You & I *2* ( Chadi & Ikram )

الحلقة 2: صُــدْفَـة....🧡

« هو شخص واحد... جعلني أومن بالصدف...»

🧡🧡🧡

✨ بعد ثلاث سنوات✨

الحياة زوينة بزاف... و لكن عينينا كيشوفوها فانعكاسات روحنا... داكشي علاش ملي كيكون الداخل ديالنا خايب كنشوفوها خايبة... و ملي كنقول الداخل ديالنا خايب مكنقصدش أننا ناس مامزيانينش... كنقصد بلي الظروف و المشاكل شوهونا... خلاونا نحسو بحوايج خايبين لداخل... و بهاد الحوايج ولينا كنشوفو الدنيا... ملي كنتجرحو جروحنا كيوليو يبانو لينا فكلشي... و كلشي كيولي يبان لينا خايب... بحالهم... و بحالي أنا دابا... واقفة فواحد البالكون زوين... مقابلة مع منظر الشمس و هي كتغرب ورا البحر... ألوان السما منعكسين على سطح الماء... الليموني و الوردي و البنفسجي معانقين و كيرقصو فالسما و البحر... الهواء الصيفي دافي... كلشي زوين... و لكن بعيني أنا كان....... عادي... بارد... مكيفرحش...

صوت تيليفوني كيصوني... كان محطوط ورايا فوق الطابلة مع البيسي ديالي لي محلول و التشيبس لي فالزلافة... هزيتو و كانت آبيل فالواتساب من مونية و روزا... جاوبت و درت السبيكر و تطلق صوت مونية و هي كتسب بالاسبانية معصبة...
مانحتاجش نسولها باش نعرفها فاللوطو كتسوق...

مونية: ( تنهدات ) هانا... يالاه خرجت من الخدمة...

روزا: تعطلتي اليوم...

مونية: إوا داك الكلب شدنا تاني... عصصبني مكيساليييش بزز باش طلقنا... هزيت تيليفوني نصوني عليكم لقيت ميساج من عند ختي بغاتني نمشي نجيبها من عند صاحبتها... كنقول ليها راني عيااانة و وااالو مكتفهمش... هاني غادية عندها... و مزااال تاني خاصني نمشي مع ماما تتقدا...

- ( هزيت الزلافة درتها على حجري ) هادشي علاش قلت ليك ماتديريش البيرمي...

روزا: إكرام جيتي!!

مونية: دخلتك للابيل غير على الله... قلت ملي غايجيو عندها دارهم ماغاديش تقدر تهضر...

- ( درت تشيبس ففمي ) مزال ماجاوش...

روزا: ياك قلتي اليوم غايدوزو عليك و تطلعو للشمال؟

- ( سرحت رجلي على الكرسي لي حدايا ) إوا خالتي جات عندهم داكشي علاش أجلو السفر... قالت ليا ماما نشد الكار و نرجع للدار قلت ليها لا... عام و أنا معتكفة على الكتوبة باش ملي يجي الصيف نسافر ماشي باش نرجع للدار نتصادع مع ولاد خالتي... ( تنهدت ) حتى تمشي على خاطرها و يجيو يهزوني و نطلعو للشمال...

مونية: و شحال غاتبقا؟

- و شكون عرف؟ على الأكثر سيمانة...