Christmas Pops

🎈البــدايــة🎈

🎈في الماضي .. بعد أسبوع من ليلة الاعـ.تداء🎈

نفس الإضائة المنخفضة .. نفس صوت الخشب كيتحرق فالشوميني .. نفس ريحة الشاي المهدئ .. نفس الشمعة .. نفس الكرسي الجلدي .. و نفس الكتف الدافي حاط عليه راسو ..

كلشي كان نفسو .. إلا هي .. كانت مختلفة .. قبل أسبوع كانت بحال شي وردة ناعمة متفتحة .. و لكن دابا ذبلات .. عينيها طفاو .. جلدتها بهاتت .. وزنها نقص و الهالات ضارو بعينيها .. مزال آثار كدمات زرقين على ذقنها و الجرحة لي فجنب شفايفها كانت واضحة ..

كان جالس فحجرها و هي شادة كتاب بيدها .. كتاب على غلافو صورة لسانتا جالس وسط الثلج بالليل و قرعة الشراب فيدو .. عنوانو "Drunken Santa" ( سانتا الثمل ) .. كتاب بربعة القصص مختلفة .. فربعة الدول مختلفة .. و بربعة الظروف مختلفة .. حاجة وحدة لي كتجمعهم .. أنهم وقعو فالكريسماس .. و كيتعاودو بلسان سانتا سكران ..

- ( كتقرا بشوية فآخر الأسطر فآخر صفحات القصة الثالثة ) و لكن ايڤا .. فهمات بلي الأماني كتطلبش .. الأماني كااانخدمو عليها وكنحققوها .. بالصبر .. و الإصرار .. و التضحية .. واخا يستدعي الأمر على رأس تلة ثلجية .. تبغي راجلها كل نهار .. أسهل من أنها تطلب أمنية من سانتا سكران ..

سكتات و سدات الكتاب .. كريس شاف فيها هاز حجبانو بدهشة ..

كريس: صافي القصة سالات!!!

بابتسامة حنينة حركات راسها بآه ..

كريس: ( خدا منها الكتاب شادو كيقلب صفحاتو ) يعني دانييل هو راجل إيڤا !!!!!

- ( بدات كتدوز يدها على شعرو ) آه ..

كريس: ( باستفهام ) و لكن!! كيفاش؟؟؟ ياك هي قالت بلي راجلها ما.ت هو و ولدها ؟؟!!! ( شاف فيها ) كدبات؟؟

- ( حركات راسها بلا ) لا أحبيبي.. بعض المرات.. المو.ت ماشي هو ملي كتخرج روحنا منا و نتدفنو تحت التراب ..

كريس: ( بارتباك طفولي ) مافهمتش!

- بعض المرات كنمو.تو واخا حنا حيين .. كنتنفسو .. كناكلو .. كنعسو .. كنهضرو و نبتسمو و يمكن نغنيو .. كنحسو بالثلج و كنشمو ريحة الورد .. و لكن .. واخا هاكاك مكنتسماوش عايشين ..

صوتها كان فيه بزاف ديال الألم حيت كانت كتهضر على راسها .. فعينيها كان بؤس كبير ماقادراش تخبيه .. و كريس كان ولد صغير ماقادرش يشوفو .. عند راسو أن ماماه ولات بيخير و أن الكابوس سالا هاديك الليلة .. ماكانش عارف أن ماماه مزال عايشة فهاداك الكابوس .. هادوك المشاعر مزال كينفجرو فيها فكل ثانية .. شعور الضعف و التقزز و الخوف و الكراهية .. هي مزال كتشم ريحة الوحش فلحمها و كتحس بيديه مزال كيقيسوها .. كتحس بسخونية أنفاسو المقززة فوجهها .. كتسمع صوتو فودنيها و قلبها كيتقطع بوحشية ..