شويه مو كثير دورها مالقاها جاء بيطلع إلا البنت تطلع في وجهه شهقت عبير ورجعت دخلت الحمام طلع وسيم الحوش وهو باقي مخلوع منها اخذ الورقه وطلع وهو معرق اول مره يصير معه موقف كذا في حياته كلها

عند عبير رجعت الحمام وهي مخلوعه وجهه حمر من الخوف ياربي ابك هذا مين يارب مايقول لاخواني والله ينحروني افف مني ليتني رحت مع امي كان ابرك لي افف عبير صحصحي شويه ياربي هذا مين وش اللي جابه هنا
رجعت حنان من السطح وراحت للحوش ونزلت الراديو ونادت اريام تجيب القهوه وراحت تدق الباب على عبير :عبور ابك انتي وينك لك ساعه فالحمام اطلعي بسرعه جهزنا الجلسه والقهوه ناقصنا انتي بسرعه اخلصي علينا شغلت عبير الكباس وقالت: يلا دقايق وطالعه بس شوفي لي الدرب فيه احد ولا اطلع تذكرت حنان أن وسيم فيه وقالت:اصبري دقائق بشوف وسيم طلع ولا باقي لاتطلعين لين اقول لك
عند عبير يعني اللي شافني هو وسيم يارب مايقول لاخواني وابوي ابك انا وش سويت بنفسي
رجعت حنان وقالت:عبور خلاص اطلعي مافيه احد لاتفوتك الاغنيه تجنن عاد اعرفك انك تعشقين اغانيه لو انها بايخه
طلعت عبير وقالت: عاد حمودي اغانيه ماتنتفوت لا تلوموني في حبي له والله عاد أنه سيد الرجال هو واغانيه
حنان:يلا امشي الوقت راح طلعو البنات للحوش وشغلو الراديو على اغنيه محمد بن غرمان وعبير كل شويه قائمه ترقص لهم لين إذن الظهر وكل واحد رجع لبيته وتسكرت الدكاكين والكل راح يريح له شويه من التعب والجهد لين بعد العصر
بيت ابو نواف رجع كل واحد منهم وجهزت عبير الغداء وقاعدة تنادي:هنوووو وصمخ تعال خذ الغداء جاء هاني وصفقها على رأسها وقال:الحين هذا اسم تنادين واحد خاط الشنب في وجهه مسكت عبير رأسها بالم:يد تيس مو يد انسان اقول بس خذ الغداء ولا يكثر قبل اعلم ابوي يقص يدك لك ياتيس أخذ هاني الغداء وقال:اقول جيبي الشطه معك ولا يكثر
اجتمع الكل على السفره البسيطه وبينهم صحن فيه رز وعليه دجاج والشطه تنتقل بين الكل رغم بساطه السفره إلا انهم فرحانين انهم مجتمعين وام نواف كل شويه تحصنهم في قلبها وتدعي أن الله لا يفرقهم

انتهى.
عطوني رايكم🤍.