كريس بقا كيشوف فيها بصدمة! هو غير قبل ساعات خلاها فالدار .. كيفاش يلقاها دابا فالفرقة ديالو؟ و علاش مافراسو والو؟؟
قرن حجبانو .. هو أصلا معصب داكشي علاش انفجر بلاما يحس و هو كيشوف فهاورد ..كريس: sir .. (سيدي) أنا عارف بلي عندك الصلاحيات تزيد و تنقص لي بغيتي فالتيم ديالي .. و لكن راه أنا هو الرئيس ديال هاد الفرقة و خاصني نعرف قبلما تتبدل أي حاجة فيها .. راك هاكا كتخربق ليا خدمتي كلها ..
جورج .. آنخيل .. روبرت و ستيڤ حسو بالتوتر فالجو و كلهم تقادو فالجلسة..
هاورد: ( قرن حجبانو ) أشمن خدمة كتهضر عليها؟؟ راه كوون كنتو كتديرو شي خدمة ماكنتش غانكون مضطر أنني نتدخل .. ( ضرپ بيدو على الطابلة و كلهم حدرو ريوسهم إلا كريس لي بقا كيشوف ليه فعينيه ) شهر و نص دابا و كل سيمانة كيطيح ولد مڨتول و ماقادرين تديرو والو! مزال مالقيتو حتى راس خيط!! ( مكمل بانفعال ) واش عارف شحال ديال ليزابيل كيجيوني فالنهار بسبب الفشل ديالكم .. ( أشار ليه بسبابتو ) ديالك نتا أكريس نتااا ..
زير كريس على قبضات يديه و سنانو .. هو كيتقبل هاد الهضرة من عند الصحافة و الشعب حيت مكيفهموش فخدمتهم و ماعارفين والو و لكن ماقدرش يتقبلها من عند الرئيس لي كيشووف شحال كانو دايرين جهدهم فالملف .. و لكن ماقدرش يجاوبو واخا عندو باش ..
هاورد: ( مكمل معصب ) الصحافة كتضغط علينا و الرأي العام حتى هو .. الجمعيات و عائلات الضحايا .. و حنا ماعندنا و لو حتى معلومة صغييييرة نبانو بيها أننا درنا شي تقدم .. ماكاين واااالو .. ولينا ضحكة قدام كلللشي .. حتى الملكة براااسها .. غاتكون سمعتي الخطاب ديالها و شفتيها كتواعد الشعب أن البوليس غايلقاو المجرم فأقرب وقت .. فين هو؟؟؟ همم؟ قول ليا واش لقيتي شي حاجة لي تخليني نهز يدي و نخليك تتكلف بوحدك بهادشي؟؟
كريس: ( تحنى شد على الطابلة و نطق بانفعال مقاطعو بلاما يفكر ) لقيييت .. لقيتو هو برااااسو .. هاداك الڨتال المسسسخ ولد الڨحححبةة .. لقييتو ..
توسعو عيون هاورد و المحققين كلهم شافو جهة كريس .. و حتى شاف كيفاش كيشوفو فيه عاد وعى بشنو قال ..
هاورد: كيفاش .. كيفاش لقيتيه؟؟!!
جرات كايلا الكرسي و جلسات حتى هي كتشوف فكريس مدهوشة و كتتسنى الجواب ديالو ..
كريس مسح على وجهو بيدو .. حس بيدو كترعش باغي يجبد بيها گارو يكميه باش يتكالما و لكن ماقدرش .. بلع ريقو كينهج .. كان متوتر .. لأول مرة فحياتو كلها و بعد سنين طوييلة كيحس بالخوف .. شعور قوي كيرعد صدرو و قلبو لداخل .. بلاما يكون متأكد من السبب .. آه عارف راسو غلط .. و لكن هادي ماشي أول مرة .. هو فمسيرتو كمحقق دار بزاااف ديال الأخطاء لي كبر من هادي .. تعاقب شحال من مرة و كان غايخسر خدمتو شحال من مرة .. و لكن هادي بشي طريقة من الطرق كانت مختلفة .. الإحساس كان مختلف .. كيحس براسو غاينهار .. كيحس براسو كيحماق ..
أنت تقرأ
Christmas Pops
Misterio / Suspensoصوت التهراس كان برا و لكن أنا حسيت بيه فيا لداخل .. فهاديك الليلة .. ماشي الطباسل ولا الكيسان لي تهرسو إنما أنا .. فهاديك الليلة .. تقيدو يدي بأصفاد العجز و ودعت الحرية .. تحبست فيا .. فهاديك الليلة .. مـ.ت و جسدي الصغير كان هو قبري المظلم و البارد...