« كنت أبحث عن النسيان... فتعثرت بك... مجددا... »
♥♥♥
✨POV: IKRAM.✨
الغلط ديالي... أنا لي ماقلتش ليه بسلامة... ماقلتش الوداع... أنني نهبط من هادوك الدروج بلاما نودعو تماااما بحال أنني نخلي قصة فالنص و نكتب "يتبع" فاللخر... حيت ضروري الدنيا غاتعاود تلاقيني بيه باش نكملو فين خليناها... كون سلمت عليه هادي تلت سنين و قلت ليه "بسلامة" ماكناش غانعاودو نتلاقاو... ماكنتش غانتصدم بيه هاكا قدامي... و ماكانش غايشوفني و أنا فهاد الحالة...
أنا عندي جوج أسئلة و ماعرفتش شكون نسول داكشي علاش غانسولكم و نتوما جاوبوني...
السؤال اللول: علاش ديما ملي كنتلاقا معاه من بعد فراق طويل كاتكون حالتي تشفي العدو؟! إما فازگة بالشتا بحال شي قط متشرد... ولا بحوايج البراهش حدا صاحبتو لي كيف شي المودل... ولا هاكا... بحوايج النعاس... شعري مطلوق و كامل مشعكك... عيني و وجهي منفوخين بالنعاس... معمشة... بتريكو بابا الكبير لي سرقت ليه قبلما نسافر... و بشورط طويل حمر كبر مني ماعرفتوش منين جاني... و شوفوه هو... نقي بحال ديما... مرتب بحال ديما... ريحتو زوينة بحال ديما... فينما تلاقينا كايكون هاكا... و فينما تلاقينا... أنا لي كنخسر...
و السؤال الثاني: علاش الحياة ديما كتصدمني بيه؟ ماكتعطينيش تلميحات... مكتضرپش ليا معاه موعد و تخليني نوجد ليه راسي... كتحطو قدامي فأكثر الأوقات لي أنا مامتوقعاهش فيهم... فالبلايص لي عقلي مآمن بلي مستحيل يوصل ليهم... كيكونو دفاعاتي هابطين و ماكانكونش مستعدة لأي هجوم... حتى كنلقا راسي فجأة وسط الحرپ و العدو على بعد خطوة وحدة مني... سيفو محطوط على رقبتي... و عندي غير ثواني قلال باش نقرر... واش نتقاتل باش نعيش... ولا نستسلم للمو.ت...
فهاد الحالة كان خاصني نعرف شنو ندير... نتراجع و نخرج من هاد الصالون و نمشي لبيتي و نسد عليا... ولا نخرج من هاد الصالون و نمشي لباب الدار و نخرج منها كاملة فمرة و مانعاودش نرجع...
و لكن... فهاد لحظة الجبن و الضعف و أنا كنفكر فالانسحاب و الهروب... دازت من بالي آخر هضرة قلنا لبعضياتنا... و الوعود لي عطيت لراسي و أنا كنبعد عليه... علاش غانهرب منو؟ ياك تفارقنا بحالا مكنعنيو لبعضياتنا حتى حاجة؟ يعني هادا لي واقف قدامي غير واحد الإكس عادي... مابقا بيني و بينو والو... علاش نبين ليه أنني مزال مهتمة و هازاه فراسي؟ داكشي لي بيني و بينو سالا شحااال هادي... خمس سنين دازت على فراقنا... و ملي تلاقينا هادي تلت سنين بكيت قدامو بحال شي برهوشة ماقادراش تعيش بلا بيه... بينت ليه الضعف فالأخير قمعني و خسرت... غلط مستحيل نعاودو... حيت قادرة نعيش بلا بيه... و عشت بلا بيه... ماشي غير هو لي قادر يتجاوز و يعيش حياتو بحالا ماعمرنا كنا... حتى أنا قادرة... و حتى إيلا كان هادشي كدوب ماعنديش مشكل نكدب و نمثل المهم هو مانخسرت قدامو... مرة أخرى...
أنت تقرأ
You & I *2* ( Chadi & Ikram )
Historia Cortaكنتفارقو... و كنعاودو نتلاقاو... كنحاول نرسم طريقي بعيد عليك... و بشي طريقة من الطرق كتعاود طريقي تتقاطع مع طريقك... فراق ورا فراق... جرح ورا جرح... صدفة ورا صدفة... كنزيد نعرف راسي... كنزيد نعرفك... و كنزيد نستوعب داكشي لي بيني و بينك شحال كبير...
