اي اني تعبان مختنك من كل شي ..من الهوى الي بصدري كل شي يوجع حتى النفس يحرك
احس الدنيا ...اخذتني .بعيد ورجعتني بس وين رجعت ماعرف ..وين رحت هم مادري ..
كعدت ع اركبي ..
اريد ارتاح حالي من حال الناس ارتاح واعيش لشوكت ابقى هيج داخل صراع ماعرف اولة من تاليه ..
رفعت راسي
هوى حار...اعاين ..ظلام ..ودليله الله ..
وين تاليتك ابو شيبه
تندفن هنا ؟
لو حتى كبر ماكو الك ..
اكو بصدري ..حجي ماينحجي
مو شغله عشك ..شغله حياه ماعرف شنو بيها اني
مختاريت شي بيها ..
كل شي ..بيها مو عدل حتى اني ..
مو عدل ..
الكاع حارة تجوي ..
بس مو جسمي الي يحرك
لا هاي روحي الي تسعر نار ..
ماعرف شنو اريدة
ولا ردت شي وصار عدل بحياتي
نزلت للكاع ..
خليت خدي عليها ..
اخذت نفس عميق
وكتمتة بروحي ..
عمت عيني عليك ياخوي ..
نايم ع التربان ..
وشبقى بيك التراب ..وحرارة عمت عيوني عليك ..
اسمع صوت من بعيد ابو شييييبه وينك
كمت عدلت روحي ...
وكفت ..
عدلت روحي ونفضت هدومي ..
واكو دمعه بعيوني منزلت ..بس ..بللت عيوني
مسحتها ..
ووكفت الضوى قرب مني
ها عبوس ..
كال ..ولك شجاي تسوي هنا ..
كتله هيج داستطلاع ..
كال انت عاقل لو مخبل ..
ضحكت ..ورحت قريب يمه
جان يضوي ..داير مداير المكان بلايت ..
كال امشي ..يمعود ..
لا يطلعك احد هنا ..
جا ماشايفهم كلها قناصه بكل زاغور واوي
ههههه دمشي ..
رحت ..طبينه بلخيمه
كعدت بالكاع
كتله شنو الجاي
كال ..مابقى شي هانت
كم جريدي نصيدة وخلص ..
هنااا الحرب جانت حاسمه وقوية ..
مرات الاعلام يضلمنا ومرات ينصفنا ..
الموصل ..
اخ يالعراق شبقيت بينا
ومنو بقى
دائما ارددها وترن براسي
نموت نموت ويحيا الوطن ..
ياااوطن بالله..عليك
اخاف بيوم نموت كلنا ..
وانت تحيى وحدك ..
بس المن..؟؟
هنا ..النهايه ..وتريد حييل
ذبيت حمولي كلها ..
وشديت رايه العباس ..
وتوزرت بهمه ابو الحسنين
وجنت اطب بكل درب بكل شبر بي الموت
بس هجي الاوي الموت انه وربعي
نريد انصر
مارنرد اذا موويانه النصر
وصلنا
نحرر الساحل الايمن ..
الساحل الايمن بيوته وشوراعه اشبهه بمناطق
الفضل وباب الشيخ
جان كلش صعب الترجل بيها
لان بكل زاويه اكو فخ بيها ..
وبيها اهالي ..
لكن ..
قانون ..ويسري ع الكل
الحرب لا تعرف الضحايا ..
هنا داعش ..
كام يستغل الناس العزل
ويدخل الهم ..لبيواهم ويجبرهم ع البقاء
ماعدا ..
اذا عدهم زلم هواي يقتل منهم
حتى يسيطر اكثر ..
ويبقى داخل البيت ..
هواي مواقف بقت براسي صعب انساها
وذكريات ..مرعبة صعب اتناساها ..
وصعب النوم وياها
كابووووس ...واعيش بداخله
اصوات اهالي اطفال ..
اعداء براسي ...
صريخ ..نحيب امهات ..ويايه عايش
سجن ..واني سجنت روحي بي
حتى بنومي مامرتاح
جبت عمري كلة مامرتاح
اصدقاء احباب
يرحون وميرجعون
ذبح قتل .دم .
يتفنن داعش باساليب القتل
داعش بنهايته
استخدم كل اسلحته وكل قوته ..
حتى يرجع يسيطر من جديد
لكن بد.ن جدوى
الجيش العراقي الي فرض نفسه وسيطر
وحرر مكان بعد مكان ..
ويوميه ..تنداس وتنزل راية داعش
ويصعد علم العراق وعلم ابا الاحرار يرفف
بكل مكان سبق احتله داعش ..
ريحه العفن والموت والبارود
تارسه المكان
حتى لون السما يختلف
احمر وبي سواد
بسبب القصف ..او الموت ..
مادري ..
بهاي الارض اكو مجازر صارت
جمووع من البشر انقتلو واندفنو بيها
نساء انهتكت اعراضها بوحشية ..
اطفال ورجال وشيوخ تعذبو ..
بمسمى الدوله الاسلاميه
جنت اسال نفسي معقوله ..راح ترجع ويرجعون الها
اهلها وتنفتح اسواقها وشوارعها ..
؟؟؟؟
